Dokʉ̈ Timotë 1 - Mbëtï Ndjapä: TÄFO MADƗ̈

Kə̂ po ndə̂ azü

¹ Mëmê Pôlo, më wâtə̂ badjângele ndə̂ Jezü Krîsiti, lə̂ köbosə̂ kə̂ zama ndə̂ Ndjapä, Earə̂ kə̂ tcha azə̂, la Jezü Krîsiti ndə̂ azə̈ zâ su azə̂ pâ yê.

² Më mbö mbëtï âtə sə̈ mö Timotë, ndə̂ mo wâtə̂ lëge modô ndə̂ mê lə̂ köbosə̂ kə̂ za su zə̈ sə̈ Ndjapä. Äfü pä Ndjapä Bha la Jezü Krîsiti Gbölö Gbïɛ̈ ndə̂ azə̂ mbo tchôtchô su tə̂ zə̈, kə̂ wun nyonyo zə̈, kə̂ za zɨtɨ su sə̈ mö.

Angbongbo a-earə̂ kə̂ nyisə̂ rə

³ Batə̂ rə̂ ndə̂ më yûkû nə̈ alême sə̈ mö ndə̂ mê âsə̈ ro atə̂ Mäsëdöâne lâme, amö sə po bhâ Ëfêze. Angâ azü bhâye ndə̂ andjë nyisə̂ rə ndə̂ âwâ ngbî tə̂ pö Ndjapä lâme, amö dacho la andjê.

⁴ Amö to rə̂ sə̈ andjê pä andjë zabô tə̂ andjê zâ ndə̂kə̂ dɨ andə̂ma apö yepa-ê, lakə̂ dɨ arə̈ angbängbä araâta andjê-ê. Arə lâme mbö rə̂ pä azü gama andjê lə̂ gbâtə̂ andjê, praâbalë âdə̂âbo rə ndə̂ su Ndjapä nyîndə̂ nə̈ kä lâme-a, ndə̂ a wunsə̂ nə̈ lə̂ köbosə̂ kə̂ za su sə̈ Ndjapä.

⁵ Dju kə̂ zama ndə̂ më zâ rə̂ sə̈ mö lâme wä ndə̂kə̂ pa andjë nyində̂ angâ andjê lə̂ köbosə̂ grôgrô su, la tchôtchô kə̂ rɨ tchə̂lə̂ su, la lëge kə̂ za su sə̈ Ndjapä.

⁶ Angâ azü gbôtə̂ tchôtchô köbo lâme nə̂, köbo andjê yû lakə̂ dɨ awünwün apö nə̂.

⁷ Andjë tö rə̂ pä anyë wätə̂ a-earə̂ kə̂ nyisə̂ ndïɛ̈, dëkë andjë djêâbo tchə̂lə̂ pö ndə̂ andjë to rə̂-a, âdəndjë arə ndə̂ andjë hro kôkôkô pânə̈-a.

⁸ Azə̈ wûnsə̂ nə̈ nə̂ pä âdə azü âmbo rə gundə̂sə̂ ndïɛ̈, ânyë ndïɛ̈ nə̈ watə̂ tchôtchô rə.

⁹ Äwäpä azə̈ djë tchə̂lə̂ pö atə̂ djîrə̂: Ndïɛ̈ wâbo bëte azü ndə̂ andjë mbo djîrə̂ rə-a, praâbalë äwä bëte azü ndə̂ andjë kosə̂ ndïɛ̈ la azü ndə̂ andjë kôsə̂ Ndjapä, la a-earə̂ ngbongbo su, la a-earə̂ ngbongbo rə, la azü ndə̂ andjë kpêâbô wa Ndjapä kpê-ê, ndə̂ andjë mbôâbô wa rə ndə̂ âwâ ngbî bëte Ndjapä mbô-ê, la azü ndə̂ andjë wôn arabha andjê, la azü ndə̂ andjë wôn araanyï andjê, la a-earə̂ kə̂ won azü,

¹⁰ la a-earə̂ kə̂ pu aɛ̈chë âdəndjë aköchë ngbî ngbî, la aköchë ndə̂ andjë pu angâ andjê aköchë, la azü ndə̂ andjë mbo waɛ̂che ndə̂ angbâa, la a-earə̂ yepa, la azü ndə̂ andjë debä la pö yepa, la azü gbɛ̂ ndə̂ andjë mbo rə ngbî tə̂ lëge pö Ndjapä ndə̂ a nyîsə̂ nə̈.

¹¹ Pö ndə̂ âwâ gundə̂sə̂ Tchôtchô Pö ndə̂ ânyîsə̂ kə̂ wa gbölö ndə̂ Ndjapä kä âtə. Ndjapä ndə̂ a to tchôtchô pö ndə̂ yê kä ndə̂ âzâ pö lâme ëlə̂ ma mê.

Pôlo zä ayîabâ sə̈ Ndjapä

¹² Më zä ayîabâ tə̂ gbölösə̂nə̈ sə̈ Jezü Krîsiti Gbölö Gbïɛ̈ ndə̂ azə̂, ndə̂ tche zâ gbôgbô sə̈ mê. Tchetchë kä ndə̂ âwûn mê batə̂ akrə ndə̂ tche za su yê pâ yê, ânyë kə̈ zâ mê tə̂ earə̂ kua ndə̂ yê.

¹³ Mëmê ndə̂ më wâ dokʉ̈tchê alême tə̂ earə̂ kə̂ to angbongbo apö, la earə̂ kə̂ mbo azü la yûkü, la earə̂ kə̂ dro tchô. Praâbalë tche wûn nyonyo mê, bëte më wûn-âbo sə̂ arə ndə̂ më mbô rə̂ lâme-a, ndjë bëte më zâbo su mê sə̈ tchë-a.

¹⁴ Tə̂ lëge nə̈, tchôtchô su ndə̂ Gbölö Gbïɛ̈ ndə̂ azə̂ röpâ nə̈ bëte mê, ndjë lakə̂ nyində̂ ngâ, lakə̂ za su sə̈ Ndjapä ndə̂ tche kʉ̂ rə̂ sə̈ mê lə̂ köbosə̂ nə̈ ndə̂ më wâ balë la Jezü Krîsiti.

¹⁵ Pö ndə̂ mê to rə̂ âtə wä ndə̂kə̂ pa akrə za su yê pânə̈, kə̈ kʉ̂sə̂ nə̈ ndə̂kə̂ pa azü gbɛ̂ gamba rə̂, pö nə̈ wä kâkë: Jezü Krîsiti nə̈ atə̂ bêche âtə ndə̂kə̂ tcha earə̂ ngbongbo rə, ndə̂ mëmê, më wâtə̂ dokʉ̈ earə̂ ngbongbo rə nə̈.

¹⁶ Praâbalë ndə̂ Jezü Krîsiti wûn nyonyo mê lâme, äwä ndə̂kə̂ pa mëmê ndə̂ më də̂ dokʉ̈ earə̂ ngbongbo rə lâme, tche nyïsə̂ köbo ndə̂ tche rʉ̂âtə̂ su yê ndə̂kə̂ sə bëte mê. Tche mbö tâ käko ndə̂kə̂ sro köbo sə̈ azü ndə̂ andjê zadje su andjê sə̈ tchë, ânyë kə̂ gbo tchîsûwu ndə̂ logbɛ̂ logbɛ̂.

¹⁷ Äfü pä azə̈ lusə̂ gbïɛ̈ ndə̂ tche wâ pïï etə̂, Ndjapä ndə̂ tche wâbô wâ ndə̂kə̂ tchu-î, ndə̂ a wûn-âbô tchë wûn-î, ndə̂ tche wâ gbokôngô. Kə̂ lusə̂tə̂, la voga wätə̂ andə̂ ye nə̈, tə̂ logbɛ̂ logbɛ̂! Amin!

¹⁸ Timotë, modô ndə̂ mê, kə̂ zama ndə̂ më nyîndə̂ kə̂ za rə̂ sə̈ mö kä âtə. Äwä gundə̂sə̂ apö ndə̂ a-earə̂ ndə̂ma Ndjapä tô rə̂ pâ zə̈ alême. Pö lâme zadje gbôgbô sə̈ mö ndə̂kə̂ pa mo mbo tchôtchô kʉ̈ʉ̈.

¹⁹ Lə̂ köbosə̂ su zə̈ ndə̂ mo zâ rə̂ sə̈ Ndjapä lâme, la tchôtchô kə̂ rɨ tchə̂lə̂, angâ azü kösə̂ kə̂ dje atchôtchô apö ndə̂ andjë rɨ tchə̂lə̂ su andjê pânə̈ lâme, ânyë su andjê ndə̂ andjë zâ rə̂ sə̈ Ndjapä lâme, köbo nə̈ yû-î.

²⁰ Lə̂ gûtə̂ azü nə̈ lâme, a gbö Imenë la Alegezândere. Më gbötə̂ andjê tchânə̂ Satäa, ndə̂kə̂ pa andjë ka tôâbô angbongbo pö tô tə̂ Ndjapä-ê.