Dokʉ̈ Timotë 2 - Mbëtï Ndjapä: TÄFO MADƗ̈

Wängö pâ kə̂ to pö sə̈ Ndjapä

¹ Më zä wängö tə̂ dokʉ̈ nə̈ ndə̂kə̂ pa nyë yükû rə tchânə̂ Ndjapä, kə̂ to apö sə̈ tchë, kə̂ dɨ tchə̂lə̂ ma nyê sə̈ tchë, kə̂ za ayîabâ sə̈ tchë bëte azü gbɛ̂.

² Nyë tö pö sə̈ tchë bëte agbïɛ̈ la azü gbɛ̂ ndə̂ andjë wâ gbölö tə̂ küma ngâ kua, ndə̂kə̂ pa azə̈ sə la zɨtɨ su, kə̂ sə gii-ï, kə̂ zatə̂ azə̂ gbɛ̂ sə̈ Ndjapä, lakə̂ lusə̂tə̂ azə̂.

³ Rə ndə̂ âwâtə̂ tchôtchô nə̈, ânyë kə̈ fû tə̂ Ndjapä Earə̂ kə̂ tcha azə̂ kä lâme.

⁴ Ndjapä nyïndə̂ nə̈ pä azü gbɛ̂ tcha lə̂ kuzü, lakə̂ wunsə̂ lëge pö.

⁵ Bëte Ndjapä wä kütû balë, akrə ndə̂ tche nə̂ la zɨtɨ su lə̂ gbâtə̂ Ndjapä la azü, tche wä ndjë balë: Tche də̈ Jezü Krîsiti ndə̂ tche wâtə̂ akrə.

⁶ Tche zätə̂ yê la kuzü ndə̂kə̂ yosə̂ azü gbɛ̂. Rə ndə̂ Krîsiti mbô rə̂ kä lâme ndə̂kə̂ nyisə̂ nə̈ pä Ndjapä nyïndə̂ kə̂ tcha azü gbɛ̂ lə̂ kuzü, tche mbö rə̂ gundə̂sə̂ lö nə̈ ndə̂ tche nyîkrə rə̂.

⁷ Bëte rə̂ kä ndə̂ Ndjapä zâ mê ndə̂kə̂ pa më mu pö ndə̂ yê, kə̂ watə̂ badjângele. Më wä ndjë tə̂ earə̂ kə̂ nyisə̂ rə sə̈ azü ndə̂ andjë wâbô wâtə̂ ajuîfu, ndə̂kə̂ pa andjë za su andjê sə̈ Krîsiti, kə̂ wunsə̂ lëge pö. Pö ndə̂ më tô rə̂ lâme wätə̂ lëge pö, më môâbo yepa-a.

⁸ Më nyïndə̂ nə̈ pä aköchë to pö sə̈ Ndjapä kusə̂ tchô gbɛ̂, lakə̂ kenga könô andjê atə̂ lafô, könô ndə̂ âwâ ngbî ânyë kə̈ dâka gbɛ̂. Âwâbo pä andjë to pö nə̈ sə̈ tchë la mêrâ-a, âdəndjë lakə̂ gama andjê lə̂ gbâtə̂ andjê-a.

⁹ Âdə andə̂ aɛ̈chë, äwäpä andjë yu lə̂ba la köbo nə̈, lə̂ba ndə̂ a lusə̂ andjê la rə̂, ndə̂ âwâtə̂ mbämbä lə̂ba. Âwâbo pä andjë ngbo küma andjê la angâ arə kulə̂ nə̈-a, kə̂ yuabô arə ndə̂ lôlo yû ëtə̂ andjê, kə̂ yuabô akɨ̂dji yû-î, la alə̂ba ngbâ gbölö makətche-ê.

¹⁰ Praâbalë äwäpä andjë nyisə̂ kə̂ fu ndə̂ andjê lə̂ köbosə̂ kə̂ mbo tchôtchô rə. Rə ndə̂ aɛ̈chë ndə̂ andjë zâtə̂ andjê sə̈ Ndjapä wâ ndə̂kə̂ mbo rə̂ kä lâme.

¹¹ Âdə a âsə̈ nyisə̂ rə sə̈ aɛ̈chë, äwäpä andjë sə gii-ï, kə̂ zatə̂ andjê gbɛ̂ ndə̂kə̂ dje earə̂ kə̂ nyisə̂ rə nə̈.

¹² Më zâbo köbo sə̈ ɛ̈chë ndə̂kə̂ nyisə̂ rə sə̈ aköchë-a, âdəndjë ndə̂kə̂ wa gbölö pâ andjê-a. Äwäpä andjë sə lə̂ wûtû nə̈.

¹³ Bëte Adâme kä ndə̂ Ndjapä mbô tchë dokʉ̈tchê, ânyë kə̈ mbô Ɛ̂ve la tchêngbâ nə̈.

¹⁴ Âdə̂âbo Adâme kä ndə̂ a bôlo tchë-a, praâbalë ɛ̈chë kä ndə̂ a bôlo tchë, ânyë tche kôsə̂ ma Ndjapä.

¹⁵ Käko ɛ̈chë âtchadje lə̂ kuzü lə̂ köbosə̂ kə̂ zɨ abechë, kütû lə̂ köbosə̂ kə̂ kpokpo tə̂ lə̂kə̂ za su sə̈ Krîsiti, lakə̂ nyində̂ ngâ, lakə̂ sə ngbî bëte Ndjapä, lakə̂ mbo rə la köbo nə̈ ndə̂ afû tə̂ su Ndjapä.