Dokʉ̈ Timotë 6 - Mbëtï Ndjapä: TÄFO MADƗ̈

¹ Azü gbɛ̂ ndə̂ andjë wâtə̂ angbâa, äwäpä andjë lusə̂ a-earə̂ andjê, gundə̂sə̂ nə̈ ndə̂ andjë kʉ̂sə̂ nə̈ ndə̂kə̂ pa a kpe wa andjê. Käko ânyë a droabô rə̈ Ndjapä drô-ê, kə̂ droabô ndjë kə̂ nyisə̂ rə ndə̂ ârâ drô-ê.

² Angbâa ndə̂ a-earə̂ andjê wâtə̂ azü ndə̂ Krîsiti, andjë wätə̂ arə̂mâ ndə̂ andjê lə̂ Krîsiti. Âdə̂âbo anə̈ lâme kä ndə̂ âkitə̂ köbo tə̂ andjê ndə̂kə̂ lusə̂ a-earə̂ andjê nə̈-a, praâbalë äwäpä angbâa nə̈ ka mbô kua ndə̂ a-earə̂ andjê nə̈ âro anə̈ dokʉ̈tchê, bëte a-earə̂ andjê nə̈, ndə̂ andjë gbo rə ngbâ kua ndə̂ angbâa lâme, andjë wâ nə̂ tə̂ azü ndə̂ Krîsiti, kə̈ wâtə̂ arə̂mâ ndə̂ andjê, ânyë Ndjapä nyïndə̂ andjê tə̂ gbölösə̂nə̈. Rə ndə̂ âwâ pä mo nyisə̂ nə̈, kə̂ zama tə̂ pö ndə̂nə̈ kä âtə:

Ngbongbo kə̂ nyisə̂ rə la lëge kə̂ gbo rə

³ Âdə ngâ akrə ânyisə̂ ngâ pö ngbî, ânyë kə̈ zâbô tə̂ yê zâ tə̂ alëge apö ndə̂ Gbölö Gbïɛ̈ ndə̂ azə̂ Jezü Krîsiti-î, lakə̂ nyisə̂ rə ndə̂ âwâbô wâ gundə̂sə̂ apö ndə̂kə̂ zatə̂ andjê sə̈ Ndjapä-ê,

⁴ dëkë tche bhï gogo yê lə̂ wünwün nə̈. Tche wûn-âbo sə̂ rə balë-a, tche kä la tə̂kömbô ndə̂kə̂ gama yê la azü, ndjë lakə̂ po tə̂ pö ndə̂ ada apö. Arə lâme kä ndə̂ ânə la gbölö su, kə̂ po lə̂ gbâtə̂ azü, kə̂ dro tchô, kə̂ to angbongbo apö tə̂ azü,

⁵ kə̂ gama lə̂ gbâtə̂ azü ndə̂ âkâbô kâ-ê. Kə̂ wunsə̂ rə ndə̂ andjê wâtə̂ ngôlê-ngölë nə̈. Lëge pö wâbo lə̂ andjê-a, bëte andjë wûntî pä kə̂ zatə̂ andjê gbɛ̂ sə̈ Ndjapä wätə̂ köbo ndə̂kə̂ gbo arə.

⁶ Ɛn-ɛn! Kə̂ zatə̂ andjê gbɛ̂ sə̈ Ndjapä wätə̂ köbo ndə̂kə̂ gbo arə tə̂ gbölösə̂nə̈, lə̂ köbosə̂ nə̈ ndə̂ akrə zâ su yê kütû pâ rə ndə̂ tche wâ la rə̂.

⁷ Bëte azə̈ nə̂âbo la ngâ rə balë atə̂ bêche âtə-a, käko ndjë, azə̈ wâbo ndə̂kə̂ gu la ngâ rə balë-a.

⁸ Käko âdə azə̂ âwa la kɨ̈zɨ̂ la lə̂ba, äwäpä su azə̈ wa kütû pânə̈.

⁹ Andə̂ andjanə̈ ndə̂ andjë nyîndə̂ kə̂ gbo rə tə̂ gbölösə̂nə̈ lâme, andjë të la kû ndə̂ arə ndə̂ âbolo azü, la angbängbä angbongbo agʉ ndə̂kə̂ gbo rə, ndə̂ ândɨ azü, ânyë kə̂ e la andjê pu kuzü.

¹⁰ Bëte chëchë angbongbo arə balë balë gbɛ̂ də̈ kə̂ nyində̂ makətche. Angâ azü gbötə̂ köbo, kə̂ ê tʉ̂rʉ tə̂ su andjê ndə̂ andjë zâ rə̂ sə̈ Krîsiti tə̂ pö ndə̂ kə̂ nyində̂ makətche. Andjë zä nyonyo tə̂ su andjê la tə̂ andjê lə̂ köbosə̂ tchə̂lə̂ küma andjê ndə̂ âdjîngɨli.

Pôlo zä wängö sə̈ Timotë

¹¹ Âdə andə̂ zə nə̈, akrə ndə̂ Ndjapä, amö kpe tə̂ arə lâme gbɛ̂. Amö pu köbo djîrə̂ rə, kə̂ zatə̂ zə̈ gbɛ̂ sə̈ Ndjapä, kə̂ za su zə̈ sə̈ Krîsiti, kə̂ nyində̂ ngâ, kə̂ mbo rə nyima-ë.

¹² Amö mbo tchôtchô kʉ̈ʉ̈ lə̂ köbosə̂ kə̂ za su sə̈ Krîsiti. Amö za tchîsûwu ndə̂ logbɛ̂ logbɛ̂ ndə̂ a ê mö ndə̂kə̂ gbo rə̂ lâme, ndə̂ mo gâmba pö ndə̂kə̂ za su zə̈ sə̈ Krîsiti kraâ alême lə̂ la angbängbä azü ndə̂ andjë sə̂ sə̂nə̈.

¹³ Më zäma sə̈ mö tchâtchu Ndjapä ndə̂ tche za tchîsûwu sə̈ arə gbɛ̂, ndjë tchâtchu Jezü Krîsiti ndə̂ tche tô tchôtchô pö tchâtchu Pônse Pïlâte, tə̂ pö ndə̂ su yê ndə̂ tche zâ rə̂ sə̈ Ndjapä.

¹⁴ Amö bata ndïɛ̈ ndə̂ Ndjapä, âwâbo pä ngâ ngbongbo rə balë wa lə̂ zə̈-a, âwâbo pä a gbo ngâ pö ndə̂kə̂ gbɨtɨ tü balë lə̂ küma zə̈-a. Amö mbo tâ käko ndjoa ëtə̂ kə̂ ka ndə̂ Gbölö Gbïɛ̈ ndə̂ azə̂ Jezü Krîsiti.

¹⁵ Tche âkangbâ yê tə̂ lo nə̈ ndə̂ Ndjapä nyîkrə rə̂. Ndjapä ndə̂ a to tchôtchô pö ndə̂ yê, tche wä gbokôngô, ânyë kə̈ wâ pâ arə gbɛ̂. Tche wätə̂ Gbïɛ̈ ndə̂ agbïɛ̈ gbɛ̂, Gbölö Gbïɛ̈ ndə̂ agbölö gbïɛ̈ gbɛ̂.

¹⁶ Tchetchë balë kä ndə̂ âwâbô wâ ndə̂kə̂ tchu-î, ndə̂ tche sə̂ lə̂ ngbänga, ndə̂ ngâ akrə ndə̂kə̂ ndo la sə̂nə̈ sə̂âbo-a. Ngâ akrə balë ndə̂ tche wûn Ndjapä sə̂âbo-a, ânyë ngâ akrə balë ndə̂ tche kʉ̂sə̂ kə̂ wun tchë sə̂âbo-a. Kə̂ lusə̂tə̂ la gbôgbô wätə̂ andə̂ ye nə̈ tə̂ logbɛ̂ logbɛ̂! Amin.

¹⁷ Andə̂ a-earə̂ kə̂ gbo arə tchêbêche âtə, amö zama sə̈ andjê pä andjë bhiabô gogo andjê bhî, kə̂ zabô su andjê zâ pâ kə̂ gbo rə ndə̂ tchêbêche, ndə̂ âchiabô chî lâme-ê. Praâbalë äwäpä andjë za su andjê pâ Ndjapä, tchetchë ndə̂ tche kʉ arə gbɛ̂ sə̈ azə̂ tə̂ gbölösə̂nə̈, ndə̂kə̂ pa su azə̂ wa la mômô lə̂ köbosə̂ nə̈.

¹⁸ Amö to rə̂ sə̈ andjê ndə̂kə̂ pa andjë mbo dâkâ, kə̂ mbo atchôtchô kua tə̂ gbölösə̂nə̈, kə̂ kʉ rə la su andjê balë, kə̂ krʉ tchə̂lə̂ rə ndə̂ andjê la angâ andjê.

¹⁹ Käko andjê paladje arə ndə̂ andjê la tə̂ andjê bhâlə̂ tchôtchô gro ndə̂ âwâtə̂ gbôgbô nə̈, bëte tchêlâmbo. Käko ânyë andjë gbo lëge tchîsûwu.

²⁰ Timotë, amö bata rə ndə̂ Ndjapä gbôtâ ëtchânə̂ zə̈ lâme. Amö kpe tə̂ awünwün apö ndə̂ âwa ngbî tə̂ pö ndə̂kə̂ za su sə̈ Krîsiti lâme. Amö kpe ndjë tə̂ apö kə̂ gama pâ angbongbo kə̂ wunsə̂ rə.

²¹ Angâ azü gämba apö nə̈ lâme, ânyë kə̈ gbôtə̂ köbo su andjê ndə̂ andjë zâ rə̂ sə̈ Krîsiti lâme. Äfü pä Ndjapä mbo tchôtchô su tə̂ nyê.