Dokʉ̈ Körɛ̂nte 4 - Mbëtï Ndjapä: TÄFO MADƗ̈

Abadjângele ndə̂ Krîsiti

¹ Äwäpä nyë wun ârâ batə̂ a-earə̂ kua ndə̂ Krîsiti, ndə̂ andjë wâtə̂ azü ndə̂ andjë bata lëge pö ndə̂ Ndjapä ndə̂ âwâ lə̂ küwû nə̈ ndə̂kə̂ mbo rə̂ la kua gundə̂sə̂ nə̈.

² Dëkë rə ndə̂ a yukû nə̈ sə̈ a-earə̂ kə̂ bata rə ndə̂ Ndjapä, ânyë kə̂ mbo rə̂ la kua lâme wä ndə̂kə̂ pa andjë bata arə nə̈ kə̂ mbo rə̂ la kua la köbo nə̈.

³ Andə̂ me nə̈, âdə nyê ânyində̂ kə̂ wa ngbanga ndə̂ mê âdəndjë ngâ kpûlû ndə̂ a-earə̂ kə̂ wa ngbanga kä ndə̂ ânyîndə̂ kə̂ wa ngbanga ndə̂ mê, ngbanga ndə̂ mê wâbo lə̂nə̈-a, praâbalë âdə̂âbo mëmê kä ndə̂ âwa ngbanga ndə̂ mê la tə̂ mê-a.

⁴ Më mbôâbo ngâ ngbongbo rə ndə̂ su mê sə̂ lakə̂ hro la mê tə̂ pö ndə̂nə̈-a, praâbalë ânyîâbo ndə̂kə̂ to rə̂ pä më wâ djîrə̂ lə̂ la Ndjapä nə̂-a. Gbölö Gbïɛ̈ kä ndə̂ âwa ngbanga ndə̂ mê.

⁵ Käko âwâbo pä nyë wa ngbanga lə̂ küma akrə dokʉ̈tchê ndə̂kə̂ pa lo nə̈ wutu-a. Nyë krʉ̈ bëte Gbölö Gbïɛ̈, tche ka ânyë. Tchetchë kä ndə̂ âwutuadje la rə ndə̂ âwâ lə̂ küwû nə̈, lə̂ bübü tchô kə̂ za rə̂ ësûwu. Tchê nyiadje sə̂ rə ndə̂ âwâ bhâlə̂ su azü kraâ lə̂ la azü gbɛ̂. Käko Ndjapä gambadje akrə balë balë gundə̂sə̂ kua ndə̂ tche mbô rə̂.

⁶ Arə̂mä, tə̂ pö ndə̂ nyê kä ndə̂ më tô pö ndə̂ Äpölôse ndjë la andə̂ me nə̈ la tə̂ mê, ndə̂kə̂ nyisə̂ nə̈ sə̈ nyê lə̂ köbosə̂ kə̂ mbo rə ndə̂ ârâ. Nyë djë tchə̂lə̂ ndoka âtə: «Äwäpä akrə balë balë krʉ kütû pâ pö ndə̂ a mbô rə̂ lə̂ mbëtï.» Käko ânyë ngâ akrə balë bhiabô gogo yê bhî ndə̂kə̂ sə dəndə̂ ngâ akrə ânyë kə̂ kosə̂ ngânə̈.

⁷ Tchabâ kä ndə̂ âtô rə̂ sə̈ mö pä momö kä ndə̂ âwâ gbölö pâ angâ zə̈ gbɛ̂? Arə ndə̂ mo wâ la rə̂, Ndjapä də̂âbo tchë ndə̂ tche kʉ̂ rə̂ sə̈ mö? Âdə Ndjapä âdə tchë ndə̂ tche kʉ̂ rə̂ sə̈ mö, bëte giamâ kä ndə̂ mo bhi gogo zə̈ âwûntî pä a kʉ̂âbo rə̂ kʉ̈ sə̈ mö?

⁸ Nyë wüntî pä nyë gbô arə gbɛ̂ ndə̂ su nyê nyîndə̂ nə̈ nə̂! Nyë wüntî pä nyë wâ nə̂ tə̂ azü ndə̂ andjë wâ la rə! Nyë wâ sa nə̂ tə̂ agbïɛ̈, praâbalë âdə̂âbo ârâ-a! Tə̂ lëge nə̈ më nyïndə̂ nə̈ pä nyë watə̂ alëge agbïɛ̈ ânyë ârâ mbo ndjë gbïɛ̈ la nyê.

⁹ Bëte lə̂ la mê, Ndjapä kʉ̈ ârâ ndə̂ abadjângele kə̈ gbôtə̂ ârâ dəngbâ azü gbɛ̂, batə̂ azü ndə̂ a wâ ngbanga kuzü lə̂ küma andjê: Azü tchêbêche gbɛ̂ täkpa ndə̂ ârâ lakə̂ wun ârâ batə̂ rə ngɨ̈, aânje ndjë la azü gbɛ̂ wün ndjë ârâ.

¹⁰ Ârâ wätə̂ a-earə̂ nyî bëte Krîsiti, praâbalë nyënyê ndə̂ nye nə̈, nyë wätə̂ azü ndə̂ küma andjê wâ lanə̈ lə̂ köbosə̂ nə̈ ndə̂ nyë wâ balë la Krîsiti. Ârâ wâbo la gbôgbô-a, praâbalë nyë kä la gbôgbô. A lüsə̂ nyê, praâbalë kə̈ tâlusə̂ ârâ.

¹¹ Ndə̂ azə̈ kä sə̂ âtə, gʉ kä lakə̂ nyu ârâ, tchə̂lə̂ gɨ ârâ hrô nə̂, lə̂ba wâbo tə̂ ârâ-a, a mbö ngbongbo rə tə̂ ârâ, ârâ wâbo la ngâ tchô ndə̂kə̂ sə kpiî ëtâ-a.

¹² Ârâ wün yûkü lakə̂ mbo kua la könô ârâ ânyë kə̂ gbo kɨ̈zɨ̂. A drö ârâ, praâbalë ârâ ë tchôtchô pö pâ andjê, a mbö ârâ la gbôgbô, praâbalë ârâ rʉ̈ätə̂ su ârâ.

¹³ A jënde ârâ, praâbalë ârâ tö kütû atchôtchô pö ndə̂nə̈. Ndə̂ tchô angaâtə, ârâ mbôtə̂ ârâ nə̂ batə̂ akrətcherə ndə̂ tchêbêche âtə, batə̂ aföfö arə ndə̂ azü yî rə̂ fiî.

¹⁴ Më mbôâbo mbëtï âtə sə̈ nyê ndə̂kə̂ za ganô lə̂ la nyê-a, praâbalë më nyïndə̂ kə̂ kra tü nyê dokʉ̈tchê batə̂ abechë ndə̂ mê ndə̂ më nyîndə̂ andjê tə̂ gbölösə̂nə̈.

¹⁵ Bëte âdə azü sâke lə̂ könô gbɛ̂ kä ndə̂ ânyîsə̂ köbo ndə̂kə̂ wa balë la Krîsiti sə̈ nyê, arabha nyê ngbâbo ngbä-a: Mëmê kä ndə̂ âzɨ̂ nyê lə̂ köbosə̂ nə̈ ndə̂ më mû Tchôtchô Pö sə̈ nyê ânyë nyë wâ balë la Jezü Krîsiti.

¹⁶ Käko më zä wängö sə̈ nyê ndə̂kə̂ mbo rə batə̂ mê.

¹⁷ Tə̂ pö ndə̂nə̈ kä ndə̂ më wân Timotë sə̈ nyê, modô ndə̂ mê ndə̂ më nyîndə̂ yê tə̂ gbölösə̂nə̈, ndə̂ gbô tchë sə̂ lə̂ köbo Gbölö Gbïɛ̈. Tche kä ndə̂ ânyiadje sə̂ köbo ndə̂ më sə̂ la rə̂ la tchêngbâ nə̈ ndə̂ më wâ balë la Krîsiti, batə̂ rə̂ ndə̂ më nyîsə̂ nə̈ katchôgbɛ̂, kulə̂ a-Egilîze.

¹⁸ Angâ azü wüntî pä mê kä ka bata atə̂ndə̂ nyê tee-a, ânyë kə̈ sə̂ lakə̂ nyisə̂ tə̂ andjê ârô masə̂nə̈.

¹⁹ Praâbalë âdə Gbölö Gbïɛ̈ ânyində̂ nə̈, mê kä kadje atə̂ndə̂ nyê angangaâtə. Âdə më âwutu, më nyîâbo ndə̂kə̂ dje kütû apö ndə̂ a-earə̂ kə̂ bhi gogo lâme-a, praâbalë më nyïndə̂ kə̂ wun gbôgbô ndə̂ andjê lakə̂ mbo rə.

²⁰ Bëte Gbölö gö-gbïɛ̈ ndə̂ Ndjapä wâbo lə̂ köbosə̂ apö-a, praâbalë äwä lə̂ köbosə̂ kə̂ mbo rə la gbôgbô ndə̂ Ndjapä.

²¹ Giamâ nyë nyîndə̂ nə̈? Nyë nyïndə̂ nə̈ pä më nə pu nyê la djapra? Âdəndjë rə̂ ndə̂ nyë nyîndə̂ nə̈ pä më nə la su ndə̂kə̂ nyində̂ ngâ ndjë la su ndə̂ âmbo rə tə̂ nyima nə̈?