Fïlîpe 3 - Mbëtï Ndjapä: TÄFO MADƗ̈

Tchôtchô köbo ndə̂kə̂ wa djîrə̂ lə̂ la Ndjapä

¹ Angaâtə, arə̂mä ndə̂ mê, äwäpä nyë wa la mômô lə̂ köbosə̂ nə̈ ndə̂ nyë wâ balë la Gbölö Gbïɛ̈. Sə̂nə̈ kâbo tə̂ mê ndə̂kə̂ pa më ka mbô kütû apö lə̂ mbëtï lâme sə̈ nyê-a, rə lâme wä ndə̂kə̂ mbo rə̂ pä nyë kpokpo tə̂ nyê.

² La nyê gbö tə̂ angbongbo a-earə̂ kua, la nyê gbö tə̂ aɛ̈vrô lâme, la nyê gbö tə̂ azü ndə̂ andjë wâ ngbongbo gasa lâme-ê.

³ Azə̂ ndə̂ azə̂ voga Ndjapä lə̂ köbosə̂ Yingö ndə̂ yê, azə̈ kä ndə̂ âwâtə̂ alëge a-earə̂ gasa nə̈, azə̈ wä la mômô ndə̂ azə̈ wâ balë la Jezü Krîsiti, azə̈ zâbo su azə̂ pâ azə̂ la tə̂ azə̂-a.

⁴ Dëkë, mëmê ndjë gbɛ̂ më wä âme ndə̂kə̂ za su mê pâ mê la tə̂ mê. Âdə ngâ akrə âto rə̂ tə̂ su yê pä anyë wä ndə̂kə̂ za su anyê pâ anyê la tə̂ anyê dëkë më rö tchë tə̂ gbölösə̂nə̈.

⁵ A wä mê la gasa lə̂ lö mïndûu manə̈ vötaâ la tchêngbâ nə̈ ndə̂ a zɨ̂ mê. Më wätə̂ akrə gö ndə̂ Isarayële pâ mawo ndə̂ Bejamɛ̈n, araâta mê gbɛ̂ wätə̂ ajuîfu, lə̂ köbosə̂ ndïɛ̈ më wätə̂ lëge farizïɛ̈n.

⁶ Lə̂ köbosə̂ kə̂ mbo kua ndə̂ më zâ su mê gbɛ̂ ëtâ, më mbö arə gbôgbô tə̂ a-Egilîze. Âdə andə̂ pö ndə̂ ndïɛ̈ lakə̂ mbo rə djîrə̂ gundə̂sə̂ nə̈, ngâ akrə ndə̂ tche yi pö lə̂ küma mê bëte rə̂ wâbo-a.

⁷ Praâbalë arə gbɛ̂ ndə̂ mê gbo arə ngbânə̂ alême, më wün rə̂ angaâtə batə̂ ngâ rə ndə̂ âyû bëte Krîsiti.

⁸ Tə̂ lëge nə̈, më wün arə lâme gbɛ̂ batə̂ rə ndə̂ âyû, ndə̂kə̂ wunsə̂ rə ndə̂ âdâka tə̂ gbölösə̂nə̈, ndə̂ âdə̂: Jezü Krîsiti, Gbölö Gbïɛ̈ ndə̂ mê. Tə̂ pö ndə̂ yê kä ndə̂ arə ndə̂ mê yû, më wün arə lâme gbɛ̂ batə̂ nyü ndə̂kə̂ gbo Krîsiti,

⁹ ânyë mëmê la tchë, ârâ wa balë. Më kä wâbo ndə̂kə̂ kä bhi gogo mê lə̂ köbosə̂ kə̂ wa djîrə̂ lə̂ köbosə̂ ndïɛ̈-a. Praâbalë më wä balë la Krîsiti bëte rə̂ ndə̂ më zâ su mê sə̈ Krîsiti. Ndjapä kä âkə̂ mbo rə̂ pä akrə wa djîrə̂ lə̂ köbosə̂ kə̂ za yê su sə̈ tchë.

¹⁰ Rə ndə̂ më nyîndə̂ nə̈ wä ndə̂kə̂ wunsə̂ Krîsiti, tchetchë la gbôgbô ndə̂ âjô tchë lə̂ kuzü, kə̂ wun yûkü la tchë ânyë kə̂ wa batə̂ tchë lə̂ kuzü ndə̂ yê.

¹¹ Käko rə ndə̂ su mê wâ pânə̈ wä kâkë: Mëmê ndjë gbɛ̂, mê joadje lə̂ kuzü.

Kə̂ kpe la rö ëtə̂ manə̈

¹² Më tôâbo rə̂ pä më wûtu ëtə̂ manə̈ âdəndjë rə̂ ndə̂ më dâka gbɛ̂ nə̂-a. Praâbalë gbô mê kä lə̂ rö, më zätə̂ mê gbɛ̂ la gbôgbô ndə̂kə̂ za rə ndə̂ âwâ bëte mê, bëte Jezü Krîsiti la tə̂ yê zâ mê nə̂.

¹³ Arə̂mä, më wûn-âbo sə̂nə̈ pä më gbô rə nə̈ nə̂-a, praâbalë rə balë ndə̂ âzâ su mê wä kâkë: Më nyïndə̂ kə̂ gbötə̂ rə ndə̂ âwâ dəngbâ mê, kə̂ pu köbo rə ndə̂ âwâ də tchâtchu mê.

¹⁴ Käko më kpë la rö ndə̂kə̂ wutu ëtə̂ manə̈, ânyë kə̂ gbo rə ngbânə̈ tchânə̂ Ndjapä ndə̂ tche ê azə̂ ndə̂kə̂ gbo rə̂ bhâ lafô lə̂ köbosə̂ Jezü Krîsiti.

¹⁵ Azə̂ gbɛ̂ ndə̂ azə̈ nêgbe lə̂ köbosə̂ arə ndə̂ Yingö, äwäpä kə̂ rɨ su azə̂ gbɛ̂ wa balë. Âdə ngâ pö âwa tâ ânyë pö tə̂ su nyê wâ ngbî, Ndjapä âkradje tchə̂lə̂ la nyê pâ pö nə̈ lâme.

¹⁶ Âdə rə nə̈ âwa atöko, äwäpä nyë ndəpo kpôlə̂ köbo ndə̂ ârâ nə̂ lə̂nə̈ ndjoa angêta.

¹⁷ Arə̂mä, nyënyê gbɛ̂ nyë mbö rə batə̂ mê. La nyë wä kpôtə̂ andjanə̈ ndə̂ andjë mbo rə batə̂ rə̂ ndə̂ ârâ nyîsə̂ nə̈ sə̈ nyê.

¹⁸ Bëte angbängbä azü mbö rə ndə̂ ânyîsə̂ nə̈ pä andjë kôsə̂ pö ndə̂ yö ndə̂ gba ndə̂ Krîsiti nə̂. Më tô pö lâme sə̈ nyê nə̂ ëngbâ ngânə̈ ëngbâ ngânə̈, ânyë kə̂ kä to rə̂ la ngûla sə̈ nyê âtə.

¹⁹ Köbo ndə̂ andjë zâ rə̂ lâme, ârə̂ âwutu la andjê ëtə̂ kuzü, bëte ndjapä ndə̂ andjê də̈ tchə̂lə̂ andjê, andjë bhï gogo andjê tə̂ rə ndə̂ âmbo ganô tə̂ andjê. Andjë zä su andjê gbɛ̂ kütû pâ arə tchêbêche âtə.

²⁰ Âdə andə̂ azə̂ nə̈, gö ndə̂ azə̂ kä bhâ lafô, azə̈ krʉ̈ ndə̂kə̂ pa Gbölö Gbïɛ̈ ndə̂ azə̂ Jezü Krîsiti Earə̂ kə̂ tcha azə̂ to bhâye kə̂ ka.

²¹ Tchê mboadje rə̂ pä tə̂ azə̂ ndə̂ ganô âtə wa batə̂ tə̂ yê ndə̂ tchêlafô. Lə̂ köbosə̂ gbôgbô ndə̂ yê, ndə̂ âmbo rə̂ pä tche kʉ arə gbɛ̂ tchâtchâ kümändëmä ndə̂ yê.