Dokʉ̈ Körɛ̂nte 5 - Mbëtï Ndjapä: TÄFO MADƗ̈

Arə ganô lə̂ Egilîze ndə̂ Körɛ̂nte

¹ A djë rə̂ katchôgbɛ̂ pä bhândə̂ nyê, kə̂ pu aɛ̈chë âdəndjë aköchë katchôgbɛ̂ rö masə̂nə̈. Achengana azü ndə̂ andjë wûn-âbô sə̂ Ndjapä wûn, a gbôâbo ndjë rə̂ bhândə̂ andjê-a! A tö rə̂ pä ngâ akrə balë lə̂ gûtə̂ nyê kä lakə̂ sə la ɛ̈chë ndə̂ bha nə̈.

² Nyë sə̈ lakə̂ bhi gogo nyê pâ arə käko! Äwä âme ndə̂kə̂ pa nyë sə la nyonyo, ânyë akrə ndə̂ tche mbo tə̂ rə käko, nyê ji tchë lə̂ gûtə̂ nyê-ê.

³ Andə̂ me nə̈, më sə̂âbo ndrotə̂ nyê-a, praâbalë më kä ndrotə̂ nyê lə̂ köbosə̂ Yingö. Më wâ ngbanga pâ akrə ndə̂ tche mbô rə lâme nə̂, âwûntî pä më kä lə̂ gûtə̂ nyê.

⁴ Âdə nyê âpalatə̂ nyê la rə̈ Gbölö Gbïɛ̈ ndə̂ azə̂ Jezü, mê səadje lə̂ gûtə̂ nyê lə̂ köbosə̂ Yingö la gbôgbô ndə̂ Gbölö Gbïɛ̈ ndə̂ azə̂ Jezü.

⁵ Äwäpä nyë gbotə̂ akrə käko tchânə̂ Satäa ânyë Satäa ndɨ tə̂ akrə nə̈. Käko ânyë yingö ndə̂ akrə nə̈ tcha lə̂ kuzü lo kə̂ ka ndə̂ Gbölö Gbïɛ̈.

⁶ Rə ndə̂ nyê bhi gogo nyê tə̂ pö ndə̂nə̈ lâme dâkabô-a! Nyë wûn-âbo sə̂nə̈ pä kütû kpîɛ̂kpîɛ̂ djëvö ndə̂ âwâ lə̂ zûwü farîni kä ndə̂ âmbo rə̂ pä farîni nə̈ suku?

⁷ Äwäpä nyë ji bəndɨ djëvö lə̂ gûtə̂ nyê ndə̂kə̂ pa nyë wa batə̂ täfo zûwü farîni ndə̂ djëvö wâbô wâ lə̂nə̈-ê. Ndə̂ Krîsiti wâtə̂ Ngbavö Ɛ̈bro-ngbaga ndə̂ Pâke ndə̂ azə̂, ndə̂ a zâ tchë la ngela lâme, nyë wâ nə̂ batə̂ täfo farîni ndə̂ djëvö wâbô wâ lə̂nə̈.

⁸ Käko âwâbo pä azə̈ mbo kpülü ndə̂ Pâke nə̈ la bəndɨ djëvö-a, ndə̂ âwâtə̂ djëvö ndə̂ ngbongbo rə, la andə̂ ngbongbo su lâme-a, praâbalë azə̈ mbö kpülü ndə̂ Pâke nə̈ la mâpa ndə̂ djëvö wâbô wâ lə̂nə̈-ê, ndə̂ ânyîndə̂ kə̂ to pö ndə̂kə̂ daka gbɛ̂ lakə̂ to lëge pö.

⁹ Lə̂ ngâ mbëtï ndə̂ më wân rə̂ sə̈ nyê dokʉ̈tchê, më tö rə̂ lə̂nə̈ päkëdə̂: «Nyë ngböäbô tə̂ nyê ngbô la azü ndə̂ andjë pu aɛ̈chë âdəndjë aköchë katchôgbɛ̂ lâme-ê.»

¹⁰ Pö ndə̂ më tô rə̂ alême wûn-âbo azü gbɛ̂ pâ cho âtə ndə̂ andjë pu aköchë âdəndjë aɛ̈chë katchôgbɛ̂-a, azü ndə̂ andjë wâ la gʉ arə tchêbêche la a-earə̂ ngbä, âdəndjë azü ndə̂ andjë voga angakʉ̈lä. Âdə pö ndə̂ mê nə̈ âwatə̂ pö ndə̂ azü käko lâme gbɛ̂, dëkë äwä ndə̂kə̂ pa nyë gbo pâ cho âtə-ê.

¹¹ Praâbalë më mbö mbëtï lâme sə̈ nyê ndə̂kə̂ pa nyë ngboabô tə̂ nyê ngbô la ngâ akrə ndə̂ tche tô rə̂ pä ânyë də̈ akrə ndə̂ Krîsiti ngâ nyê, ânyë kə̂ pu aɛ̈chë âdəndjë aköchë katchôgbɛ̂, kə̂ wa la gbölö gʉ ndə̂kə̂ gbo arə gbɛ̂, kə̂ voga angakʉ̈lä, kə̂ to angbongbo pö tə̂ angâ yê, kə̂ watə̂ ngbâa ndə̂ pî lakə̂ watə̂ earə̂ ngbä. Âwâbo ndjë ndə̂kə̂ pa nyë zɨ rə la akrə käko-a.

¹² Mëmê kä ndə̂ âwa ngbanga pâ azü də sûwu? Äwäpä nyë wä ngbanga ndə̂ azü dələ̂nə̈!

¹³ Andə̂ azü də sûwu, Ndjapä kä ndə̂ âwadje ngbanga ndə̂ andjê. Mbëtï Ndjapä tö rə̂ päkëdə̂: «Nyë jï Ngbongbo akrə lə̂ gûtə̂ nyê.»