Dokʉ̈ Körɛ̂nte 6 - Mbëtï Ndjapä: TÄFO MADƗ̈

Ngbanga lə̂ gûtə̂ azü ndə̂ Krîsiti

¹ Âdə nyë âgbo pö la angâ nyê lə̂ gbâtə̂ nyê, kə̂ e la andjê atə̂ tchâtchu a-earə̂ kə̂ wa ngbanga də sûwu ndə̂ andjë wûn-âbô sə̂ Ndjapä wûn-î, ânyë kə̂ gbotə̂ kə̂ e la andjê atə̂ tchâtchu azü ndə̂ Ndjapä-ê. Atöko kä ndə̂ nyê alafô ndə̂kə̂ mbo tə̂ rə käko-ë?

² Nyë wûn-âbo sə̂nə̈ pä azü ndə̂ Ndjapä kä ndə̂ âwadje ngbanga ndə̂ azü tchêbêche âtə? Âdə nyënyê kä ndə̂ âwadje ngbanga ndə̂ azü tchêbêche âtə, atöko ânyë nyë wâbô wâ la gbôgbô ndə̂kə̂ wa ngbanga ndə̂ ayɛ̈yɛ̈ pö-ê?

³ Nyë wûn-âbo sə̂nə̈ pä azə̈ kä ndə̂ âwadje ngbanga ndə̂ aânje? Âdə rə nə̈ âwa käko, atöko kä ndə̂ nyë wâbô ngbanga ndə̂ apö ndə̂ tchîsûwu âtə wâ-ê?

⁴ Âdə apö käko âwa lə̂ gbâtə̂ nyê, bëte giamâ kä ndə̂ nyê e la pö nə̈ atə̂ tchâtchu a-earə̂ kə̂ wa ngbanga də sûwu, ndə̂ Egilîze wûn andjê batə̂ ngâ mbämbä rə?

⁵ Më tö pö lâme käko, bëte äwätə̂ ganô ndə̂ nyê. Käko lə̂ gbâtə̂ nyê, ngâ akrə balë ndə̂ küma yê wâ lanə̈, ndə̂ tche wâ la gbôgbô ndə̂kə̂ wa ngbanga ndə̂ pö lə̂ gûtə̂ arə̂mâ sə̂âbo?

⁶ Praâbalë âdə ngâ akrə ndə̂ Krîsiti ndə̂ tche wâ la pö la ngâ yê, tche e la tchë atə̂lə̂ ngbanga tchâtchu azü ndə̂ andjë zâbô su andjê zâ sə̈ Krîsiti, âdâka nə̂?

⁷ Ndə̂ pö ndə̂kə̂ e la angâ nyê atə̂lə̂ ngbanga də̂ käko lâme, köbo nyê yû nə̂. Bëte giamâ kä ndə̂ nyë rʉ̂âbô rʉ̂âtə̂ su nyê la azü ndə̂ andjë mbô ngbongbo rə tə̂ nyê la azü ndə̂ andjë zɨ̂ ngbä rə ndə̂ nyê?

⁸ Praâbalë nyënyê kä ndə̂ âmbo ngbongbo rə, kə̂ zɨ ngbä rə ndə̂ azü! Dëkë nyë mbö rə nə̈ lâme tə̂ arə̂mâ ndə̂ nyê lə̂ Krîsiti.

⁹ Nyë wûn-âbo sə̂nə̈ pä azü ndə̂ andjë mbo ngbongbo rə gbôâbo tchô bhâlə̂ Gbölö gö-gbïɛ̈ ndə̂ Ndjapä? Nyë böloabô tə̂ nyê bôlo-ê: A-earə̂ kə̂ pu aɛ̈chë âdəndjë aköchë katchôgbɛ̂, azü ndə̂ andjë voga angakʉ̈lä, azü ndə̂ andjë pu aɛ̈chë âdəndjë aköchë ndə̂ angâ andjê, aköchë ndə̂ andjë lo la angâ andjê aköchë,

¹⁰ a-earə̂ ngbä, azü ndə̂ andjë wâ la gbölö gʉ ndə̂kə̂ gbo arə gbɛ̂, azü ndə̂ andjë wâtə̂ angbâa ndə̂ pî, azü ndə̂ andjë to angbongbo pö tə̂ angâ andjê, azü ndə̂ andjë kʉ rə tə̂ angâ andjê la gbôgbô, azü käko gbɛ̂ gboabô tchô bhâlə̂ Gbölö gö-gbïɛ̈ ndə̂ Ndjapä tee-a.

¹¹ Angâ azü lə̂ gbâtə̂ nyê wä alême käko. Praâbalë Ndjapä kô pö lə̂ küma nyê nə̂, kə̈ kʉ̂ nyê ngbî ânyë nyë dâka gbɛ̂ bëte tchë, kə̈ mbô rə̂ pä nyë wa djîrə̂ lə̂ la yê la rə̈ Gbölö Gbïɛ̈ Jezü Krîsiti ndjë la Kpɨ̂ki Yingö ndə̂ azə̂.

Tə̂ akrə wätə̂ gbölö nda Ndjapä

¹² Angâ azü tö rə̂ päkëdə̂: «A zä köbo sə̈ anyë ndə̂kə̂ mbo arə gbɛ̂.» Tə̂ lëge nə̈, praâbalë rə gbɛ̂ də̂âbo rə̂ ndə̂ âdâka la nyê-a. Më tö ndjë rə̂ pä «A zä köbo sə̈ mê ndə̂kə̂ mbo arə gbɛ̂.» Praâbalë më nyîâbo ndə̂kə̂ watə̂ ngbâa ndə̂ ngâ rə balë-a.

¹³ Angâ azü tö ndjë rə̂ päkëdə̂: «Kɨ̈zɨ̂ wä bëte tchə̂lə̂, ânyë tchə̂lə̂ wâ bëte kɨ̈zɨ̂.» Ɛn-ɛn, praâbalë Ndjapä ândɨadje kɨ̈zɨ̂ la tchə̂lə̂. Käko tə̂ akrə wâbo ndə̂kə̂ pa tche za rə̂ sə̈ ɛ̈chë âdəndjë köchë katchôgbɛ̂-a. Tə̂ akrə wä bëte Gbölö Gbïɛ̈, ânyë Gbölö Gbïɛ̈ wâ bëte tə̂ akrə.

¹⁴ Ndjapä ndə̂ tche jô Gbölö Gbïɛ̈ lə̂ kuzü lâme, tchê joadje ndjë azə̂ lə̂ kuzü lə̂ köbosə̂ gbôgbô ndə̂ yê.

¹⁵ Nyë wûn-âbo sə̂nə̈ pä atchâme-tə̂ nyê də̈ tchâkalâ atchâme-tə̂ Krîsiti? Ndə̂ âdə̂ käko, më âza tchâkalâ tə̂ Krîsiti nə̈ ndə̂kə̂ mbo rə̂ pä äwatə̂ tchâkalâ ngâ ɛ̈chë ndə̂ kua ndə̂ yê wâ ndə̂kə̂ pu aköchë katchôgbɛ̂? Âdə̂âbo käko-a!

¹⁶ Nyë wûn-âbo sə̂nə̈ pä akrə ndə̂ tche pû ɛ̈chë ndə̂ kua ndə̂ yê wâ ndə̂kə̂ pu aköchë katchôgbɛ̂ lâme, tchetchë la ɛ̈chë nə̈ andjë ngbôâbo kə̈ wâ batə̂ akrə balë? Mbëtï Ndjapä tö rə̂ päkëdə̂: «Andjê bïchuû gbɛ̂ ngboadje kə̂ wa batə̂ akrə balë.»

¹⁷ Praâbalë akrə ndə̂ tche ngbôtə̂ yê balë la Gbölö Gbïɛ̈, andjë ngbö kə̈ wâ batə̂ akrə balë lə̂ köbosə̂ Yingö.

¹⁸ Nyë kpë tə̂kə̂ pu aɛ̈chë âdəndjë aköchë katchôgbɛ̂! Adɨ̂ angbongbo rə gbɛ̂ ndə̂ akrə mbo rə̂ grʉ̂âbo tə̂ yê-a. Praâbalë âdə akrə âpu aɛ̈chë âdəndjë aköchë katchôgbɛ̂, dëkë tche sə̈ lakə̂ mbo ngbongbo rə tə̂ tə̂ yê la tə̂ yê.

¹⁹ Nyë wûn-âbo sə̂nə̈ pä tə̂ nyê wätə̂ gbölö nda ndə̂ Kpɨ̂ki Yingö ndə̂ tche sə̂ lə̂ nyê lâme? Kpɨ̂ki Yingö lâme, Ndjapä kä ndə̂ âzâ tchë sə̈ nyê, nyë sə̂âbo kütû bëte nyê la tə̂ nyê-a.

²⁰ Ndjapä yö nyê la gbölö ngîrî. Äwäpä nyë zatə̂ nyê ndə̂kə̂ voga tchë la rə̂.