Ëfêze 1 - Mbëtï Ndjapä: TÄFO MADƗ̈

Kə̂ po ndə̂ azü

¹ 5Mëmê Pôlo më wätə̂ badjângele ndə̂ Jezü Krîsiti, lə̂ köbosə̂ nə̈ ndə̂ Ndjapä nyîndə̂ nə̈, më mbö mbëtï âtə sə̈ azü ndə̂ Ndjapä ndə̂ andjë sə̂ bhâ [Ëfêze], andjanə̈ ndə̂ andjë zâ su andjê gbɛ̂ sə̈ Ndjapä ânyë kə̈ wâ balë la Jezü Krîsiti.

² Äfü pä Ndjapä Bha azə̂ la Gbölö Gbïɛ̈ Jezü Krîsiti mbo tchôtchô su tə̂ nyê kə̂ za zɨtɨ su sə̈ nyê.

Atchôtchô rə ndə̂ azə̈ gbo rə̂ lə̂kə̂ wa balë la Krîsiti

³ Azə̈ voga Ndjapä Bha Gbölö Gbïɛ̈ ndə̂ azə̂ Jezü Krîsiti! Tche kʉ̈ arə ndə̂ Yingö gbɛ̂ ndə̂ âwâ bhâ lafô sə̈ azə̂, lə̂ köbosə̂ nə̈ ndə̂ azə̈ wâ balë la Krîsiti.

⁴ Dokʉ̈tchê ndə̂kə̂ pa a mbo tchîsûwu, Ndjapä dɨ̈ azə̂ ndə̂kə̂ pa azə̈ wa balë la tchë ânyë azə̈ watə̂ azü ndə̂ andjë wâ ngbî ânyë kə̈ dâka gbɛ̂, ndə̂ pö wâbô wâ lə̂ küma andjê lə̂ la yê. Lə̂ köbosə̂ nə̈ ndə̂ Ndjapä nyîndə̂ azə̂,

⁵ tche nyïkrə rə̂ dokʉ̈tchê ndə̂kə̂ pa azə̈ watə̂ abechë ndə̂ yê lə̂ köbosə̂ Jezü Krîsiti, tchôtchô kə̂ mbo rə ndə̂ yê ndə̂ tche nyîndə̂ kə̂ mbo rə̂ kä lâme.

⁶ Azə̈ vöga Ndjapä ndə̂ tche wâ gbölö, ndə̂ tche mbô tchôtchô su tə̂ azə̂ lə̂ köbosə̂ Modô ndə̂ yê ndə̂ tche nyîndə̂ yê tə̂ gbölösə̂nə̈.

⁷ Lə̂ köbosə̂ nə̈ ndə̂ azə̈ wâ balë la Krîsiti, a jï azə̂ lə̂ ngbongbo rə lə̂ köbosə̂ jï yê, kə̈ kô pö lə̂ küma azə̂, lə̂ köbosə̂ tchôtchô rə ndə̂ tchôtchô su yê.

⁸ Ndjapä kʉ̈ atchôtchô arə sə̈ azə̂ tə̂ gbölösə̂nə̈, tche mbö rə̂ pä küma azə̂ wa lanə̈, kə̈ zâ kə̂ wunsə̂ rə gbɛ̂ sə̈ azə̂.

⁹ Tche mbö rə̂ pä azə̈ wunsə̂ rə ndə̂ tche nyîkrə rə̂, ndə̂ âwâ lə̂ küwû nə̈. Lə̂ tchôtchô kə̂ wun tchô ndə̂ yê, tche nyïkrə rə̂ alême dokʉ̈tchê ndə̂kə̂ mbo rə̂ lə̂ köbosə̂ Krîsiti.

¹⁰ Rə ndə̂ tche nyîkrə rə̂ bhâtə̂ su yê lâme, wä ndə̂kə̂ pa âdə lo nə̈ âta tâ, tche pala arə gbɛ̂ ndə̂ âwâ bhâ lafô la anə̈ ndə̂ âwâ bêche tchâtchâ makündji balë ndə̂ tche də̂ Krîsiti.

¹¹ Ndə̂ azə̈ wâ ndjë balë la Krîsiti, azə̈ gbö andə̂ azə̂ nə̈ arə ndə̂ tche nyîkrə rə̂ dokʉ̈tchê lə̂ köbosə̂ nə̈ ndə̂ tche dɨ̂ azə̂ ndə̂kə̂ gbo rə̂. Tche mbö arə nə̈ gbɛ̂ batə̂ rə̂ ndə̂ su yê nyîndə̂ nə̈.

¹² Äwäpä ârâ voga Ndjapä ndə̂ tche wâ gbölö, ârâ ndə̂ ârâ də̂ adokʉ̈ azü ndə̂ ârâ zâ su ârâ pâ Krîsiti.

¹³ Ndə̂ ârâ wâ balë la Krîsiti, nyënyê ndjë gbɛ̂, nyë djê lëge pö nə̂, Tchôtchô Pö ndə̂ âmbô rə̂ ânyë nyë tchâ lə̂ kuzü. Nyë zâ su nyê gbɛ̂ sə̈ Krîsiti nə̂, käko, Ndjapä mbö ngâ sɨ̂nyî rə ndə̂ yê tə̂ nyê, sɨ̂nyî rə nə̈ lâme də̈ Kpɨ̂ki Yingö, ndə̂ tche zâ bâlâ tə̂ yê alême.

¹⁴ Kpɨ̂ki Yingö nə̈ də̈ dokʉ̈ tchâkalâ tchôtchô rə ndə̂ azə̈ gboadje rə̂ tchânə̂ Ndjapä. Azə̂ gboadje rə̂ gbɛ̂ tə̂ lo nə̈ ndə̂ a ji azə̂ lə̂ ngbongbo rə tratralë. Azə̈ vöga Ndjapä ndə̂ tche wâ gbölö.

Pôlo tö pö sə̈ Ndjapä

¹⁵ Bëte rə̂ kä, ndə̂ më djê pö ndə̂ su nyê ndə̂ nyë zâ rə̂ sə̈ Gbölö Gbïɛ̈ Jezü, la rə̂ ndə̂ nyë nyîndə̂ azü ndə̂ Ndjapä gbɛ̂,

¹⁶ më gbôâbo tə̂kə̂ za ayîabâ sə̈ Ndjapä tə̂ po ndə̂ nyê-a, sə̂nə̈ ndə̂ mê sə lakə̂ to pö sə̈ tchë la rə̈ nyê.

¹⁷ Më yükû nə̈ sə̈ Ndjapä ndə̂ Gbölö Gbïɛ̈ ndə̂ azə̂ Jezü Krîsiti, Bha ndə̂ tche wâ gbölö, ndə̂kə̂ pa tche za Yingö ndə̂ küma ndə̂ âwa lanə̈ sə̈ nyê. Yingö nə̈ nyiadje sə̂ apö pâ Ndjapä sə̈ nyê, kə̂ mbo rə̂ pä nyë wunsə̂ yê tə̂ lëge nə̈.

¹⁸ Äwäpä tche ji tchə̂lə̂ su nyê ndə̂kə̂ pa nyë wunsə̂ rə ndə̂ tche ê nyê ndə̂nə̈, ndə̂ nyë krʉ̂ bëte rə̂, kə̂ wunsə̂ tchôtchô rə ndə̂ ârô masə̂nə̈, ndə̂ tche nyîkrə rə̂ bëte azü ndə̂ yê.

¹⁹ Nyê wun-adje ndjë sə̂ gbôgbô ndə̂ ârôpâ agbôgbô gbɛ̂, ndə̂ tche nyîsə̂ nə̈ sə̈ azə̂ ndə̂ azə̈ zâ su azə̂ sə̈ tchë. Gbôgbô lâme kä ndə̂

²⁰ Ndjapä mbô rə̂ lə̂ köbosə̂ Krîsiti, ndə̂ Ndjapä jô tchë lə̂ kuzü, ânyë kə̈ mbô rə̂ pä tche sə də ndôkö könô yê bhâ lafô.

²¹ Bhâye, Krîsiti sə̈ pâ akümändëmä gbɛ̂, agbôgbô gbɛ̂, amakündji gbɛ̂, la angâ arə̈ gbɛ̂ ndə̂ âwâ ndə̂kə̂ pa a e rə̂, lə̂ tchîsûwu atə̂ la tchîsûwu ndə̂ ânə.

²² Ndjapä kʉ̈ arə gbɛ̂ ëtchâtchâ da Krîsiti. Tche zä Krîsiti pâ arə gbɛ̂, ânyë kə̈ zä tchë batə̂ akrə tə̂ küma Egilîze.

²³ Egilîze nə̈ lâme də̈ tə̂ Krîsiti, Krîsiti nə̈ sɨ̂sɨ̈ lə̂ Egilîze nə̈ gbɛ̂, tchetchë ndə̂ Krîsiti nə̈ lâme, Ndjapä sɨ̂sɨ̈ lə̂ yê gbɛ̂.