Dokʉ̈ Tësälönîke 2 - Mbëtï Ndjapä: TÄFO MADƗ̈

Kua ndə̂ Pôlo mbô rə̂ bhâ Tësälönîke

¹ Arə̂mä, nyënyê la tə̂ nyê, nyë wûnsə̂ nə̈ nə̂ pä kə̂ wutu ndə̂ ârâ bhândə̂ nyê alême wâbo ämbänə̈-a.

² Nyë wûn ndjë sə̂nə̈ nə̂ pä dokʉ̈tchê ârâ wün yûkü ânyë a drô ârâ bhâlə̂ gö ndə̂ Fïlîpe. Praâbalë Ndjapä zä gbôgbô tə̂ su ârâ ndə̂kə̂ mu Tchôtchô Pö ndə̂ yê sə̈ nyê lə̂ arə yûkü lâme.

³ Kə̂ mu pö ndə̂ ârâ nə̈ krʉ̂âbo pâ yepa-a, âwâbo lə̂ köbosə̂ ngbongbo pö tə̂ su akrə-a, kə̈ wâbo ndjë ndə̂kə̂ bolo azü-a.

⁴ Praâbalë ârâ mü pö nə̈ batə̂ rə̂ ndə̂ su Ndjapä nyîndə̂ nə̈, bëte tche wün rə̂ pä ârâ kʉ̂sə̂ nə̈ nə̂, ânyë kə̈ zâ köbo sə̈ ârâ ndə̂kə̂ mu Tchôtchô Pö. Ârâ pûâbo köbo ndə̂kə̂ wa djîrə̂ lə̂ la azü-a, praâbalë ârâ pü köbo ndə̂kə̂ wa djîrə̂ lə̂ la Ndjapä, ndə̂ tche wun tchô bhâlə̂ su azü.

⁵ Nyë wûnsə̂ nə̈ nə̂ gbɛ̂ pä ârâ tôâbo ngâ pö balë ndə̂kə̂ bolo azü-a; ârâ zâbo ndjë gʉ kə̂ gbo rə ndə̂ ârâ wü dəkêlê kə̂ mu pö nə̈-a, Ndjapä wûnsə̂ nə̈ nə̂.

⁶ Ârâ pûâbo köbo ndə̂kə̂ pa azü lusə̂ ârâ-a, âdəndjë bhândə̂ nyê, âdəndjë bhândə̂ angâ azü ngbî-a.

⁷ Äwä âme ndə̂kə̂ pa ârâ wa batə̂ ngâ kʉ̂ngbô pâ nyê tə̂ pö ndə̂nə̈ ndə̂ ârâ wâtə̂ abadjângele ndə̂ Krîsiti. Praâbalë ndə̂ ârâ sə̂ alême lə̂ gbâtə̂ nyê, ârâ mbö nyê nyima-ë, batə̂ ngâ anyï bechë ndə̂ tche kʉ̂ abechë ndə̂ yê ë krʉ yê ânyë kə̂ za ngo ëma andjê.

⁸ Tə̂ pö ndə̂nə̈ ndə̂ ârâ nyîndə̂ nyê tə̂ gbölösə̂nə̈, ârâ nyîâbo ndə̂kə̂ mu kütû Tchôtchô Pö balë sə̈ nyê-a, praâbalë ârâ nyï ndjë ndə̂kə̂ za tchîsûwu ndə̂ ârâ la kuzü bëte nyê, bëte nyë də̈ azü ndə̂ pö ndə̂ nyê kʉ̂ ârâ tə̂ gbölösə̂nə̈!

⁹ Arə̂mä, äwäpä su nyê te pâ yûkü ndə̂ ârâ wûn rə̂ alême lakə̂ mbo kua, ânyë gbâdâ kâ tə̂ ârâ. Ârâ mbö kua dalobiî ânyë kə̈ wâbô wâtə̂ kʉ̂ngbô pâ ngâ akrə balë-ê. Käko kä ndə̂ ârâ mû Tchôtchô Pö ndə̂ Ndjapä.

¹⁰ Nyë wûnsə̂ arə ndə̂ ârâ mbô rə̂ nə̂, Ndjapä ndjë gbɛ̂ wûnsə̂ nə̈ nə̂: Kə̂ sə ndə̂ ârâ lə̂ gbâtə̂ nyê azü ndə̂ Krîsiti däka gbɛ̂, kə̈ wâ djîrə̂ ânyë ngâ pö balë wâbo lə̂ küma ârâ-a.

¹¹ Nyë wûn ndjë sə̂nə̈ nə̂ pä ârâ mbö rə tə̂ akrə balë balë batə̂ rə̂ ndə̂ bha bechë mbo rə̂ tə̂ abechë ndə̂ yê.

¹² Ârâ zä wängö sə̈ nyê, kə̈ tô apö ndə̂kə̂ za gbôgbô tə̂ su nyê, kə̈ yûkû nə̈ sə̈ nyê la gbôgbô ndə̂kə̂ pa nyë sə batə̂ rə̂ ndə̂ Ndjapä nyîndə̂ nə̈, tchetchë ndə̂ tche ê nyê ndə̂kə̂ li atə̂lə̂ Gbölö gö-gbïɛ̈ ndə̂ yê, ndjë lə̂kə̂ wa gbölö ndə̂ yê.

¹³ Bëte rə̂ kä ndə̂ ârâ ndjë gbɛ̂ ârâ zä ayîabâ sə̈ Ndjapä logbɛ̂ bëte sə̂nə̈ ndə̂ ârâ mû pö Ndjapä sə̈ nyê alême, nyë djê rə̂, ânyë kə̈ gbô rə̂ batə̂ lëge pö ndə̂ Ndjapä, âdə̂âbo batə̂ pö ndə̂ akrə-a. Praâbalë pö nə̈ tö bhândə̂ Ndjapä ânyë kə̈ mbô kua lə̂ su nyê, nyënyê ndə̂ nyë zâ su nyê sə̈ Krîsiti.

¹⁴ Käko arə̂mä, kə̂ mbo rə ndə̂ nyê wä batə̂ andə̂ azü ndə̂ a-Egilîze ndə̂ andjë sə̂ bhâ Judë, andjanə̈ ndə̂ andjë wâ balë la Jezü Krîsiti lâme, bëte nyë wün ndjë yûkü tchânə̂ azü gö ndə̂ nyê la tə̂ nyê batə̂ rə̂ ndə̂ azü ndə̂ a-Egilîze ndə̂ Judë wûn yûkü tchânə̂ ajuîfu.

¹⁵ Andjendjê kä ndə̂ âwôn Gbölö Gbïɛ̈ Jezü la a-earə̂ ndə̂ma Ndjapä, kə̈ mbô ndjë gbôgbô tə̂ ârâ. Kə̂ mbo rə ndə̂ andjê fûâbo tə̂ Ndjapä-a, andjë də̈ a-earə̂ kə̂ kosə̂ azü gbɛ̂.

¹⁶ Andjë kïtə̂ köbo tə̂ ârâ ndə̂kə̂ mu pö Ndjapä sə̈ azü ndə̂ andjë wâbô wâtə̂ ajuîfu-î, pö ndə̂ âwâ ndə̂kə̂ tcha andjê lə̂ kuzü. Ajuîfu mbö rə̂ pä ngbongbo rə ndə̂ andjë mbo tchê rə̂ logbɛ̂ wa ëpânə̈ ëpânə̈. Praâbalë la tchêngbâ nə̈ gbɛ̂ mêrâ ndə̂ Ndjapä tê pâ andjê.

Pôlo nyïndə̂ kə̂ ka kə̂ wun azü ndə̂ Tësälönîke

¹⁷ Âdə andə̂ ârâ arə̂mä, azə̈ krʉ̈ tchə̂lə̂ tə̂ azə̂ la nyê tə̂ angâ alö, ndə̂ ârâ sə̂ tə̂ nyê ngrɨ̈, praâbalë gbô su ârâ kä pâ nyê. Ârâ mbö rə̂ gbɛ̂ ndə̂kə̂ e kə̂ wun nyê, bëte gʉ nyê nyü ârâ tə̂ gbölösə̂nə̈.

¹⁸ Bëte rə̂ kä ndə̂ ârâ nyîndə̂ kə̂ e atə̂ndə̂ nyê; mëmê Pôlo, më pü köbo ëngbâ ngânə̈ ndə̂kə̂ e, praâbalë Satäa kïtə̂ köbo tə̂ ârâ.

¹⁹ Käko tə̂ lo ndə̂kə̂ ka ndə̂ Gbölö Gbïɛ̈ Jezü, giamâ kä ndə̂ ârâ za su ârâ pânə̈, giamâ kä âkə̂ watə̂ mômô ndə̂ ârâ, giamâ kä ndə̂ ârâ gbo rə̂ ngbâ kua ndə̂ ârâ mbô rə̂ ndjoa etə̂ manə̈? Âdə̂âbo nyê?

²⁰ Ɛn-ɛn, tə̂ pö ndə̂ nyê kä ndə̂ a lusə̂ ârâ, ânyë ârâ wâ la mômô.