Fïlîpe 1 - Mbëtï Ndjapä: TÄFO MADƗ̈

Kə̂ po ndə̂ azü

¹ Mëmê Pôlo la Timotë, a-earə̂ kua ndə̂ Jezü Krîsiti. Ârâ wän mbëtï âtə sə̈ azü ndə̂ Ndjapä ndə̂ andjë wâ balë la Jezü Krîsiti lə̂ gbölö gö ndə̂ Fïlîpe. Ârâ wän ndjë mbëtï âtə sə̈ azü tə̂ küma Egilîze la adiâkere:

² Äfü pä Ndjapä Bha azə̂ la Gbölö Gbïɛ̈ ndə̂ azə̂ Jezü Krîsiti mbo tchôtchô su tə̂ nyê, kə̂ za zɨtɨ su sə̈ nyê.

Pôlo tö pö sə̈ Ndjapä bëte azü lə̂ Egilîze ndə̂ Fïlîpe

³ Logbɛ̂ sə̂nə̈ ndə̂ su mê te pâ nyê, më sə̈ lakə̂ za ayîabâ sə̈ Ndjapä ndə̂ mê.

⁴ Logbɛ̂ ndə̂ mê âsə̈ to pö sə̈ Ndjapä bëte nyê gbɛ̂, më tö pö la mômô tə̂ su mê,

⁵ bëte rə̂ ndə̂ nyë zâ könô sə̈ mê, ätö sə̂nə̈ ndə̂ më jêtə̂ kə̂ mu Tchôtchô Pö ndjoa ëtə̂ tchô angêta.

⁶ Më wünsə̂ nə̈ tə̂ lëge nə̈ pä Ndjapä ndə̂ tche jêtə̂ tchôtchô kua lə̂ köbosə̂ nyê, tchê mboadje rə̂ ndjoa ëtə̂ lo kə̂ ka ndə̂ Jezü Krîsiti.

⁷ Äwä lə̂ köbo nə̈ ndə̂kə̂ pa su mê wa pâ nyê. Pö ndə̂ nyê zä su mê tə̂ gbölösə̂nə̈, bëte nyë gbö ndjë atchôtchô arə ndə̂ Ndjapä kʉ̂ rə̂ sə̈ mê lə̂ köbosə̂ tchôtchô su yê. Ndə̂ më sə̂ angêta lə̂ nda kânga, âdəndjë rə̂ ndə̂ më sə̂âbô sə̂ lə̂ nda kânga, më kïtə̂ köbo la gbôgbô tə̂ azü ndə̂ andjë nyîâbô nyîndə̂ nə̈ pä a mu Tchôtchô Pö ndə̂ mê sə lakə̂ mu rə̂ la gbôgbô.

⁸ Lə̂ la Ndjapä më nyïndə̂ nyê tə̂ gbölösə̂nə̈ la su mê balë batə̂ rə̂ ndə̂ Jezü Krîsiti nyîndə̂ nyê.

⁹ Më tö pö sə̈ Ndjapä bëte nyê kâkë: Äwäpä kə̂ nyində̂ angâ nyê lə̂ gbâtə̂ nyê e kütû ë atə̂ tchâtchu nə̈, käko tchə̂lə̂ la nyê kra ndə̂kə̂ wunsə̂ rə djîrə̂,

¹⁰ ânyë nyê wunsə̂ rə ndə̂ âwâtə̂ tchôtchô nə̈ la rə ndə̂ âwâtə̂ ngbongbo nə̈. Käko nyê wadje tə̂ azü ndə̂ andjë grô gbɛ̂, ânyë tə̂ lo kə̂ ka ndə̂ Krîsiti, ngâ pö wabô wâ lə̂ küma nyê-ê.

¹¹ Nyê wadje tə̂ azü ndə̂ adjîrə̂ arə sɨ̂sɨ̈ lə̂ andjê, ndə̂ ânə̂ lə̂ köbosə̂ Jezü Krîsiti. Käko kä ndə̂ a voga Ndjapä lakə̂ lusə̂ yê.

Krîsiti wätə̂ Tchîsûwu

¹² Arə̂mä, më nyïndə̂ nə̈ pä nyë wunsə̂ nə̈: Rə ndə̂ âgbô mê, ämbö rə̂ pä Tchôtchô Pö e atə̂ tchâtchu nə̈.

¹³ Bëte rə̂ kä ndə̂ aturûgu gbɛ̂ lə̂ gbadja ndə̂ gbïɛ̈ la azü katchôgbɛ̂ wûnsə̂ nə̈ pä më kä bhâlə̂ nda kânga bëte kua ndə̂ Krîsiti.

¹⁴ Angbängbä arə̂mâ ndə̂ andjë wûn mê bhâlə̂ nda kânga, andjë kä gbô gbôgbô tə̂ su andjê ndə̂kə̂ za su andjê gbɛ̂ pâ Gbölö Gbïɛ̈. Käko andjë wä la gbôgbô, kə̈ kä mûâbo pö ndə̂ Ndjapä la wa-a, andjë mü rə̂ ârô anə̈ dokʉ̈tchê.

¹⁵ Tə̂ lëge nə̈, angânə̈ lə̂ gûtə̂ andjê mü pö ndə̂ Krîsiti la gbölö su, kə̈ nyî ndjë ndə̂kə̂ pu tchâma mê, praâbalë angânə̈ mü rə̂ la tchôtchô su.

¹⁶ Andjanə̈ ndə̂ andjë mû pö lakə̂ nyində̂ ngâ, andjë wûnsə̂ nə̈ nə̂ pä Ndjapä zä rə̂ sə̈ mê ndə̂kə̂ kitə̂ köbo tə̂ azü ndə̂ andjë to ngbongbo pö tə̂ Tchôtchô Pö.

¹⁷ Angânə̈ mü pö ndə̂ Krîsiti ndə̂kə̂ pu gbölö tchô, kə̂ mbo rə ndə̂ andjê wä la ngbongbo su, kə̈ wûn andə̂ andjë nə̈ bhâtə̂ su andjê pä, kə̂ mbo tə̂ rə käko, yûkü ndə̂ mê âkä ro masə̂nə̈ bhâlə̂ nda kânga.

¹⁸ Praâbalë âdə kə̂ nyisə̂ rə ndə̂ andjê âwatə̂ lëge nə̈ âdəndjë rə̂ ndə̂ âwâ la ngbongbo su, äwä ämbänə̈! Gbölö rə nə̈ də̈ rə̂ ndə̂ andjë mû pö ndə̂ Krîsiti! Bëte rə̂ kä ndə̂ su mê wâ la mômô! Käko gbô su mê âwadje la mômô logbɛ̂.

¹⁹ Bëte më wünsə̂ nə̈ pä rə lâme gbɛ̂ mbö rə̂ pä më tcha lə̂ köbosə̂ kə̂ to pö ndə̂ nyê sə̈ Ndjapä, la könô ndə̂ Yingö ndə̂ Jezü Krîsiti zâ rə̂ sə̈ mê.

²⁰ Bëte rə ndə̂ më krʉ̂ bëte rə̂ ânyë kə̈ zâ su mê pânə̈, ganô mboabô mê tee-a. Praâbalë angaâtə âdəndjë logbɛ̂, âdə mê âtchu âdəndjë rə̂ ndə̂ më wâ la tʉ̈rʉ̂ la mê, më wünsə̂ nə̈ tə̂ lëge nə̈ bhâtə̂ su mê pä Krîsiti gë lə̂ mê tə̂ gbölösə̂nə̈.

²¹ Bëte andə̂ me nə̈, âdə mê âsə la tʉ̈rʉ̂ la mê, më sə̈ bëte Krîsiti, ânyë âdə mê âtchu, më tchü ndə̂kə̂ gbo rə ngbâ kua ndə̂ më mbô rə̂.

²² Praâbalë âdə kə̂ sə ndə̂ mê la tʉ̈rʉ̂ la mê bêche âtə âwa ndə̂kə̂ za köbo sə̈ mê ndə̂kə̂ mbo ngâ tchôtchô kua ndə̂ âle, käko më wûn-âbo sə̂ anə̈ ndə̂ mê mbo rə̂-a.

²³ Su mê dɨ̈ mê bïbïchuû: Më wä la gʉ ndə̂kə̂ gbotə̂ tchîsûwu âtə ndə̂kə̂ sə la Krîsiti, anə̈ lâme kä âkə̈ dâka.

²⁴ Praâbalë kə̂ sə ndə̂ mê la tʉ̈rʉ̂ la mê bêche âtə wä tə̂ pö ndə̂ nyê.

²⁵ Tə̂ lëge nə̈, më wünsə̂ nə̈ bhâtə̂ su mê pä mê wadje la tchîsûwu, mê səadje ndrotə̂ nyê ndə̂kə̂ pa kua ndə̂ nyê e atə̂ tchâtchu nə̈ ânyë nyë wa la mômô lə̂kə̂ za su nyê sə̈ Ndjapä.

²⁶ Käko sə̂nə̈ ndə̂ mê ka pu nyê, tə̂ nyê âkra ngrô bëte mê, lə̂ köbosə̂ nə̈ ndə̂ nyë wâ balë la Jezü Krîsiti.

²⁷ Praâbalë äwäpä kə̂ sə ndə̂ nyê wa gundə̂sə̂ Tchôtchô Pö ndə̂ Krîsiti. Käko âdə mê âe ndə̂kə̂ wun nyê âdəndjë rə̂ ndə̂ më êâbô ê, äwäpä më dje rə̂ pä gbô nyê kä kpôtâ lakə̂ wa balë. Pö tə̂ su nyê wa balë, lakə̂ palatə̂ nyê ndə̂kə̂ mbo kʉ̈ʉ̈ bëte Tchôtchô Pö.

²⁸ Nyë gböäbô gbôtə̂ köbo pä a-earə̂ kə̂ kosə̂ nyê za wa lə̂ nyê ämbänə̈-ê, ârə̂ kä âkə̂ nyisə̂ kə̂ te ndə̂ andjê, ânyë nyë kä lə̂ köbo ndə̂kə̂ tcha lə̂ kuzü, rə nə̈ lâme tö bhândə̂ Ndjapä.

²⁹ Bëte Ndjapä mbö tchôtchô su tə̂ nyê lə̂ köbosə̂ Krîsiti, âdə̂âbô kütû ndə̂kə̂ za su nyê sə̈ tchë-a, praâbalë ndə̂kə̂ wun ndjë yûkü bëte tchë.

³⁰ Nyënyê ndjë gbɛ̂ nyë kä lə̂ kʉ̈ʉ̈ ndə̂ nyë wûn mê la rə̂ alême, ânyë nyë wûnsə̂ nə̈ nə̂ pä gbô mê kä lakə̂ mbo rə̂ âtə.