Dokʉ̈ Tësälönîke 3 - Mbëtï Ndjapä: TÄFO MADƗ̈

¹ Käko köbo ndə̂kə̂ pa ârâ rʉatə̂ su ârâ kə̂ krʉ zoo wâbo-a, bëte rə̂ kä ndə̂ ârâ nyïkrə rə̂ ndə̂kə̂ sə la kütû ârâ po bhâ Ätêne,

² ânyë kə̈ wân Timotë ngâ ârâ lə̂ Krîsiti sə̈ nyê; tche də̈ akrə ndə̂ andjë mbo kua balë la Ndjapä, kua ndə̂kə̂ mu Tchôtchô Pö ndə̂ Krîsiti. Ârâ wän tchë sə̈ nyê ndə̂kə̂ mbo rə̂ ânyë nyê kpokpo tə̂ nyê, kə̂ mbo rə̂ ânyë nyê gbo gbôgbô lə̂kə̂ za su nyê sə̈ Krîsiti,

³ ânyë ngâ akrə balë teabô tê lə̂ köbosə̂ yûkü ndə̂ azə̈ wun rə̂ angêta lâme-ê. Bëte nyënyê la tə̂ nyê, nyë wûnsə̂ nə̈ nə̂ pä yûkü ndə̂ ârâ sə̂ lakə̂ wun rə̂ âtə, Ndjapä nyïkrə rə̂ dokʉ̈tchê bëte ârâ.

⁴ Ndə̂ gbô ârâ ndə̂po lə̂ gbâtə̂ nyê alême, ârâ tô rə̂ sə̈ nyê nə̂ pä ârâ wun-adje yûkü; ârə̂ kä âkə̈ wûtu âtə, nyë wûnsə̂ nə̈ nə̂.

⁵ Bëte rə̂ kä ndə̂ më kä wâbo ndə̂kə̂ rʉatə̂ su mê ndə̂kə̂ krʉ zoo, ânyë kə̈ wân Timotë ndə̂kə̂ pa tche e kə̂ dje pö pâ su nyê ndə̂ nyë zâ rə̂ sə̈ Krîsiti lâme-a. Wawa mbö mê ndə̂kə̂ pa Jâbolo vuabô nyê vû-ê ânyë kua ndə̂ ârâ mbô rə̂ wabô wâ ämbänə̈-ê.

⁶ Angaâtə, Timotë tô bhândə̂ nyê kə̈ kâ nə̂. Tche kä la tchôtchô pö pâ su nyê ndə̂ nyë zâ rə̂ sə̈ Ndjapä, la köbo ndə̂ nyê nyində̂ angâ nyê. Tche tö ndjë rə̂ pä gbô nyê kä lakə̂ to tchôtchô pö ndə̂ ârâ, kə̈ wâ la gʉ ndə̂kə̂ kä wun ârâ, batə̂ rə̂ ndə̂ ârâ wâ ndjë la gʉ ndə̂kə̂ kä wun nyê.

⁷ Käko arə̂mä, lə̂ nyonyo la arə gbôgbô ndə̂ âgbô ârâ lâme, ârâ gbö gbôgbô lə̂ köbosə̂ nyê, tə̂ pö ndə̂ su nyê ndə̂ nyë zâ rə̂ sə̈ Krîsiti.

⁸ Angaâtə, tə̂ ârâ krâ nə̂ ngrôô bëte gbô nyê kä lə̂ köbo Gbölö Gbïɛ̈.

⁹ Ârâ wûn-âbo sə̂ köbo ndə̂ ârâ za ayîabâ sə̈ Ndjapä tə̂ pö ndə̂ nyê-a, tə̂ pö ndə̂ gbölö mômô ndə̂ ârâ gbô rə̂ lə̂ köbosə̂ nyê tchâtchu yê.

¹⁰ Ndə̂ ârâ sə lakə̂ to pö sə̈ Ndjapä dalobiî, ârâ yükû nə̈ logbɛ̂ la gbôgbô ndə̂kə̂ mbo rə̂ pä ârâ kä wun nyê, ânyë arə ndə̂ Yingö ndə̂ nyë wâbô wâ la rə̂ pâ su nyê ndə̂ nyë zâ rə̂ sə̈ Krîsiti lâme, ârâ kʉ rə̂ ëpânə̈ sə̈ nyê.

¹¹ Äwäpä Ndjapä Bha azə̂ la tə̂ yê, ndjë la Gbölö Gbïɛ̈ ndə̂ azə̂ Jezü ji köbo sə̈ ârâ ndə̂kə̂ e atə̂ndə̂ nyê.

¹² Äwäpä Gbölö Gbïɛ̈ mbo rə̂ pä köbo ndə̂ nyê nyində̂ angâ nyê lə̂ gbâtə̂ nyê, la köbo ndə̂ nyê nyində̂ azü gbɛ̂ ârô masə̂nə̈ lâme sə lakə̂ êë atə̂ tchâtchu nə̈, batə̂ rə̂ ndə̂ ârâ nyîndə̂ nyê! Amin!

¹³ Äwäpä tche za gbôgbô tə̂ su nyê ânyë lo nə̈ ndə̂ Gbölö Gbïɛ̈ kangbâ yê la azü ndə̂ yê gbɛ̂, nyê watə̂ azü ndə̂ andjë wâ ngbî ânyë kə̈ dâka gbɛ̂ tchâtchu Ndjapä Bha azə̂, ndjë la azü ndə̂ pö wâbô wâ lə̂ küma andjê-ê.