Dokʉ̈ Tësälönîke 4 - Mbëtï Ndjapä: TÄFO MADƗ̈

Kə̂ sə ndə̂ akrə ndə̂ âfû tə̂ Ndjapä

¹ Ndə̂kə̂ ka ndə̂nə̈, arə̂mä, ârâ nyïsə̂ köbo ndə̂ nyê sə la rə̂ ânyë âfu tə̂ Ndjapä alême nə̂. Tə̂ lëge nə̈, nyë sə̂ käko nə̂. Praâbalë angaâtə, ârâ yükû nə̈ sə̈ nyê lakə̂ za wängö sə̈ nyê la rə̈ Gbölö Gbïɛ̈ Jezü; nyë mbö rə̂ âkä ro anə̈ dokʉ̈tchê.

² Bëte kə̂ zama ndə̂ Gbölö Gbïɛ̈ Jezü zâ rə̂ sə̈ ârâ ânyë ârâ zâ rə̂ sə̈ nyê lâme, nyë wûnsə̂ nə̈ nə̂.

³ Rə ndə̂ Ndjapä nyîndə̂ nə̈ wä ndə̂kə̂ pa nyë zatə̂ nyê ngbî bëte tchë, kə̂ puabô aɛ̈chë âdəndjë aköchë pû katchôgbɛ̂.

⁴ Äwäpä akrə balë balë lə̂ gbâtə̂ nyê wunsə̂ köbo ndə̂kə̂ to ɛ̈chë ndə̂ âdâka gbɛ̂ lə̂ la Ndjapä lakə̂ lusə̂tə̂.

⁵ Nyë gböäbô gbôtə̂ gʉ su nyê âropâ nyê batə̂ andə̂ azü ndə̂ andjë wâbô wâtə̂ ajuîfu-î, ânyë kə̈ wûn-âbô sə̂ Ndjapä wûn lâme-ê.

⁶ Lə̂ apö âtə, âwâbo pä ngâ akrə balë mbo ngâ rə tə̂ ngâ yê ndə̂kə̂ pa su yê kʉ tchë-a, âdəndjë ndə̂kə̂ mbo ngâ ngbongbo rə tə̂ yê-a. Bëte Gbölö Gbïɛ̈ gbôâbo tə̂ arə käko ämbänə̈-a, ârâ tô rə̂ sə̈ nyê kə̈ gbɨ̂tɨ tü nyê pânə̈ alême nə̂ gbɛ̂.

⁷ Bëte Ndjapä êâbo azə̂ ndə̂kə̂ mbo rə ndə̂ ndïɛ̈ ndə̂ yê kôsə̂ nə̈-a, praâbalë tche ë azə̂ ndə̂kə̂ wa ngbî bëte tchë ânyë kə̂ daka gbɛ̂.

⁸ Bëte rə̂ kä ndə̂ akrə ndə̂ tche kôsə̂ apö âtə, dëkë akrə də̂âbo tchë ndə̂ tche kôsə̂ yê-a, praâbalë Ndjapä kä ndə̂ tche kôsə̂ yê, tchetchë ndə̂ tche zâ Kpɨ̂ki Yingö ndə̂ yê sə̈ nyê lâme.

⁹ Pâ pö ndə̂kə̂ nyində̂ angâ nyê lə̂ gbâtə̂ nyê lə̂ Krîsiti, âwâbo ndə̂kə̂ pa a ka mbô mbëtï sə̈ nyê pânə̈-a, bëte Ndjapä nyîsə̂ köbo ndə̂kə̂ nyində̂ angâ nyê lə̂ gbâtə̂ nyê sə̈ nyê la tə̂ nyê nə̂.

¹⁰ Nyë kä lakə̂ mbo rə lâme tə̂ azü ndə̂ Krîsiti gbɛ̂ ndə̂ andjë sə̂ bhâ Mäsëdöâne. Praâbalë arə̂mä, ârâ zä wängö sə̈ nyê ndə̂kə̂ pa nyë ka mbô rə̂ âro anə̈ dokʉ̈tchê.

¹¹ Nyë pü köbo ndə̂kə̂ sə la zɨtɨ su, nyë wün köbo kua ndə̂ nyê la tə̂ nyê, kə̂ mbo kua la könô nyê ânyë kə̂ gbo rə ngbânə̈, batə̂ rə̂ ndə̂ ârâ zâma sə̈ nyê.

¹² Käko ânyë kə̂ sə ndə̂ nyê lu lə̂ la azü ndə̂ andjë wûn-âbô sə̂ Ndjapä wûn, ânyë nyê wabô wâtə̂ kʉ̂ngbô pâ ngâ akrə balë-ê.

Kə̂ ka ndə̂ Gbölö Gbïɛ̈

¹³ Arə̂mä, ârâ nyïndə̂ nə̈ pä nyë wunsə̂ lëge pö pâ azü ndə̂ andjë tchû, ânyë kə̂ səabô sə̂ la nyonyo batə̂ andə̂ azü ndə̂ andjë zâbô su andjê zâ pâ ngâ rə balë lâme-ê.

¹⁴ Bëte âdə azə̂ âgamba rə̂ pä Jezü tchû kə̈ jô lə̂ kuzü nə̂, dëkë azü ndə̂ andjë wâ balë la Krîsiti ânyë kə̈ tchû lâme, Ndjapä joadje andjê lə̂ kuzü ânyë kə̂ paladje andjê ndə̂kə̂ sə la Jezü sə̂nə̈ balë.

¹⁵ Pö ndə̂ ârâ nyîndə̂ kə̂ to rə̂ sə̈ nyê, ndə̂ Gbölö Gbïɛ̈ tô rə̂ sə̈ ârâ kä âtə: Azəzə̂ ndə̂ azə̈ sə la tʉ̈rʉ̂ la azə̂ ndjoa ëtə̂ lo kə̂ ka ndə̂ Gbölö Gbïɛ̈, andjanə̈ ndə̂ andjë tchû lâme, azə̂ roabô dokʉ̈tchê tə̂ andjê tee-a.

¹⁶ Bëte Ndjapä zadje ma, a djeadje ndjë tchə̂lə̂ gɨ̈ ngâ makündji ndə̂ aânje la tätälîtä ndə̂ Ndjapä. Käko Gbölö Gbïɛ̈ la tə̂ yê toadje bhâ lafô kə̂ jreadje. Azü ndə̂ andjë zâ su andjê sə̈ Krîsiti ânyë kə̈ tchû, andjë kä ndə̂ âjo lə̂ kuzü dokʉ̈tchê.

¹⁷ Pânə̈ azə̈ ndə̂ gbô azə̂ sə̂ la tʉ̈rʉ̂ la azə̂ tə̂ lo nə̈ lâme, a âkengadje la azə̂ la andjê gbɛ̂ lə̂ ndrö ndə̂kə̂ takpa la Gbölö Gbïɛ̈ bhâ lafô, ânyë azə̈ sə la Gbölö Gbïɛ̈ logbɛ̂.

¹⁸ Nyë zä wängö ndə̂kə̂ za gbôgbô tə̂ su angâ nyê lə̂ gbâtə̂ nyê la pö lâme.