Fïlîpe 2 - Mbëtï Ndjapä: TÄFO MADƗ̈

Gbölö ndə̂ Krîsiti lakə̂ mbotə̂ yê kpîɛ̂kpîɛ̂ rə̂

¹ Ndə̂ nyë wâ balë la Krîsiti, ämbö rə̂ pä nyë kpokpo tə̂ nyê. Lə̂ köbosə̂ kə̂ nyində̂ ngâ, ämbö rə̂ pä su nyê wa la gbôgbô, nyê wa balë la Yingö ndə̂ Ndjapä, nyë kä lakə̂ nyïndə̂ angâ nyê lə̂ gbâtə̂ nyê, ndjë lakə̂ wun nyonyo azü.

² Käko äwäpä nyë mbo rə̂ pä su mê sɨ la mômô lə̂ köbosə̂ kə̂ djetə̂ nyê, nyë nyïndə̂ angâ nyê lə̂ gbâtə̂ nyê, nyë sə̈ balë ânyë pö tə̂ su nyê wa balë.

³ Âwâbo pä nyë gbogbro tə̂ nyê ndə̂kə̂ pu gbölö tchô âdəndjë ndə̂kə̂ wa la ngbongbo su ndə̂kə̂ pa azü wun nyê-a, praâbalë äwäpä nyë mbotə̂ nyê kpîɛ̂kpîɛ̂ rə̂, kə̂ wun angâ nyê gbölö âro nyê.

⁴ Âwâbo pä akrə pu rə bëte tə̂ yê la tə̂ yê-a, praâbalë äwäpä akrə balë balë lə̂ gbâtə̂ nyê pu ndjë rə bëte tchôtchô rə ndə̂ angâ yê.

⁵ Äwäpä kə̂ mbotə̂ nyê lə̂ gbâtə̂ nyê la angâ nyê wa batə̂ andə̂ azü ndə̂ andjë wâ balë la Jezü Krîsiti.

⁶ Tchetchë ndə̂ tche wâ balë la Ndjapä logbɛ̂, praâbalë tche nyîâbo ndə̂kə̂ kitə̂ kə̂ wa balë ndə̂ andjë wâ balë la Ndjapä lâme bëte tchë-a.

⁷ Praâbalë tchetchë la tə̂ yê, tche gämba rə̂ ndə̂kə̂ gbotə̂ arə gbɛ̂ ndə̂ tche wâ la rə̂, kə̈ mbôtə̂ yê batə̂ earə̂ kua. Tche mbötə̂ yê tə̂ akrə lə̂ gbâtə̂ azü, a wün tchë batə̂ akrə.

⁸ Tche mbötə̂ yê kpîɛ̂kpîɛ̂ rə̂, kə̈ də̂ earə̂ kə̂ dje ma Bha nə̈ ndjoa ëtə̂ kuzü, âdəndjë kuzü tə̂ yö ndə̂ gba.

⁹ Bëte rə̂ kä ndə̂ Ndjapä zâ tchë lə̂ gbölö tchô, kə̈ zâ rə̈ ndə̂ ârô adɨ̂ arə̈ gbɛ̂ sə̈ tchë.

¹⁰ Ndə̂kə̂ pa la rə̈ Jezü, azü gbɛ̂ ndə̂ andjë wâ bhâ lafô la andjanə̈ pâ cho la andjanə̈ dələ̂ dju cho gbɛ̂ gʉ̂te la kʉ̈ta andjê tchâtchâ yê,

¹¹ ânyë azü gbɛ̂ to rə̂ la ma gö ndə̂ andjê päkëdə̂: «Jezü Krîsiti wätə̂ Gbölö Gbïɛ̈» käko ânyë a voga Ndjapä Bha!

Äwäpä nyë tcho batə̂ wo pâ cho âtə

¹² Käko arə̂mâ ndə̂ mê ndə̂ më nyîndə̂ nyê tə̂ gbölösə̂nə̈, ndə̂ gbô mê sə̂ ndrotə̂ nyê alême, nyë djë ma Ndjapä logbɛ̂, käko äwäpä kə̂ dje ma ndə̂ nyê lâme ka rô anə̈ dokʉ̈tchê ndə̂ më sə̂âbô sə̂ ndrotə̂ nyê. Nyë mbö kua nə̈ la gbölö wa lakə̂ gugu ndə̂kə̂ tcha tchîsûwu ndə̂ nyê.

¹³ Bëte Ndjapä kä âkə̂ za gʉ tə̂ su nyê ndə̂kə̂ mbo rə nə̈, ânyë kə̂ za köbo sə̈ nyê ndə̂kə̂ mbo rə gundə̂sə̂ rə ndə̂ tche nyîkrə rə̂ tə̂ su yê.

¹⁴ Âwâbo pä nyë mbo rə̂ lakə̂ po lə̂ ma nyê âdəndjë lakə̂ gama-a.

¹⁵ Käko nyê watə̂ azü ndə̂ pö wâbô wâ lə̂ küma andjê-ê, abechë ndə̂ Ndjapä ndə̂ ngbongbo rə wâbô wâ lə̂ küma andjê-ê, lə̂ gbâtə̂ azü ndə̂ tchô angêta âtə, ndə̂ andjë wâ ngbo ânyë kə̂ mbo ngbongbo rə. Äwäpä ngbänga nyê tcho lə̂ gûtə̂ andjê batə̂ akêkêrə̂ lafô,

¹⁶ lakə̂ mu pö ndə̂ âza tchîsûwu sə̈ azü, käko mê âwa la mômô tə̂ pö ndə̂ nyê lo kə̂ ka ndə̂ Krîsiti, bëte kua ndə̂ mê la yûkü ndə̂ më wûn rə̂ bëte nyê wâbo ämbänə̈-a.

¹⁷ Âdə jï mê âwa ndə̂kə̂ tu batə̂ ngâ ngela ndə̂ nyë wâ rə̂ sə̂ Ndjapä lə̂kə̂ mbo kua ndə̂ Ndjapä ndə̂ nyê, më wä la mômô ânyë azə̈ la nyê gbɛ̂ wa la mômô.

¹⁸ Käko nyënyê ndjë gbɛ̂, äwäpä nyê wa la mômô ânyë mê wa ndjë la mômô batə̂ nyê.

Timotë la Ëpäfrödîte

¹⁹ Âdə Gbölö Gbïɛ̈ Jezü ânyində̂ nə̈, mê wan-adje Timotë sə̈ nyê lə̂ alö âtə, ndə̂kə̂ pa mëmê la tə̂ mê, su mê wa la gbôgbô lə̂ köbosə̂ apö ndə̂ tchê toadje tchêngbâ nə̈ sə̈ mê pâ nyê.

²⁰ Bëte tchetchë balë kä ndə̂ âwûnsə̂ apö tə̂ su mê ânyë kə̂ dɨ su yê tə̂ pö ndə̂ nyê.

²¹ Adɨ̂ azü gbɛ̂ dɨ̈ su andjê pâ arə ndə̂ andjê la tə̂ andjê, âdə̂âbo pâ arə ndə̂ Jezü Krîsiti-a.

²² Praâbalë nyënyê la tə̂ nyê, nyë wünsə̂ nə̈ pä Timotë nyïsə̂ köbo ndə̂ tche mbô djîrə̂ rə, batə̂ modô la bha nə̈, tche zätə̂ yê ndə̂kə̂ mbo kua bëte Tchôtchô Pö ndrotə̂ mê.

²³ Âdə mê âwunsə̂ pö pâ mê djîrə̂ nə̂, tchetchë kä ndə̂ mê wan-adje tchë sə̈ nyê.

²⁴ Âdə Gbölö Gbïɛ̈ ânyində̂ nə̈, mëmê ndjë gbɛ̂ mê nəadje lə̂ angâ alö.

²⁵ Praâbalë më wün rə̂ pä äwä ndə̂kə̂ pa më wan ngâ ârâ Ëpäfrödîte sə̈ nyê, tche də̈ ngâ mê earə̂ kua la earə̂ kʉ̈ʉ̈, ndə̂ nyë wân tchë ndə̂kə̂ pa tche za könô sə̈ mê sə̂nə̈ ndə̂ më wâbô wâ la rə-ê.

²⁶ Tche wä la gʉ tə̂ gbölösə̂nə̈ ndə̂kə̂ ka wun nyê gbɛ̂, kə̈ wâ la nyonyo bëte rə̂ ndə̂ nyë djê pö ndə̂ tə̂kömbô ndə̂ yê.

²⁷ Tə̂ lëge nə̈, tə̂kömbô nə̈ mbö tchë ëtə̂ kuzü, praâbalë Ndjapä wûn nyonyo yê, âdə̂âbo kütû tchë-a, praâbalë tche wün ndjë nyonyo mê, ânyë mê kä wâbô wâ lə̂ nyonyo ëngbâ ngânə̈ ëngbâ ngânə̈-ê.

²⁸ Bëte rə̂ kä ndə̂ më wân tchë gasa sə̈ nyê ndə̂kə̂ pa âdə nyê âwun tchë, kə̂ kä wa la mômô, ânyë nyonyo tə̂ su mê zɨ-î.

²⁹ Äwäpä nyë za tchë bhândə̂ nyê la mômô batə̂ ngâ nyê ndə̂ nyë wâ balë la tchë lə̂ Gbölö Gbïɛ̈. Äwäpä nyë lusə̂ angâ azü batə̂ tchë,

³⁰ bëte tche wä tchêtchêtchê ndə̂kə̂ tchu bëte kua ndə̂ Krîsiti. Atchâklêtchâ tche tchû bëte kua ndə̂ Krîsiti. Tche yösə̂ tə̂ yê sə̈ kuzü, ânyë kə̈ mbô rə̂ la mê lə̂ kpâlâ nyê, ndə̂ köbo wâbô wâ ndə̂kə̂ pa nyë mbo rə̂-ê.