Dokʉ̈ Körɛ̂nte 14 - Mbëtï Ndjapä: TÄFO MADƗ̈

Angâ apö pâ rə ndə̂ Kpɨ̂ki Yingö za rə̂ sə̈ akrə

¹ Nyë pü köbo dokʉ̈tchê ndə̂kə̂ nyində̂ angâ nyê. Nyë wä ndjë la gʉ ndə̂kə̂ gbo arə ndə̂ Kpɨ̂ki Yingö, praâbalë nyë pü köbo tə̂ gbölösə̂nə̈ ndə̂kə̂ to ndə̂ma Ndjapä.

² Bëte akrə ndə̂ tche to pö la ama gö ngbî ngbî, tche tôâbo pö nə̈ sə̈ azü-a, praâbalë tche to rə̂ sə̈ Ndjapä. Ngâ akrə balë djêâbo tchə̂lə̂ pö nə̈-a, tche tö pö ndə̂ arə ndə̂ gbô rə̂ wâ lə̂ küwû nə̈ lə̂ köbosə̂ Kpɨ̂ki Yingö.

³ Praâbalë akrə ndə̂ tche to ndə̂ma Ndjapä, tche tö pö nə̈ sə̈ azü. Tche tö apö ndə̂ âmbo rə̂ pä akrə kpokpo tə̂ yê, tche zä wängö ndə̂ Ndjapä sə̈ azü, kə̂ za wängö ndə̂ âza gbôgbô tə̂ su azü.

⁴ Akrə ndə̂ tche to pö la ama gö ngbî ngbî, tche mbö rə̂ ndə̂kə̂ pä tchetchë la tə̂ yê kpokpo tə̂ yê. Praâbalë akrə ndə̂ tche to ndə̂ma Ndjapä, tche mbö rə̂ pä azü lə̂ Egilîze kpokpo tə̂ andjê.

⁵ Më nyïndə̂ nə̈ pä nyënyê gbɛ̂ nyê to pö la ama gö ngbî ngbî, praâbalë më nyïndə̂ nə̈ tə̂ gbogbôsə̂nə̈ pä nyë to ndə̂ma Ndjapä. Akrə ndə̂ tche tô ndə̂ma Ndjapä, tche mbö tchôtchô rə kə̈ rô akrə ndə̂ tche to pö la ama gö ngbî ngbî. Ndə̂kə̂ pa akrə ndə̂ tche to pö la ama gö ngbî ngbî mbo tchôtchô rə, äwäpä ngâ akrə to tchêngbâ pö nə̈ la ma gö ndə̂ azü nə̈, ânyë azü ndə̂ Egilîze nə̈ kpokpo tə̂ andjê.

⁶ Ndə̂ azə̈ sə̂ âtə arə̂mä, âdə mê ânə ndə̂kə̂ wun nyê, ânyë kə̈ tô pö sə̈ nyê la angâ ama gö ngbî, nyë âgbo tchôtchô rə lə̂ köbosə̂ mê atöko? Ndə̂kə̂ pa nyë gbo tchôtchô rə, äwäpä ngâ rə ndə̂ Ndjapä nyîsə̂ nə̈ sə̈ mê, mê to rə̂ sə̈ nyê, kə̂ mbo rə̂ ndə̂kə̂ pa nyë wunsə̂ rə, kə̂ to ndə̂ma Ndjapä sə̈ nyê, kə̂ nyisə̂ rə sə̈ nyê.

⁷ Rə nə̈ wä ndjë käko tə̂ pö ndə̂ arə ɛ̈ngbä batə̂ küdambala âdəndjë kundi: Âdə ârə̂ âkɨabô kɨ̂ ngbî ngbî tə̂ ngâ yê, akrə âmbo atöko ndə̂kə̂ dje tchə̂lə̂ gɨ̈ düwü ndə̂ küdambala âdəndjë andə̂ kundi nə̈?

⁸ Âdə a âhrʉ tätälîtä ânyë tchə̂lə̂ gɨ̈ nə̈ wûtuabô wûtu la pö nə̈ kraâ, tchabâ kä âkə̂ nyikrətə̂ yê bëte kʉ̈ʉ̈?

⁹ Nyënyê ndjë gbɛ̂ âdə nyê âto pö la ama gö ngbî ngbî, ânyë tchə̂lə̂ pö nə̈ wûtuabô wûtu kraâ, azü âdje tchə̂lə̂ pö nə̈ atöko? Dëkë nyê toadje pö lə̂ yi!

¹⁰ Ama gö ngbî ngbî ngbângbä pâ cho âtə, ânyë ngânə̈ ndə̂ a djeabô tchə̂lə̂ nə̈ djê wâbo balë-a.

¹¹ Käko âdə mê âdjeabô tchə̂lə̂ ngâ pö djê ndə̂ ngâ akrə tô rə̂ sə̈ mê, dëkë më də̈ akrə ndə̂ ngâ gö ngbî lə̂ la akrə nə̈ lâme, ânyë akrə nə̈ ndjë gbɛ̂ də̂ akrə ndə̂ ngâ gö ngbî lə̂ la mê.

¹² Nyënyê ndjë gbɛ̂ ndə̂ nyë wâ la gʉ tə̂ gbölösə̂nə̈ ndə̂kə̂ gbo arə ndə̂ Yingö, äwäpä köbo âwa, nyê pu köbo ndə̂kə̂ gbo arə ndə̂ Yingö ndə̂ âmbo rə̂ pä Egilîze kpokpo tə̂ yê.

¹³ Bëte rə̂ kä ndə̂ akrə ndə̂ tche to pö la ama gö ngbî ngbî, äwäpä tche yu Ndjapä tche za gbôgbô ndə̂ Yingö ndə̂kə̂ to tchêngbâ pö nə̈ sə̈ tchë.

¹⁴ Bëte âdə mê âto pö sə̈ Ndjapä la ama gö ngbî ngbî, yingö ndə̂ mê kä lakə̂ to pö sə̈ Ndjapä, praâbalë kə̂ wunsə̂ rə ndə̂ mê mbôâbo kua balë-a.

¹⁵ Më âmbo atöko? Mê toadje pö sə̈ Ndjapä lə̂ köbosə̂ Yingö, praâbalë mê toadje ndjë pö sə̈ Ndjapä lakə̂ wunsə̂ rə ndə̂ mê. Mê padje düwü lə̂ köbosə̂ Yingö, praâbalë mê padje ndjë düwü lakə̂ wunsə̂ rə ndə̂ mê.

¹⁶ Käko âdə mo âsə lakə̂ to pö sə̈ Ndjapä lakə̂ za ayîabâ sə̈ tchë lə̂ köbosə̂ yingö, mbämbä akrə lə̂ kpûlû nə̈ âmbo atöko ânyë kə̂ kɨ «Amin» pâ kə̂ to pö sə̈ Ndjapä ndə̂ zə̈ nə̈? Ndə̂ tche djêâbô tchə̂lə̂ pö ndə̂ zə̈ nə̈ djê lâme?

¹⁷ Tə̂ lëge nə̈, pö ndə̂ zə̈ nə̈ ndə̂ mo to rə̂ sə̈ Ndjapä lakə̂ za ayîabâ sə̈ tchë, watə̂ tchôtchô nə̈. Praâbalë âzâbo könô sə̈ ngâ zə̈ ndə̂kə̂ kpokpo tə̂ yê-a.

¹⁸ Më zä ayîabâ sə̈ Ndjapä bëte rə̂ ndə̂ më sə̂ lakə̂ to pö la ama gö ngbî ngbî ârô nyê gbɛ̂.

¹⁹ Praâbalë âdə mê âkrʉ tchâtchu kpûlû azü ndə̂ Krîsiti, më nyïndə̂ kə̂ to apö mïndûu ndə̂ azü dje tchə̂lə̂ nə̈, ânyë âkpokpo andjê, ärö anə̈ ndə̂kə̂ pa më to pö sâke lə̂ könô gbɛ̂ (10 000) la ama gö ngbî ngbî.

²⁰ Arə̂mä, äwäpä kə̂ za küma nyê wabô wâ batə̂ andə̂ abechë-ê, âdə andə̂ kə̂ mbo ngbongbo rə âdə rə̂, ɛn-ɛn! Äwäpä nyë wa batə̂ ayɛ̈yɛ̈ abechë. Praâbalë âdə ârə̂ âwa ndə̂kə̂ za küma, äwäpä nyë za küma nyê batə̂ adjêdjena azü.

²¹ Lə̂ Mbëtï-ndïɛ̈ a mbö rə̂ päkëdə̂: «Gbölö Gbïɛ̈ tö rə̂ päkëdə̂: Mê toadje pö sə̈ azü âtə lə̂ köbosə̂ azü ndə̂ andjë to ngâ ma gö ngbî, lə̂ ma azü ndə̂ ngâ ma gö ngbî. Lə̂ arə lâme gbɛ̂, andjê djeabô mê tee-a.»

²² Käko ndə̂kə̂ to pö la ama gö ngbî ngbî də̈ ngâ nyîsɨ̂ rə tə̂ pö ndə̂ azü ndə̂ andjë zâbô su andjê zâ sə̈ Krîsiti-î, praâbalë âdə̂âbo azü ndə̂ andjë zâ su andjê sə̈ Krîsiti-a. Kə̂ to ndə̂ma Ndjapä wätə̂ ngâ nyîsɨ̂ rə tə̂ pö ndə̂ azü ndə̂ andjë zâ su andjê sə̈ Krîsiti, praâbalë âdə̂âbo azü ndə̂ andjë zâbô su andjê zâ sə̈ Krîsiti lâme-a.

²³ Âdə azü ndə̂ Egilîze gbɛ̂ âpalatə̂ andjê, ânyë andjê gbɛ̂ sə̂ lakə̂ to pö la ama gö ngbî ngbî, ânyë angâ ambämbä azü âdəndjë angâ azü ndə̂ andjë zâbô su andjê zâ sə̈ Krîsiti âli lə̂ gbâtə̂ nyê, andjê toabô rə̂ tee pä nyî kä lakə̂ mbo nyê?

²⁴ Praâbalë âdə azü gbɛ̂ âto ndə̂ma Ndjapä ânyë ngâ akrə ndə̂ tche zâbô su yê zâ sə̈ Krîsiti âdəndjë ngâ mbämbä akrə âli lə̂ gbâtə̂ nyê, tchê wun-adje sə̂ ngbongbo rə ndə̂ yê, ânyë apö gbɛ̂ ndə̂ tche djê rə̂ lâme wadje ngbanga lə̂ küma yê.

²⁵ Apö ndə̂ âwâ wü bhâlə̂ su yê âwutuadje kraâ ësûwu, käko tchê gʉteadje, kə̂ chiadje küma yê, kə̂ vogadje Ndjapä lakə̂ to rə̂ päkëdə̂: «Ndjapä kä tə̂ lëge nə̈ lə̂ gbâtə̂ nyê.»

Kə̂ mbo rə la köbo nə̈ lə̂ Egilîze

²⁶ Käko arə̂mä, azə̂ âmbo atöko? Âdə nyë âpalatə̂ nyê, ngânə̈ balë lə̂ gbâtə̂ nyê pä düwü, ngânə̈ nyisə̂ rə âdəndjë rə̂ ndə̂ tche to pö ndə̂ ngâ rə ndə̂ Ndjapä nyîsə̂ nə̈ sə̈ tchë, ngânə̈ to pö la ama gö ngbî ngbî, ânyë ngânə̈ to tchêngbâ pö nə̈ la ma gö ndə̂ azü nə̈. Rə gbɛ̂ ndə̂ nyê mbo rə̂, äwäpä rə nə̈ lâme kpokpo azü ndə̂ Egilîze.

²⁷ Âdə nyê ânyində̂ kə̂ to pö la ama gö ngbî ngbî, äwäpä azü bïchuû, âdəndjë vötaâ to rə̂, äröäbô anə̈ lâme rô-ê. Äwä ndə̂kə̂ to rə̂ balë balë, ânyë ngâ akrə balë sə lakə̂ to tchêngbâ pö nə̈ la ma gö ndə̂ azü nə̈.

²⁸ Âdə ngâ akrə âsəabô sə̂ ndə̂kə̂ to tchêngbâ pö nə̈, äwäpä andjë ngbo ma andjê lə̂ gbâtə̂ azü ëtâ. Äwä ndə̂kə̂ pa akrə balë balë lə̂ gbâtə̂ andjê lâme to kütû pö nə̈ sə̈ tchë la tə̂ yê, ndjë sə̈ Ndjapä.

²⁹ Âdə andə̂ azü ndə̂ andjë wâtə̂ a-earə̂ ndə̂ma Ndjapä, äwäpä azü bïchuû âdəndjë vötaâ to rə̂, ânyë adɨ̂ azü nə̈ chi ndə̂ pö nə̈ ndə̂ andjë to rə̂ lâme.

³⁰ Âdə ngâ akrə ngbî âgbo ngâ pö dəndə̂ Ndjapä, äwäpä akrə ndə̂ tche sə̂ lakə̂ to pö lâme ngbo ma yê ëtâ.

³¹ Käko nyënyê gbɛ̂ nyë wä ndə̂kə̂ to ndə̂ma Ndjapä, praâbalë äwäpä nyë to rə̂ balë balë. Käko kä ndə̂ azü gbɛ̂ manda ngâ rə, ânyë kə̂ gbo gbôgbô tə̂ su andjê.

³² Akrə ndə̂ tche to ndə̂ma Ndjapä kä ndə̂ âwâ la kümändëmä pâ rə ndə̂ Yingö za rə̂ sə̈ tchë ndə̂kə̂ to ndə̂ma Ndjapä nə̈ lâme.

³³ Bëte Ndjapä də̈ Ndjapä ndə̂ tche mbo rə la köbo nə̈, kə̈ wâtə̂ Ndjapä ndə̂ zɨtɨ su. Batə̂ rə̂ ndə̂ a mbo rə̂ lə̂ a-Egilîze gbɛ̂ ndə̂ azü ndə̂ Ndjapä,

³⁴ äwäpä aɛ̈chë ngbo ma andjê ëtâ lə̂ kpûlû ndə̂ azü ndə̂ Ndjapä. A zâbo köbo sə̈ andjê ndə̂kə̂ to pö-a. Äwäpä andjë dje pö batə̂ rə̂ ndə̂ ndïɛ̈ tô pö ndə̂nə̈.

³⁵ Âdə andjê ânyində̂ kə̂ wunsə̂ ngâ pö pâ ngâ rə, äwäpä andjë yu aköchë ndə̂ andjê bhâlə̂ manda. Âwâbo la köbo nə̈ ndə̂kə̂ pa ɛ̈chë to pö lə̂ kpûlû azü-a.

³⁶ Pö ndə̂ Ndjapä tö bhândə̂ nyê âkə̈ wûtu? Kütû nyê balë kä ndə̂ âgbô pö nə̈?

³⁷ Âdə ngâ akrə âwuntî pä anyë də̈ earə̂ ndə̂ma Ndjapä, âdəndjë akrə ndə̂ tche wâ la Kpɨ̂ki Yingö, äwäpä tche wunsə̂ nə̈ lə̂ pö ndə̂ më mbô rə̂ sə̈ nyê âtə pä agbôgbô pö ma Gbölö Gbïɛ̈ kä.

³⁸ Âdə ngâ akrə âwun-abô sə̂nə̈ wûn käko-ë, dëkë Ndjapä wûn-âbo ndjë sə̂ yê-a.

³⁹ Käko arə̂mä, nyë pü köbo ndə̂kə̂ to ndə̂ma Ndjapä. Nyë kïäbô kîtə̂ köbo tə̂ azü ndə̂ andjë nyîndə̂ kə̂ to pö la ama gö ngbî ngbî,

⁴⁰ praâbalë äwäpä rə nə̈ gbɛ̂ mbo la köbo nə̈, kə̂ mbo rə ndə̂ âwâ djîrə̂.