Dokʉ̈ Pîêre 4 - Mbëtï Ndjapä: TÄFO MADƗ̈

Nyë gbötə̂ bəndɨ kə̂ mbo rə ndə̂ nyê

¹ Batə̂ rə̂ ndə̂ Krîsiti wûn yûkü lə̂ tə̂ yê ndə̂ akrə, käko nyënyê ndjë, äwäpä nyë za rə̂ lə̂ küma nyê pä nyê wun-adje ndjë yûkü, bëte tchanə̈ ndə̂ tche wûn yûkü lə̂ tə̂ yê ndə̂ akrə lâme, tche gbôtə̂ ngbongbo rə nə̂.

² Käko lə̂ adɨ̂ alö ndə̂ âwâ ngbânə̈ tchâtchu nyê ndə̂kə̂ sə pâ cho âtə, nyë mböämbô rə mbô gundə̂sə̂ ngbongbo gʉ su nyê-ê, praâbalë nyë mbö rə lə̂ köbosə̂ nə̈ ndə̂ Ndjapä nyîndə̂ nə̈.

³ Bëte lə̂ angû ndə̂ ârô, rə ndə̂ âfû tə̂ azü ndə̂ andjë wâbô wâtə̂ ajuîfu, nyë mbô rə̂ nə̂: Nyë pü aɛ̈chë âdəndjë aköchë katchôgbɛ̂, nyë mbö rə ndə̂ ngbongbo gʉ su nyê, nyë ndjö pî âmbo nyê, nyë zɨ̈ rə kə̂ ndjo rə âro masə̂nə̈, nyë vöga angakʉ̈lä ndə̂ âdə̂ ngâ rə ndə̂ âkʉ̂âbô sə̂nə̈ kʉ̂ pä akrə mbo rə̂-ê.

⁴ Angaâtə, âdə andjê âwun nyê ndə̂ nyë kä ngbôâbo tə̂ nyê ngbô la andjê ndə̂kə̂ pu aɛ̈chë âdəndjë aköchë katchôgbɛ̂, tchə̂lə̂ küma andjê âdjingɨli, ânyë andjë sə lakə̂ dro nyê.

⁵ Praâbalë andjê toadje pö pâ arə ndə̂ andjë mbô rə̂ lâme tchâtchu Ndjapä ndə̂ tche wâ tchêtchêtchê ndə̂kə̂ wa ngbanga pâ azü ndə̂ gbô andjë ndə̂po la tʉ̈rʉ̂ la andjê, la andjanə̈ ndə̂ andjë tchû.

⁶ Bëte rə̂ kä ndə̂ a mû ndjë Tchôtchô Pö sə̈ akuzü. Käko pânə̈ ndə̂ a wadje ngbanga lə̂ küma andjê batə̂ azü gbɛ̂, gundə̂sə̂ rə ndə̂ andjë mbô rə̂ lə̂ tə̂ andjê ndə̂ akrə, andjë sə batə̂ Ndjapä lə̂ köbosə̂ Yingö.

Kə̂ mbo kua lə̂ köbo nə̈ la arə ndə̂ Yingö

⁷ Ma arə gbɛ̂ ndô tə̂kə̂ krʉ nə̂. Käko äwäpä nyë mbo rə batə̂ azü ndə̂ küma andjê wâ lanə̈, nyë zɨ̈äbô rə zɨ̂ lakə̂ ndjo rə âro masə̂nə̈-ê, ânyë kə̂ gbo köbo ndə̂kə̂ to pö sə̈ Ndjapä.

⁸ Dokʉ̈ nə̈ wä ndə̂kə̂ pa nyë nyində̂ angâ nyê lə̂ gbâtə̂ nyê la su nyê gbɛ̂, bëte kə̂ nyində̂ ngâ vüsə̂ angbängbä angbongbo rə.

⁹ Nyë kʉ̈ angâ nyê bhândə̂ nyê lə̂ gbâtə̂ nyê, kə̂ poabô pô lə̂ ma nyê la andjê-ê.

¹⁰ Äwäpä akrə balë balë mbo kua la rə ndə̂ Yingö ndə̂ tche gbô rə̂ lə̂ köbosə̂ tchôtchô su ndə̂ Ndjapä bëte dâkâ ndə̂ angâ yê. Nyê wadje tə̂ atchôtchô a-earə̂ kə̂ bata arə ngbî ngbî ndə̂ Yingö, ndə̂ Ndjapä kʉ rə̂ sə̈ azü lə̂ köbosə̂ tchôtchô su yê.

¹¹ Âdə ngâ akrə âsə lakə̂ to pö, äwäpä tche to apö ndə̂ Ndjapä. Âdə ngâ akrə âsə lakə̂ mbo kua sə̈ angâ yê, äwäpä tche mbo rə̂ la gbôgbô ndə̂ Ndjapä zâ rə̂ sə̈ tchë, käko ânyë lə̂ köbosə̂ Jezü Krîsiti, azü voga Ndjapä lə̂ arə gbɛ̂. Gbölö la gbôgbô wätə̂ andə̂ Ndjapä tə̂ logbɛ̂ logbɛ̂! Amin.

Äwäpä azə̈ wun ndjë yûkü bëte Krîsiti

¹² Ârə̂mâ ndə̂ mê ndə̂ më nyîndə̂ nyê tə̂ gbölösə̂nə̈, tchə̂lə̂ küma nyê djïngɨliabô djîngɨli tə̂ pö ndə̂ agbôgbô arə nyonyo ndə̂ âwûtu lə̂ gbâtə̂ nyê lâme, âwûntî pä ngâ täfo rə kä âkə̂ gbo nyê.

¹³ Praâbalë âdə nyë âsə̈ wun yûkü batə̂ rə̂ ndə̂ Krîsiti wûn yûkü, nyë sə̈ la mômô. Käko ânyë lo nə̈ ndə̂ tche âsə̈ ma gbôgbô ndə̂ gbölö ndə̂ yê tə̂ azü, nyënyê ndjë gbɛ̂ nyë âsɨ̂sɨ̈ la gbölö mômô.

¹⁴ Âdə a âdro nyê bëte rə̈ Krîsiti, nyë kä la mômô, bëte Yingö ndə̂ Ndjapä ndə̂ âwâ gbölö kä pâ nyê.

¹⁵ Âwâbo pä akrə balë lə̂ gbâtə̂ nyê wun yûku tə̂ pö ndə̂kə̂ won azü-a, âdəndjë kə̂ zɨ ngbä-a, âdəndjë kə̂ mbo ngbongbo rə tə̂ azü-a, âdəndjë ndə̂kə̂ yitə̂ yê lə̂ arə ndə̂ angâ yê-a.

¹⁶ Praâbalë âdə akrə âwun yûkü bëte rə̂ ndə̂ tche wätə̂ akrə ndə̂ Krîsiti, âwâbo pä ganô mbo tchë-a, praâbalë äwäpä tche lusə̂ Ndjapä tə̂ pö ndə̂ rə̈ Krîsiti ndə̂ âwâ pâ yê lâme.

¹⁷ Bëte lo ndə̂kə̂ pa Ndjapä jetə̂ kə̂ wa ngbanga ndə̂ azü nda ndə̂ yê wûtu nə̂. Âdə tche âdokʉtchê tə̂ azə̂, andə̂ andjanə̈ ndə̂ andjë kôsə̂ kə̂ gamba Tchôtchô Pö ndə̂ Ndjapä lâme, tchîsûwu ndə̂ andjê âka atöko?

¹⁸ Batə̂ rə̂ ndə̂ Mbëtï Ndjapä tö rə̂ päkëdə̂: «Âdə sə̂ rə nə̈ âka tə̂ djîrə̂ akrə ndə̂kə̂ tcha lə̂ kuzü, andə̂ earə̂ ngbongbo su la earə̂ ngbongbo rə âdə atöko?»

¹⁹ Käko andjanə̈ ndə̂ andjë sə lakə̂ wun yûkü lə̂ köbosə̂ nə̈ ndə̂ su Ndjapä nyîndə̂ nə̈, äwäpä andjë ndəpo lakə̂ mbo dâkâ, kə̂ zatə̂ andjê gbɛ̂ sə̈ Ndjapä ndə̂ tche mbô arə gbɛ̂, tche mbö rə gundə̂sə̂ pö ma yê.