Dokʉ̈ Pîêre 1 - Mbëtï Ndjapä: TÄFO MADƗ̈

Kə̂ po ndə̂ azü

¹ Mëmê Pîêre, badjângele ndə̂ Jezü Krîsiti, më mbö mbëtï âtə sə̈ nyê, nyënyê ndə̂ Ndjapä dɨ̂ nyê, ndə̂ nyë krʉ̂ tchə̂lə̂ tə̂ nyê katchôgbɛ̂, ânyë kə̈ sə̂ batə̂ ayirə lə̂ agö batə̂: Gö ndə̂ Pôn-on, la Gälâte, la Käpädôse, la Azï, ndjë la Bitinï.

² Ndjapä Bha dɨ̈ nyê gundə̂sə̂ nə̈ ndə̂ tche nyikrə rə̂ dokʉ̈tchê bhâtə̂ su yê. Tche mbö rə̂ pä nyë daka gbɛ̂, lə̂ köbosə̂ Yingö ndə̂ yê, ndə̂kə̂ pa nyë dje ma Jezü Krîsiti, ânyë tche djutu ngbongbo rə ndə̂ nyê la jï yê. Äfü pä tchôtchô su la zɨtɨ su ndə̂ Ndjapä wa pâ nyê tə̂ gbölösə̂nə̈.

Kə̂ za su pâ rə ndə̂ âwâbô wâ ndə̂kə̂ tchu

³ Azə̈ vöga Ndjapä, Bha Gbölö Gbïɛ̈ ndə̂ azə̂ Jezü Krîsiti! Lə̂ köbosə̂ gbölö dâkâ ndə̂ yê, tche mbö rə̂ ndə̂kə̂ pa a ka zɨ̂ azə̂ tə̂ täfo nə̈, lə̂ köbosə̂ nə̈ ndə̂ Krîsiti jô lə̂ kuzü. Käko azə̈ zä su azə̂ pâ rə ndə̂ âwâbô wâ ndə̂kə̂ tchu.

⁴ Azə̈ krʉ̈ bëte atchôtchô arə ndə̂ Ndjapä kʉ̂ rə̂ pra azə̂ bhâ lafô. Arə nə̈ lâme wâbo ndə̂kə̂ ndɨ̂ndɨ̈-a, ngâ ngbongbo rə grʉ̂âbo rə̂-a, kə̂ fu ndə̂nə̈ wâbo ndjë ndə̂kə̂ ro-a.

⁵ Ndjapä âbatadje nyê la gbôgbô ndə̂ yê, lə̂ köbosə̂ kə̂ za su nyê sə̈ tchë, zoo ndə̂kə̂ pa nyë tcha lə̂ kuzü ndə̂ âwâ tchêtchêtchê ndə̂kə̂ mâtə̂ yê lə̂ adɨ̂ alö ndə̂kə̂ krʉ ndə̂ tchêbêche.

⁶ Bëte rə̂ kä ndə̂ su nyê sɨ̂sɨ̈ la mômô, âdəndjë rə̂ ndə̂ nyë sə̂ la nyonyo angaâtə lə̂ arə gbôgbô ngbî ngbî ndə̂ âgbo nyê lə̂ kpîɛ̂kpîɛ̂ lö.

⁷ Lôlo la tə̂ yê ndə̂ âwâ ndə̂kə̂ ndɨ̂ndɨ̈, a zä rə̂ lə̂ wo ndə̂kə̂ wun köbosə̂ nə̈ ndə̂ âwâtə̂ tchôtchô nə̈. Käko ndjë, su nyê ndə̂ nyë zâ rə̂ sə̈ Ndjapä däka kə̈ rô lôlo lâme, praâbalë su nyê nə̈ ndə̂ nyë zâ rə̂ sə̈ Ndjapä nə̈ lâme rö lə̂ agbôgbô arə ndə̂kə̂ pa a wun köbosə̂ nə̈ ndə̂ âwâtə̂ tchôtchô nə̈. Käko kä ndə̂ nyê gboadje voga tchânə̂ Ndjapä, kə̂ gbo golowäre ndjë lakə̂ lusə̂tə̂, tə̂ lo ndə̂kə̂ ka ndə̂ Jezü Krîsiti.

⁸ Tchetchë ndə̂ nyë wûn-âbô tchë wûn, praâbalë nyë nyîndə̂ yê, tchetchë ndə̂ nyë wûn-âbô tchë wûn, praâbalë nyë zâ su nyê sə̈ tchë, bëte rə̂ kä ndə̂ su nyê sɨ̂sɨ̈ la gbölö mômô, ndə̂ a wûn-âbo sə̂ pö ndə̂ a to rə̂ pânə̈-a.

⁹ Bëte djusə̂nə̈ ndə̂ Ndjapä tchâ nyê lə̂ kuzü lâme də̈ rə̂ ndə̂ nyë zâ su nyê sə̈ tchë.

¹⁰ Pö ndə̂kə̂ tcha lə̂ kuzü lâme, a-earə̂ ndə̂ma Ndjapä pü apö pânə̈ lə̂ aköbo ngbî ngbî. Andjë tö ndjë ndə̂ma Ndjapä dokʉ̈tchê tə̂ pö ndə̂ tchôtchô su ndə̂ Ndjapä ndə̂ âwâ bëte nyê.

¹¹ Yingö ndə̂ Krîsiti kä lə̂ a-earə̂ ndə̂ma Ndjapä ânyë andjë nyïsə̂ nə̈ dokʉ̈tchê, pö ndə̂ yûkü ndə̂ Krîsiti wun-adje rə̂, ndjë lakə̂ lusə̂tə̂ ndə̂ tchê gboadje rə̂ ngbâ yûkü nə̈. Ädə̈ käko ânyë andjë sə̂ lakə̂ pu köbo gbɛ̂ ndə̂kə̂ wunsə̂ lö ndə̂kə̂ wutu ndə̂ arə nə̈ ndə̂ Yingö tô pö ndə̂nə̈ lâme, kə̈ pû ndjë köbo ndə̂kə̂ wunsə̂ nə̈ pä atöko kä ndə̂ arə nə̈ wûtu la rə̂?

¹² Ndjapä nyïsə̂ nə̈ sə̈ andjê pä, pö nə̈ wâbo bëte andjê la tə̂ andjê-a, praâbalë äwä bëte nyê. Pö nə̈ kä ndə̂ a-earə̂ kə̂ mu Tchôtchô Pö sə lakə̂ to rə̂ sə̈ nyê angaâtə, lə̂ köbosə̂ Kpɨ̂ki Yingö bhâ lafô ndə̂ a wân tchë. Pö nə̈ lâme, aânje wä la gʉ ndə̂kə̂ wunsə̂ nə̈.

Pö ndə̂kə̂ sə ngbî ânyë kə̂ daka gbɛ̂

¹³ Bëte rə̂ kä, äwäpä nyë nyikrə su nyê ndə̂kə̂ mbo kua, nyë wünsə̂ kə̂ kitə̂ gʉ su nyê, kə̂ zä su nyê gbɛ̂ ndə̂kə̂ krʉ bëte tchôtchô rə ndə̂ nyê gboadje rə̂ tə̂ lo ndə̂kə̂ ka ndə̂ Jezü Krîsiti.

¹⁴ Nyë mbö rə batə̂ abechë ndə̂ andjë dje pö, nyë mböäbô rə mbô gundə̂sə̂ gʉ su nyê ndə̂ nyë wâ la rə̂ dokʉ̈tchê, sə̂nə̈ ndə̂ nyë wûn-âbô sə̂nə̈ wûn dämba lâme-ê.

¹⁵ Praâbalë Ndjapä ndə̂ tche ê nyê, tche wä ngbî ânyë kə̈ dâka gbɛ̂. Käko äwäpä nyënyê ndjë gbɛ̂, nyë wätə̂ azü ndə̂ andjë wâ ngbî ânyë kə̈ dâka gbɛ̂ lə̂kə̂ mbo arə ndə̂ nyê gbɛ̂.

¹⁶ Bëte Mbëtï Ndjapä tö rə̂ päkëdə̂: «Nyë sə̈ ngbî kə̂ daka gbɛ̂, bëte më wä ngbî kə̈ dâka gbɛ̂.»

¹⁷ Ndjapä wä ngbanga ndə̂ akrə gundə̂sə̂ rə ndə̂ tche mbo rə̂, kə̈ sə̂âbo dəndə̂ ngâ akrə balë-a. Käko âdə nyë âsə lakə̂ to pö sə̈ Ndjapä ânyë kə̂ e rə̂ tə̂ yê pä Bha, äwäpä nyë mbo rə lakə̂ kpe wawa yê sə̂nə̈ ndə̂ gbô nyê ndə̂po pâ cho âtə.

¹⁸ Kə̂ mbo rə ndə̂ nyê gundə̂sə̂ araâta nyê lâme, nyë gbôâbo ngâ tchôtchô rə balë ngbânə̈-a. Nyë wûnsə̂ nə̈ nə̂ pä Ndjapä jîâbo nyê lə̂ köbosə̂ rə ndə̂ âwâ ndə̂kə̂ ndɨ̂ndɨ̈ batə̂ makətche âdəndjë lôlo-a.

¹⁹ Praâbalë tche jï nyê lə̂ köbosə̂ jï Krîsiti ndə̂ âwâ la gbölö ngîrî. Krîsiti wä batə̂ ngbavö ɛ̈bro-ngbaga ndə̂ ngâ tchâme-tə̂ yê balë ndɨ̂âbô ndɨ̂-î, ânyë ngâ ngbongbo rə balë wâbo ndjë tə̂ yê-a.

²⁰ Ndjapä dɨ̈ Krîsiti dokʉ̈tchê ndə̂kə̂ pa a mbo arə gbɛ̂. Tche mä Krîsiti ësûwu bëte nyê lə̂ adɨ̂ alö.

²¹ Lə̂ köbosə̂ Krîsiti kä ndə̂ nyë zâ su nyê sə̈ Ndjapä, ndə̂ tche jô Krîsiti lə̂ kuzü ânyë kə̈ lûsə̂ yê. Käko ânyë su nyê ndə̂ nyë zâ rə̂ sə̈ Ndjapä la rə ndə̂ su nyê krʉ̂ bëte rə̂ lâme âwa pâ Ndjapä.

²² A djûtu ngbongbo rə ndə̂ nyê nə̂ lə̂ köbosə̂ nə̈ ndə̂ nyë mbô rə gundə̂sə̂ lëge pö, lakə̂ nyində̂ angâ nyê la su nyê balë lâme. Käko nyë nyïndə̂ angâ nyê lə̂ gbâtə̂ nyê la grôgrô su, kə̂ sə kpôtâ.

²³ Pö Ndjapä kâ zɨ̂ nyê tə̂ täfo nə̈ nə̂. Pö Ndjapä nə̈ lâme wâbo batə̂ ngâ ndjî rəgʉ ndə̂ âtchûtchü-a, praâbalë äwä la tchîsûwu, kə̂ tchûâbo-a, äwä pïï etə̂.

²⁴ Bëte Mbëtï Ndjapä tö rə̂ päkëdə̂: «Azü gbɛ̂ wä batə̂ bë, kə̂ fu ndə̂ andjê gbɛ̂ wä batə̂ anyînyî bë; bë nə̈ hrö ânyë anyînyî nə̈ nyoa,

²⁵ praâbalë pö ndə̂ Gbölö Gbïɛ̈ wä pïï etə̂.» Pö nə̈ lâme wätə̂ Tchôtchô Pö ndə̂ a mû rə̂ sə̈ nyê.