Dokʉ̈ Pîêre 5 - Mbëtï Ndjapä: TÄFO MADƗ̈

Wängö bëte akpôkpô azü tə̂ küma Egilîze

¹ Më tö pö âtə ndə̂kə̂ za gbôgbô tə̂ su akpôkpô azü ndə̂ Egilîze ndə̂ andjë sə̂ lə̂ gbâtə̂ nyê. Mëmê ndjë gbɛ̂ më də̈ kpôkpô akrə batə̂ nyê. Yûkü ndə̂ Krîsiti wûn rə̂ alême, më wûn rə̂ la lala mê nə̂. Käko mê səadje lə̂kə̂ wa gbölö ndə̂ âwutuadje lâme.

² Nyë bäta kpûlû azü ndə̂ Ndjapä ndə̂ tche gbôtə̂ andjê ëtchânə̂ nyê, batə̂ a-earə̂ kə̂ bata aɛ̈bro-ngbaga ndə̂ andjë bata kpûlû aɛ̈bro-ngbaga. Nyë wün tchô pâ andjê la tchôtchô su, batə̂ rə̂ ndə̂ su Ndjapä nyîndə̂ nə̈, äwäpä nyë mbo rə̂ la tə̂ nyê. Nyë mböäbô rə̂ mbô la gʉ ndə̂kə̂ gbo makətche tə̂ gbölösə̂nə̈-ê, praâbalë nyë zä su nyê gbɛ̂ pâ kua nə̈.

³ Nyë mböäbô kümändëmä mbô pâ azü ndə̂ Ndjapä gbôtə̂ andjë ëtchânə̂ nyê lâme batə̂ amakündji-î, praâbalë äwäpä akpûlû azü nə̈ wun tchôtchô kə̂ mbo rə nə̈ tə̂ nyê.

⁴ Käko âdə makündji ndə̂ a-earə̂ kə̂ bata aɛ̈bro-ngbaga nə̈ âwutu, nyê gboadje rə ngbânə̈ ndə̂ âdə̂ atchôtchô arə ndə̂ âwâ pïï etə̂.

⁵ Nyënyê ndjë gbɛ̂, abechë-ɛ̈köchë la abechë-ɛ̈chë, nyë djë ndjë ma akpôkpô azü ndə̂ Egilîze. Nyënyê gbɛ̂, äwäpä nyë mbotə̂ nyê kpîɛ̂kpîɛ̂ rə̂ lə̂kə̂ sə ndə̂ nyê lə̂ gbâtə̂ nyê, bëte Mbëtï Ndjapä tö rə̂ päkëdə̂: «Ndjapä kösə̂ azü ndə̂ andjë nyisə̂ tə̂ andjê, praâbalë tche mbö tchôtchô su tə̂ azü ndə̂ andjë mbotə̂ andjê kpîɛ̂kpîɛ̂ rə̂.»

⁶ Nyë mbötə̂ nyê kpîɛ̂kpîɛ̂ rə̂ tchâtchâ könô Ndjapä ndə̂ âwâ la gbôgbô, ânyë tche za gbölö tchô sə̈ nyê tə̂ lo nə̈ ndə̂ tche nyîkrə rə̂.

⁷ Arə gbɛ̂ ndə̂ nyê dɨ su nyê tâ, nyë gbötâ gbɛ̂ tchânə̂ Ndjapä, bëte tchetchë kä âkə̂ bata nyê.

⁸ Nyë kïtə̂ gʉ tə̂ nyê, kə̂ loabô lô-ê! Jâbolo, earə̂ kə̂ kosə̂ nyê wä batə̂ bämalä ndə̂ tche ngrɨ lakə̂ dombo ndə̂kə̂ pu ngâ akrə ndə̂kə̂ zɨ tchë.

⁹ Nyë dächo la tchë lakə̂ krʉ pâ su nyê ndə̂ nyë zâ rə̂ sə̈ Ndjapä lâme. Äwäpä nyë wunsə̂ nə̈ pä angâ nyê azü ndə̂ Ndjapä pâ cho gbɛ̂ wün ndjë yûkü lâme batə̂ nyê.

¹⁰ Yûkü ndə̂ nyê wun rə̂ lâme wä ndə̂ kpîɛ̂kpîɛ̂ lö. Praâbalë Ndjapä ndə̂ tche mbo tchôtchô su tə̂ azü, ndə̂ tche ê nyê ndə̂kə̂ sə lə̂kə̂ wa gbölö ndə̂ yê ndə̂ âwâ logbɛ̂ logbɛ̂ lə̂ köbosə̂ Jezü Krîsiti, tchê mboadje rə̂ la tə̂ yê ndə̂kə̂ pa nyë daka, kə̂ kpokpoadje nyê, ânyë ngâ rə balë goabô nyê gôâ-ê.

¹¹ Gbôgbô wätə̂ andə̂ ye nə̈ tə̂ logbɛ̂ logbɛ̂! Amin.

Adɨ̂ kə̂ po ndə̂ azü

¹² Më mbö ndöndö mbëtï âtə sə̈ nyê lə̂ köbosə̂ Silvɛ̈n ndə̂ më wûn tchë batə̂ djîrə̂ ngâ azə̂ lə̂ Krîsiti. Më mbö rə̂ ndə̂kə̂ za gbôgbô tə̂ su nyê, ndjë ndə̂kə̂ nyisə̂ nə̈ sə̈ nyê pä pö nə̈ ndə̂ nyë ndə̂po lə̂ köbo nə̈ lâme wätə̂ lëge rə lə̂ köbosə̂ tchôtchô su ndə̂ Ndjapä.

¹³ Azü ndə̂ Egilîze ndə̂ âwâ bhâ Bäbïlône pô ndə̂ nyê nə̂, Ndjapä dɨ̈ ndjë Egilîze lâme batə̂ andə̂ nye nə̈. Mâreke, modô ndə̂ mê pô ndjë ndə̂ nyê nə̂.

¹⁴ Nyë pö ndə̂ angâ nyê lə̂ gbâtə̂ nyê lakə̂ a ma angâ nyê lə̂kə̂ nyində̂ ngâ ndə̂ azü ndə̂ Krîsiti. Nyënyê gbɛ̂ ndə̂ nyë wâ balë la Krîsiti lâme, nyë sə̈ la zɨtɨ su.