Dokʉ̈ Tësälönîke 1 - Mbëtï Ndjapä: TÄFO MADƗ̈

Kə̂ po ndə̂ azü

¹ Mëmê Pôlo la Silvɛ̈n la Timotë, ârâ mbö mbëtï âtə sə̈ azü ndə̂ Egilîze ndə̂ Tësälönîke ndə̂ andjë də̂ azü ndə̂ Ndjapä Bha, la andə̂ Gbölö Gbïɛ̈ Jezü Krîsiti. Äfü pä Ndjapä mbo tchôtchô su tə̂ nyê, kə̂ za zɨtɨ su sə̈ nyê.

Kə̂ sə ndə̂ azü ndə̂ Tësälönîke lakə̂ za su andjê sə̈ Krîsiti

² Ârâ zä ayîabâ logbɛ̂ sə̈ Ndjapä tə̂ pö ndə̂ nyê gbɛ̂, ndjë lə̂kə̂ to pö ndə̂ ârâ sə̈ Ndjapä, ârâ ë rə̈ nyê logbɛ̂.

³ Lə̂ la Ndjapä, kua ndə̂ nyê mbo rə̂ lə̂kə̂ za su nyê ndə̂ nyë zâ rə̂ sə̈ Ndjapä lâme, sə̂nə̈ yûâbo tə̂ ârâ-a. Kə̂ nyində̂ angâ nyê ndə̂ âmbo rə̂ pä nyë mbo kua tə̂ gbölösə̂nə̈ lâme, sə̂nə̈ yûâbo tə̂ ârâ-a. Rə ndə̂ nyë krʉ̂ bëte rə̂ la su nyê ndə̂ gbô rə̂ ndə̂po pâ Gbölö Gbïɛ̈ ndə̂ azə̂ Jezü Krîsiti lâme, sə̂nə̈ yûâbo tə̂ ârâ-a.

⁴ Arə̂mä, azə̈ wûnsə̂ nə̈ nə̂ pä Ndjapä nyïndə̂ nyê tə̂ gbölösə̂nə̈, ânyë kə̈ dɨ̂ nyê ndə̂kə̂ watə̂ azü ndə̂ yê.

⁵ Bëte Tchôtchô Pö ndə̂ ârâ mû rə̂ sə̈ nyê, âdə̂âbo kütû mbämbä pö lə̂ ma-a, praâbalë ârâ mü rə̂ la gbôgbô ndjë lakə̂ za könô ndə̂ Kpɨ̂ki Yingö. Ârâ wünsə̂ nə̈ bhâtə̂ su ârâ pä pö ndə̂ ârâ mû rə̂ lâme wätə̂ lëge nə̈. Nyë wûnsə̂ köbo ndə̂kə̂ sə ndə̂ ârâ lə̂ gbâtə̂ nyê nə̂, ârâ mbö tâ käko ndə̂kə̂ za könô sə̈ nyê.

⁶ Âdə andə̂ nye nə̈, nyë wûnsə̂ kə̂ mbo rə batə̂ ârâ nə̂ ndjë batə̂ andə̂ Gbölö Gbïɛ̈: Ndə̂ nyë gbô pö Ndjapä lə̂ gbölö yûkü, praâbalë Kpɨ̂ki Yingö zä mômô tə̂ su nyê.

⁷ Käko nyë wâ nə̂ tə̂ azü ndə̂ andjë nyîsə̂ tchôtchô köbo sə̈ azü ndə̂ Krîsiti gbɛ̂ ndə̂ andjë sə̂ bhâ Mäsëdöâne la Akayï.

⁸ Bëte pö ndə̂ Gbölö Gbïɛ̈ tö bhândə̂ nyê ânyë kə̈ zâ tchô gbɛ̂, kə̈ wûtu bhâ Mäsëdöâne ndjë la Akayï. Praâbalë kə̂ za su nyê ndə̂ nyë zâ rə̂ sə̈ Krîsiti lâme, pö ndə̂nə̈ zä tchô gbɛ̂ ânyë ârâ nyîâbo ndə̂kə̂ to pö pânə̈-a.

⁹ Azü gbɛ̂ tö pö ndə̂ köbo ndə̂ nyë kʉ̂ ârâ bhândə̂ nyê, köbo ndə̂ nyë gbôtə̂ angakʉ̈lä ânyë kə̈ kâ pu Ndjapä ndə̂kə̂ mbo kua ndə̂ yê, tchetchë ndə̂ tche wâ la tchîsûwu ânyë kə̈ wätə̂ lëge Ndjapä.

¹⁰ Nyë krʉ̈ ndə̂kə̂ pa Modô ndə̂ yê to bhâ lafô kə̂ ka, Jezü ndə̂ Ndjapä jô tchë lə̂ kuzü, tchetchë kä ndə̂ âji azə̂ tchâtchâ mêrâ ndə̂ Ndjapä ndə̂ ânə.