Dokʉ̈ Körɛ̂nte 13 - Mbëtï Ndjapä: TÄFO MADƗ̈

Kə̂ nyində̂ ngâ rö rə gbɛ̂

¹ Âdə mê âto pö la ama gö ndə̂ azü la andə̂ aânje, ânyë kə̂ nyində̂ ngâ wâbô wâ lə̂ mê-ê, dëkë më wä batə̂ ngâ ajorʉa ndə̂ âkɨ âdəndjë ngâ kâlângbä ndə̂ âkɨ ngbôô.

² Âdə mê âwa la gbôgbô ndə̂ Kpɨ̂ki Yingö ndə̂kə̂ to ndə̂ma Ndjapä, âdə mê âwunsə̂ dju arə ndə̂ âwâ lə̂ küwû nə̈, âdə mê âwunsə̂ rə gbɛ̂, âdə kə̂ za su mê sə̈ Krîsiti âwa gbölö ndə̂kə̂ to rə̂ sə̈ aga pä tche gitə̂ yê lə̂ kpâlâ yê chï, ânyë âgîtə̂ yê chï, ânyë kə̂ nyində̂ ngâ wâbô wâ lə̂ mê-ê, më wâbo tə̂ ngâ rə-a.

³ Âdə mê âkrʉ tchə̂lə̂ arə ndə̂ mê gbɛ̂ tə̂ a-earə̂ gʉ, âdə mê âgbo ndjë tə̂ tə̂ mê ndə̂kə̂ pa a cho rə̂ la wo, ânyë kə̂ nyində̂ ngâ wâbô wâ lə̂ mê-ê, mê gboabô ngâ rə ngbânə̈ tee-a.

⁴ Akrə ndə̂ tche nyîndə̂ ngâ yê, tche rʉ̈ätə̂ su yê, tche mbö dâkâ, tche mbôâbo gbölö su-a, kə̈ mbôâbo tə̂ yê gbölö-a, kə̈ bhîâbo gogo yê-a.

⁵ Akrə ndə̂ tche nyîndə̂ ngâ yê, tche mbôâbo rə ganô-a, tche pûâbo rə tə̂ pö ndə̂ yê-a, kə̈ mbôâbo mêrâ-a, kə̈ zâbo akrə tə̂ su yê-a.

⁶ Akrə ndə̂ tche nyîndə̂ ngâ yê, tche wâbo la mômô lə̂ köbosə̂ rə mbə̈lï-a, praâbalë tche wä la mômô lə̂ köbosə̂ lëge pö.

⁷ Akrə ndə̂ tche nyîndə̂ kə̂ gʉa la yê pâ angbongbo arə gbɛ̂ ndə̂ a mbo rə̂ tə̂ yê, tche zä su yê sə̈ Ndjapä lə̂ arə gbɛ̂, tche zä su yê pâ arə gbɛ̂ ndə̂ tche krʉ̂ bëte rə̂, tche rʉ̈ätə̂ su yê lə̂ arə gbɛ̂.

⁸ Kə̂ nyîndə̂ ngâ wä pïï etə̂. Kə̂ to ndə̂ma Ndjapä âkrʉadje, gbôgbô ndə̂ Yingö ndə̂kə̂ to pö la ama gö ngbî ngbî âkadje, kə̂ wunsə̂ rə âkrʉadje.

⁹ Bëte kə̂ wunsə̂ rə ndə̂ azə̂ wä kütû tə̂ tchâkalâ nə̈, kə̂ to ndə̂ma Ndjapä ndə̂ azə̂ wä kütû tə̂ tchâkalâ nə̈.

¹⁰ Praâbalë âdə ndundu rə nə̈ ndə̂ âdâka gbɛ̂ âwutu, tchâkalâ rə nə̈ lâme âroadje.

¹¹ Ndə̂ gbô mê ndə̂po tə̂ bechë, më tö pö batə̂ abechë, kə̂ za küma mê wä batə̂ andə̂ abechë. Praâbalë sə̂nə̈ ndə̂ më âsə̈ kʉche, më gbôtə̂ kə̂ mbo rə batə̂ abechë-ê.

¹² Ndə̂ azə̈ sə̂ âtə, azə̈ sə̈ lakə̂ wun tchô batə̂ rə̂ ndə̂ akrə wuntə̂ yê la wunla, kə̈ wûn-âbo rə nə̈ djîrə̂-a, praâbalë tə̂ngâlo, azə̂ wun-adje rə nə̈ tchâtchu azə̂. Ndə̂ azə̈ sə̂ âtə, kə̂ wunsə̂ rə ndə̂ mê wätə̂ tchâkalâ nə̈, praâbalë tə̂ngâlo, mê wun-adje sə̂ arə gbɛ̂ batə̂ rə̂ ndə̂ Ndjapä wûnsə̂ mê.

¹³ Ndə̂ tchô angaâtə, arə vötaâ lâme kä tâ: Kə̂ za su sə̈ Krîsiti, kə̂ za su pâ rə ndə̂ akrə krʉ bëte rə̂, la kə̂ nyində̂ ngâ, praâbalë kə̂ nyində̂ ngâ wä gbölö kə̈ rô adɨ̂ nə̈ gbɛ̂.