Dokʉ̈ Körɛ̂nte 3 - Mbëtï Ndjapä: TÄFO MADƗ̈

A-earə̂ kua ndə̂ Ndjapä

¹ Arə̂mä, andə̂ me nə̈ më gbôâbo köbo ndə̂kə̂ to pö sə̈ nyê batə̂ rə̂ ndə̂ a to pö sə̈ azü ndə̂ andjë wâ la Kpɨ̂ki Yingö-a, praâbalë më tö pö sə̈ nyê kütû batə̂ rə̂ ndə̂ a to rə̂ sə̈ azü ndə̂ andjë wûn-âbô sə̂ Ndjapä wûn-î, la azü ndə̂ Krîsiti ndə̂ gbô andjê wâtə̂ abechë lə̂kə̂ za su sə̈ Ndjapä.

² Më zä ngû ngo sə̈ nyê ndə̂kə̂ pa nyë ndjo rə̂, më zâbo gbôgbô kɨ̈zɨ̂ sə̈ nyê-a, bëte nyê zɨabô rə̂ tee-a. Praâbalë ndə̂ tchô angêta nyê kä gboabô ndjë köbo ndə̂kə̂ zɨ rə̂ tee-a.

³ Bëte gbô nyê kä lakə̂ mbo rə batə̂ azü ndə̂ tchêbêche âtə. Gbölö su lakə̂ po kä lə̂ gbâtə̂ nyê. Ânyîâbo sə̂nə̈ pä nyë mbö rə batə̂ azü ndə̂ tchêbêche âtə? Kə̂ mbo rə ndə̂ nyê wâbo batə̂ andə̂ azü gbɛ̂?

⁴ Âdə ngânə̈ balë lə̂ gûtə̂ nyê âto rə̂ päkëdə̂: «Më də̈ akrə ndə̂ Pôlo», ânyë ngânə̈ tô ndjë rə̂ päkëdə̂: «Më də̈ tchandə̂ Äpölôse», kə̂ mbo rə ndə̂ nyê wâbo batə̂ andə̂ azü gbɛ̂?

A-earə̂ kua ndə̂ Ndjapä

⁵ Äpölôse də̈ tchabâ? Ânyë Pôlo də̂ tchabâ? Ârâ də̈ kütû a-earə̂ kua ndə̂ Ndjapä. Lə̂ köbosə̂ ârâ kä ndə̂ nyë zâ su nyê sə̈ Krîsiti. Akrə balë balë lə̂ gbâtə̂ ârâ mbö kua gundə̂sə̂ arə ndə̂ Gbölö Gbïɛ̈ zâ rə̂ sə̈ tchë.

⁶ Mëmê kä ndə̂ âchî rə nə̈, Äpölôse sû ngû tâ, praâbalë Ndjapä kä ndə̂ âmbo rə̂ pä äkʉche.

⁷ Käko akrə ndə̂ tche chî rə̂ la akrə ndə̂ tche sû ngû tâ, andjë gbɛ̂ wâbo tə̂ ngâ rə-a. Praâbalë gbölö rə nə̈ də̈ akrə ndə̂ tche mbô rə̂ pä äkʉche, tche də̈ Ndjapä balë.

⁸ Akrə ndə̂ tche lû rə̂ la akrə ndə̂ tche sû ngû tâ, andjë wä nyɛ̂ɛ̂ balë. Praâbalë Ndjapä zadje rə sə̈ akrə balë balë gundə̂sə̂ kua ndə̂ tche mbô rə̂.

⁹ Bëte ârâ mbö kua balë la Ndjapä, ânyë nyë də̂ andə̂ nye nə̈ kɨ̈ndɨ̈ ndə̂ Ndjapä. Nyë wä ndjë tə̂ nda ndə̂ Ndjapä.

¹⁰ Lə̂ köbosə̂ tchôtchô su ndə̂ Ndjapä mbô rə̂ tə̂ mê, më mbö kua nə̈ batə̂ ngâ tchôtchô earə̂ kə̂ mbo nda, ânyë kə̈ mbô da nda nə̈. Ngâ akrə ngbî mbô nda ëpânə̈. Praâbalë äwäpä la akrə balë balë gbo lə̂ känyï ndə̂ tche mbo rə̂ la nda nə̈ ëpânə̈.

¹¹ Bëte ngâ akrə ndə̂ tche wâ ndə̂kə̂ mbo ngâ da nda ngbî tə̂ anə̈ ndə̂ a mbô rə̂ dokʉ̈tchê lâme sə̂âbo-a, da nda nə̈ də̈ Jezü Krîsiti.

¹² Akrə wä ndə̂kə̂ mbo nda pâ da nda nə̈ lâme la lôlo la wɛ̂n ndə̂ a mbo rə̂ la makətche la täme ndə̂ gbôgbô ngîrî la yö la angâ agbâkü bë ngbî ngbî.

¹³ Kua ndə̂ akrə balë balë wutuadje kraâ lə̂ la azü gbɛ̂ tə̂ lo kə̂ wa ngbanga. Bëte kua ndə̂ akrə balë balë roadje lə̂ wo, ânyë wo ânyiadje sə̂ tchôtchô kua âdəndjë ngbongbo kua ndə̂ akrə balë balë gbɛ̂ ësûwu.

¹⁴ Âdə akrə âmbo nda ânyë âjûâbô jû-î, tchê gboadje ngâ tchôtchô rə ngbânə̈.

¹⁵ Praâbalë âdə nda ndə̂ yê âju, tchê gboabô ngâ rə balë tee-a. Tchetchë la tə̂ yê tchadje lə̂ kuzü, praâbalë äwä batə̂ rə̂ ndə̂ akrə rô lə̂ tïmï wo.

¹⁶ Nyë wätə̂ gbölö nda ndə̂ Ndjapä, ndə̂ Yingö ndə̂ yê sə̂ lə̂ nyê. Nyë wûn-âbo sə̂nə̈ käko-ë?

¹⁷ Âdə ngâ akrə ândɨ gbölö nda Ndjapä, Ndjapä ândɨadje ndjë tchë. Tə̂ lëge nə̈, gbölö nda Ndjapä wä ngbî bëte Ndjapä, ânyë nyënyê kä ndə̂ âwâtə̂ gbölö nda Ndjapä nə̈.

Djîrə̂ küma akrə ndə̂ âwa lanə̈

¹⁸ Âwâbo pä akrə bolotə̂ yê la tə̂ yê-a. Âdə ngâ akrə lə̂ gbâtə̂ nyê âwun rə̂ pä küma anyê kä lanə̈ batə̂ azü ndə̂ tchêbêche âtə, äwäpä tche watə̂ earə̂ nyî ânyë kə̂ watə̂ djîrə̂ akrə ndə̂ küma yê wâ lanə̈.

¹⁹ Bëte küma azü tchêbêche ndə̂ âwa lanə̈ wätə̂ rə nyî lə̂ la Ndjapä. Ädə̈ käko ânyë Mbëtï Ndjapä tô rə̂ päkëdə̂: «Ndjapä gbö azü ndə̂ küma andjê wâ lanə̈ lâme lə̂ känyï ndə̂kə̂ bolo azü ndə̂ andjê la tə̂ andjê.»

²⁰ Mbëtï nə̈ kä tô rə̂ päkëdə̂: «Gbölö Gbïɛ̈ wünsə̂ pö bhâlə̂ su akrə ndə̂ küma yê wâ lanə̈, kə̈ wûnsə̂ nə̈ nə̂ pä küma andjê ndə̂ âwâ lanə̈ lâme wä ämbämbänə̈.»

²¹ Käko âwâbo pä ngâ akrə bhi gogo yê tə̂ pö ndə̂ azü-a, bëte rə nə̈ gbɛ̂ wätə̂ andə̂ nye nə̈.

²² Pôlo âdəndjë Äpölôse âdəndjë Pîêre âdəndjë tchêpâ cho gbɛ̂ âdəndjë kə̂ sə la tʉ̈rʉ̂ la âdəndjë kuzü âdəndjë tchô angêta âdəndjë tchêlâmbo, rə lâme gbɛ̂ də̈ andə̂ nye nə̈.

²³ Praâbalë nyënyê, nyë wätə̂ azü ndə̂ Krîsiti, ânyë Krîsiti wâtə̂ akrə ndə̂ Ndjapä.