Ëfêze 2 - Mbëtï Ndjapä: TÄFO MADƗ̈

Kə̂ wutu lə̂ kuzü lakə̂ gbo tchîsûwu

¹ Dokʉ̈tchê alême nyë wä batə̂ azü ndə̂ andjë tchû lə̂ köbosə̂ kə̂ mbo rə ndə̂ nyê ndə̂ âwâbô wâ lə̂ köbo nə̈-ê, la ngbongbo rə ndə̂ nyê.

² Nyë mbö rə alême batə̂ kə̂ mbo rə ndə̂ azü tchêbêche atə̂, kə̈ djê ma makündji ndə̂ angbongbo atchozö, ndə̂ tche sə̂ lə̂ gûtə̂ tchêbêche la tchêlafô, tchetchë kä âkə̂ mbo rə̂ angaâtə lə̂ su azü ndə̂ andjë kôsə̂ pö ma Ndjapä.

³ Azə̈ gbɛ̂, azə̈ mbö ndjë rə alême batə̂ andjê: Azə̈ mbö rə alême gundə̂sə̂ gʉ su azə̂, azə̈ mbö rə ndə̂ tə̂ azə̂ yûkû nə̈, la rə ndə̂ su azə̂ nyîndə̂ nə̈. Tə̂ pö ndə̂nə̈ ndə̂ azə̈ wâ alême käko lâme, azə̈ wä ndjë alême ndə̂kə̂ gbo mêrâ ndə̂ Ndjapä batə̂ azü gbɛ̂.

⁴ Praâbalë Ndjapä wün nyonyo azə̂ tə̂ gbölösə̂nə̈, bëte tche nyïndə̂ azə̂ tə̂ gbölösə̂nə̈.

⁵ Ndə̂ azə̈ wâ alême batə̂ azü ndə̂ andjë tchû lə̂ köbosə̂ kə̂ mbo rə ndə̂ azə̂ ndə̂ âwâbô wâ lə̂ köbo nə̈-ê, tche zâ tchîsûwu sə̈ azə̂ lə̂ köbosə̂ Krîsiti. Âwâ lə̂ köbosə̂ tchôtchô su ndə̂ Ndjapä ânyë a tchâ nyê.

⁶ Lə̂ köbosə̂ nə̈ ndə̂ azə̈ wâ balë la Jezü Krîsiti, Ndjapä jö azə̂ lə̂ kuzü, kə̈ mbô rə̂ pä azə̈ sə la tchë bhâ lafô.

⁷ Käko Ndjapä mbö dâkâ tə̂ azə̂ lə̂ köbosə̂ Jezü Krîsiti, kə̈ nyîndə̂ kə̂ nyisə̂ tchôtchô rə ndə̂ ârô adɨ̂ nə̈ gbɛ̂ lə̂ köbosə̂ tchôtchô su yê lə̂ tchîsûwu ndə̂ ânə.

⁸ Bëte a tchä nyê lə̂ köbosə̂ tchôtchô su, lə̂ köbosə̂ kə̂ za su nyê sə̈ Ndjapä. Kə̂ tcha lə̂ kuzü lâme tôâbo bhândə̂ nyê-a, Ndjapä kä âkə̈ zâ rə̂.

⁹ Kə̂ tcha lə̂ kuzü lâme nə̂âbo ngbâ kə̂ mbo kua ânyë akrə bhi gogo yê pânə̈-a.

¹⁰ Bëte Ndjapä kä ndə̂ âmbô azə̂, a mbö azə̂ lə̂ köbosə̂ kə̂ wa balë ndə̂ azə̂ la Jezü Krîsiti, ndə̂kə̂ pa azə̈ mbo atchôtchô arə ndə̂ tche nyikrə rə̂ dokʉ̈tchê ndə̂kə̂ pa azə̈ mbo rə̂.

Kə̂ wa balë la Krîsiti

¹¹ Nyënyê ndə̂ nyë wâbo wâtə̂ ajuîfu lâme, äwäpä köbo kə̂ sə ndə̂ nyê dokʉ̈tchê alême, sə̂nə̈ te lə̂ nyê! Ajuîfu wün nyê batə̂ azü ndə̂ andjë wâbô gasa wâ, andjendjê ndə̂ andjë tô rə̂ pä anyë də̈ a-earə̂ kə̂ wa gasa lâme, dëkë könô akrə kä ndə̂ âwâ gasa nə̈ tə̂ mbë andjê.

¹² Sə̂nə̈ lâme, nyë wâbo la Krîsiti-a, kə̈ wâbo lə̂ arə ndə̂ âwâtə̂ andə̂ azü gö ndə̂ Isarayële-a. Nyë wâbo lə̂ amadɨ̈ ndə̂ Ndjapä ndə̂ tche zâ bâlâ nə̈ lâme-a, nyë wâbo la ngâ rə ndə̂ nyê za su nyê pânə̈-a, kə̈ wâbo la Ndjapä pâ cho âtə-a. Äwäpä sə̂nə̈ te ndjë lə̂ nyê.

¹³ Praâbalë angaâtə, ndə̂ nyë wâ balë la Jezü Krîsiti lâme, nyënyê ndə̂ nyë sə̂ alême ngrɨ̈ tə̂ Ndjapä, âmbô rə̂ ânyë nyë gîtə̂ nyê nə̂ ndola tchë lə̂ köbosə̂ jï Krîsiti.

¹⁴ Bëte Krîsiti kä ndə̂ ânə̂ la zɨtɨ su sə̈ azə̂, kə̈ mbô rə̂ pä ajuîfu la azü ndə̂ andjë wâbô wâtə̂ ajuîfu, andjë wâtə̂ azü gö balë. Lə̂ köbosə̂ kə̂ zatə̂ yê la kuzü, tche ndɨ̈ tchə̂lə̂ gbadja ndə̂ âkrʉ̂ tchə̂lə̂ azə̂, ndə̂ âmbô rə̂ alême pä azə̈ kosə̂ angâ azə̂ lâme.

¹⁵ Tche wrʉ̂ ndïɛ̈ ndə̂ Möyîze, la apö gbɛ̂ ndə̂ âwâ lə̂nə̈ lâme nə̂. Tche nyïndə̂ kə̂ pala ajuîfu la azü ndə̂ andjë wâbô wâtə̂ ajuîfu ndə̂kə̂ pa andjë wa batə̂ täfo akrə ndə̂ andjë wâ balë la tchë. Käko kä ndə̂ tche nə̂ la zɨtɨ su.

¹⁶ Krîsiti päla andjê ëtâ batə̂ akrə balë, kə̈ nyïkrə tchôtchô kə̂ sə lə̂ gbâtə̂ andjê la Ndjapä lə̂ köbosə̂ kuzü ndə̂ yê pâ yö ndə̂ gba. Lə̂ köbosə̂ yö ndə̂ gba lâme, tche ndɨ̂ ndjë tchə̂lə̂ kə̂ kosə̂ ngâ nə̂.

¹⁷ Tche nə̈ ndə̂kə̂ mu Tchôtchô Pö ndə̂ zɨtɨ su sə̈ nyê ndə̂ nyë sə̂ ngrɨ̈ alême, la andjanə̈ ndə̂ andjë sə̂ ndjë ndö alême.

¹⁸ Bëte Krîsiti kä ndə̂ âmbô rə̂ pä ajuîfu la azü ndə̂ andjë wâbô wâtə̂ ajuîfu, azə̈ gitə̂ azə̂ ndola Ndjapä Bha lə̂ köbosə̂ Yingö balë.

¹⁹ Käko nyë kä wâ bata tə̂ azü ndə̂ ngâ gö ngbî-a, âdəndjë azü ndə̂ andjë nə̂nə̈-a. Praâbalë nyënyê la azü ndə̂ Ndjapä, nyë wâ nə̂ batə̂ azü gö balë, kə̈ wâ nə̂ tə̂ azü lə̂ bûngrɨ̂ ndə̂ Ndjapä.

²⁰ Nyë wä batə̂ nda ndə̂ a mbô rə̂, ndə̂ da nda nə̈ də̂ abadjângele la a-earə̂ ndə̂ma Ndjapä. Jezü Krîsiti la tə̂ yê kä ndə̂ âwâtə̂ gbôgbô täme ndə̂ da nda nə̈.

²¹ Lə̂ köbosə̂ kə̂ wa balë la tchë kä ndə̂ anda gbɛ̂ kpokpo tə̂ andjê, kə̂ ge, ânyë kə̂ mbotə̂ yê tə̂ gbölö nda Ndjapä ndə̂ âwâ ngbî ânyë kə̈ dâka gbɛ̂ bëte Gbölö Gbïɛ̈.

²² Lə̂ köbosə̂ Krîsiti kä ndə̂ nyënyê ndjë gbɛ̂ nyë wâ nə̂ nyɛ̂ɛ̂ balë tə̂ nda ndə̂kə̂ watə̂ nda ndə̂ Ndjapä sə lə̂nə̈ lə̂ köbosə̂ Yingö ndə̂ yê.