Dokʉ̈ Körɛ̂nte 2 - Mbëtï Ndjapä: TÄFO MADƗ̈

Pôlo tö rə̂ pä a wôn Jezü pâ yö ndə̂ gba nə̂

¹ Arə̂mä, mëmê la tə̂ mê ndə̂ më ê atə̂ndə̂ nyê alême ndə̂kə̂ mu apö ndə̂ Ndjapä ndə̂ âwâ lə̂ küwû nə̈, më mûâbo pö nə̈ lə̂ köbosə̂ agbôgbô pö âdəndjë lə̂ köbosə̂ küma mê ndə̂ âwâ lanə̈-a.

² Bëte, ndə̂ më sə̂ lə̂ gbâtə̂ nyê, më nyîâbo ndə̂kə̂ wunsə̂ ngâ rə ngbî-a, kütû Jezü Krîsiti, Jezü Krîsiti ndə̂ a wôn tchë pâ yö ndə̂ gba.

³ Ndə̂ më sə̂ lə̂ gbâtə̂ nyê alême, më wâbo la gbôgbô-a, wawa rôpâ mê ânyë më sə̂ lakə̂ gûgû gügu.

⁴ Pö ndə̂ mê lakə̂ nyisə̂ rə ndə̂ mê wâbo tə̂ atchôtchô pö lə̂ köbosə̂ küma akrə ndə̂ âwâ lanə̈-a. Praâbalë Kpɨ̂ki Yingö kä ndə̂ ânyîsə̂ nə̈ la gbôgbô pä pö nə̈ wätə̂ lëge nə̈.

⁵ Käko ânyë kə̂ za su nyê sə̈ Ndjapä krʉabô krʉ̂ pâ küma akrə ndə̂ âwa lanə̈-ê, praâbalë äkrʉ̈ pâ gbôgbô ndə̂ Ndjapä.

Küma Ndjapä ndə̂ âwâ lanə̈

⁶ Dëkë, ârâ nyïsə̂ köbo ndə̂ küma akrə wa lanə̈ sə̈ azü ndə̂ Krîsiti ndə̂ andjë dû lə̂kə̂ za su andjê sə̈ Ndjapä. Küma ndə̂ âwa lanə̈ lâme tôâbo pâ cho âtə-a, kə̈ tôâbo ndjë tə̂ a-earə̂ kümändëmä ndə̂ andjë wâ la gbôgbô pâ cho âtə-a. Arə lâme gbɛ̂ wä ndə̂kə̂ ndɨ̂ndɨ̈.

⁷ Ârâ nyïsə̂ köbo ndə̂ küma Ndjapä wâ lanə̈, ndə̂ âwâ lə̂ küwû nə̈, ndə̂ tche vûsə̂ nə̈ tə̂ azü. Praâbalë dokʉ̈tchê ndə̂kə̂ pa Ndjapä mbo arə gbɛ̂, tche nyîkrə pö ndə̂ küma ndə̂ âwa lanə̈ lâme nə̂, ndə̂kə̂ pa azə̈ gbo kə̂ lusə̂tə̂ lə̂ köbosə̂ nə̈.

⁸ Ngânə̈ balë lə̂ gbâtə̂ a-earə̂ kümändëmä ndə̂ andjë wâ la gbôgbô pâ cho âtə wûn-âbo sə̂ pö pâ küma ndə̂ âwa lanə̈ lâme-a. Âdə andjê âwunsə̂ nə̈ alême, dëkë andjê won-abô Gbölö Gbïɛ̈ ndə̂ tche wâ la gbôgbô pâ yö ndə̂ gba tee-a.

⁹ Praâbalë Mbëtï Ndjapä tö rə̂ päkëdə̂: «Rə ndə̂ la akrə wûn-âbô rə̂ wûn-î, rə ndə̂ tü akrə djêâbô rə̂ djê-ê, rə ndə̂ pö nə̈ wûtuabô wûtu tə̂ su akrə-ê, Ndjapä nyïkrə rə̂ gbɛ̂ bëte azü ndə̂ andjë nyîndə̂ yê.»

¹⁰ Bëte Ndjapä nyïsə̂ arə lâme sə̈ azə̂ lə̂ köbosə̂ Yingö ndə̂ yê. Bëte Yingö pü dju apö gbɛ̂, ndjë la arə ndə̂ Ndjapä nyîkrə rə̂ bhâlə̂ su yê ndə̂ gbô rə̂ wâ lə̂ küwû nə̈.

¹¹ Tchabâ lə̂ gûtə̂ azü pâ cho âtə kä ndə̂ âwûnsə̂ apö ndə̂ akrə ndə̂ âwâ lə̂ küwû nə̈? Kütû yingö ndə̂ akrə ndə̂ âwâ lə̂ yê kä ndə̂ âwûnsə̂ nə̈. Käko ndjë, rə ndə̂ âwâ bhâlə̂ su Ndjapä, ngâ akrə balë wûn-âbo sə̂nə̈-a, kütû Kpɨ̂ki Yingö.

¹² Âdə andə̂ azə̈ nə̈, azə̈ gbôâbo yingö ndə̂ tchêbêche âtə-a, praâbalë azə̈ gbö Yingö ndə̂ âtô bhândə̂ Ndjapä, ndə̂ âmbô rə̂ pä azə̈ wunsə̂ atchôtchô arə ndə̂ Ndjapä kʉ rə̂ sə̈ azü lə̂ köbosə̂ tchôtchô su yê.

¹³ Käko ârâ tôâbo pö lə̂ köbosə̂ küma azü ndə̂ âwa lanə̈ pâ cho âtə-a, praâbalë ârâ tö rə̂ lə̂ köbosə̂ nə̈ ndə̂ Kpɨ̂ki Yingö nyîsə̂ nə̈ sə̈ ârâ. Ädə̈ käko ânyë ârâ nyisə̂ rə ndə̂ Kpɨ̂ki Yingö la apö ndə̂ âtô bhândə̂ Yingö lâme.

¹⁴ Akrə ndə̂ tche wâbô wâ la Yingö ndə̂ Ndjapä, tche wâbo ndə̂kə̂ gamba arə ndə̂ Kpɨ̂ki Yingö-a. Rə nə̈ wä batə̂ rə nyî lə̂ la yê, tche wâbo ndə̂kə̂ dje tchə̂lə̂ nə̈-a, bëte lə̂ köbosə̂ Kpɨ̂ki Yingö balë kä ndə̂ akrə wünsə̂ kə̂ krʉ tchə̂lə̂ tchôtchô rə la ngbongbo rə.

¹⁵ Akrə ndə̂ tche wâ la Kpɨ̂ki Yingö, tche wünsə̂ kə̂ krʉ tchə̂lə̂ tchôtchô rə la ngbongbo rə gbɛ̂, praâbalë ngâ akrə balë ndə̂ tche wâ ndə̂kə̂ to ngâ pö pâ yê wâbo-a.

¹⁶ Bëte Mbëtï Ndjapä tö rə̂ päkëdə̂: «Tchabâ kä ndə̂ âwûnsə̂ pö bhâlə̂ su Gbölö Gbïɛ̈? Tchabâ kä âwâ ndə̂kə̂ nyisə̂ rə sə̈ tchë?» Dëkë andə̂ azə̈ nə̈, pö bhâlə̂ su Krîsiti kä bhâlə̂ su azə̂.