Dokʉ̈ Körɛ̂nte 16 - Mbëtï Ndjapä: TÄFO MADƗ̈

Kə̂ pala makətche bëte Egilîze ndə̂ Jerûzalêmo

¹ Âdə andə̂ pö ndə̂ kə̂ pala makətche bëte azü ndə̂ Ndjapä, äwäpä nyënyê ndjë gbɛ̂, nyë mbö rə̂ batə̂ rə̂ ndə̂ më nyîsə̂ köbo nə̈ sə̈ a-Egilîze ndə̂ Gälâte.

² Lə̂ dɨmâche balë balë, äwäpä akrə balë balë lə̂ gûtə̂ nyê za ngâ tchâkalâ makətche ndə̂ yê gundə̂sə̂ rə ndə̂ tche gbô rə̂, kə̂ bata rə̂ ngbî bhâ tchâalê ndə̂ yê. Käko ânyë a krʉabô krʉ̂ bëte mê pä më wutu ânyë a pala makətche nə̈-a.

³ Âdə mê âwutu bhâye, mê wan-adje ambëtï la makətche ngbâ nyê lâme atə̂ Jerûzalêmo tchânə̂ azü ndə̂ nyê nyiadje sə̈ andjê.

⁴ Âdə ârə̂ âwa ndə̂kə̂ pa mëmê la tə̂ mê e, mê eadje la andjê.

Angâ atchô ndə̂ Pôlo nyîndə̂ kə̂ e ku tâ

⁵ Mê nəadje pu nyê, la tchêngbâ nə̈ ndə̂ mê roadje pâ cho ndə̂ Mäsëdöâne; bëte mê roadje lə̂ Mäsëdöâne ânyë kə̂ e etə̂.

⁶ Âdə köbo âwa, mê səadje la nyê lə̂ angâ alö, âdəndjë rə̂ mê sə lə̂ alö gbɛ̂ ndə̂ zɨ sə̂ lakə̂ mbo, ndə̂kə̂ pa nyë kʉ arə sə̈ mê bëte wrʉ̂ ndə̂ mê.

⁷ Andə̂ anə̈ âtə, më nyîâbo ndə̂kə̂ yi kütû la mê pâ nyê kə̂ ro etə̂-a, praâbalë më nyïndə̂ kə̂ sə la nyê lə̂ angâ alö, ndə̂ Gbölö Gbïɛ̈ nyîndə̂ nə̈.

⁸ Praâbalë mê âsə ndjë bhâ Ëfêze zoo ëtə̂ lö kpülü ndə̂ Päntëkôte.

⁹ Bëte ngâ gbölö köbo jî sə̈ mê nə̂ ndə̂kə̂ mbo ngâ kua bhâye, praâbalë a-earə̂ kə̂ kitə̂ köbo tə̂ kua ndə̂ mê ngbä tə̂ gbölösə̂nə̈.

¹⁰ Âdə Timotë âwutu bhâye, nyë mbö rə̂ ndə̂kə̂ pa tche səabô sə̂ lə̂ gbâtə̂ nyê la wa-ê, bëte tche mbö ndjë kua ndə̂ Gbölö Gbïɛ̈ batə̂ mê.

¹¹ Âwâbo pä ngâ akrə balë wun tchë batə̂ mbämbä akrə-a. Nyë kʉ̈ arə sə̈ tchë ndə̂kə̂ pa tche ka la zɨtɨ su pu mê, bëte mëmê la arə̂mâ, ârâ kä lakə̂ krʉ bëte tchë.

¹² Âdə andə̂ Äpölôse ngâ azə̂, më zä wängö sə̈ tchë tə̂ gbölösə̂nə̈ ndə̂kə̂ pa tchetchë la arə̂mâ, andjë e atə̂ndə̂ nyê, praâbalë tche nyîâbo ndə̂kə̂ e angaâtə-a. Lo nə̈ âta tâ nə̂, tchê eadje.

Adɨ̂ apö lakə̂ pö ndə̂ azü

¹³ Nyë löäbô lô-ê, nyë rʉ̈ätə̂ su nyê ndə̂ nyë zâ rə̂ sə̈ Krîsiti, nyë mbö rə batə̂ aköchë, kə̂ kpokpo tə̂ nyê.

¹⁴ Rə gbɛ̂ ndə̂ nyê mbo rə̂, nyë mbö rə̂ lakə̂ nyïndə̂ angâ nyê.

¹⁵ Nyë wûnsə̂ nə̈ nə̂ pä Sëtëfänâse la azü lə̂ bûngrɨ̂ ndə̂ yê də̈ adokʉ̈ azü ndə̂ Akayï ndə̂ andjë zâ su andjê sə̈ Krîsiti, ânyë kə̈ zâtə̂ andjê gbɛ̂ ndə̂kə̂ mbo dâkâ tə̂ azü ndə̂ Ndjapä. Arə̂mä, më yükû nə̈ sə̈ nyê:

¹⁶ Nyë djë ma azü käko, kə̂ dje ndjë ma azü ndə̂ andjë mbo kua la andjê balë lakə̂ wun yûkü lâme.

¹⁷ Më wä la mômô bëte kə̂ nə ndə̂ Sëtëfänâse, Förötünätûse la Äkäyïkûse; andjë mbö rə̂ la mê lə̂ kpâlâ nyê,

¹⁸ bëte andjë mbö rə̂ ânyë su mê la andə̂ nye nə̈ zɨ̂. Äwäpä nyë wunsə̂ kə̂ gamba tchôtchô kə̂ mbo rə ndə̂ azü käko.

¹⁹ Azü ndə̂ a-Egilîze lə̂ gö ndə̂ Azï pô ndə̂ nyê nə̂. Äkïlâse la Prïsîye pô ndə̂ nyê nə̂ la rə̈ Gbölö Gbïɛ̈, ndjë la azü ndə̂ Egilîze ndə̂ andjë pala tchê tə̂ andjê bhâ tchâalê ndə̂ arə̂mâ bïchuû lâme.

²⁰ Arə̂mâ gbɛ̂ ndə̂ andjë sə̂ bhâtə̂, pô ndə̂ nyê nə̂. Nyë pö ndə̂ angâ nyê lə̂ gbâtə̂ nyê lakə̂ a ma angâ nyê ndə̂ âdâka gbɛ̂ lə̂ la Ndjapä.

²¹ Mëmê la tə̂ mê kä ndə̂ âmbô apö ndə̂kə̂ po ndə̂ azü âtə la könô mê: Mëmê Pôlo, më pô ndə̂ nyê nə̂.

²² Âdə ngâ akrə ânyiabô nyîndə̂ Gbölö Gbïɛ̈, äwäpä ngbongbo pö wa pâ yê. Maranatä! Gbölö Gbïɛ̈ amö nə!

²³ Äwäpä Gbölö Gbïɛ̈ Jezü mbo tchôtchô su tə̂ nyê.

²⁴ Më nyïndə̂ nyê gbɛ̂ lə̂ köbosə̂ nə̈ ndə̂ azə̈ wâ balë la Jezü Krîsiti.