Dokʉ̈ Körɛ̂nte 15 - Mbëtï Ndjapä: TÄFO MADƗ̈

Pö ndə̂kə̂ jo ndə̂ Krîsiti lə̂ kuzü

¹ Arə̂mä, më nyïndə̂ kə̂ kä kra tü nyê pâ Tchôtchô Pö ndə̂ më mû rə̂ sə̈ nyê alême, ndə̂ nyë gbô rə̂ ânyë gbô su nyê wâ pânə̈ lâme.

² Âdə nyê âbata Tchôtchô Pö nə̈ batə̂ rə̂ ndə̂ më mû rə̂ sə̈ nyê, nyê tchadje lə̂ kuzü lə̂ köbosə̂ nə̈; ârə̂ âdəabô də̂ käko, dëkë kə̂ za su nyê sə̈ Ndjapä wä ämbänə̈.

³ Dokʉ̈ rə ndə̂ më nyîsə̂ nə̈ sə̈ nyê də̈ pö ndə̂ mëmê la tə̂ mê më gbô rə̂: Krîsiti tchü bëte ngbongbo rə ndə̂ azə̂, batə̂ rə̂ ndə̂ Mbëtï Ndjapä tô rə̂,

⁴ a chï tchë, lə̂ lö vötaâ, tche jô lə̂ kuzü, batə̂ rə̂ ndə̂ Mbëtï Ndjapä tô rə̂.

⁵ Tche wütu ëtə̂ Pîêre, pânə̈ tche wûtu ëtə̂ abadjângele lə̂ könô gbɛ̂ tchêpâ nə̈ bïchuû.

⁶ La tchêngbâ nə̈ tche wûtu ëtə̂ arə̂mâ ndə̂, kə̂ ngba ndə̂ andjê rô ngbangbo mïndûu (500) kpö sə̂nə̈ balë. Gbô gbogbôsə̂ andjê kä la tʉ̈rʉ̂ la andjê, angânə̈ tchû nə̂.

⁷ Pânə̈ tche wûtu ëtə̂ Jâke, la tchêngbâ nə̈ tche wûtu ëtə̂ abadjângele gbɛ̂.

⁸ La tchêngbâ azü lâme gbɛ̂ tche wûtu ndjë ëtə̂ mê, mëmê ndə̂ më wâ batə̂ bechë ndə̂ a zɨ̂ tchë tə̂ zɨ̈zɨ̈ nə̈.

⁹ Bëte më wä kpîɛ̂kpîɛ̂ rə̂ tə̂ abadjângele gbɛ̂, më kʉ̂âbo ndjë sə̂nə̈ pä a e rə̂ tə̂ mê pä badjângele-a, bëte më mbö gbôgbô tə̂ Egilîze ndə̂ Ndjapä.

¹⁰ Praâbalë lə̂ köbosə̂ tchôtchô su ndə̂ Ndjapä, më də̈ akrə ndə̂ nyê wun mê angêta âtə. Tchôtchô su ndə̂ Ndjapä mbô rə̂ tə̂ mê, tchêngbâ nə̈ wâbo ämbänə̈-a, praâbalë më mbö kua ârô adɨ̂ abadjângele gbɛ̂. Âdə̂âbo mëmê kä ndə̂ âmbô kua nə̈-a, praâbalë tchôtchô su ndə̂ Ndjapä ndə̂ âwâ la mê kä ndə̂ âmbô rə̂.

¹¹ Käko mëmê âdəndjë adɨ̂ abadjângele nə̈, pö ndə̂ ârâ sə̂ lakə̂ mu rə̂ kä lâme, pö ndə̂ nyë zâ su nyê sə̈ Ndjapä tə̂ pö ndə̂nə̈ kä lâme.

Pö ndə̂kə̂ jo ndə̂ akuzü

¹² Âdə ârâ sə lakə̂ mu pö, ârâ tö rə̂ pä Krîsiti jô lə̂ kuzü nə̂. Ämbö atöko ânyë angâ azü lə̂ gbâtə̂ nyê to rə̂ pä akuzü wâbo ndə̂kə̂ jo lə̂ kuzü lâme?

¹³ Âdə azü âwabô wâ ndə̂kə̂ jo lə̂ kuzü, dëkë Krîsiti jôâbo ndjë lə̂ kuzü nə̂-a.

¹⁴ Âdə Krîsiti âjoabô jô lə̂ kuzü, dëkë kə̂ mu pö ndə̂ ârâ wä ämbänə̈, kə̂ za su nyê sə̈ Ndjapä wä ndjë ämbänə̈.

¹⁵ Pâ arə lâme gbɛ̂, âdə akuzü âjoabô jô tə̂ lëge nə̈, änyïndə̂ kə̂ to rə̂ pä Ndjapä jôâbo Krîsiti lə̂ kuzü nə̂-a. Âdə rə nə̈ âwa käko, dëkë ârâ mö yepa la rə̈ Ndjapä, tə̂ pö ndə̂nə̈ ndə̂ ârâ tô rə̂ pä tche jö Krîsiti lə̂ kuzü lâme.

¹⁶ Âdə akuzü âjoabô jô-ê, dëkë Krîsiti jôâbo ndjë lə̂ kuzü nə̂-a.

¹⁷ Âdə Krîsiti âjoabô jô lə̂ kuzü, dëkë kə̂ za su nyê sə̈ Ndjapä wä ämbänə̈, gbô nyê kä lə̂ ngbongbo rə ndə̂ nyê.

¹⁸ Käko änyïndə̂ kə̂ to rə̂ pä andjanə̈ ndə̂ andjë zâ su andjê sə̈ Ndjapä ânyë kə̈ tchû lə̂ Krîsiti lâme, andjë yû nə̂ tratralë-ê.

¹⁹ Âdə azə̂ âza su azə̂ pâ Krîsiti kütû bëte tchîsûwu ndə̂ azə̈ wâ la rə̂ angêta, dëkë azə̈ də̈ a-earə̂ nyonyo ârô adɨ̂ azü gbɛ̂.

²⁰ Praâbalë tə̂ lëge nə̈, Krîsiti də̈ dokʉ̈ akrə ndə̂ tche jô lə̂ kuzü, ndə̂kə̂ nyisə̂ nə̈ pä azü ndə̂ andjë tchû, andjê joadje ndjë lə̂ kuzü.

²¹ Bëte rə̂ ndə̂ kuzü nə̂ lə̂ köbosə̂ akrə balë, kə̂ jo ndə̂ azü lə̂ kuzü nəadje ndjë lə̂ köbosə̂ akrə balë.

²² Batə̂ rə̂ ndə̂ azü gbɛ̂ tchû lə̂ köbosə̂ Adâme, käko azü gbɛ̂ wadje ndjë la tchîsûwu lə̂ köbosə̂ Krîsiti.

²³ Praâbalë lö akrə balë balë âta tâ ânyë tche jo lə̂ kuzü: Dokʉ̈ akrə nə̈ də̈ Krîsiti, pânə̈ azü ndə̂ Krîsiti joadje kpô lo kə̂ ka ndə̂ yê.

²⁴ Pânə̈, rə gbɛ̂ âka sə̂nə̈ ndə̂ Krîsiti ndɨadje angbongbo atchozö ndə̂ andjë wâ la kümändëmä la gbôgbô pâ azə̂, ânyë kə̂ gboadje tə̂ mbätä-gbïɛ̈ ndə̂ yê nə̈ sə̈ Ndjapä Bha.

²⁵ Bëte äwäpä Krîsiti wa gbïɛ̈, zoo Ndjapä kʉ a-earə̂ kə̂ kosə̂ yê gbɛ̂ ëtchâtchâ da yê.

²⁶ Balë earə̂ kə̂ kosə̂ yê nə̈, ndə̂ tche ndɨadje tchë də̈ kuzü.

²⁷ Bëte Mbëtï Ndjapä tö rə̂ päkëdə̂: «Ndjapä kʉ̈ arə gbɛ̂ ëtchâtchâ da yê.» Praâbalë änyïndə̂ kə̂ to rə̂ pä Ndjapä nə̈ ndə̂ tche kʉ̂ arə gbɛ̂ ëtchâtchâ da Krîsiti nə̈ lâme, tchetchë la tə̂ yê tche sə̂âbo tchâtchâ da Krîsiti nə̈-a.

²⁸ Sə̂nə̈ ndə̂ arə gbɛ̂ âwadje tchâtchâ Krîsiti, Modô nə̈ la tə̂ yê səadje tchâtchâ Ndjapä ndə̂ tche kʉ̂ arə gbɛ̂ ëtchâtchâ yê lâme. Käko kä ndə̂ Ndjapä wadje Gbïɛ̈ pâ arə gbɛ̂.

²⁹ Âdə rə nə̈ âdəabô də̂ käko, azü ndə̂ andjë gbo batɛ̂me tə̂ pö ndə̂ akuzü lâme, giamâ kä ndə̂ andjë pu rə̂? Âdə azü âjoabô jô lə̂ kuzü, bëte giamâ kä ndə̂ andjë gbo batɛ̂me tə̂ pö ndə̂ andjê?

³⁰ Âdə andə̂ azə̈ nə̈, bëte giamâ kä ndə̂ logbɛ̂ azə̈ wâ lə̂ köbo kuzü?

³¹ Arə̂mä, tə̂ lëge nə̈ logbɛ̂ më kä lə̂ kuzü, lëge pö, më bhï gogo mê tə̂ pö ndə̂ nyê lə̂ köbosə̂ nə̈ ndə̂ azə̈ wâ la nyê balë la Jezü Krîsiti Gbölö Gbïɛ̈ ndə̂ azə̂.

³² Âdə mê âza su mê kütû pâ pö ndə̂ azü, dju kʉ̈ʉ̈ ndə̂ mê mbô rə̂ la azü ndə̂ Ëfêze ndə̂ andjë wâ batə̂ agia güsü lâme də̈ nə̈bâ? Âdə azü âjoabô jô lə̂ kuzü, käko batə̂ rə̂ ndə̂ azü to rə̂, «azə̈ zɨ̈ rə, kə̂ ndjo rə, bëte lâmbo azə̂ âtchû tchü.»

³³ Nyë böloabô tə̂ nyê bôlo-ê: «Mo âmbo agü la ngbongbo akrə, kə̂ wadje tə̂ ngbongbo akrə.»

³⁴ Nyë mbö rə batə̂ azü ndə̂ küma andjê wâ lanə̈, kə̂ mboabô ngbongbo rə mbô-ê! Bëte angâ azü lə̂ gbâtə̂ nyê wûn-abo sə̈ Ndjapä-a, më tö pö lâme bëte äwätə̂ ganô ndə̂ nyê.

Tə̂ azü ndə̂ andjë jo lə̂ kuzü

³⁵ «Praâbalë ngâ akrə âyuadje kû nə̈ pä, atöko kä ndə̂ azü jo lə̂ kuzü? Anə̈bâ tə̂ nə̈ kä ndə̂ andjë wâ la rə̂?»

³⁶ Ngbɨ̈lə̈ akrə! Ndjî rəgʉ ndə̂ mo lu rə̂, ârə̂ âtchu ânyë kə̂ wutu tə̂ täfo nə̈.

³⁷ Rə ndə̂ mo lu rə̂ də̂âbo yö rəgʉ nə̈ ndə̂ âkʉ-a, praâbalë ädə̈ kütû mbämbä ndjî rəgʉ nə̈, ndjî blë âdəndjë ngâ ndjî rəgʉ ngbî.

³⁸ Pânə̈ Ndjapä zä ngâ tə̂ sə̈ ndjî rəgʉ nə̈ batə̂ rə̂ ndə̂ su yê nyîndə̂ nə̈. Ndjî rəgʉ balë balë wä la tə̂ ndə̂ âwâtə̂ andə̂ ye nə̈.

³⁹ Mbë arə ndə̂ âwâ la tchîsûwu ndə̂ âkʉ̂tə̂ yê la ngâ yê wâbo-a: Mbë akrə wä ngbî, andə̂ agia wâ ngbî, andə̂ anyïɛ̈nə̈ wâ ngbî, andə̂ agiangû wâ ngbî.

⁴⁰ Tə̂ arə tchêlafô kä ndjë tâ, ânyë tə̂ arə tchêbêche wâ ndjë tâ, tə̂ arə tchêlafô fü ngbî, ânyë tə̂ arə tchêbêche fû ndjë ngbî.

⁴¹ Kə̂ ta ndə̂ lo wä ngbî, kə̂ ta ndə̂ nyîpï wâ ndjë ngbî, kə̂ ta ndə̂ akêkêrə̂ wä ngbî, ndjë lə̂ gbâtə̂ akêkêrə̂, kə̂ ta ndə̂ andjê wä ngbî ngbî tə̂ angâ andjê.

⁴² Rə nə̈ wä ndjë käko tə̂ pö ndə̂kə̂ jo ndə̂ akuzü: Tə̂ ndə̂ a chî rə̂ wätə̂ tə̂ ndə̂ ândɨ, tə̂ ndə̂ âjo lə̂ kuzü, âkä ndɨ bata tee-a.

⁴³ Tə̂ ndə̂ a chî rə̂, ädə̈ tə̂ ndə̂ âwâbô wâtə̂ ngâ rə-ê, tə̂ ndə̂ âjo lə̂ kuzü, ädə̈ tə̂ ndə̂ a lusə̂ nə̈. Tə̂ ndə̂ a chî rə̂ də̈ tə̂ ndə̂ âmô, tə̂ ndə̂ âjo lə̂ kuzü də̈ tə̂ ndə̂ âwâ la gbôgbô tə̂ gbölösə̂nə̈.

⁴⁴ Tə̂ ndə̂ a chî rə̂ də̈ mbämbä tə̂ akrə, tə̂ ndə̂ âjo lə̂ kuzü də̈ tə̂ ndə̂ Yingö za tchîsûwu sə̈ rə̂. Mbämbä tə̂ akrə kä tâ, ânyë tə̂ ndə̂ Yingö za tchîsûwu sə̈ rə̂ kä tâ.

⁴⁵ Bëte rə̂ kä ndə̂ Mbëtï Ndjapä tô rə̂ päkëdə̂: «Adâme ndə̂ tche də̂ dokʉ̈ akrə, Ndjapä mbö rə̂ ânyë tche wâ la tʉ̈rʉ̂ la yê.» Bïchuû Adâme nə̈ də̈ Yingö ndə̂ tche za tchîsûwu sə̈ azü.

⁴⁶ Akrə ndə̂ tche nə̂ dokʉ̈tchê, tche də̂âbo akrə ndə̂ Yingö-a, tche də̈ mbämbä akrə, praâbalë akrə ndə̂ Yingö nə̈ la tchêngbâ nə̈.

⁴⁷ Dokʉ̈ akrə ndə̂ Ndjapä zâ cho ânyë kə̈ mbô tchë la rə̂, də̈ akrə tchêbêche. Bïchuû akrə nə̈ tö bhâ lafô ânyë kə̈ nə̂.

⁴⁸ Azü tchêbêche wä ndjë batə̂ akrə ndə̂ Ndjapä zâ cho ânyë kə̈ mbô tchë la rə̂. Azü tchêlafô wâ ndjë batə̂ akrə ndə̂ tche tô bhâ lafô ânyë kə̈ nə̂.

⁴⁹ Batə̂ rə̂ ndə̂ azə̈ wâtə̂ nyîsɨ̂ tchanə̈ ndə̂ Ndjapä zâ cho ânyë kə̈ mbô tchë la rə̂ lâme, azə̂ kʉadje ndjë tə̂ azə̂ la tchanə̈ ndə̂ tche tô bhâ lafô ânyë kə̈ nə̂ lâme.

⁵⁰ Arə̂mä, pö ndə̂ më nyîndə̂ kə̂ to rə̂ kä âtə: Tə̂ azə̂ ndə̂ akrə wâbo ndə̂kə̂ gbo tchô bhâlə̂ Gbölö gö-gbïɛ̈ ndə̂ Ndjapä-a, rə ndə̂ âwâ ndə̂kə̂ ndɨ wâbo ndə̂kə̂ sə̈ pïï ëtə̂-a.

⁵¹ Më nyïndə̂ kə̂ nyisə̂ ngâ rə ndə̂ gbô rə̂ wâ lə̂ küwû nə̈ sə̈ nyê: Azə̂ tchuabô gbɛ̂ tee-a, praâbalë tə̂ azə̂ gbɛ̂ âwadje ngbî,

⁵² kpro kâkë, batə̂ rə̂ ndə̂ akrə tchî la yê, sə̂nə̈ ndə̂ adɨ̂ tätälîtä kɨ. Bëte tätälîtä âkɨadje, akuzü joadje la tə̂ ndə̂ âkä ndɨabô ndɨ̂-î, ânyë azə̈ ndə̂ azə̈ nə̈, tə̂ azə̂ wadje ngbî.

⁵³ Käko äwäpä tə̂ akrə ndə̂ ândɨabô ndɨ̂ lâme, akrə yu rə̂ ëtə̂ yê ndə̂ âwâ ndə̂kə̂ ndɨ ânyë tə̂ akrə ndə̂ âwâ ndə̂kə̂ tchu lâme, akrə yu rə̂ ëtə̂ yê ndə̂ âtchuabô tchû-î.

⁵⁴ Âdə tə̂ ndə̂ âwâ ndə̂kə̂ ndɨ âyu tə̂ ndə̂ âwâ ndə̂kə̂ ndɨabô ndɨ̂-î, ânyë tə̂ ndə̂ âwâ ndə̂kə̂ tchu âyu tə̂ ndə̂ âwâ ndə̂kə̂ tchuabô tchû-î, käko pö ndə̂ Mbëtï Ndjapä tô rə̂ mbo gundə̂sə̂ nə̈. Mbëtï nə̈ tô rə̂ päkëdə̂: «Ndjapä ndɨ̂ kuzü nə̂ tratralë-ê, gbôgbô ndə̂ kuzü yû nə̂!»

⁵⁵ «Kuzü, gbôgbô ndə̂ zə̈ lâme wä bhâ tchêbâ? Kuzü, rə ndə̂ mo won azü la rə̂ lâme wä bhâ tchêbâ?»

⁵⁶ Rə ndə̂ kuzü won azü la rə̂ lâme də̈ ngbongbo rə, ânyë rə ndə̂ âza gbôgbô sə̈ ngbongbo rə də̈ ndïɛ̈.

⁵⁷ Praâbalë azə̈ zä ayîabâ sə̈ Ndjapä ndə̂ tche mbô rə̂ pä lə̂ köbosə̂ Gbölö Gbïɛ̈ ndə̂ azə̂ Jezü Krîsiti, azə̈ gbo gbôgbô.

⁵⁸ Käko arə̂mâ ndə̂ mê ndə̂ më nyîndə̂ nyê tə̂ gbölösə̂nə̈, nyë kpökpo tə̂ nyê logbɛ̂, kə̂ sə kpô tə̂kə̂ mbo kua ndə̂ Gbölö Gbïɛ̈ la su nyê gbɛ̂. Äwäpä nyë wunsə̂ nə̈ pä kua ndə̂ nyê mbo rə̂ bëte Gbölö Gbïɛ̈ lâme, tchêngbâ nə̈ wâbo ämbänə̈-a.