Dokʉ̈ Körɛ̂nte 9 - Mbëtï Ndjapä: TÄFO MADƗ̈

Köbo kə̂ mu Tchôtchô Pö ndə̂ Pôlo

¹ Më kʉ̂âbo sə̂kə̂ mbo arə gbɛ̂? Më də̂âbo badjângele? Më wûn-âbo Jezü Gbölö Gbïɛ̈ ndə̂ azə̂? Nyë də̂âbo azü ndə̂ nyë wâtə̂ rə ngbâ kua ndə̂ më mbô rə̂ sə̈ Gbölö Gbïɛ̈ lâme?

² Âdə angâ azü âwun-abô mê wûn batə̂ badjângele, praâbalë bhândə̂ nyê, më wätə̂ badjângele. Bëte lə̂ köbosə̂ nə̈ ndə̂ nyë wâ balë la Gbölö Gbïɛ̈, nyë nyïsə̂ nə̈ la tə̂ nyê pä më də̈ badjângele.

³ Pö ndə̂ më nyîndə̂ kə̂ to rə̂ sə̈ azü ndə̂ andjë yî pö lə̂ küma mê wä kâkë:

⁴ Ârâ wâbo ndə̂kə̂ zɨ rə âdəndjë ndə̂kə̂ ndjo rə ngbâ kua ndə̂ ârâ?

⁵ Ârâ wâbo ndə̂kə̂ za ngâ ɛ̈chë ndə̂ tche wâtə̂ akrə ndə̂ Krîsiti po tə̂ ârâ, kə̂ nə la tchë batə̂ rə̂ ndə̂ angâ ârâ abadjângele la arə̂mâ ndə̂ Gbölö Gbïɛ̈ la Pîêre mbo rə̂ lâme?

⁶ Kütû Bärnäbâse la mëmê kä ndə̂ âwâ ndə̂kə̂ mbo kua ânyë kə̂ gbo kɨ̈zɨ̂ ma ârâ?

⁷ Tchabâ kä ndə̂ âlî lə̂ kua turûgu ânyë kə̂ zɨ rə ngbâ makətche ndə̂ yê la tə̂ yê? Tchabâ kä ndə̂ âchî vînye ânyë kə̈ zɨ̂âbô ndjî nə̈ zɨ̂-î? Âdəndjë rə̂ ndə̂ tche bâta abâgala ânyë kə̈ ndjôâbô ngû ngo andjê ndjô-ê?

⁸ Apö ndə̂ më tô rə̂ lâme wâbo kütû pâ kə̂ mbo rə ndə̂ azü-a, bëte a tö ndjë rə̂ käko lə̂ ndïɛ̈ ndə̂ Möyîze.

⁹ A mbö rə̂ lə̂ ndïɛ̈ ndə̂ Möyîze päkëdə̂: «Bâgala ndə̂ tche sə̂ lakə̂ mbo kua ndə̂kə̂ dada andjî blë, âwâbo pä a gʉa ma yê-a.» Ndjapä tö pö lâme kütû tə̂ pö ndə̂ abâgala?

¹⁰ Tche tôâbo pö lâme tə̂ pö ndə̂ azə̂? Tə̂ lëge nə̈, apö ndə̂ a mbô rə̂ lə̂ mbëtï lâme wätə̂ pö ndə̂ azə̂. Äwäpä akrə ndə̂ tche djo kɨ̈ndɨ̈ wunsə̂ nə̈ pä anyê gboadje ndjî rəgʉ nə̈, ânyë tchanə̈ ndə̂ tche kʉlʉ ndjî rəgʉ nə̈ wun ndjë sə̂nə̈ pä anyê gboadje ndjî rəgʉ nə̈.

¹¹ Ârâ lü atchôtchô arə ndə̂ Yingö lə̂ nyê. Âdə ârâ âgbo ndjë ngâ tchâkalâ atchôtchô arə ndə̂ nyê, dëkë ârâ yükû rə tə̂ gbölösə̂nə̈ kä lâme?

¹² Âdə angâ azü âyukû rə nə̈ tchânə̂ nyê, bëte giamâ kä ndə̂ ârâ yuabô kû nə̈ yû âro andə̂ andjanə̈ lâme? Praâbalë ârâ mbôâbo tâ käko-a. Ârâ rʉ̈ätə̂ su ârâ pâ arə gbɛ̂, ânyë kə̂ mboabô ngâ rə mbô ndə̂ âkitə̂ köbo tə̂ Tchôtchô Pö ndə̂ Krîsiti-î.

¹³ Nyë wûn-âbo sə̂nə̈ pä azü ndə̂ andjë mbo kua lə̂ gbölö nda Ndjapä gbö kɨ̈zɨ̂ ndə̂ andjê lə̂ gbölö nda Ndjapä? Ânyë azü ndə̂ andjë wa ngela pâ gbalâka gbö ndjë andə̂ andjê tchâkalâ arə ndə̂ a kʉ̂ rə̂ ânyë kə̈ wâ rə̂ la ngela nə̈?

¹⁴ Äwä ndjë batə̂ rə̂ ndə̂ Gbölö Gbïɛ̈ zâma ndə̂kə̂ pa akrə ndə̂ tche mu Tchôtchô Pö gbo ndjë rə ndə̂ yê lə̂ köbosə̂ Tchôtchô Pö nə̈.

¹⁵ Praâbalë më gbôâbo ngâ rə balë lə̂nə̈-a. Më mbôâbo mbëtï âtə ndə̂kə̂ yukû nə̈-a. Ädäka ndə̂kə̂ pa më tchu kə̈ rô rə̂ ndə̂kə̂ pa më yukû rə tchânə̂ nyê. Bëte rə̂ kä ndə̂ mê bhi gogo mê, ngâ akrə balë ndə̂ tche wâ ndə̂kə̂ ji rə̂ wâbo-a.

¹⁶ Bhândə̂ mê, ndə̂kə̂ mu Tchôtchô Pö wâbo tə̂ pö ndə̂kə̂ bhi gogo-a, ädə̈ ngâ rə ndə̂ më wâ ndə̂kə̂ mbo rə̂. Nyonyo kä tə̂ mê, âdə më âmuabô Tchôtchô Pö mû-î.

¹⁷ Âdə mëmê la tə̂ mê kä ndə̂ âpû köbo kua nə̈ lâme, dëkë më wä ndə̂kə̂ gbo makətche-kua ngbânə̈. Praâbalë ngâ rə ngbî ndə̂kə̂ pa më mbo rə̂ wâbo-a, më âmbo kütû kua ndə̂ a zâ rə̂ sə̈ mê lâme.

¹⁸ Käko makətche-kua ndə̂ mê nə̈ də̈ nə̈bâ? Ädə̈ rə̂ ndə̂ mê mu Tchôtchô Pö ämbämbänə̈ sə̈ azü. Rə ndə̂ âwâ âme ndə̂kə̂ pa më gbo rə̂ ngbânə̈, më yûâbo kû nə̈-a.

Kə̂ mu Tchôtchô Pö

¹⁹ Tə̂ lëge nə̈ më wâbo tə̂ ngbâa ndə̂ ngâ akrə balë-a, praâbalë më mbötə̂ mê tə̂ ngbâa ndə̂ azü gbɛ̂ ndə̂kə̂ gbo azü tə̂ gbölösə̂nə̈.

²⁰ Âdə mê âsə lə̂ gûtə̂ ajuîfu, kə̂ mbo rə batə̂ ajuîfu ânyë kə̂ gbo andjê sə̈ Krîsiti. Âdə mê âsə lə̂ gûtə̂ azü ndə̂ andjë sə̂ tchâtchâ ndïɛ̈ ndə̂ Möyîze, mëmê ndə̂ më sə̂âbô sə̂ tchâtchâ ndïɛ̈ ndə̂ Möyîze lâme, mê mbo rə batə̂ akrə ndə̂ tche sə̂ tchâtchâ ndïɛ̈ nə̈, ânyë kə̂ gbo andjê sə̈ Krîsiti.

²¹ Âdə mê âsə lə̂ gûtə̂ andjanə̈ ndə̂ andjë wûn-âbô sə̂ ndïɛ̈ ndə̂ Möyîze wûn-î, kə̂ mbo rə batə̂ azü ndə̂ andjë wûn-âbô sə̂ ndïɛ̈ ndə̂ Möyîze wûn-î, ânyë kə̂ gbo andjê sə̈ Krîsiti. Ânyîâbo ndə̂kə̂ to rə̂ pä më kösə̂ ndïɛ̈ ndə̂ Ndjapä-a, bëte më mbö rə gundə̂sə̂ ndïɛ̈ ndə̂ Krîsiti.

²² Âdə mê âsə lə̂ gûtə̂ azü ndə̂ andjë kpôkpoabô tə̂ andjê kpôkpo lə̂kə̂ za su andjê sə̈ Krîsiti, kə̂ mbo rə batə̂ azü ndə̂ andjë kpôkpoabô tə̂ andjê kpôkpo lə̂kə̂ za su andjê sə̈ Krîsiti ânyë kə̂ gbo andjê sə̈ Krîsiti. Më zätə̂ mê gbɛ̂ sə̈ azü gbɛ̂ ndə̂kə̂ mbo rə̂ gbɛ̂ ânyë kə̂ tcha angânə̈ sə̈ Krîsiti.

²³ Më mbö arə lâme gbɛ̂ tə̂ pö ndə̂ Tchôtchô Pö ânyë kə̂ gbo atchôtchô arə ndə̂ Tchôtchô Pö nə̈ za rə̂.

²⁴ Nyë wûn-âbo sə̂nə̈ pä azü ndə̂ andjë pa adɨngâalî lə̂ la azü gbɛ̂, andjë kpë nyɛ̂ɛ̂ balë, praâbalë ngâ akrə balë kä ndə̂ âgbo tchôtchô rə ngbânə̈? Nyë pä adɨngâalî la känyï ndə̂kə̂ pa nyë gbo ngâ tchôtchô rə ngbânə̈.

²⁵ Azü gbɛ̂ ndə̂ andjë pa adɨngâalî, andjë kösə̂ angâ arə ânyë kə̂ nyikrətə̂ andjê bëte adɨngâalî nə̈. Andjë mbö tâ käko ndə̂kə̂ gbo rə ngbânə̈, praâbalë rə nə̈ wä ndə̂kə̂ ndɨ̂ndɨ̈. Âdə andə̂ azə̈ nə̈, azə̈ mbö rə̂ ndə̂kə̂ gbo tchôtchô rə ngbânə̈ ndə̂ âwâbô wâ ndə̂kə̂ ndɨ-î.

²⁶ Bëte rə̂ kä ndə̂ më pâ adɨngâalî ânyë la mê wâ kütû tə̂ rə ndə̂ më nyîndə̂ kə̂ gbo rə̂. Më də̈ akrə ndə̂ tche gʉ̂â könô yê ânyë kə̂ du azü la rə̂ lâme, praâbalë më dûâbo tchə̂lə̂ yi-a.

²⁷ Më mbö arə gbôgbô tə̂ tə̂ mê, ndə̂kə̂ pa ädje mê. Ârə̂ âdəabô də̂ käko-ë, Tchôtchô Pö ndə̂ mê mu rə̂ lâme, mê âwutu lə̂nə̈ kênê ämbänə̈.