Dokʉ̈ Tësälönîke 5 - Mbëtï Ndjapä: TÄFO MADƗ̈

¹ Arə̂mä, âdə andə̂ pö ndə̂ lö, âdəndjë dalo ndə̂ arə nə̈ wutuadje lə̂nə̈, âdə̂âbo ngâ rə ndə̂kə̂ pa a mbo mbëtï sə̈ nyê tə̂ pö ndə̂nə̈ kä lâme-a.

² Nyënyê la tə̂ nyê, nyë wûnsə̂ nə̈ nə̂ djîrə̂ päkëdə̂: Lö kə̂ ka ndə̂ Gbölö Gbïɛ̈ âwa batə̂ earə̂ ngbä lə̂ bütchî.

³ Ndə̂ azü âsə to rə̂ me päkëdə̂: «Zɨtɨ su kä tâ, ngâ rə mboabô azə̂ tee-a», kpôtə̂ lo nə̈ lâme kä ndə̂ andjê wun-adje ngâ ngbongbo rə ndə̂ âteadje pâ andjê batə̂ käkä tchə̂lə̂ ɛ̈chë la güzu ndə̂ tche nyîndə̂ kə̂ zɨ. Andjê wutuabô lə̂nə̈ tee-a.

⁴ Praâbalë andə̂ nye nə̈ arə̂mä, nyë sə̂âbo lə̂ bübü tchô-a, ânyë lö nə̈ lâme troabô nyê trô batə̂ earə̂ ngbä-a.

⁵ Bëte nyënyê gbɛ̂, nyë də̈ azü ndə̂ ngbänga, azü ndə̂ ngbɛ̂ngbɛ̂ lo. Azə̈ də̂âbo azü tchə̂lə̂ bütchî-a, âdəndjë azü ndə̂ bübü tchô-a.

⁶ Käko âwâbo pä azə̈ lo batə̂ adɨ̂ azü-a, praâbalë la azə̂ gbö-ê, azə̈ zɨ̈äbô rə zɨ̂ âro masə̂nə̈-ê.

⁷ Andjanə̈ ndə̂ andjë lo, andjë lö lə̂ bütchî, ânyë andjanə̈ ndə̂ andjë ndjo pî ämbö andjê, ämbö andjê lə̂ bütchî.

⁸ Praâbalë azə̂ ndə̂ azə̈ wâtə̂ azü ndə̂ ngbɛ̂ngbɛ̂ lo, azə̈ zɨ̈äbô rə zɨ̂ âro masə̂nə̈-ê. Äwäpä kə̂ za su sə̈ Ndjapä lakə̂ nyində̂ ngâ lâme, azə̈ yü rə̂ batə̂ lə̂ba kʉ̈ʉ̈ ndə̂ a mbô rə̂ la wɛ̂n ndə̂ akrə yu rə̂ ëtə̂ krʉ yê, kə̂ yu kə̂ tcha lə̂ kuzü ndə̂ azə̈ zâ su azə̂ pânə̈ lâme batə̂ kpoto ndə̂ wɛ̂n ndə̂ akrə yu rə̂ ëtə̂ küma yê.

⁹ Bëte Ndjapä nyîkrəabô rə̂ ndə̂kə̂ pa mêrâ ndə̂ yê te pâ azə̂-a, praâbalë tche nyïkrə rə̂ ndə̂kə̂ pa azə̈ tcha lə̂ kuzü logbɛ̂ lə̂ köbosə̂ Gbölö Gbïɛ̈ ndə̂ azə̂ Jezü Krîsiti,

¹⁰ ndə̂ tche tchû bëte azə̂ lâme, âdə azə̂ âsə la tʉ̈rʉ̂ la azə̂, âdəndjë rə̂ ndə̂ azə̈ tchû, azə̈ sə balë la tchë.

¹¹ Bëte rə̂ kä ndə̂, nyë zä wängö ndə̂kə̂ za gbôgbô tə̂ su angâ nyê lə̂ gbâtə̂ nyê, kə̂ mbo rə̂ ndə̂kə̂ pa nyë kpokpo tə̂ nyê batə̂ rə̂ ndə̂ nyë sə̂ lakə̂ mbo rə̂ lâme.

Adɨ̂ wängö lakə̂ po ndə̂ azü

¹² Arə̂mä, ârâ yükû nə̈ sə̈ nyê ndə̂kə̂ pa nyë lusə̂ andjanə̈ ndə̂ andjë mbo kua lə̂ gbâtə̂ nyê, ndə̂ andjë nyisə̂ köbo sə̈ nyê la rə̈ Gbölö Gbïɛ̈, lakə̂ gbɨtɨ tü nyê.

¹³ Nyë mbö la sə̂ andjê tə̂ gbölösə̂nə̈ lakə̂ nyində̂ andjê tə̂ pö ndə̂ kua ndə̂ andjë mbo rə̂ lâme. Nyë sə̈ la zɨtɨ su lə̂ gbâtə̂ nyê.

¹⁴ Arə̂mä, ârâ zä wängö sə̈ nyê ndə̂kə̂ pa nyë gbɨtɨ tü andjanə̈ ndə̂ andjë mboabô rə mbô lə̂ köbo nə̈ lâme-ê, kə̂ za wängö ndə̂kə̂ za gbôgbô tə̂ su andjanə̈ ndə̂ andjë zôgo. Nyë zä könô sə̈ andjänə̈ ndə̂ andjë wâbô wâ la gbôgbô-ê, kə̂ rʉatə̂ su nyê la azü gbɛ̂.

¹⁵ La nyê gbö-ê, ânyë ngâ akrə balë mboabô ngbongbo rə mbô tə̂ akrə ndə̂ tche mbô ngbongbo rə tə̂ yê-ê, praâbalë nyë pü köbo logbɛ̂ ndə̂kə̂ mbo tchôtchô rə lə̂ gbâtə̂ nyê, ndjë tə̂ azü gbɛ̂.

¹⁶ Nyë wä la mômô logbɛ̂,

¹⁷ nyë gböäbô gbôtə̂ kə̂ to pö sə̈ Ndjapä-ê.

¹⁸ Nyë zä ayîabâ sə̈ Ndjapä lə̂ arə gbɛ̂, bëte rə ndə̂ tche nyîndə̂ nə̈ tə̂ nyê kä lâme, nyënyê ndə̂ nyë wâ balë la Jezü Krîsiti.

¹⁹ Nyë kïäbô kîtə̂ köbo tə̂ Kpɨ̂ki Yingö ndə̂kə̂ mbo kua-ê,

²⁰ nyë wün-äbô apö ndə̂ a-earə̂ ndə̂ma Ndjapä wûn batə̂ mbämbä pö-ê.

²¹ Praâbalë nyë wün tchə̂lə̂ apö nə̈ gbɛ̂ djîrə̂, kə̂ bata anə̈ ndə̂ âdâka,

²² nyë kpë tə̂ angbongbo arə gbɛ̂.

²³ Äwäpä Ndjapä la tə̂ yê ndə̂ tche za zɨtɨ su sə̈ azü mbo rə̂ ânyë tə̂ nyê wa gbɛ̂ ngbî bëte tchë. Äwäpä tche bata yingö ndə̂ nyê, vrö nyê la tə̂ nyê gbɛ̂ ânyë ngâ pö balë wabô wâ lə̂ küma nyê tə̂ lo kə̂ ka ndə̂ Gbölö Gbïɛ̈ ndə̂ azə̂ Jezü Krîsiti-î.

²⁴ Tchanə̈ ndə̂ tche ê nyê, tche mbö rə gundə̂sə̂ pö ma yê, tchetchë kä ndə̂ âmboadje rə lâme gbɛ̂.

²⁵ Arə̂mä, nyë tö ndjë pö sə̈ Ndjapä bëte ârâ.

²⁶ Nyë pö ndə̂ arə̂mâ gbɛ̂ lakə̂ a ma ndə̂ âdâka gbɛ̂.

²⁷ Më yükû nə̈ sə̈ nyê la gbôgbô, la rə̈ Gbölö Gbïɛ̈: Nyë dɨ̈ mbëtï âtə sə̈ azü ndə̂ Krîsiti gbɛ̂.

²⁸ Äfü pä tchôtchô su ndə̂ Gbölö Gbïɛ̈ ndə̂ azə̂ Jezü Krîsiti wa pâ nyê.