Ëfêze 6 - Mbëtï Ndjapä: TÄFO MADƗ̈

Kə̂ sə ndə̂ abechë la arabha la araanyï andjê

¹ Abechë, nyë djë ma arabha la araanyï nyê, bëte Gbölö Gbïɛ̈ nyïndə̂ nə̈ käko, kə̂ mbo tə̂ rə käko wä djîrə̂.

² «Amö kpe wa bha la anyï zə̈», dokʉ̈ ndïɛ̈ ndə̂ Ndjapä zâ bâlâ nə̈ kä lâme.

³ «Käko kä ndə̂ mo sə la sə̂nə̈ ânyë tchîsûwu ndə̂ zə̈ pâ cho atə̂ gu tə̂ gbölösə̂nə̈.»

⁴ Nyënyê ndə̂ arabha la araanyï, nyë mböäbô rə̂ mbô ndə̂kə̂ pa su abechë ndə̂ nyê kʉ andjê-ê, praâbalë nyë bäta andjê lə̂ köbosə̂ kə̂ nyisə̂ tchôtchô köbo sə̈ andjê lakə̂ za wängö ndə̂ âtô bhândə̂ Gbölö Gbïɛ̈ sə̈ andjê.

Angbâa la a-earə̂ andjê

⁵ Angbâa, nyë djë ma a-earə̂ nyê pâ cho âtə lakə̂ kpe wa andjê tə̂ gbölösə̂nə̈, la su nyê gbɛ̂ batə̂ rə̂ ndə̂ nyê dje ma Krîsiti.

⁶ Nyë mböäbô kua nə̈ mbô kütû ndə̂ la andjê-ê, ndə̂kə̂ pa a wun rə̂ pä nyë pü köbo ndə̂kə̂ daka lə̂ la azü-î. Praâbalë nyë mbö rə batə̂ angbâa ndə̂ Krîsiti ndə̂ andjë zâ su andjê gbɛ̂ ndə̂kə̂ mbo rə ndə̂ su Ndjapä nyîndə̂ nə̈.

⁷ Nyë mbö kua ndə̂ andjê la tchôtchô su âwûntî pä nyê mbö kua ndə̂ Gbölö Gbïɛ̈, nyë wün-äbô rə̂ wûn batə̂ andə̂ akrə-ê.

⁸ Nyë wûnsə̂ nə̈ nə̂ päkëdə̂: Akrə ndə̂ tche wâtə̂ ngbâa, âdəndjë rə̂ ndə̂ tche wâbô wâtə̂ ngbâa, ânyë kə̈ mbô tchôtchô rə, tchê gboadje rə ngbânə̈ bhândə̂ Gbölö Gbïɛ̈.

⁹ Nyënyê ndə̂ a-earə̂ angbâa, nyë mbö ndjë tâ käko tə̂ angbâa ndə̂ nyê. Nyë gbötə̂ kə̂ hro la andjê-ê. Nyë wûnsə̂ nə̈ nə̂ pä Gbölö Akrə ndə̂ nyê la andjê gbɛ̂ kä balë bhâ lafô, tche krʉ̂âbo tchə̂lə̂ gbâtə̂ azü-a.

Arə kʉ̈ʉ̈ ndə̂ Ndjapä

¹⁰ Ndə̂kə̂ ka pö lâme, nyë kpökpo tə̂ nyê lə̂ Gbölö Gbïɛ̈, lə̂ gbölö gbôgbô ndə̂ yê.

¹¹ Nyë yü arə kʉ̈ʉ̈ ndə̂ Ndjapä gbɛ̂ ëtə̂ nyê ânyë kə̂ dacho la akänyï ndə̂ Jâbolo.

¹² Bëte azə̈ wâbo ndə̂kə̂ mbo kʉ̈ʉ̈ la azü-a, praâbalë azə̈ mbö kʉ̈ʉ̈ la arə gbɛ̂ ndə̂ âwâ la kümändëmä, la anə̈ ndə̂ âwâ la gbôgbô, la anə̈ ndə̂ âwâ la gbôgbô pâ tchêbêche ndə̂ ngbongbo rə, la angbongbo atchozö ndə̂ andjë sə̂ lə̂ gûtə̂ tchêlafô la tchêbêche.

¹³ Bëte rə̂ kä, nyë kʉ̈ arə kʉ̈ʉ̈ ndə̂ Ndjapä gbɛ̂! Käko ânyë nyê dacho, kə̂ krʉ̈ lafô lə̂ ngbongbo lö, ânyë kə̂ mbo kʉ̈ʉ̈ nə̈ zoo ëtə̂ manə̈.

¹⁴ Nyë krʉ̈ lafô! Kə̂ ï lëge pö pâ lə̂ba ndə̂ nyê batə̂ wû tchêpâ lə̂ba, kə̂ yu djîrə̂ pö ëtə̂ nyê batə̂ lə̂ba-wɛ̂n.

¹⁵ Nyë yü gʉ ndə̂kə̂ mu Tchôtchô Pö ndə̂ zɨtɨ su batə̂ dakpo ndə̂ akrə yu rə̂ ëtə̂ da yê.

¹⁶ Su nyê ndə̂ nyë zâ rə̂ sə̈ Ndjapä lâme, nyë zä rə̂ batə̂ vôla logbɛ̂. Lə̂ köbosə̂ nə̈ kä ndə̂ nyê kitə̂ köbo tə̂ awûlî ndə̂ wo ndə̂ Ngbongbo akrə.

¹⁷ Kə̂ tcha ndə̂ nyë tchâ lə̂ kuzü lâme, nyë yü rə̂ batə̂ kpoto-wɛ̂n, kə̂ yu pö Ndjapä batə̂ besala ndə̂ Yingö.

¹⁸ Nyë tö pö sə̈ Ndjapä lə̂ aköbo nə̈ balë balë gbɛ̂, ndjë tə̂ logbɛ̂, kə̂ yukû arə tchânə̂ yê lə̂ köbosə̂ Yingö. Käko la nyê gbö logbɛ̂, nyë gböäbô gbôtə̂ kə̂ to pö sə̈ Ndjapä tə̂ pö ndə̂ azü ndə̂ yê gbɛ̂.

¹⁹ Nyë tö ndjë pö sə̈ Ndjapä bëte mê ndə̂kə̂ pa tche za pö ndə̂ yê ëlə̂ ma mê ânyë mê muabô Tchôtchô Pö ndə̂ rə ndə̂ âwâ lə̂ küwû nə̈ mû la wa-ê.

²⁰ Më də̈ akrə ndə̂ më sə̂ lə̂ kpâlâ Jezü Krîsiti ânyë kə̈ sə̂ lə̂ nda kânga. Nyë tö pö sə̈ Ndjapä ndə̂kə̂ pa më toabô pö nə̈ tô la wa-ê, batə̂ rə̂ ndə̂ më wâ ndə̂kə̂ to rə̂.

Kə̂ po ndə̂ azü

²¹ Ndə̂kə̂ pa nyë wunsə̂ pö pâ mê, kə̂ wunsə̂ rə ndə̂ mê mbo rə̂, Tïchîke ngâ azə̂ ndə̂ më nyîndə̂ yê tə̂ gbölösə̂nə̈, ndə̂ tche də̂ djîrə̂ earə̂ kua ndə̂ Gbölö Gbïɛ̈ toadje apö pâ mê gbɛ̂ sə̈ nyê.

²² Më wän kütû tchë sə̈ nyê ndə̂kə̂ to pö pâ ârâ sə̈ nyê, kə̂ za wängö ndə̂kə̂ za gbôgbô tə̂ su nyê.

²³ Äfü pä Ndjapä Bha la Gbölö Gbïɛ̈ Jezü Krîsiti za zɨtɨ su sə̈ arə̂mâ gbɛ̂, kə̂ za ndjë kə̂ nyində̂ ngâ lakə̂ za su sə̈ Ndjapä sə̈ andjê.

²⁴ Äfü pä tchôtchô su ndə̂ Ndjapä wa pâ azü gbɛ̂ ndə̂ andjë nyîndə̂ Gbölö Gbïɛ̈ ndə̂ azə̂ Jezü Krîsiti lakə̂ nyində̂ yê ndə̂ âwâ pïï etə̂.