Ëfêze 5 - Mbëtï Ndjapä: TÄFO MADƗ̈

Kə̂ sə lə̂ ngbänga

¹ Nyë mbö rə batə̂ Ndjapä bëte nyë də̈ abechë ndə̂ tche nyîndə̂ nyê.

² Nyë sə̈ lakə̂ nyində̂ angâ nyê, batə̂ rə̂ ndə̂ Krîsiti nyîndə̂ azə̂ ânyë kə̈ zâtə̂ yê la tə̂ yê la ngela sə̈ Ndjapä bëte azə̂, batə̂ ngâ gia ndə̂ a zô tchë pâ gbalâka sə̈ Ndjapä ndə̂ tchâfo yê fô djîrə̂ ânyë kə̈ fû tə̂ su yê.

³ Nyë də̈ azü ndə̂ Ndjapä, käko âwâbo pä a dje pö ndə̂ arə batə̂ kə̂ pu aɛ̈chë âdəndjë aköchë katchôgbɛ̂, kə̂ mbo angâ arə kâkpö balë balë gbɛ̂, la gʉ kə̂ gbo arə gbɛ̂ lə̂ gbâtə̂ nyê-a.

⁴ Âwâbo la köbo nə̈ pä angbongbo pö, apö nyî la apö ganô wutu lə̂ ma nyê-a, praâbalë nyë zä kütû ayîabâ sə̈ Ndjapä.

⁵ Äwäpä nyë wunsə̂ nə̈ djîrə̂ pä akrə ndə̂ tche pû aɛ̈chë âdəndjë aköchë katchôgbɛ̂, la akrə ndə̂ tche wâ la kâkpö, la akrə ndə̂ tche wâ la gbölö gʉ ndə̂kə̂ gbo arə gbɛ̂ (bëte akrə ndə̂ tche wâ la gʉ ndə̂kə̂ gbo arə gbɛ̂ wä batə̂ akrə ndə̂ tche voga angakʉ̈lä), tche wâbo ndə̂kə̂ gbo rə lə̂ Gbölö gö-gbïɛ̈ ndə̂ Krîsiti la andə̂ Ndjapä-a.

⁶ Âwâbo pä azü bolo nyê la ambämbä pö-a: Arə käko lâme gbɛ̂ kä ndə̂ ânə la mêrâ ndə̂ Ndjapä pâ azü ndə̂ andjë kôsə̂ pö ma yê.

⁷ Nyë ngböäbô tə̂ nyê ngbô lakə̂ mbo ngâ rə la azü käko-ë.

⁸ Dokʉ̈tchê alême, nyë sə̈ lə̂ bübü nə̈. Praâbalë angaâtə, nyë kä lə̂ ngbänga lə̂ köbosə̂ nə̈ ndə̂ nyë wâ balë la Gbölö Gbïɛ̈. Nyë mbö rə batə̂ azü ndə̂ andjë sə̂ lə̂ ngbänga.

⁹ Bëte rə ndə̂ ngbänga nə la rə̂ də̈: Kə̂ mbo dâkâ, kə̂ mbo djîrə̂ rə la lëge pö.

¹⁰ Nyë pü köbo ndə̂kə̂ wunsə̂ rə ndə̂ âfû tə̂ su Gbölö Gbïɛ̈.

¹¹ Nyë ngböäbô tə̂ nyê ngbô la azü ndə̂ andjë mbo rə lə̂ bübü tchô, ndə̂ ngâ tchôtchô rə wâbô wâ lə̂nə̈-ê. Praâbalë nyë wütu la pö ndə̂nə̈ ësûwu.

¹² Bëte äwätə̂ rə ganô ndə̂kə̂ to pö ndə̂ arə ndə̂ azü lâme mbo rə̂ tchâkabû.

¹³ Praâbalë âdə a âto pö ndə̂ arə ndə̂ andjë mbo rə̂ lâme ësûwu, ârə̂ âwutu lə̂ ngbänga.

¹⁴ Bëte rə ndə̂ a wutu la pö ndə̂nə̈ ësûwu mbötə̂ yê tə̂ rə ndə̂ âwûtu lə̂ ngbänga. Ädə̈ käko ânyë a tô rə̂ päkëdə̂: «Amö jo-ê, momö ndə̂ mo lô âtə. Amö alafô lə̂ gbâtə̂ akuzü, Krîsiti wan-adje ngbänga yê pâ zə̈.»

¹⁵ Äwäpä la nyê gbo pâ kə̂ sə ndə̂ nyê: Nyë mböäbô rə mbô batə̂ angbɨ̈lə̈ azü-î, praâbalë nyë mbö rə batə̂ azü ndə̂ küma andjê wâ lanə̈.

¹⁶ Nyë gböäbô gbôtə̂ dalo ndə̂ nyê âro ämbämbänə̈-ê, bëte alö ndə̂ tchô angaâtə wätə̂ ngbongbo nə̈.

¹⁷ Bëte rə̂ kä, nyë sə̈äbô sə̂ batə̂ angbɨ̈lə̈ azü-î, praâbalë nyë pü köbo ndə̂kə̂ wunsə̂ rə ndə̂ Gbölö Gbïɛ̈ nyîndə̂ nə̈.

¹⁸ Nyë ndjöäbô pî ndjô âmbo nyê bëte ngbongbo rə kä lə̂nə̈, praâbalë nyë gbötə̂ köbo sə̈ Kpɨ̂ki Yingö tche sɨ tchə̂lə̂ su nyê.

¹⁹ Nyë ngbötə̂ nyê kə̂ pa adüwü ndə̂ Mbëtï Ndjapä, adüwü ndə̂kə̂ za voga sə̈ Ndjapä la adüwü ndə̂ Kpɨ̂ki Yingö za rə̂ sə̈ nyê, nyë pä düwü kə̂ voga Gbölö Gbïɛ̈ la su nyê gbɛ̂.

²⁰ Nyë zä ayîabâ sə̈ Ndjapä Bha logbɛ̂ tə̂ pö ndə̂ rə gbɛ̂ la rə̈ Gbölö Gbïɛ̈ ndə̂ azə̂ Jezü Krîsiti.

Kə̂ sə ndə̂ aɛ̈chë la aköchë ndə̂ andjê

²¹ Nyënyê ndə̂ nyê kpe wa Krîsiti, äwäpä nyë dje ma angâ nyê lə̂ gbâtə̂ nyê.

²² Aɛ̈chë, nyë djë ma aköchë ndə̂ nyê batə̂ rə̂ ndə̂ nyê dje ma Gbölö Gbïɛ̈.

²³ Bëte köchë də̈ akrə tə̂ küma ɛ̈chë batə̂ rə̂ ndə̂ Krîsiti də̂ akrə tə̂ küma Egilîze. Krîsiti nə̈ də̈ Earə̂ kə̂ tcha Egilîze ndə̂ âdə̂ tə̂ yê.

²⁴ Batə̂ rə̂ ndə̂ Egilîze dje ma Krîsiti, äwäpä aɛ̈chë dje aköchë ndə̂ andjê lə̂ arə gbɛ̂.

²⁵ Aköchë, nyë nyïndə̂ aɛ̈chë ndə̂ nyê batə̂ rə̂ ndə̂ Krîsiti nyîndə̂ Egilîze ânyë kə̈ zâ tchîsûwu ndə̂ yê bëte rə̂.

²⁶ Ndə̂kə̂ pa Egilîze nə̈ wa ngbî kə̂ daka gbɛ̂, tche djutu rə̂ la ngû lə̂ köbosə̂ pö ndə̂ yê. Rə ndə̂ tche nyîndə̂ nə̈ kä lâme.

²⁷ Tche nyïndə̂ kə̂ mbo rə̂ pä Egilîze nə̈ fu tə̂ gbölösə̂nə̈, ngâ cho grʉabô rə̂ grʉ̂-ê, âsɨkpɨabô sɨ̂kpɨ-î, âdaka gbɛ̂, ânyë tche mbo rə̂ pä äkrʉ tchâtchu yê la tə̂ yê. Tche nyïndə̂ nə̈ pä Egilîze wa ngbî kə̂ daka gbɛ̂, ndə̂ ngâ pö balë wâbô wâ lə̂ küma nə̈-ê.

²⁸ Käko äwäpä köchë nyində̂ ɛ̈chë ndə̂ yê batə̂ tə̂ yê. Akrə ndə̂ tche nyîndə̂ ɛ̈chë ndə̂ yê, tche nyïndə̂ tə̂ yê la tə̂ yê.

²⁹ Bëte ngâ akrə balë kôâbo sə̂ tə̂ yê nə̂-a, praâbalë tche zɨ̈ kɨ̈zɨ̂, kə̂ bata tə̂ yê, batə̂ rə̂ ndə̂ Krîsiti bata Egilîze ndə̂ yê.

³⁰ Bëte azə̈ də̈ atchâme-tə̂ ndə̂ tə̂ yê.

³¹ Ädə̈ käko ânyë Mbëtï Ndjapä tô rə̂ päkëdə̂: «Köchë gboadje tchâtchâ bha la anyï nə̈, kə̂ itə̂ yê la ɛ̈chë ndə̂ yê ânyë andjë bïchuû gbɛ̂ wa batə̂ akrə balë.»

³² Ngâ gbölö pö lə̂ küwû kä lə̂ pö lâme. Mëmê, më tö rə̂ pä, pö nə̈ wä pâ Krîsiti la Egilîze.

³³ Âdə andə̂ nye nə̈, äwäpä akrə balë balë nyində̂ ɛ̈chë ndə̂ yê batə̂ tə̂ yê la tə̂ yê, ânyë ɛ̈chë kpe wa köchë ndə̂ yê.