Fïlîpe 4 - Mbëtï Ndjapä: TÄFO MADƗ̈

¹ Arə̂mâ ndə̂ mê ndə̂ më nyîndə̂ nyê tə̂ gbölösə̂nə̈, më wä la gʉ ndə̂kə̂ ka wun nyê! Më wä la mômô lə̂ köbosə̂ nyê ânyë tə̂ mê krâ tə̂ gbölösə̂nə̈! Käko arə̂mâ ndə̂ mê ndə̂ më nyîndə̂ nyê tə̂ gbölösə̂nə̈, äwäpä nyë kpokpo tə̂ nyê lə̂ köbosə̂ nə̈ ndə̂ nyë wâ balë la Gbölö Gbïɛ̈.

Adɨ̂ apö

² Më zä wängö sə̈ Evodï la Sɛ̈ntîche ndə̂kə̂ pa andjë djetə̂ andjê lə̂ gbâtə̂ andjê bëte rə̂ ndə̂ andjë wâ balë la Gbölö Gbïɛ̈.

³ Momö ndjë gbɛ̂, mo də̈ ngâ mê djîrə̂ earə̂ kua, më yükû nə̈ sə̈ mö ndə̂kə̂ pa mo za könô sə̈ andjê, bëte andjë zä könô sə̈ mê lə̂ kua ndə̂kə̂ mu Tchôtchô Pö sə̈ azü, andjendjê la Kelemän la adɨ̂ angâ mê a-earə̂ kua ndə̂ a mbô rə̈ andjê bhâlə̂ mbëtï ndə̂ tchîsûwu ndə̂ logbɛ̂ logbɛ̂.

⁴ Nyë wä la mômô logbɛ̂ lə̂ köbosə̂ nə̈ ndə̂ nyë wâ balë la Gbölö Gbïɛ̈. Më kä tô rə̂ sə̂ nyê: Nyë wä la mômô logbɛ̂!

⁵ Äwäpä azü gbɛ̂ wun dâkâ ndə̂ nyê. Gbölö Gbïɛ̈ ndô tə̂kə̂ ka nə̂.

⁶ Nyë dɨ̈äbô su nyê dɨ̂ pâ ngâ rə balë-ê, praâbalë lə̂ arə gbɛ̂, nyë yükû rə ndə̂ nyë nyîndə̂ nə̈ tchânə̂ Ndjapä, lə̂ köbosə̂ kə̂ to pö sə̈ tchë lakə̂ dɨ tchə̂lə̂ ma, lakə̂ za ayîabâ sə̈ tchë.

⁷ Käko ânyë, zɨtɨ su ndə̂ Ndjapä ndə̂ ârôpâ kə̂ wunsə̂ rə ndə̂ azü gbɛ̂, batadje su nyê lakə̂ rɨ tchə̂lə̂ nyê balë la Jezü Krîsiti.

⁸ Ndə̂kə̂ ka pö nə̈, arə̂mä, äwäpä nyë za su nyê pâ rə ndə̂ âdâka, rə ndə̂ a voga rə̂, rə ndə̂ âwâtə̂ lëge nə̈, rə ndə̂ a lusə̂ nə̈, rə ndə̂ âwâ djîrə̂, rə ndə̂ âdâka gbɛ̂, rə ndə̂ âfû lə̂ la azü, rə ndə̂ a to tchôtchô pö ndə̂nə̈ sə̈ azü.

⁹ Rə ndə̂ më nyîsə̂ nə̈ sə̈ nyê, rə ndə̂ nyë wûn rə̂ ânyë kə̈ djê rə̂ lə̂ ma mê, äwäpä nyë mbo rə̂. Ndjapä ndə̂ tche za zɨtɨ su sə̈ azü, tchê səadje ndrotə̂ nyê.

Pôlo zä ayîabâ sə̈ azü ndə̂ Egilîze ndə̂ Fïlîpe

¹⁰ Më wä la gbölö mômô lə̂ Gbölö Gbïɛ̈: Su mê wä la mômô bëte rə̂ ndə̂ nyë nyîsə̂ nə̈ pä, gbô su nyê kä pâ mê. Su nyê nyïndə̂ mê alême, praâbalë nyë gbôâbo köbo ndə̂kə̂ mbo rə̂ la mê-a.

¹¹ Më tôâbo pö lâme ndə̂kə̂ wa la gʉ ngâ rə-a. Bëte më mända ndə̂kə̂ za su mê logbɛ̂ kütû pâ rə ndə̂ më wâ la rə̂.

¹² Më wünsə̂ kə̂ sə̈ lə̂ yûkü, kə̈ wûn ndjë sə̂kə̂ sə sə̂nə̈ ndə̂ më wâ la arə tə̂ gbölösə̂nə̈. Më mända ndə̂kə̂ sə la mômô katchôgbɛ̂, lə̂ arə gbɛ̂. Më mända ndə̂kə̂ sə la mômô ndə̂ tchə̂lə̂ mê sɨ̂ âdəndjë rə̂ ndə̂ më sə̂ la gʉ. Më mända ndə̂kə̂ sə la mômô ndə̂ më wâ la rə tə̂ gbölösə̂nə̈ âdəndjë rə̂ ndə̂ më wâbô wâ la rə-ê.

¹³ Më wä ndə̂kə̂ mbo arə lâme gbɛ̂ bëte Krîsiti kä ndə̂ âzâ gbôgbô sə̈ mê.

¹⁴ Praâbalë nyë mbö tchôtchô rə ânyë kə̈ zâ tîɛ̂ ma yûkü nə̈ tə̂ mê lâme.

¹⁵ Nyënyê ndə̂ azü lə̂ Egilîze ndə̂ Fïlîpe, nyënyê la tə̂ nyê, nyë wûnsə̂ nə̈ nə̂ pä, sə̂nə̈ ndə̂ a jêtə̂ kə̂ mu Tchôtchô Pö kä ndə̂ më gbô bhâ Mäsëdöâne. Ngâ Egilîze balë zâbo ngâ rə balë sə̈ mê ngbâ rə ndə̂ më zâ rə̂ sə̈ tchë lâme-a, kütû Egilîze ndə̂ nyê kä ndə̂ âzâ könô sə̈ mê.

¹⁶ Ndə̂ më sə̂ alême bhâ Tësälönîke, nyë wän arə ndə̂ më wâ la gʉ nə̈ sə̈ mê ëngbâ ngânə̈ ëngbâ ngânə̈.

¹⁷ Ânyîâbo ndə̂kə̂ to rə̂ pä më sə̈ lakə̂ gro tchêngbâ rə ndə̂ azü kʉ rə̂ sə̈ azü-a. Rə ndə̂ mê pu rə̂ wä ndə̂kə̂ pa azü gbo rə tə̂ gbölösə̂nə̈ ngbâ rə ndə̂ andjë mbô rə̂.

¹⁸ Më gbô arə gbɛ̂ ndə̂ nyë wân rə̂ sə̈ mê nə̂, më kä gbô rə̂ ârô masə̂nə̈. Më gbö arə ngbâ nyê tchânə̂ Ëpäfrödîte. Rə ndə̂ nyë wân rə̂ wä batə̂ yömbö ndə̂ tchâfo nə̈ fô djîrə̂, kə̈ wâ ndjë batə̂ ngâ ngela ndə̂ âdâka ânyë Ndjapä gâmba rə̂.

¹⁹ Ndjapä ndə̂ mê kʉadje arə gbɛ̂ ndə̂ nyë nyîndə̂ nə̈ sə̈ nyê, tche âkʉ rə̂ lə̂ köbosə̂ Jezü Krîsiti bëte tche wä la atchôtchô arə ârô masə̂nə̈.

²⁰ Azə̈ vöga Ndjapä Bha azə̂ logbɛ̂ logbɛ̂! Amin.

Adɨ̂ kə̂ pö ndə̂ azü

²¹ Lə̂ köbosə̂ nə̈ ndə̂ azə̈ wâ balë la Jezü Krîsiti, nyë pö ndə̂ azü ndə̂ Ndjapä balë balë gbɛ̂ sə̈ mê. Arə̂mâ ndə̂ më sə̂ la andjê pô ndə̂ nyê nə̂.

²² Azü ndə̂ Ndjapä gbɛ̂ ndə̂ andjë sə̂ bhâtə pô ndə̂ nyê nə̂, ndə̂kə̂ wun rə̂ djîrə̂, andjanə̈ ndə̂ andjë sə̂ bhâlə̂ gbadja ndə̂ gbölö gbïɛ̈ ndə̂ Rômo pô ndjë ndə̂ nyê nə̂.

²³ Äfü pä Gbölö Gbïɛ̈ Jezü Krîsiti mbo tchôtchô su tə̂ nyê.