Dokʉ̈ Körɛ̂nte 12 - Mbëtï Ndjapä: TÄFO MADƗ̈

Arə ndə̂ Kpɨ̂ki Yingö kʉ rə̂ sə̈ azü

¹ Âdə andə̂ arə ndə̂ Kpɨ̂ki Yingö kʉ rə̂ sə̈ azü, arə̂mä më nyïndə̂ nə̈ pä nyë wunsə̂ pö pânə̈ djîrə̂.

² Nyë wûnsə̂ nə̈ nə̂ pä sə̂nə̈ ndə̂ nyë wûn-âbô sə̂ Ndjapä wûn dämba-ê, a gbɨ̈tɨ nyê kə̈ ê la nyê ngbâ angakʉ̈lä ndə̂ andjë wâtə̂ amangbɨ̈lə̈.

³ Bëte rə̂ kä ndə̂ më nyîndə̂ kə̂ to rə̂ sə̈ nyê päkëdə̂: Akrə ndə̂ Yingö ndə̂ Ndjapä to pö lə̂ yê, tche tôâbo rə̂ päkëdə̂: «Ngbongbo pö kä pâ Jezü-a!» Ndjë akrə ndə̂ Kpɨ̂ki Yingö wâbô wâ lə̂ yê, tche tôâbo rə̂ päkëdə̂: «Jezü də̈ Gbölö Gbïɛ̈-a.»

⁴ Arə ndə̂ Kpɨ̂ki Yingö kʉ rə̂ sə̈ azü wä ngbî ngbî, praâbalë kütû Yingö balë lâme kä ndə̂ âkʉ rə̂ sə̈ azü.

⁵ Aköbo ndə̂kə̂ mbo kua ndə̂ Gbölö Gbïɛ̈ wä ngbî ngbî, praâbalë Gbölö Gbïɛ̈ wä kütû balë.

⁶ Akua wä ngbî ngbî, praâbalë kütû Ndjapä balë kä ndə̂ âza gbôgbô sə̈ azü gbɛ̂ ndə̂kə̂ mbo akua nə̈ gbɛ̂.

⁷ A zä gbôgbô ndə̂ Kpɨ̂ki Yingö sə̈ akrə balë balë tə̂ pö ndə̂ dâkâ ndə̂ azü gbɛ̂.

⁸ Yingö zä pö ndə̂ küma ndə̂ âwa lanə̈ sə̈ ngâ akrə, kə̈ zâ gbôgbô sə̈ ngânə̈ ndə̂kə̂ to pö lə̂ köbosə̂ kə̂ wunsə̂ rə.

⁹ Kütû Yingö balë lâme zä kə̂ za su sə̈ Krîsiti sə̈ ngâ akrə, kə̈ zâ gbôgbô ndə̂kə̂ tcha azü lə̂ tə̂kömbô sə̈ ngânə̈.

¹⁰ Tche zä gbôgbô ndə̂kə̂ mbo akpɨ̈ngbɨ̈ rə sə̈ ngâ akrə, kə̈ zâ gbôgbô ndə̂kə̂ to ndə̂ma Ndjapä sə̈ ngânə̈, kə̈ zâ gbôgbô ndə̂kə̂ krʉ tchə̂lə̂ Kpɨ̂ki Yingö la angbongbo yingö sə̈ ngânə̈, kə̈ zâ gbôgbô ndə̂kə̂ to pö la ama gö ngbî ngbî sə̈ ngânə̈, ânyë kə̈ zâ gbôgbô sə̈ ngânə̈ ndə̂kə̂ to ndə̂ma pö ndə̂ ama gö ngbî ngbî lâme sə̈ angâ yê.

¹¹ Praâbalë kütû Kpɨ̂ki Yingö balë lâme kä ndə̂ âmbo arə lâme gbɛ̂. Tche kʉ̈ arə ndə̂ Yingö sə̈ akrə balë balë batə̂ rə̂ ndə̂ su yê nyîndə̂ nə̈.

Tə̂ akrə wä balë, atchâme-tə̂ akrə ngbângbä

¹² Käko tə̂ akrə wä balë, praâbalë atchâme-tə̂ akrə ngbângbä. Ndə̂ atchâme-tə̂ akrə gbɛ̂ ngbângbä lâme, ängbö gbɛ̂ kə̈ wâtə̂ tə̂ akrə balë. Rə nə̈ wä ndjë käko tə̂ pö ndə̂ Krîsiti.

¹³ Bëte azə̈ gbɛ̂ gbö batɛ̂me lə̂ köbosə̂ Yingö balë, ndə̂kə̂ watə̂ tə̂ akrə balë. Ajuîfu la azü ndə̂ andjë wâbô wâtə̂ ajuîfu, angbâa la azü ndə̂ andjë wâbô wâtə̂ angbâa, azü gbɛ̂ gbö kütû Yingö balë lâme.

¹⁴ Bëte âdə̂âbo ngâ tchâme-tə̂ akrə balë kä ndə̂ âwâtə̂ ndundu tə̂ akrə-a, praâbalë angbängbä atchâme-tə̂ kä ndə̂ ângbô ânyë kə̈ wâtə̂ ndundu akrə balë.

¹⁵ Âdə da âto rə̂ päkëdə̂: «Âbatə̂ më də̂âbô könô də̂ âtə-ê, më də̂âbo ngâ tchâkalâ tə̂ akrə-a.» Ârə̂ kä ndə̂ âmbo rə̂ pä tche wabô wâtə̂ ngâ tchâkalâ tə̂ akrə nə̈?

¹⁶ Âdə tü âto rə̂ päkëdə̂: «Âbatə̂ më də̂âbô la də̂ âtə-ê, më də̂âbo ngâ tchâkalâ tə̂ akrə-a.» Ârə̂ kä ndə̂ âmbo rə̂ pä tche wabô wâtə̂ ngâ tchâkalâ tə̂ akrə nə̈?

¹⁷ Âdə ndundu tə̂ akrə gbɛ̂ âwatə̂ la, käko tche âdje pö atöko? Âdə ndundu tə̂ akrə gbɛ̂ âwatə̂ tü, käko tche âdje tchâfo rə atöko?

¹⁸ Praâbalë Ndjapä nyïkrə atchâme-tə̂ akrə balë balë ëtə̂ tə̂ akrə batə̂ rə̂ ndə̂ su yê nyîndə̂ nə̈.

¹⁹ Âdə atchâme-tə̂ akrə gbɛ̂ âwa kütû tə̂ ngâ tchâme-tə̂ balë, käko ndundu akrə nə̈ wä bhâ tchêbâ?

²⁰ Atchâme-tə̂ akrə ngbângbä, praâbalë tə̂ akrə wä kütû balë.

²¹ Käko la toabô rə̂ tee sə̈ könô päkëdə̂: «Më wâbo lə̂ zə̈-a», âdəndjë rə̂ ndə̂ küma to rə̂ sə̈ da päkëdə̂: «Më wâbo lə̂ zə̈-a.»

²² Praâbalë atchâme-tə̂ akrə ndə̂ a wûn-âbô rə̂ wûn tə̂ ngâ rə-ê, ârə̂ kä ndə̂ âwâtə̂ rə ndə̂ akrə wâbo ndə̂kə̂ gbotâ-a.

²³ Atchâme-tə̂ akrə ndə̂ azə̈ lûâbô sə̂nə̈ lû lâme, ârə̂ kä ndə̂ azə̈ lusə̂ nə̈ tə̂ gbölösə̂nə̈. Atchâme-tə̂ akrə ndə̂ a eabô tchê rə̈ nə̈ ê lâme-ê, ârə̂ kä ndə̂ azü wun rə̂ la tchôtchô la.

²⁴ Andə̂ adɨ̂ atchâme-tə̂ ndə̂ âfû, ngâ pö wâbo tâ-a. Praâbalë Ndjapä nyïkrətə̂ akrə, kə̈ zâ kə̂ lusə̂tə̂ tə̂ gbölösə̂nə̈ sə̈ atchâme-tə̂ ndə̂ azü luabô sə̂nə̈ lû-î.

²⁵ Ndjapä mbö tâ käko ndə̂kə̂ pa tchə̂lə̂ gbâtə̂ atchâme-tə̂ krʉabô tchə̂lə̂ tə̂ yê krʉ̂-ê, ânyë atchâme-tə̂ nə̈ balë balë za könô sə̈ angâ andjê lə̂ gbâtə̂ andjê.

²⁶ Âdə ngâ tchâme-tə̂ balë âsə̈ wun yûkü, atchâme-tə̂ nə̈ gbɛ̂ âwun ndjë yûkü la tchë. Âdə a âlusə̂ ngâ tchâme-tə̂ balë, adɨ̂ atchâme-tə̂ nə̈ gbɛ̂ âwa la mômô la tchë.

²⁷ Dëkë nyënyê gbɛ̂ nyë wätə̂ tə̂ Krîsiti, nyënyê balë balë gbɛ̂ nyë wätə̂ atchâme-tə̂ yê.

²⁸ Ädə̈ käko ânyë azü ndə̂ Ndjapä kʉ̂ andjê lə̂ Egilîze tə̂ dokʉ̈ nə̈ də̈ abadjângele. Abïchuû nə̈ də̈ a-earə̂ ndə̂ma Ndjapä. Avötaâ azü nə̈ də̈ a-earə̂ kə̂ nyisə̂ rə, pânə̈ azü ndə̂ tche zâ gbôgbô sə̈ andjê ndə̂kə̂ mbo akpɨ̈ngbɨ̈ rə, pânə̈ azü ndə̂ tche zâ gbôgbô sə̈ andjê ndə̂kə̂ tcha a-earə̂ tə̂kömbô, azü ndə̂ tche zâ gbôgbô sə̈ andjê ndə̂kə̂ za könô sə̈ angâ andjê, azü ndə̂ tche zâ gbôgbô sə̈ andjê ndə̂kə̂ sə tə̂ küma angâ andjê, azü ndə̂ tche zâ gbôgbô sə̈ andjê ndə̂kə̂ to pö la ama gö ngbî ngbî ndə̂ andjë wûn-âbô sə̂nə̈ wûn-î.

²⁹ Azü gbɛ̂ kä ndə̂ âwâtə̂ abadjângele? Azü gbɛ̂ kä ndə̂ âwâtə̂ a-earə̂ ndə̂ma Ndjapä? Azü gbɛ̂ kä ndə̂ âwâtə̂ a-earə̂ kə̂ nyisə̂ rə? Azü gbɛ̂ kä ndə̂ âwâ la gbôgbô ndə̂kə̂ mbo akpɨ̈ngbɨ̈ rə?

³⁰ Azü gbɛ̂ kä ndə̂ âwâ la gbôgbô ndə̂kə̂ tcha a-earə̂ tə̂kömbô? Azü gbɛ̂ kä ndə̂ âwâ la gbôgbô ndə̂kə̂ to pö la ama gö ngbî ngbî? Azü gbɛ̂ kä ndə̂ âwâ la gbôgbô ndə̂kə̂ to tchêngbâ ama gö ngbî ngbî nə̈?

³¹ Nyë pü köbo ndə̂kə̂ gbo gbôgbô ndə̂ Yingö za rə̂ sə̈ akrə ndə̂ âdâka kə̈ rô adɨ̂ nə̈ gbɛ̂. Praâbalë angaâtə, më ânyisə̂ ngâ köbo sə̈ nyê ndə̂ âdâka kə̈ rô adɨ̂ nə̈ gbɛ̂.