Dokʉ̈ Timotë 4 - Mbëtï Ndjapä: TÄFO MADƗ̈

Angbongbo a-earə̂ kə̂ nyisə̂ rə

¹ Kpɨ̂ki Yingö tö rə̂ kraâ päkëdə̂: Lə̂ adɨ̂ alö âtə, angâ azü âgboadje tə̂ köbo su andjê ndə̂ andjë zâ rə̂ sə̈ Krîsiti, kə̂ zadje tə̂ andjê sə̈ ayingö ndə̂ âbolo azü, lakə̂ nyisə̂ rə ndə̂ âtô bhândə̂ angbongbo atchozö.

² Azü nə̈ lâme tchadje köbo sə̂nə̈ ngbâ azü ndə̂kə̂ mbo rə ndə̂ andjê wâ ngbî tə̂ pö ma andjê, ndə̂ andjë wâtə̂ a-earə̂ yepa. Kə̂ rɨ tchə̂lə̂ su andjê wä batə̂ wɛ̂n ndə̂ a zâ rə̂ lə̂ wo ânyë âdrô gboo.

³ Andjë kïtə̂ köbo tə̂ azü ndə̂kə̂ pa andjë toabô tə̂ andjê tô-ê, kə̈ kîtə̂ köbo ndə̂kə̂ pa andjë zɨabô angâ akɨ̈zɨ̂ zɨ̂-ê. Dëkë Ndjapä mbö kɨ̈zɨ̂ lâme ndə̂kə̂ pa azü ndə̂ Krîsiti ndə̂ andjë wûnsə̂ lëge pö, andjë zɨ rə̂ lakə̂ za ayîabâ sə̈ Ndjapä.

⁴ Bëte rə gbɛ̂ ndə̂ Ndjapä mbô rə̂ wätə̂ tchôtchô nə̈, ânyë ngâ rə balë ndə̂kə̂ pa a kosə̂ nə̈ wâbo-a. Äwä ndə̂kə̂ pa akrə zɨ rə̂ lakə̂ za ayîabâ sə̈ Ndjapä.

⁵ Bëte pö Ndjapä, lakə̂ to pö sə̈ Ndjapä djütu angbongbo rə lə̂ arə gbɛ̂.

Tchôtchô earə̂ kua ndə̂ Jezü Krîsiti

⁶ Amö nyisə̂ rə lâme gbɛ̂ sə̈ arə̂mâ, käko mô wadje tə̂ tchôtchô earə̂ kua ndə̂ Jezü Krîsiti. Mô nyiadje sə̂nə̈ pä tchə̂lə̂ zə̈ sɨ̂sɨ̈ la apö ndə̂kə̂ za su sə̈ Krîsiti, la tchôtchô kə̂ nyisə̂ rə ndə̂ mo zâ tchêngbâ nə̈ djîrə̂ lâme.

⁷ Amö dje tchêngbâ zə̈ tə̂ angbongbo andə̂ma pö ndə̂ âwâ ngbî tə̂ pö ndə̂kə̂ za su sə̈ Krîsiti lâme-ê, praâbalë amö zatə̂ zə̈ gbɛ̂ sə̈ Ndjapä.

⁸ Angɨ̈ gbɛ̂ ndə̂ âmbo rə̂ pä tchə̂lə̂ kpoto akrə kra lâme, ämbö dâkâ tə̂ akrə kpîɛ̂kpîɛ̂ rə̂, praâbalë kə̂ zatə̂ andjê gbɛ̂ sə̈ Ndjapä däka lə̂ arə gbɛ̂. Bëte kə̂ zatə̂ andjê gbɛ̂ sə̈ Ndjapä nə̈ lâme, pö ndə̂ tchîsûwu ndə̂ akrə gbo rə̂ kä lə̂nə̈: Tchîsûwu ndə̂ yê ndə̂ tchô angêta, la tchîsûwu ndə̂ yê ndə̂ tchô lâmbo.

⁹ Pö âtə wätə̂ pö ndə̂ âwâ ndə̂kə̂ pa akrə za su yê pânə̈, kə̈ kʉ̂sə̂ nə̈ ndə̂kə̂ pa azü gbɛ̂ gamba rə̂ la su andjê gbɛ̂.

¹⁰ Âdə azə̂ âsə̈ wun yûkü, ndjë âdə azə̈ âsə lakə̂ mbo kʉ̈ʉ̈, bëte azə̈ zä su azə̂ pâ Ndjapä ndə̂ tche wâ la tʉ̈rʉ̂ la yê. Tche wätə̂ earə̂ kə̂ tcha azü gbɛ̂, tə̂ gbogbôsə̂nə̈ tche tchä azü ndə̂ andjë zâ su andjê sə̈ Krîsiti.

¹¹ Rə ndə̂ âwâ pä mo zama tə̂ pö ndə̂nə̈, lakə̂ nyisə̂ nə̈ kä lâme.

¹² Âwâbo pä ngâ akrə talusə̂ zə̈ tə̂ pö ndə̂nə̈ ndə̂ mo wâtə̂ bechë-ɛ̈köchɛ̈-a, praâbalë amö nyisə̂ köbo sə̈ andjê lə̂ köbosə̂ pö ndə̂ zə̈, kə̂ mbo rə ndə̂ zə̈, kə̂ nyində̂ ngâ ndə̂ zə̈, kə̂ za su zə̈ sə̈ Krîsiti lakə̂ wa la grôgrô su.

¹³ Dokʉ̈tchê ndə̂kə̂ pa më nə, amö zatə̂ zə̈ gbɛ̂ ndə̂kə̂ dɨ Mbëtï Ndjapä, kə̂ za wängö sə̈ azü, lakə̂ nyisə̂ rə.

¹⁴ Amö taluabô sə̂ rə ndə̂ Yingö ndə̂ Ndjapä zâ rə̂ sə̈ mö lâme tâlu-î. Tche zä rə̂ sə̈ mö lə̂ köbosə̂ tchôtchô su yê, ndjë gundə̂sə̂ pö ndə̂ a-earə̂ ndə̂ma Ndjapä tô rə̂ pâ zə̈, ndjë la rə̂ ndə̂ kpûlû akpôkpô azü tô könô andjê pâ zə̈ lâme.

¹⁵ Rə ndə̂ âwâ ndə̂kə̂ pa mo za rə̂ lə̂ su zə̈ kä lâme. Rə ndə̂ âwâ ndə̂kə̂ pa mo rʉatə̂ su zə̈ lə̂nə̈ kä lâme. Käko ânyë azü gbɛ̂ wun köbo ndə̂ kua ndə̂ zə̈ e atə̂ tchâtchu nə̈.

¹⁶ La zə̈ gbö pâ zə̈ la tə̂ zə̈, ndjë pâ kə̂ nyisə̂ rə ndə̂ zə̈. Amö rʉatə̂ su zə̈ pânə̈. Mo âmbo tâ käko ânyë kə̂ tchadje tə̂ zə̈ la tə̂ zə̈ lə̂ kuzü, ndjë la andjanə̈ ndə̂ andjë dje mö.