Dokʉ̈ Körɛ̂nte 8 - Mbëtï Ndjapä: TÄFO MADƗ̈

Gûsû ndə̂ a wa rə̂ la ngela sə̈ angakʉ̈lä

¹ Âdə andə̂ gûsû ndə̂ a wâ rə̂ la ngela sə̈ angakʉ̈lä: Tə̂ lëge nə̈, «azə̂ gbɛ̂ də̈ a-earə̂ kə̂ wunsə̂ rə», batə̂ rə̂ ndə̂ nyê to tchê rə̂. Kə̂ wunsə̂ rə lâme mbö rə̂ pä azü bhi gogo andjê, praâbalë kə̂ nyində̂ ngâ mbö rə̂ ânyë akrə ndə̂ Krîsiti ge lə̂ Yingö.

² Âdə ngâ akrə âwun rə̂ pä anyë wûnsə̂ rə nə̂, dëkë tche wûn-âbo sə̂ rə batə̂ rə̂ ndə̂ a wunsə̂ rə-a.

³ Praâbalë âdə ngâ akrə ânyində̂ Ndjapä, Ndjapä wûnsə̂ yê nə̂.

⁴ Käko äwä ndə̂kə̂ zɨ gûsû ndə̂ a wâ rə̂ la ngela sə̈ angakʉ̈lä ämbänə̈? Azə̈ wûnsə̂ nə̈ nə̂ pä ngâ ngakʉ̈lä balë sə̂âbo pâ cho âtə-a, ânyë ngâ ndjapä ngbî wâbo-a, kütû Ndjapä balë.

⁵ Bëte angâ azü tö rə̂ pä angâ andjapä kä bhâ lafô âdəndjë bêche âtə. Bhândə̂ andjê tə̂ lëge nə̈ andjapä ngbângbä, agbölö gbïɛ̈ ndjë ngbângbä.

⁶ Âdə andə̂ azə̂, Ndjapä wä kütû balë, tche də̈ Bha ndə̂ rə gbɛ̂ tô bhândə̂ yê, ânyë bëte tchë kä ndə̂ azə̈ wâ la tchîsûwu. Azə̈ wä ndjë la Gbölö Gbïɛ̈ kütû balë, tche də̈ Jezü Krîsiti ndə̂ Ndjapä mbô arə gbɛ̂ lə̂ köbosə̂ yê, ânyë azə̈ wâ la tʉ̈rʉ̂ la azə̂ lə̂ köbosə̂ yê.

⁷ Praâbalë âdə̂âbo azü gbɛ̂ kä ndə̂ âwûnsə̂ nə̈-a. Angânə̈ sə̈ alême lakə̂ voga angakʉ̈lä. Ädə̈ käko ânyë gbô andjê sə̂ angêta lakə̂ zɨ gûsû ndə̂ a wâ rə̂ la ngela, kə̈ wûntî pä gûsû lâme, a wä rə̂ la ngela tə̂ lëge nə̈ sə̈ angakʉ̈lä. Kə̂ rɨ tchə̂lə̂ su andjê gêâbo-a, bëte andjë wün rə̂ pä anyë wâ nə̂ ngbo lə̂ köbosə̂ gûsû ndə̂ andjë zɨ̂ rə̂ lâme.

⁸ Âdə̂âbo kɨ̈zɨ̂ kä ndə̂ âmbo rə̂ pä azə̈ wa ndola Ndjapä-a. Âdə azə̂ âzɨabô rə̂ zɨ̂-î, ngâ rə ndə̂ azə̂ ndə̂ âyû lə̂nə̈ wâbo-a. Âdə azə̂ âzɨ rə̂, ngâ rə ndə̂ azə̈ gbo ndjë rə̂ lə̂nə̈ wâbo-a.

⁹ A zä köbo sə̈ nyê ndə̂kə̂ mbo arə gbɛ̂, praâbalë la nyê gbö-ê, ânyë lə̂ köbosə̂ kə̂ mbo arə ndə̂ nyê nə̈, ngâ akrə ndə̂ tche kpôkpoabô tə̂ yê kpôkpô lə̂kə̂ za su yê sə̈ Ndjapä teabô tê lə̂ köbosə̂ nyê-ê.

¹⁰ Bëte âdə a âwun mö ndə̂ mo wûnsə̂ lëge pö, ânyë mo sə̂ lakə̂ zɨ rə bhâlə̂ nda ndə̂ angakʉ̈lä, akrə ndə̂ kə̂ rɨ tchə̂lə̂ su yê wâ kpîɛ̂kpîɛ̂ rə̂ lâme zabô ndjë ngoa nə̈ ngbâ zə̈, kə̂ zɨ ndjë gûsû ndə̂ a wâ rə̂ la ngela sə̈ angakʉ̈lä?

¹¹ Käko lə̂ köbosə̂ kə̂ wunsə̂ rə ndə̂ zə̈, akrə ndə̂ Krîsiti ndə̂ tche kpôkpoabô tə̂ yê kpôkpo lâme tchuadje, tchetchë ndə̂ Krîsiti tchû bëte tchë lâme.

¹² Âdə nyê âmbo ngbongbo rə käko tə̂ arə̂mâ ndə̂ nyê lakə̂ ndɨ tchə̂lə̂ kə̂ rɨ su andjê ndə̂ âkpôkpoabô tə̂ yê kpôkpo lâme, dëkë nyë mbö ngbongbo rə lâme tə̂ Krîsiti.

¹³ Bëte rə̂ kä, âdə kɨ̈zɨ̂ kä ndə̂ âmbo rə̂ pä ngâ mê te, mê kä zɨ bata gûsû balë tee-a, ânyë ngâ mê teabô tê lə̂ köbosə̂ nə̈-ê.