Dokʉ̈ Timotë 3 - Mbëtï Ndjapä: TÄFO MADƗ̈

Pö pâ azü tə̂ küma Egilîze

¹ Pö ndə̂ mê to rə̂ âtə wätə̂ pö ndə̂ âwâ ndə̂kə̂ pa akrə za su yê pânə̈: Âdə ngâ akrə ânyində̂ kə̂ watə̂ akrə tə̂ küma Egilîze, dëkë tchôtchô kua kä ndə̂ tche nyîndə̂ nə̈.

² Käko âwâbo pä a gbo ngâ pö balë ndə̂kə̂ gbɨtɨ tü lə̂ küma akrə tə̂ küma Egilîze-a, tche wätə̂ köchë ndə̂ ɛ̈chë balë, tche zɨ̂âbo rə ârô masə̂nə̈-a, tche tö pö la köbo nə̈, tche mbö rə la köbo nə̈, tche wünsə̂ kə̂ kʉ ayirə bhândə̂ yê la köbo nə̈, tche wünsə̂ kə̂ nyisə̂ rə.

³ Tche zâbo tə̂ yê gbɛ̂ ndə̂kə̂ ndjo pî-a, kə̈ wâbo tə̂ earə̂ kʉ̈ʉ̈-a, praâbalë tche wä zɨtɨ-ë. Tche wâbo tə̂ earə̂ kə̂ po la azü-a, kə̈ wâbo tə̂ akrə ndə̂ tche nyîndə̂ makətche tə̂ gbölösə̂nə̈-a.

⁴ Äwäpä tche wunsə̂ kə̂ nyisə̂ köbo sə̈ azü lə̂ bûngrɨ̂ ndə̂ yê la tə̂ yê, kə̂ mbo rə̂ ndə̂kə̂ pa abechë ndə̂ yê dje ma azü, lakə̂ kpe wa andjê.

⁵ Âdə ngâ akrə âwun-abô wûnsə̂ kə̂ nyisə̂ köbo sə̈ azü lə̂ bûngrɨ̂ ndə̂ yê la tə̂ yê, tche âwun tchô pâ Egilîze ndə̂ Ndjapä tchïtchïnə̈ atöko?

⁶ Âwâbo pä akrə tə̂ küma Egilîze watə̂ täfo akrə ndə̂ tche zâ su yê sə̈ Krîsiti-a. Ârə̂ âdəabô də̂ käko, tche âbhi gogo yê tə̂ gbölösə̂nə̈, ânyë a wadje ngbanga lə̂ küma yê batə̂ rə̂ ndə̂ a wâ ngbanga lə̂ küma Jâbolo lâme.

⁷ Äwä ndjë ndə̂kə̂ pa azü də sûwu to tchôtchô pö ndə̂ yê, käko ânyë, azü toabô angbongbo pö tô tə̂ yê, ânyë tche teabô tê lə̂ kû ndə̂ Jâbolo-ê.

Pö pâ adiâkere

⁸ Äwäpä adiâkere wa ndjë tə̂ azü ndə̂ andjë lûsə̂tə̂ andjê, pö ma andjê wa kütû balë, andjë zabô tə̂ andjê zâ gbɛ̂ ndə̂kə̂ ndjo pî-î, kə̂ puabô köbo pû ndə̂kə̂ gbo makətche lə̂ köbosə̂ ngbongbo köbo-ê.

⁹ Adiâkere də̈ azü ndə̂ andjë bata alëge apö pâ kə̂ za su sə̈ Krîsiti ndə̂ a nyîsə̂ nə̈, la tchôtchô kə̂ rɨ tchə̂lə̂ su.

¹⁰ Äwäpä a wun andjê dokʉ̈tchê, la tchêngbâ nə̈ âdə a âgboabô ngâ pö gbô ndə̂kə̂ gbɨtɨ tü lə̂ küma andjê, ânyë andjë mboadje kua ndə̂ diâkere.

¹¹ Aɛ̈chë ndjë gbɛ̂, äwäpä andjë lusə̂tə̂ andjê, kə̂ toabô alû tô-ê, kə̂ zɨabô rə zɨ̂ âro masə̂nə̈-ê, kə̂ mbo rə gbɛ̂ gundə̂sə̂ pö ma andjê.

¹² Äwäpä diâkere watə̂ köchë ndə̂ ɛ̈chë balë, äwäpä tche wunsə̂ kə̂ nyisə̂ köbo sə̈ abechë ndə̂ yê, la azü lə̂ bûngrɨ̂ ndə̂ yê la tə̂ yê.

¹³ Bëte andjanə̈ ndə̂ andjë mbo kua ndə̂ diâkere lə̂ köbo nə̈, andjë gbö gbölö tchô, ânyë andjê âwa la su ndə̂ âwâ gii tə̂ gbölösə̂nə̈, ndə̂ âkrʉ̂ pâ su andjê ndə̂ andjë zâ rə̂ sə̈ Jezü Krîsiti.

Gbölö pö ndə̂ âwâ lə̂ küwû nə̈

¹⁴ Më mbö mbëtï âtə sə̈ mö, bëte më kä la gʉ ndə̂kə̂ e kə̂ wun mö angangaâtə.

¹⁵ Käko âdə më âwutuabô wûtu gasa-ê, mô wun-adje sə̂ köbo ndə̂ mo nə la rə̂ lə̂ gbâtə̂ azü ndə̂ Ndjapä, ndə̂ ânyîndə̂ kə̂ to rə̂ päkëdə̂: Egilîze ndə̂ Ndjapä ndə̂ tche wâ la tchîsûwu. Egilîze nə̈ kä ndə̂ âza gbôgbô la könô sə̈ lëge pö.

¹⁶ Ɛn-ɛn, pö ndə̂ âwâ lə̂ küwû nə̈ pâ kə̂ zatə̂ andjê gbɛ̂ sə̈ Ndjapä, ndə̂ a wûtu la pö ndə̂nə̈ wä gbölö, ngâ akrə ndə̂kə̂ kosə̂ nə̈ sə̂âbo-a. Pö nə̈ wä kâkë: Krîsiti mätə̂ yê lə̂ tə̂ akrə, Kpɨ̂ki Yingö tô pö ndə̂ yê pä tche wä djîrə̂, aânje chêko tchë, a mu pö ndə̂ yê sə̈ azü ndə̂ andjë wâbô wâtə̂ ajuîfu, angbängbä azü pâ cho zä su andjê sə̈ tchë, Ndjapä kênga tchë lə̂ golowäre ndə̂ yê.