Filemön 1 - Mbëtï Ndjapä: TÄFO MADƗ̈

Kə̂ po ndə̂ azü

¹ Mëmê Pôlo ndə̂ a yî mê bhâlə̂ nda kânga bëte kua ndə̂ më mbô rə̂ la rə̈ Jezü Krîsiti, mëmê la Timotë ndə̂ tche wâtə̂ ngâ azə̂ earə̂ kua. Ârâ kä ndə̂ âmbô mbëtï âtə sə̈ mö Filemön, ndə̂ mo wâtə̂ ngâ ârâ lə̂ kua, ndə̂ ârâ nyîndə̂ zə̈ tə̂ gbölösə̂nə̈.

² Mbëtï âtə wä ndjë bëte azü ndə̂ Krîsiti gbɛ̂ ndə̂ andjë pâlatə̂ andjê bhâ tchâalê ndə̂ zə̈. Äwä ndjë bëte nyînə̂ azə̂ Apiä, la Ärchîpe ndə̂ tche wâtə̂ agü azə̂ lə̂ kʉ̈ʉ̈.

³ Äfü pä Ndjapä Bha azə̂ la Gbölö Gbïɛ̈ Jezü Krîsiti mbo tchôtchô su tə̂ nyê, kə̂ za zɨtɨ su sə̈ nyê.

Pôlo zä ayîabâ sə̈ Ndjapä bëte Filemön

⁴ Filemön, logbɛ̂ ndə̂ mê âsə̈ to pö sə̈ Ndjapä ndə̂ mê, më tö pö ndə̂ zə̈ lə̂nə̈ lakə̂ za ayîabâ sə̈ tchë.

⁵ Bëte më djë rə̂ pä mo nyïndə̂ azü ndə̂ Ndjapä gbɛ̂, kə̈ zâ ndjë su zə̈ gbɛ̂ sə̈ Gbölö Gbïɛ̈ Jezü.

⁶ Më yükû nə̈ sə̈ Ndjapä ndə̂kə̂ pa kə̂ za su zə̈ sə̈ Krîsiti ndə̂ âwâ balë la andə̂ ârâ lâme, âmbo kua lə̂ zə̈ ânyë kə̂ mbo rə̂ pä azü wunsə̂ tchôtchô rə gbɛ̂ ndə̂ azə̈ wâ la rə̂ lə̂kə̂ za su azə̂ balë sə̈ Krîsiti.

⁷ Ngâ mê lə̂ Krîsiti, më kä la gbölö mômô, kə̈ gbô gbôgbô tə̂ su mê, tə̂ pö ndə̂ azü ndə̂ mo nyîndə̂ andjê, la rə̂ ndə̂ mo zâ gbôgbô tə̂ su azü ndə̂ Krîsiti lâme.

Pôlo yükû nə̈ sə̈ Filemön ndə̂kə̂ mbo dâkâ tə̂ Önëzîme

⁸ Bëte rə̂ ndə̂ azə̈ la mö wâ balë la Krîsiti, më wä la gbôgbô ndə̂kə̂ zama sə̈ mö tə̂ rə ndə̂ âwâ pä mo mbo rə̂.

⁹ Bëte lə̂ köbosə̂ kə̂ nyində̂ ngâ ndə̂ azə̂ la mö, më yükû nə̈ sə̈ mö, mëmê Pôlo, më dû nə̂ ânyë angaâtə më kä bhâlə̂ nda kânga tə̂ pö ndə̂ Jezü Krîsiti.

¹⁰ Më yükû nə̈ sə̈ mö ndə̂kə̂ pa mo mbo dâkâ tə̂ bechë ndə̂ mê Önëzîme. Bëte bhâlə̂ nda kânga bhâtə, tche wâ nə̂ tə̂ modô ndə̂ mê lə̂ köbosə̂ Jezü Krîsiti.

¹¹ Dokʉ̈tchê mo gbôâbo ngâ rə lə̂ yê-a, praâbalë angaâtə mëmê la momö, azə̈ gbô rə lə̂ yê nə̂.

¹² Më wän tchë sə̈ mö ëngbânə̈ bëte tchetchë, tche wätə̂ ngâ tchâme-tə̂ mê la tə̂ mê.

¹³ Më nyï âme ndə̂kə̂ bata tchë kpô ndrotə̂ mê ndə̂kə̂ pa tche mbo rə̂ la mê lə̂ kpâlâ zə̈ ndə̂ gbô mê sə̂ lə̂ nda kânga bëte Tchôtchô Pö.

¹⁴ Praâbalë më nyîâbo ndə̂kə̂ ro pâ küma zə̈, ânyë kə̂ za mö la gbôgbô ndə̂kə̂ mbo dâkâ-a, praâbalë äwäpä mo mbo rə̂ ngbâ su zə̈.

¹⁵ Ambêteko tchə̂lə̂ gbâtə̂ zə̈ krʉ̂ la Önëzîme ngbâ angâ kpîɛ̂kpîɛ̂ lö, ânyë mo ka gbo tchë tə̂ logbɛ̂.

¹⁶ Bëte angaâtə, tche kä wâ bata kütû tə̂ ngbâa-a, praâbalë tche kä rô ngbâa tə̂ gbölösə̂nə̈, tche də̈ ngâ mê lə̂ Krîsiti ndə̂ më nyîndə̂ yê tə̂ gbölösə̂nə̈, ndə̂ tche wâtə̂ lëge tchandə̂ me nə̈, momö ndjë gbɛ̂ mô kä nyiadje ndə̂ yê tə̂ gbölösə̂nə̈ bëte tche wä ndjë tə̂ akrə batə̂ mö, kə̈ wâ ndjë tə̂ ngâ zə̈ ndə̂ tche zâ su yê sə̈ Krîsiti.

¹⁷ Käko âdə mo âwun mê batə̂ agü zə̈, äwäpä mo za tchë bhândə̂ zə̈ âwûntî pä mëmê la tə̂ mê kä ndə̂ mo zâ mê.

¹⁸ Âdə tche âmbo ngâ ngbongbo rə alêe tə̂ zə̈, âdəndjë geda ndə̂ zə̈ âwa lə̂ küma yê, amö gbotâ lə̂ küma mê.

¹⁹ Mëmê Pôlo kä ndə̂ âmbô mbëtï âtə sə̈ mö la könô mê: Mëmê kä ndə̂ âgiadje rə̂ sə̈ mö. Më nyîâbo ndə̂kə̂ to rə̂ sə̈ mö pä, sə̂ geda ndə̂ mê ndə̂ âwâ ndjë lə̂ küma zə̈ lâme, sə̂nə̈ te lə̂ zə̈-a, bëte geda nə̈ də̈ tchîsûwu ndə̂ zə̈.

²⁰ Tə̂ lëge nə̈, ngâ mê lə̂ Krîsiti, më yükû nə̈ sə̈ mö ndə̂kə̂ pa mo mbo dâkâ tə̂ mê lə̂ köbosə̂ nə̈ ndə̂ azə̈ wâ la mö balë lə̂ Gbölö Gbïɛ̈ lâme. Amö za gbôgbô tə̂ su mê bëte azə̈ la mö wâ nə̂ balë la Krîsiti.

²¹ Më mbö mbëtï âtə sə̈ mö bëte më wünsə̂ nə̈ bhâtə̂ su mê pä mô djeadje ma mê ndə̂kə̂ mbo rə ndə̂ më yükû nə̈ sə̈ mö lâme. Më wünsə̂ nə̈ pä mô mboadje rə̂ âro anə̈ ndə̂ më yûkû nə̈ ndə̂kə̂ pa mo mbo rə̂.

²² Amö nyikrə ngâ tchô gasa ndə̂kə̂ pa më lo tâ. Bëte më wä la gʉ ndə̂kə̂ wutu bhândə̂ nyê lə̂ köbosə̂ kə̂ to pö ndə̂ nyê sə̈ Ndjapä.

Adɨ̂ kə̂ po ndə̂ azü

²³ Ëpäfräse ndə̂ ârâ la tchë sə̂ bhâlə̂ nda kânga bëte Jezü Krîsiti pô ndə̂ zə̈ nə̂.

²⁴ Angâ mê a-earə̂ kua batə̂ Mâreke, Ärïstâreke, Dëmâse la Lûke, andjë pô ndjë ndə̂ zə̈ nə̂.

²⁵ Äfü pä Gbölö Gbïɛ̈ Jezü Krîsiti mbo tchôtchô su tə̂ nyê.