Ëfêze 4 - Mbëtï Ndjapä: TÄFO MADƗ̈

Tə̂ Krîsiti wä balë

¹ Mëmê ndə̂ më də̂ earə̂ kânga bëte Gbölö Gbïɛ̈, më zä wängö sə̈ nyê ndə̂kə̂ pa nyë mbotə̂ nyê gundə̂sə̂ kə̂ e nyê ndə̂ Ndjapä ê nyê lâme.

² Nyë mbötə̂ nyê kpîɛ̂kpîɛ̂ rə̂, kə̂ mbo rə tə̂ angâ nyê nyima-ë, kə̂ rʉatə̂ su nyê. Nyë rʉ̈ätə̂ su nyê la angâ nyê lə̂kə̂ nyində̂ ngâ.

³ Nyë pü köbo gbɛ̂ ndə̂kə̂ bata kə̂ sə ndə̂ nyê balë lə̂ Kpɨ̂ki Yingö lə̂ köbosə̂ kə̂ sə la zɨtɨ su lə̂ gbâtə̂ nyê.

⁴ Azə̈ gbɛ̂ wätə̂ tə̂ balë ânyë Yingö wâ balë, äwä ndjë batə̂ rə̂ ndə̂ Ndjapä ê nyê ndə̂kə̂ pa nyë za su nyê pâ rə balë.

⁵ Gbölö Gbïɛ̈ wä balë, kə̂ za su sə̈ Ndjapä wâ balë, batɛ̂me wâ balë.

⁶ Ndjapä wä balë, tche də̈ Bha azü gbɛ̂, tche wä gbïɛ̈ pâ azü gbɛ̂, tche mbö rə lə̂ köbosə̂ azü gbɛ̂, kə̈ sə̂ lə̂ azü gbɛ̂.

⁷ Käko azə̂ gbɛ̂ azə̈ gbö arə ndə̂ Yingö ndə̂ Krîsiti kʉ̂ rə̂ sə̈ akrə balë balë gbɛ̂ gundə̂sə̂ tchôtchô su yê.

⁸ Ädə̈ käko anyë a mbô rə̂ lə̂ Mbëtï Ndjapä päkëdə̂: «Ndə̂ tche â atə̂ lafô, tche kʉ̈ angbâa; tche kʉ̈ atchôtchô arə sə̈ azü.»

⁹ «Tche ä atə̂ lafô» änyïndə̂ kə̂ to rə̂ atöko? Änyïndə̂ kə̂ to rə̂ pä dokʉ̈tchê ndə̂kə̂ pa tche a atə̂ lafô, tche jë alême zoo bhâ bêche.

¹⁰ Tchanə̈ ndə̂ tche jê atə̂ bêche lâme, tche də̈ tchanə̈ ndə̂ tche â ngrɨ̈ dəpâ atchêlafô gbɛ̂ ânyë kə̈ sɨ̂ tchîsûwu gbɛ̂.

¹¹ Arə ndə̂ Yingö ndə̂ Krîsiti kʉ̂ rə̂ wä kâkë: Tche kʉ̈ rə̂ sə̈ angânə̈ ndə̂kə̂ watə̂ abadjângele, âdəndjë a-earə̂ ndə̂ma Ndjapä, âdəndjë a-earə̂ kə̂ mu Tchôtchô Pö, âdəndjë a-earə̂ kə̂ sə tə̂ küma Egilîze, âdəndjë a-earə̂ kə̂ nyisə̂ rə.

¹² Tche kʉ̈ arə nə̈ lâme käko ndə̂kə̂ pa azü ndə̂ Ndjapä gbo köbo ndə̂kə̂ mbo kua ndə̂ Ndjapä zâ rə̂ sə̈ andjê ânyë tə̂ Krîsiti ge,

¹³ zoo ndə̂kə̂ pa azə̈ gbɛ̂ wa balë lə̂kə̂ za su sə̈ Ndjapä lakə̂ wunsə̂ Modô ndə̂ yê. Käko azə̂ wadje tə̂ adjêdjena azü lə̂ su azə̂ ndə̂ azə̈ zâ rə̂ sə̈ Ndjapä, ânyë azə̈ ge zoo kə̂ wa batə̂ Krîsiti lə̂ gbölö ndə̂ yê.

¹⁴ Käko azə̂ kä wa bata batə̂ ayɛ̈yɛ̈ abechë tee-a, ndə̂ andjë wâ batə̂ külû la ngû ndə̂ kpabe sə lakə̂ e la rə̂ katchôgbɛ̂ lâme ndə̂, kə̂ nyisə̂ rə ndə̂ a-earə̂ yepa la a-earə̂ kə̂ bolo azü wâ batə̂ yi ndə̂ âro la andjê dəkalâ dəkalâ lâme.

¹⁵ Praâbalë âdə azə̂ âto lëge pö lakə̂ nyində̂ ngâ, azə̂ geadje lə̂ rə gbɛ̂ ndə̂kə̂ wa batə̂ Krîsiti ndə̂ tche wâtə̂ küma nə̈.

¹⁶ Lə̂ köbosə̂ yê kä ndə̂ atchâme-tə̂ gbɛ̂ pâlatə̂ andjê kə̈ wâ balë. Andjë täkpa tə̂ andjê lə̂ köbosə̂ anë kʉ̂tê. Âdə tchâme-tə̂ akrə balë balë âsə lakə̂ mbo kua ndə̂ yê, kʉ̂tê nə̈ gbɛ̂ âge kə̂ nyikrətə̂ yê lə̂kə̂ nyində̂ ngâ.

Täfo kə̂ sə lə̂ Krîsiti

¹⁷ Më tö pö atə̂ sə̈ nyê, kə̈ nyîndə̂ nə̈ tə̂ lëge nə̈ la rə̈ Gbölö Gbïɛ̈ päkëdə̂: Nyë kä mbôâbô rə mbô batə̂ azü ndə̂ andjë wûn-âbo sə̂ Ndjapä wûn lâme-ê, ndə̂kə̂ wunsə̂ rə ndə̂ andjê wâ ämbämbänə̈ lâme-a.

¹⁸ Kə̂ za küma andjê wä lə̂ bübü nə̈, andjë wâbo la tchîsûwu ndə̂ Ndjapä za rə̂ sə̈ azü-a, bëte andjë wûn-âbo sə̂ rə-a, ânyë âmbô rə̂ pä andjë wa la gbôgbô su.

¹⁹ Andjë wûn-âbo sə̂kə̂ krʉ tchə̂lə̂ tchôtchô rə la ngbongbo rə-a, ädə̈ käko ânyë andjë zâtə̂ andjê ndə̂kə̂ pu aɛ̈chë âdəndjë aköchë katchôgbɛ̂. Andjë mbö arə kâkpö balë balë gbɛ̂ kə̈ gbôâbo tə̂ köbo nə̈-a.

²⁰ Âdə andə̂ nye nə̈, âdə̂âbo käko kä ndə̂ a nyîsə̂ kə̂ wunsə̂ Krîsiti sə̈ nyê-a.

²¹ Âdə tchetchë tə̂ lëge nə̈ kä ndə̂ nyë djê pö ndə̂ yê, âdə pö pâ yê kä ndə̂ a nyîsə̂ nə̈ sə̈ nyê gundə̂sə̂ lëge pö ndə̂ âwâ lə̂ Jezü:

²² Äwäpä nyë gbotə̂ bəndɨ kə̂ sə ndə̂ nyê, kə̂ jitə̂ nyê tə̂ bəndɨ kə̂ mbo rə ndə̂ nyê, ndə̂ âmbo rə̂ pä gʉ su nyê bolo nyê ndə̂kə̂ pa nyë ndɨ-î.

²³ Äwäpä nyë gbotə̂ köbo sə̈ Yingö ndə̂ Ndjapä, tche mbo rə̂ ndə̂kə̂ pa köbo kə̂ za küma nyê kä watə̂ täfo nə̈.

²⁴ Batə̂ rə̂ ndə̂ akrə yu täfo lə̂ba ëtə̂ yê, äwäpä nyë yu täfo akrə ndə̂ a mbô tchë lə̂ köbosə̂ nə̈ ndə̂ Ndjapä nyîndə̂ nə̈. Lə̂ köbosə̂ lëge pö kä ndə̂ akrə wa djîrə̂, kə̂ wa ngbî ânyë kə̂ daka gbɛ̂.

²⁵ Bëte rə̂ kä, nyë gbötə̂ kə̂ mo yepa-ê: Äwäpä akrə balë balë to lëge pö sə̈ ngâ yê, bëte azə̈ gbɛ̂ wä batə̂ atchâme-tə̂ akrə balë.

²⁶ Âdə mêrâ âmbo nyê, nyë mböäbô ngbongbo rə mbô-ê, âwâbo pä lo zɨ tə̂ nyê la mêrâ lə̂ nyê-a.

²⁷ Nyë gböäbô gbôtə̂ köbo sə̈ Jâbolo-ê.

²⁸ Äwäpä earə̂ ngbä gbotə̂ kə̂ zɨ ngbä-ê, kə̂ za gbôgbô ndə̂ yê gbɛ̂ ndə̂kə̂ mbo kua la könô yê la tə̂ yê la köbo nə̈, kə̂ gbo rə ânyë kə̂ kʉ ngânə̈ sə̈ akrə ndə̂ tche wâbô wâ la rə̂-ê.

²⁹ Âwâbo pä ngâ ngbongbo pö balë wutu lə̂ ma nyê-a. Praâbalë âdə köbo âwa, nyê to kütû tchôtchô pö ndə̂ âmbo rə̂ pä angâ nyê kpokpo tə̂ andjê, ânyë âmbo dâkâ tə̂ azü ndə̂ andjë dje nyê.

³⁰ Nyë zäbô nyonyo zâ sə̈ Kpɨ̂ki Yingö-ê, bëte lə̂ köbosə̂ Yingö nə̈ lâme, Ndjapä mbö ngâ sɨ̂nyî rə tə̂ nyê bëte lö kə̂ ji nyê lə̂ ngbongbo rə tratralë-ê.

³¹ Nyë zäbô akrə zâ tə̂ su nyê-ê, su nyê hröäbô hrô-ê, nyë mböäbô mêrâ mbô-ê, nyë täbô wârə̂ tâ lə̂ küma akrə-ê, kə̂ droabô akrə drô-ê, angbongbo rə lâme gbɛ̂, nyë kä mbô bata rə̂ mbô-ê la adɨ̂ angbongbo rə balë balë gbɛ̂.

³² Nyë mbö tchôtchô rə lə̂ gbâtə̂ nyê, kə̂ wun nyonyo angâ nyê, nyë kö pö lə̂ küma angâ nyê lə̂ gbâtə̂ nyê, batə̂ rə̂ ndə̂ Ndjapä kô pö lə̂ küma nyê lə̂ köbosə̂ Krîsiti.