Dokʉ̈ Körɛ̂nte 7 - Mbëtï Ndjapä: TÄFO MADƗ̈

Pö ndə̂kə̂ totə̂ ndə̂ köchë la ɛ̈chë

¹ Azə̈ kä ëpâ pö ndə̂ nyë yû mê la rə̂ lə̂ mbëtï ndə̂ nyê lâme. Ädäka ndə̂kə̂ pa köchë grʉabô ɛ̈chë grʉ̂-ê.

² Praâbalë ndə̂kə̂ pa akrə puabô ɛ̈chë âdəndjë köchë pû katchôgbɛ̂, äwäpä köchë wa la ɛ̈chë ndə̂ yê tâ, ânyë ɛ̈chë wa ndjë la köchë ndə̂ yê tâ.

³ Äwäpä köchë za rə ndə̂ ɛ̈chë ndə̂ yê sə̈ tchë, ânyë ɛ̈chë za ndjë rə ndə̂ köchë ndə̂ yê sə̈ tchë.

⁴ Ɛ̈chë wâbo la kümändëmä pâ tə̂ yê la tə̂ yê-a, bëte tə̂ yê də̈ andə̂ köchë ndə̂ yê. Köchë wâbo la kümändëmä pâ tə̂ yê la tə̂ yê-a, bëte tə̂ yê də̈ andə̂ ɛ̈chë ndə̂ yê.

⁵ Nyë köäbô sə̂nə̈ kô ndə̂kə̂ sə köchë la ɛ̈chë lə̂ gbâtə̂ nyê-ê, praâbalë âdə nyê âdjetə̂ nyê lə̂ angâ alö ndə̂kə̂ to pö sə̈ Ndjapä ânyë kə̂ gbotâ. La tchêngbâ nə̈ nyê kä ka ndə̂nə̈, bëte nyë âmboabô me mbô tâ käko, Satäa gbo köbo ndə̂kə̂ vu nyê, ndə̂ nyë wâbô wâ la gbôgbô ndə̂kə̂ kitə̂ gʉ nə̈-ê.

⁶ Pö ndə̂ më tô rə̂ sə̈ nyê lâme, më zâbo nyê la gbôgbô ndə̂nə̈-a, praâbalë ngâ köbo kä ndə̂ më nyîsə̂ nə̈ sə̈ nyê.

⁷ Më nyïndə̂ nə̈ pä azü gbɛ̂ wa batə̂ mê, praâbalë akrə balë balë gbö gbôgbô ndə̂ Yingö ndə̂ Ndjapä za rə̂ sə̈ tchë. Tche zä ngânə̈ sə̈ tchanə̈ âtə, kə̂ za ngânə̈ ngbî sə̈ tchanə̈ təbhâ.

⁸ Azü ndə̂ andjë tôâbô aɛ̈chë âdəndjë aköchë tô dämba-ê, la aɛ̈chë lə̂ ndavrö, më tö pö âtə sə̈ nyê päkëdə̂: Ädäka ndə̂kə̂ pa nyë ndəpo ndə̂kə̂ sə la kütû nyê batə̂ mê.

⁹ Praâbalë âdə nyê âwabô wâ la gbôgbô ndə̂kə̂ kitə̂ gʉ tə̂ nyê-ê, äwäpä nyë totə̂ nyê! Bëte ädäka ndə̂kə̂ totə̂ nyê kə̈ rô anə̈ ndə̂kə̂ pa gʉ tə̂ nyê ropâ nyê.

¹⁰ Âdə andə̂ andjanə̈ ndə̂ andjë totə̂ andjê lâme, më zäma âtə sə̈ andjê, âdə̂âbo mëmê-a, praâbalë Gbölö Gbïɛ̈ kä ndə̂ âzâma nə̈: Âwâbo pä ɛ̈chë gbotə̂ köchë ndə̂ yê-a.

¹¹ Âdə tche âgbotə̂ köchë ndə̂ yê, âwâbo pä tche ka tô ngâ täfo köchë-a, âdəndjë rə̂ tche nyikrə pö la köchë ndə̂ yê. Andə̂ köchë ndjë, âwâbo pä tche gro ɛ̈chë ndə̂ yê-a.

¹² Âdə andə̂ adɨ̂ azü nə̈, më tö pö âtə sə̈ andjê, pö nə̈ tôâbo bhândə̂ Gbölö Gbïɛ̈-a, mëmê kä ndə̂ âtô rə̂ päkëdə̂: Âdə ngâ ɛ̈chë ndə̂ tche zâbô su yê zâ sə̈ Ndjapä dämba-ê, ânyë kə̈ nyîndə̂ kə̂ sə la köchë ndə̂ yê ndə̂ tche də̂ akrə ndə̂ Krîsiti, âwâbo pä köchë nə̈ gro tchë-a.

¹³ Käko ndjë, âdə ngâ ɛ̈chë âwa la ngâ köchë ndə̂ tche zâbô su yê zâ sə̈ Ndjapä dämba-ê, ânyë köchë nə̈ nyîndə̂ kə̂ sə la tchë, âwâbo pä ɛ̈chë nə̈ kosə̂ yê-a.

¹⁴ Bëte köchë ndə̂ tche zâbô su yê zâ sə̈ Ndjapä lâme wä ngbî bëte Ndjapä tə̂ pö ndə̂ ɛ̈chë ndə̂ yê, ânyë ɛ̈chë ndə̂ tche zâbô ndjë su yê zâ sə̈ Ndjapä lâme wä ngbî bëte Ndjapä tə̂ pö ndə̂ köchë ndə̂ yê. Ârə̂ âdəabô də̂ käko, abechë ndə̂ nyê wä ngbo lə̂ la Ndjapä. Dëkë abechë ndə̂ nyê wä ngbî bëte Ndjapä.

¹⁵ Praâbalë âdə tchanə̈ ndə̂ tche zâbô su yê zâ sə̈ Ndjapä lâme ânyində̂ kə̂ kosə̂ ɛ̈chë âdəndjë köchë ndə̂ yê, äwäpä a gbotə̂ yê tche kosə̂ yê. Käko ɛ̈chë nə̈ âdəndjë köchë nə̈ ndə̂ tche zâ su yê sə̈ Ndjapä lâme, ngâ rə ndə̂ âpala andjê wâbo-a, bëte Ndjapä ë nyê ndə̂kə̂ pa nyë sə la zɨtɨ su.

¹⁶ Momö ndə̂ ɛ̈chë ndə̂ mo zâ su zə̈ sə̈ Ndjapä lâme, mo wünsə̂ nə̈ pä mô tchadje köchë ndə̂ zə̈ lə̂ kuzü? Momö ndə̂ köchë ndə̂ mo zâ su zə̈ sə̈ Ndjapä lâme, mo wünsə̂ nə̈ pä mô tchadje ɛ̈chë ndə̂ zə̈ lə̂ kuzü?

Kə̂ sə ndə̂ akrə ndə̂ Krîsiti

¹⁷ Âdə andə̂ adɨ̂ azü nə̈, apö ndə̂ mê zama tə̂ pö ndə̂nə̈ kulə̂ a-Egilîze gbɛ̂ kä âtə: Äwäpä akrə balë balë ndəpo lə̂ köbo ndə̂ Gbölö Gbïɛ̈ zâ rə̂ sə̈ tchë. Äwäpä tche ndə̂po lə̂kə̂ sə ndə̂ yê dokʉ̈tchê tə̂ lo nə̈ ndə̂ Ndjapä ê tchë.

¹⁸ A wä mö la gasa dokʉ̈tchê ndə̂kə̂ pa Ndjapä e mö? Âwâbo pä mo vusə̂ nə̈-a. Mo wâbo gasa dokʉ̈tchê ndə̂kə̂ pa Ndjapä e mö? Âwâbo pä a wa mö la gasa-a.

¹⁹ Ndə̂kə̂ wa gasa âdəndjë ndə̂kə̂ wabô gasa wâ, äwä ämbänə̈: Gbölö rə nə̈ wä ndə̂kə̂ mbo rə gundə̂sə̂ ndïɛ̈ ndə̂ Ndjapä.

²⁰ Äwäpä akrə balë balë ndə̂po lə̂kə̂ sə ndə̂ yê dokʉ̈tchê tə̂ lo nə̈ ndə̂ Ndjapä ê tchë.

²¹ Sə̂nə̈ ndə̂ Ndjapä ê mö, mo də̈ ngbâa? Amö dɨabô su zə̈ dɨ̂ tâ-ê. Praâbalë âdə ngâ köbo âwa tâ ndə̂kə̂ pa mo wutu tchâtchâ ngbâa nə̈, amö wutu tchâtchâ nə̈-ê.

²² Bëte ngâ ngbâa ndə̂ Gbölö Gbïɛ̈ ê tchë, tche wûtu tchâtchâ ngbâa nə̈ nə̂, kə̈ wâ nə̂ tə̂ akrə ndə̂ Gbölö Gbïɛ̈. Akrə ndə̂ tche wâbô wâtə̂ ngbâa ânyë Gbölö Gbïɛ̈ ê tchë, dëkë tche wâ nə̂ tə̂ ngbâa ndə̂ Krîsiti.

²³ Ndjapä yö nyê la gbôgbô ngîrî, nyë kä wâbô wâtə̂ angbâa ndə̂ azü-î.

²⁴ Arə̂mä, äwäpä akrə balë balë ndəpo lə̂kə̂ sə ndə̂ yê dokʉ̈tchê tə̂ lo nə̈ ndə̂ Ndjapä ê tchë.

²⁵ Âdə andə̂ andjanə̈ ndə̂ andjë tôâbô aɛ̈chë âdəndjë aköchë tô-ê, Gbölö Gbïɛ̈ zâbo ma sə̈ mê pâ andjê-a. Praâbalë më ânyisə̂ kə̂ wun tchô ndə̂ mê batə̂ akrə, ndə̂ nyë wâ ndə̂kə̂ za su nyê pâ pö ndə̂ yê, bëte Gbölö Gbïɛ̈ wün nyonyo mê.

²⁶ Bhândə̂ mê, më wün rə̂ pä, ädäka ndə̂kə̂ pa akrə sə kütû käko lə̂ köbosə̂ tchô ndə̂ âwâ ngbo angêta. Tə̂ lëge nə̈, më wün andə̂ me nə̈ pä akrə sə kütû käko.

²⁷ Mo kä la ɛ̈chë? Amö puabô köbo pû ndə̂kə̂ gbotə̂ yê-ê. Mo wâbo la ɛ̈chë dämba? Amö puabô köbo pû ndə̂kə̂ to ɛ̈chë-ê.

²⁸ Praâbalë âdə mo âto ɛ̈chë, mo mbôâbo ngbongbo rə-a. Âdə ngâ bechë-ɛ̈chë âto köchë, tche mbôâbo ngbongbo rə-a. Praâbalë azü ndə̂ andjë tôtə̂ andjê wun-adje yûkü tə̂ gbölösə̂nə̈ lə̂ tchîsûwu ndə̂ andjê, ârə̂ kä ndə̂ më nyîndə̂ nə̈ pä ägboabô nyê gbô-ê.

²⁹ Arə̂mä, pö ndə̂ më nyîndə̂ kə̂ to rə̂ wä kâkë: Adɨ̂ alö ngbâbo-a, angaâtə azü ndə̂ andjë wâ la ɛ̈chë, äwäpä andjë sə̈ âwûntî pä andjë wâbo la ɛ̈chë-a.

³⁰ Azü ndə̂ andjë kɨ, äwäpä andjë sə âwûntî pä andjë kɨ̂âbo-a. Azü ndə̂ andjë wâ la mômô, äwäpä andjë sə âwûntî pä andjë wâbo la mômô-a. Azü ndə̂ andjë yo rə, äwäpä andjë sə âwûntî pä andjë wâbo la rə-a.

³¹ Azü ndə̂ andjë gbo arə tchêbêche âtə, äwäpä andjë sə âwûntî pä andjë gbôâbo rə-a, bëte arə tchêbêche âtə âro me rö.

³² Më nyïndə̂ nə̈ pä nyë dɨ̈äbô su nyê dɨ̂-î. Akrə ndə̂ tche tôâbô ɛ̈chë tô-ê, tchê dɨadje su yê pâ arə ndə̂ Gbölö Gbïɛ̈, tche pü köbo ndə̂kə̂ pa su Gbölö Gbïɛ̈ fu la tchë.

³³ Praâbalë köchë ndə̂ tche tô ɛ̈chë, kə̂ dɨ su yê wä pâ arə ndə̂ tchêbêche âtə, tche pü köbo ndə̂kə̂ pa su ɛ̈chë ndə̂ yê fu la tchë,

³⁴ käko su yê wä pâ arə bïchuû. Äwä ndjë batə̂ rə̂ ndə̂ ɛ̈chë ndə̂ tche tôâbô köchë tô-ê, la bechë-ɛ̈chë ndə̂ tche tôâbô köchë tô-ê, andjê dɨadje su andjê pâ arə ndə̂ Gbölö Gbïɛ̈. Andjê batadje tə̂ andjê la yingö ndə̂ andjê ngbî bëte Ndjapä. Praâbalë ɛ̈chë ndə̂ tche tô köchë, kə̂ dɨ su yê wä pâ arə ndə̂ tchêbêche âtə, tche pü köbo ndə̂kə̂ pa su köchë ndə̂ yê fu la tchë.

³⁵ Më tö pö lâme bëte tchôtchô kə̂ sə ndə̂ nyê, âwâbo batə̂ ngâ kû ndə̂ më drô rə̂ lə̂ köbo nyê-a. Praâbalë më nyïndə̂ nə̈ pä nyë mbo anə̈ ndə̂ âwâ djîrə̂ ânyë kə̂ za su nyê gbɛ̂ kütû pâ Gbölö Gbïɛ̈ balë.

³⁶ Âdə ngâ köchë ndə̂ gbô tchë sə̂ lakə̂ e ngbâ ngâ ɛ̈chë, tchë âwun rə̂ pä anyë wä ndə̂kə̂ gitə̂ anyê pu ɛ̈chë nə̈ tə̂ pö ndə̂nə̈ ndə̂ gʉ ɛ̈chë nə̈ rôpâ yê, ânyë tche wûn rə̂ pä ädäka ndə̂kə̂ pa anyë to tchë, käko äwäpä tche mbo rə̂ batə̂ rə̂ ndə̂ su yê nyîndə̂ nə̈. Ngbongbo rə də̂âbo rə̂ ndə̂ tche mbô rə̂ lâme-a: Äwäpä andjê bïchuû gbɛ̂ totə̂ andjê.

³⁷ Praâbalë âdə köchë nə̈ ânyîkrə rə̂ bhâtə̂ su yê ndə̂kə̂ toabô ɛ̈chë tô-ê, ânyë ngâ rə kîâbô kîtə̂ köbo tə̂ yê-ê, äwä lə̂ köbo nə̈. Âdə tche âwa la gbôgbô ndə̂kə̂ kitə̂ gʉ tə̂ yê, ânyë kə̈ nyîkrə rə̂ bhâtə̂ su yê ndə̂kə̂ səabô sə̂ la tchë köchë la ɛ̈chë-ê, tche mbö rə̂ lə̂ köbo nə̈.

³⁸ Käko akrə ndə̂ tche tô ɛ̈chë ndə̂ tche ê ngbâ yê, tche mbö rə̂ djîrə̂. Praâbalë akrə ndə̂ tche tôâbô ɛ̈chë nə̈ lâme tô-ê, tche kä mbô rə̂ djîrə̂ tə̂ gbölösə̂nə̈.

³⁹ Ɛ̈chë ndə̂ a tô tchë wä ndə̂kə̂ za su yê kütû pâ köchë ndə̂ yê ndjoa ëtə̂ kuzü. Âdə köchë ndə̂ yê nə̈ âtchu, tche wä ndə̂kə̂ to ngâ täfo köchë batə̂ rə̂ ndə̂ su yê nyîndə̂ nə̈, praâbalë äwäpä köchë nə̈ watə̂ akrə ndə̂ Krîsiti.

⁴⁰ Bhâtə̂ su mê, âdə ɛ̈chë nə̈ âtoabô ngâ köchë tô-ê, tchê səadje la mômô. Mëmê ndjë gbɛ̂ më wün rə̂ pä më kä la Yingö ndə̂ Ndjapä.