Dokʉ̈ Pîêre 3 - Mbëtï Ndjapä: TÄFO MADƗ̈

Kə̂ sə ndə̂ aɛ̈chë la aköchë ndə̂ andjê

¹ Nyënyê ndjë, aɛ̈chë, nyë djë ma aköchë ndə̂ nyê, käko ânyë angânə̈ lə̂ gbâtə̂ aköchë nə̈ ndə̂ andjê kôsə̂ pö Ndjapä, andjê ka pu tchë lə̂ köbosə̂ kə̂ mbo rə ndə̂ aɛ̈chë ndə̂ andjê, âdə̂âbo tə̂ pö ndə̂ pö ndə̂ nyê to rə̂ sə̈ andjê-a.

² Aköchë nə̈ wun-adje kə̂ mbotə̂ nyê ndə̂ âdâka gbɛ̂, la rə̂ ndə̂ nyê lusə̂ andjê.

³ Âwâbo pä nyë pu köbo ndə̂kə̂ fu lə̂ la azü la arə ndə̂ nyê mbo rə̂ tə̂ nyê də sûwu-a, ndə̂ âdə̂: Kə̂ ngbo küma nyê, kə̂ yu arə ndə̂ âfû ndə̂ a mbô rə̂ la lôlo, kə̂ yu alə̂ba ndə̂ âfû tə̂ gbölösə̂nə̈.

⁴ Praâbalë nyë pü köbo ndə̂kə̂ fu dələ̂ su nyê. Arə ndə̂ âfû ânyë kə̂ ndɨabô ndɨ̂-î də̈ su ndə̂ âwa gii-ï, kə̂ wa zɨtɨ; ârə̂ kä âkə̈ fû lə̂ la Ndjapä.

⁵ Ädə̈ käko ânyë aɛ̈chë ndə̂ andjë wâ alême ngbî ânyë kə̈ dâka gbɛ̂, andjë zä su andjê pâ Ndjapä, kə̈ djê ma aköchë ndə̂ andjê,

⁶ batə̂ Sarä ndə̂ tche djê ma Abrahâmo ânyë kə̈ ê tchë päkëdə̂: «Gbölö gbïɛ̈ ndə̂ mê.» Âdə nyë âmbo dâkâ, ânyë wawa ngâ rə balë mbôâbô nyê mbô-ê, dëkë nyë wâ nə̂ tə̂ aɛ̈wünrə ndə̂ Sarä.

⁷ Nyënyê ndjë aköchë ndə̂ aɛ̈chë, lə̂kə̂ sə ndə̂ nyê pâ cho la aɛ̈chë ndə̂ nyê, äwäpä nyë wunsə̂ nə̈ pä aɛ̈chë ndə̂ nyê də̈ amömö azü. Nyë lüsə̂ andjê, bëte nyënyê la andjê gbɛ̂ kä ndə̂ âgbo tchîsûwu ndə̂ Ndjapä za rə̂ sə̈ akrə, ndə̂kə̂ pa ngâ rə balë kiabô kîtə̂ köbo tə̂kə̂ to pö ndə̂ nyê sə̈ Ndjapä-ê.

Kə̂ wun yûkü bëte djîrə̂ rə

⁸ Ndə̂kə̂ ka ndə̂ pö nə̈, äwäpä pö tə̂ su nyê gbɛ̂ wa balë, nyë wün nyonyo angâ nyê. Nyë nyïndə̂ angâ nyê lə̂ gbâtə̂ nyê batə̂ arə̂mâ ndə̂ nyê lə̂ Krîsiti, nyë mbö dâkâ, kə̂ mbotə̂ nyê kpîɛ̂kpîɛ̂ rə̂.

⁹ Ngbongbo rə ndə̂ azü mbo rə̂ tə̂ nyê, nyë mböäbô ndjë ngbongbo rə lâme mbô tə̂ andjê-ê, kə̂ dro tchô ndə̂ azü dro nyê la rə̂, nyë dröäbô ndjë andjê drô ndə̂ sə̂nə̈-ê. Praâbalë nyë ë tchôtchô pö pâ azü, bëte Ndjapä ë nyê tə̂ pö ndə̂nə̈, käko ânyë tche e tchôtchô pö pâ nyê.

¹⁰ Bëte Mbëtï Ndjapä tö rə̂ päkëdə̂: «Akrə ndə̂ tche nyîndə̂ tchîsûwu ndə̂ yê, ânyë kə̈ nyîndə̂ kə̂ sə la sə̂nə̈, äwäpä tche bata ma yê tə̂ ngbongbo pö, kə̂ bata ma yê tə̂ apö kə̂ bolo tchô,

¹¹ kə̂ dje tchêngbâ yê tə̂ ngbongbo rə, kə̂ mbo tchôtchô rə, nyë pü köbo zɨtɨ su kə̂ pi kpôtâ.

¹² Bëte la Gbölö Gbïɛ̈ kä pâ adjîrə̂ azü, ânyë tche kä lakə̂ dje pö ndə̂ andjë to rə̂ sə̈ tchë, praâbalë Ndjapä kösə̂ azü ndə̂ andjë mbo ngbongbo rə.»

¹³ Âdə nyê âza su nyê gbɛ̂ ndə̂kə̂ mbo tchôtchô rə, tchabâ kä ndə̂ âmbo ngbongbo rə tə̂ nyê?

¹⁴ Âdə nyë âwun ndjë yûkü tə̂ pö ndə̂ djîrə̂ rə ndə̂ nyë mbô rə̂, nyë kä la mômô. Nyë mböämbô wa ngâ akrə balë mbô-ê, tchə̂lə̂ küma nyê djïngɨliabô djîngɨli-î.

¹⁵ Praâbalë äwäpä nyë lusə̂ Krîsiti bhâlə̂ su nyê batə̂ Gbölö Gbïɛ̈ ndə̂ nyê. Nyë sə̈ tchêtchêtchê logbɛ̂ ndə̂kə̂ to pö sə̈ azü ndə̂ andjë yu nyê tə̂ rə ndə̂ nyë zâ su nyê ndə̂kə̂ krʉ bëte rə̂.

¹⁶ Praâbalë nyë tö pö nə̈ sə̈ andjê nyima-ë lakə̂ lusə̂ andjê, äwäpä kə̂ rɨ tchə̂lə̂ su nyê wabô wâ la ngâ ngbongbo rə-ê, käko ânyë ganô mbo azü ndə̂ andjë to angbongbo apö tə̂ nyê tə̂ pö ndə̂ tchôtchô kə̂ sə ndə̂ nyê balë la Krîsiti.

¹⁷ Bëte âdə Ndjapä ânyində̂ nə̈ pä nyë wun yûkü tə̂ pö ndə̂ dâkâ ndə̂ nyê mbo rə̂, anə̈ lâme kä âkə̈ dâka kə̈ rô ndə̂kə̂ pa nyë wun yûkü tə̂ pö ndə̂ ngbongbo rə ndə̂ nyê.

¹⁸ Käko Krîsiti la tə̂ yê wün yûkü sûsunə̈ balë tratralë bëte ngbongbo rə ndə̂ azü. Tchetchë ndə̂ tche wâ djîrə̂, tche tchü bëte azü ndə̂ andjë wâbô wâ djîrə̂ ânyë kə̂ e la nyê atə̂ tchâtchu Ndjapä. Tchetchë ndə̂ azü wôn kütû tə̂ yê ndə̂ akrə, praâbalë Ndjapä kä zâ tchîsûwu ndə̂ yê ëngbânə̈ sə̈ tchë lə̂ köbosə̂ Kpɨ̂ki Yingö.

¹⁹ Ädə̈ käko ânyë tche ê kə̈ mû Tchôtchô Pö sə̈ atchozö ndə̂ andjë sə̂ lə̂ kânga.

²⁰ Andjanə̈ ndə̂ andjë kôsə̂ pö ma Ndjapä alême, sə̂nə̈ ndə̂ tche rʉ̂âtə̂ su yê ndə̂kə̂ krʉ bëte andjê pä andjë ka pu tchë tə̂ lo nə̈ ndə̂ Nowë mbô âreche. Kütû kpîɛ̂kpîɛ̂ kə̂ ngba ndə̂ azü mïndûu manə̈ vötaâ kä ndə̂ âlî lə̂nə̈, ânyë Ndjapä tchâ andjê lə̂ köbosə̂ ngû.

²¹ Rə lâme wä batə̂ nyîsɨ̂ batɛ̂me ndə̂ âtcha nyê angaâtə. Batɛ̂me nə̈ lâme djûtuabô kâkpö ndə̂ âwatə̂ kpoto nyê-a, praâbalë äwätə̂ kə̂ zatə̂ akrə sə̈ Ndjapä, ndə̂kə̂ pa kə̂ rɨ tchə̂lə̂ su yê wabô wâ la ngâ ngbongbo rə balë-ê. Ârə̂ kä âkə̂ tcha nyê lə̂ köbosə̂ kə̂ jo ndə̂ Jezü Krîsiti lə̂ kuzü.

²² Tche gû atə̂ lafô nə̂, ânyë kə̈ sə̂ də ndôkö könô Ndjapä. Angaâtə aânje, atchozö ndə̂ andjë wâ la kümändëmä la andjanə̈ ndə̂ andjë wâ la gbôgbô, andjë kä tchâtchâ yê.