Dokʉ̈ Timotë 5 - Mbëtï Ndjapä: TÄFO MADƗ̈

Köbo kə̂ mbo rə tə̂ azü ndə̂ Krîsiti

¹ Amö gbɨtɨabô tü akrə ndə̂ tche dû gbɨ̂tɨ la gbôgbô-ê, praâbalë äwäpä mo za wängö sə̈ tchë batə̂ bha zə̈. Amö za wängö sə̈ abechë-ɛ̈köchë batə̂ arə̂mâ ndə̂ zə̈,

² kə̂ za rə̂ sə̈ akpôkpô aɛ̈chë batə̂ araanyï zə̈, kə̂ za rə̂ sə̈ abechë-ɛ̈chë batə̂ araanyînə̂ zə̈ la grôgrô su.

³ Amö lusə̂ aɛ̈chë lə̂ ndavrö, ndə̂ andjë wâtə̂ alëge aɛ̈chë lə̂ ndavrö.

⁴ Âdə ngâ ɛ̈chë lə̂ ndavrö âwa la abechë âdəndjë araâta nə̈, andjendjê kä ndə̂ âzatə̂ andjê gbɛ̂ ndə̂kə̂ mbo rə̂ la azü lə̂ bûngrɨ̂ ndə̂ andjê la tə̂ andjê dokʉ̈tchê, kə̂ gi arə ndə̂ arabha la araanyï andjê mbô rə̂ tə̂ andjê alême sə̈ andjê ëngbânə̈. Tə̂ lëge nə̈, rə ndə̂ âdâka lə̂ la Ndjapä kä lâme.

⁵ Âdə andə̂ tchanə̈ ndə̂ tche wâtə̂ lëge ɛ̈chë lə̂ ndavrö, ndə̂ tche sə̂ la kütû yê, tche zä su yê pâ Ndjapä, kə̂ rʉatə̂ su yê dalobiî lakə̂ dɨ tchə̂lə̂ ma yê sə̈ Ndjapä, ndjë lakə̂ to pö sə̈ tchë.

⁶ Praâbalë tchanə̈ ndə̂ gbô arə tchêbêche âtə ndə̂po lakə̂ tcho tə̂ yê, tche tchû nə̂, ndə̂ gbô tchë ndə̂po la tʉ̈rʉ̂ la yê lâme.

⁷ Arə ndə̂ âwâ pä mo zama tə̂ pö ndə̂nə̈ kä lâme, ânyë a gboabô ngâ pö gbô balë ndə̂kə̂ gbɨtɨ tü aɛ̈chë lə̂ ndavrö la rə̂-ê.

⁸ Âdə ngâ akrə âbatabô azü lə̂ bûngrɨ̂ ndə̂ yê bâta, tə̂ gbogbôsə̂nə̈ azü ndə̂ andjë sə̂ lə̂ nda ndə̂ yê, dëkë tche gbôtə̂ köbo su yê ndə̂ tche zâ rə̂ sə̈ Krîsiti nə̂, ngbongbo rə ndə̂ yê lâme, rö andə̂ akrə ndə̂ tche zâbô su yê zâ sə̈ Krîsiti dämba-ê.

⁹ Âdə mo ânyində̂ kə̂ mbo rə̈ ngâ ɛ̈chë lə̂ mbëtï ndə̂ aɛ̈chë lə̂ ndavrö, äwäpä tche wa la ngû ndola tə̂ azü vötaâ ânyë. Ndjë äwäpä tche watə̂ ɛ̈chë ngbâ köchë kütû balë.

¹⁰ Äwäpä azü wunsə̂ yê la atchôtchô kua ndə̂ tche mbô rə̂: Tche də̈ akrə ndə̂ tchê bata abechë, kə̂ wunsə̂ kə̂ kʉ ayirə bhândə̂ yê, kə̂ djutu da azü ndə̂ Ndjapä, kə̂ za könô sə̈ azü ndə̂ andjë sə̂ lə̂ nyonyo. Tche də̈ akrə ndə̂ tche mbo tchôtchô rə balë balë gbɛ̂.

¹¹ Âdə andə̂ aɛ̈chë lə̂ ndavrö ndə̂ gbô andjê ndə̂po tə̂ abechë-ɛ̈chë, amö mboabô rə̈ andjê mbô lə̂ mbëtï-ê, bëte âdə gʉ su andjê âalafô tə̂ andjê me nə̂, andjê gboadje tə̂ köbo Krîsiti ndə̂kə̂ kä to aköchë.

¹² Kə̂ mbo tə̂ rə käko lâme wä ngbanga pâ andjê, bëte andjë gbôtə̂ köbo dokʉ̈ pö ma andjê ndə̂ andjë zâ rə̂ alême nə̂.

¹³ Pâ arə lâme gbɛ̂, andjë mbôâbo kua-a, ânyë kua ndə̂ andjê wä kütû ndə̂kə̂ nə kulə̂ manda azü. Âdə̂âbô kütû tə̂ pö ndə̂nə̈ ndə̂ andjë mbôâbo kua mbô lâme kä me-a, praâbalë andjë dɨ̈ apö tə̂ gbölösə̂nə̈, kə̈ vûâbo sə̂ apö-a, kə̂ yitə̂ andjê lə̂ arə ndə̂ âwûn-âbô andjê wûn-î.

¹⁴ Më nyïndə̂ nə̈ pä abechë-ɛ̈chë lə̂ ndavrö kä to aköchë, kə̂ zɨ abechë, kə̂ nyisə̂ köbo sə̈ azü nda ndə̂ andjê. Käko andjê gboabô tə̂ köbo sə̈ earə̂ kə̂ kosə̂ azə̂, ndə̂kə̂ dɨ angbongbo apö tə̂ azə̂ tee-a.

¹⁵ Bëte angâ aɛ̈chë lə̂ ndavrö gbôtə̂ tchôtchô köbo nə̂, ânyë kə̈ zâ tchêngbâ Satäa.

¹⁶ Âdə ngâ ɛ̈chë ndə̂ tche zâ su yê sə̈ Krîsiti, âwa la angâ aɛ̈chë lə̂ ndavrö pâ mawo ndə̂ yê, äwäpä tche mbo rə̂ la andjê, âwâbo pä Egilîze mbo rə̂ la andjê-a. Käko Egilîze nə̈ mbo rə̂ kütû la andjanə̈ ndə̂ andjë wâtə̂ alëge aɛ̈chë lə̂ ndavrö.

¹⁷ Akpôkpô azü ndə̂ andjë nyisə̂ köbo sə̈ azü lə̂ Egilîze la köbo nə̈, äwäpä a lusə̂ andjê, sûsunə̈ bïchuû, tə̂ gbogbôsə̂nə̈, andjanə̈ ndə̂ andjë wun yûkü la kua ndə̂kə̂ mu pö lakə̂ nyisə̂ rə.

¹⁸ Bëte Mbëtï Ndjapä tö rə̂ päkëdə̂: «Bâgala ndə̂ tche sə̂ lakə̂ mbo kua ndə̂kə̂ dada andjî blë, âwâbo pä a gʉa ma yê-a», ndjë «äwäpä a kʉ makətche-kua ndə̂ earə̂ kua sə̈ tchë.»

¹⁹ Amö gambabô pö ndə̂ ngâ akrə yî rə̂ lə̂ küma ngâ kpôkpô akrə ndə̂ Egilîze gâmba-ê, praâbalë âdə azü bïchuû âdəndjë vötaâ ndə̂ andjë wûn rə nə̈, andjê âto pö ndə̂nə̈ ânyë mo gamba rə̂.

²⁰ Andjanə̈ ndə̂ andjë mbo ngbongbo rə, amö hro la andjê tchâtchu azü gbɛ̂, käko ânyë wawa mbo adɨ̂ nə̈.

²¹ Më yükû nə̈ sə̈ mö la gbôgbô tchâtchu Ndjapä, ndjë tchâtchu Jezü Krîsiti la aânje ndə̂ Ndjapä dɨ̂ andjê, amö mbo rə gundə̂sə̂ kə̂ zama lâme, kə̂ səabô sə̂ dəndə̂ ngâ akrə balë-ê, kə̂ nyiabô nyîndə̂ ngâ akrə âro ngânə̈-ê.

²² Amö toabô könô zə̈ tô gâgasa lə̂ küma ngâ akrə-ê, kə̂ yiabô tə̂ zə̈ yî lə̂ angbongbo rə ndə̂ ngâ akrə-ê, praâbalë momö la tə̂ zə̈, amö bata su zə̈ tə̂ grôgrô nə̈.

²³ Amö gbotə̂ kə̂ ndjo kütû ngû-î, amö ndjo vɛ̂n-ɛn kpîɛ̂kpîɛ̂ rə̂, bëte tchə̂lə̂ zə̈ ndə̂ âka tchê mö lâme, la atə̂kömbô ndə̂ âmbo tchê mö lâme.

²⁴ Angâ azü kä tâ ndə̂ ngbongbo rə ndə̂ andjê wütu kraâ dokʉ̈tchê ndə̂kə̂ pa a wa ngbanga lə̂ küma andjê dəngbânə̈, praâbalë andə̂ angânə̈, ngbongbo rə ndə̂ andjê wütu dəngbâ kə̂ wa ngbanga lə̂ küma andjê.

²⁵ Käko ndjë, atchôtchô kua ndə̂ azü mbo rə̂, wütu kraâ lə̂ la azü, ânyë anə̈ ndə̂ a wûn-âbô sə̂nə̈ wûn gasa-ê, wâbo po lə̂ küwû nə̈-a.