Dokʉ̈ Körɛ̂nte 11 - Mbëtï Ndjapä: TÄFO MADƗ̈

¹ Nyë mbö rə batə̂ mê, batə̂ rə̂ ndə̂ mëmê ndjë gbɛ̂ më mbô rə batə̂ Krîsiti.

Kə̂ sə ndə̂ aköchë la aɛ̈chë lə̂ Egilîze

² Më gämba nyê bëte logbɛ̂ sə̂ mê kä lakə̂ te lə̂ nyê, ânyë nyë kä lakə̂ mbo rə gundə̂sə̂ apö ndə̂ mê nyisə̂ nə̈ sə̈ nyê.

³ Më nyïndə̂ nə̈ pä nyë wunsə̂ pö âtə: Krîsiti də̈ akrə tə̂ küma aköchë gbɛ̂, köchë də̈ akrə tə̂ küma ɛ̈chë, Ndjapä wätə̂ akrə tə̂ küma Krîsiti.

⁴ Köchë ndə̂ tche sə̂ lakə̂ to pö sə̈ Ndjapä âdəndjë rə̂ ndə̂ tche sə̂ lakə̂ to ndə̂ma Ndjapä, ânyë kə̈ î ngâ rə pâ küma yê, dëkë tche lûâbo sə akrə tə̂ küma yê-a.

⁵ Praâbalë âdə ɛ̈chë ndə̂ tche sə̂ lakə̂ to pö sə̈ Ndjapä, âdəndjë rə̂ ndə̂ tche sə̂ lakə̂ to ndə̂ma Ndjapä ânyë kə̈ îâbô ngâ rə î pâ küma yê, dëkë tche lûâbo sə̈ köchë ndə̂ yê ndə̂ tche də̂ akrə tə̂ küma yê-a. Tche wä tiî batə̂ ɛ̈chë ndə̂ a tchô su küma yê.

⁶ Âdə ɛ̈chë â-iabô ngâ rə î pâ küma yê, äwäpä tche tcho su küma yê-ê. Praâbalë âdə kə̂ wa tchêpâ su küma yê âdəndjë ndə̂kə̂ tcho rə̂ âwatə̂ rə ganô, äwäpä tche i tchêpâ küma yê.

⁷ Âdə andə̂ köchë, tche wâbo ndə̂kə̂ i tchêpâ küma yê-a, bëte tche wätə̂ nyîsɨ̂ Ndjapä la köbo ndə̂ Ndjapä wâ la rə̂, praâbalë ɛ̈chë nyïsə̂ köbo ndə̂ köchë wâ la rə̂.

⁸ Bëte köchë wûtuabô lə̂ ɛ̈chë-a, praâbalë ɛ̈chë wütu lə̂ köchë.

⁹ Ndjapä mbôâbo köchë bëte ɛ̈chë-a, praâbalë tche mbö ɛ̈chë bëte köchë.

¹⁰ Bëte rə̂ kä ndə̂ ɛ̈chë wä ndə̂kə̂ i ngâ rə pâ küma yê ndə̂kə̂ nyisə̂ nə̈ pä anyë wä tchâtchâ köchë, bëte aânje.

¹¹ Praâbalë ndə̂ azə̈ wâ balë la Gbölö Gbïɛ̈, ɛ̈chë wâbo ngbî tə̂ köchë-a, ânyë köchë wa ndjë ngbî tə̂ ɛ̈chë-a.

¹² Batə̂ rə̂ ndə̂ ɛ̈chë wûtu lə̂ köchë, käko ndjë ɛ̈chë kä ndə̂ âzɨ̂ köchë ânyë rə gbɛ̂ tö bhândə̂ Ndjapä.

¹³ Nyënyê la tə̂ nyê, nyë wä ngbanga pâ pö âtə: Ndə̂kə̂ pa ɛ̈chë sə lakə̂ to pö sə̈ Ndjapä, ânyë kə̈ îâbô tchêpâ küma yê î-î, äkä la köbo nə̈?

¹⁴ Äwätə̂ rə ganô ndə̂kə̂ pa köchë gbotə̂ su küma yê âgu! Tchîsûwu kä ndə̂ ânyîsə̂ arə käko sə̈ nyê.

¹⁵ Andə̂ ɛ̈chë, ngrɨ̈ngrɨ̈ su küma yê mbö rə̂ pä tche lu, bëte Ndjapä zä su küma sə̈ tchë ndə̂kə̂ pa äi tchêpâ küma yê nə̈.

¹⁶ Praâbalë âdə ngâ akrə ânyində̂ kə̂ kosə̂ pö lâme, äwäpä tche wunsə̂ nə̈ pä ngâ köbo ngbî ndə̂kə̂ pa ârâ la a-Egilîze ndə̂ Ndjapä mbo rə̂ wâbo-a.

Kɨ̈zɨ̂ ndə̂ Gbölö Gbïɛ̈

¹⁷ Po ndə̂ më nyîndə̂ kə̂ to rə̂ sə̈ nyê âtə, mê gambabô nyê tee-a. Kə̂ palatə̂ nyê mbö nyê ngbo, kə̈ mbôâbo nyê pä nyë e atə̂ tchâtchu nə̈-a.

¹⁸ Tə̂ dokʉ̈ nə̈, a tö rə̂ sə̈ mê pä âdə nyê âpalatə̂ nyê, apö ndə̂kə̂ krʉ tchə̂lə̂ tə̂ kä lə̂ gbâtə̂ nyê, tchâkalâ pö nə̈ wätə̂ lëge pö.

¹⁹ Äwäpä tchə̂lə̂ tə̂ nyê krʉ-ê, ânyë a wun andjanə̈ lə̂ gûtə̂ nyê ndə̂ andjë wâtə̂ adjîrə̂ azü.

²⁰ Ndə̂ nyê palatə̂ nyê lâme, âdə̂âbo kɨ̈zɨ̂ ndə̂ Gbölö Gbïɛ̈ kä ndə̂ nyê zɨ rə̂-a.

²¹ Bëte sə̂nə̈ ndə̂ nyê sə lakə̂ zɨ rə, akrə balë balë gbrögbrotə̂ yê ndə̂kə̂ to kɨ̈zɨ̂ ndə̂ yê la tə̂ yê, âmbô rə̂ pä ngânə̈ kä la gʉ, ânyë pî sə lakə̂ mbo ngânə̈.

²² Nyë wâbo la anda ndə̂kə̂ zɨ rə ndjë lakə̂ ndjo rə bhâlə̂ nə̈? Âdəndjë rə̂ nyë sə̈ lakə̂ mo Egilîze ndə̂ Ndjapä mö? Nyë nyïndə̂ kə̂ mbo rə ganô tə̂ azü ndə̂ rə ndə̂ andjê wâbô wâ tâ lâme? Më âto rə̂ sə̈ nyê atöko? Äwäpä më gamba nyê? Ɛ̂n-ɛ̈n, më gâmbabô nyê pâ pö lâme-a.

²³ Käko pö ndə̂ më gbô rə̂ tchânə̂ Gbölö Gbïɛ̈ ânyë kə̂ to rə̂ sə̈ nyê kä âtə: Lə̂ bütchî ndə̂ a yôsə̂ Gbölö Gbïɛ̈ Jezü, tche zâ mâpa,

²⁴ kə̈ zâ ayîabâ sə̈ Ndjapä, kə̈ tchô tchə̂lə̂ nə̈ ânyë kə̈ tô rə̂ päkëdə̂: «Rə âtə də̈ tə̂ mê, ndə̂ âwâ bëte nyê. Nyë mbö rə lâme ndə̂kə̂ pa sə̂ mê te lə̂ nyê.»

²⁵ La tchêngbâ kɨ̈zɨ̂ nə̈, tche zâ kangûchi vɛ̂n-ɛn, kə̈ mbô ndjë tâ käko, kə̈ tô rə̂ päkëdə̂: «Kangûchi vɛ̂n-ɛn âtə də̈ täfo madɨ̈ lə̂ köbosə̂ jï mê. Logbɛ̂ ndə̂ nyê âsə̈ ndjo rə̂, nyë mbö rə lâme ndə̂kə̂ pa sə̂ mê te lə̂ nyê.»

²⁶ Bëte logbɛ̂ ndə̂ nyê sə lakə̂ zɨ mâpa lâme, ânyë kə̂ ndjo kangûchi vɛ̂n-ɛn lâme, nyë mü pö ndə̂ kuzü Gbölö Gbïɛ̈ zoo ëtə̂ lo nə̈ ndə̂ tche ka.

²⁷ Bëte rə̂ kä ndə̂ akrə ndə̂ tchê zɨadje mâpa, ndjë lakə̂ ndjoadje kangûchi vɛ̂n-ɛn ndə̂ Gbölö Gbïɛ̈, ânyë kə̈ lûâbô sə̂nə̈ lû-î, dëkë pö kä lə̂ küma yê tə̂ pö ndə̂ tə̂ la jï Gbölö Gbïɛ̈.

²⁸ Äwäpä akrə balë balë rɨ tchə̂lə̂ yê pâ yê la tə̂ yê dokʉ̈tchê ânyë kə̂ zɨ mâpa, ndjë lakə̂ ndjo kangûchi vɛ̂n-ɛn âtə.

²⁹ Bëte akrə ndə̂ tche zɨ̂ mâpa, ndjë lakə̂ ndjo kangûchi vɛ̂n-ɛn, ânyë kə̈ wûn-âbô rə̂ wûn batə̂ tə̂ Gbölö Gbïɛ̈-ê, dëkë tche kä lakə̂ wa ngbanga pâ yê la tə̂ yê, ndə̂ tche sə̂ lakə̂ zɨ rə̂ ndjë lakə̂ ndjo rə̂ lâme.

³⁰ Bëte rə̂ kä ndə̂ a-earə̂ tə̂kömbô la azü ndə̂ andjë ngêwele sɨ̂sɨ̈ lə̂ gbâtə̂ nyê. Angbängbä angânə̈ tchû nə̂.

³¹ Âdə azə̂ ârɨ tchə̂lə̂ azə̂ dokʉ̈tchê pâ kə̂ mbo rə ndə̂ azə̂, dëkë azə̈ têâbo tchâtchâ ngbanga ndə̂ Gbölö Gbïɛ̈-a.

³² Praâbalë Gbölö Gbïɛ̈ wä ngbanga ndə̂ azə̂, kə̈ gbɨ̂tɨ tu azə̂ ânyë kə̈ wâbô ngbanga wâ lə̂ küma azə̂ la adɨ̂ azü tchêbêche âtə-ê.

³³ Käko arə̂mâ ndə̂ mê, âdə nyê âpalatə̂ nyê ndə̂kə̂ zɨ kɨ̈zɨ̂ ndə̂ Gbölö Gbïɛ̈, äwäpä nyë krʉ̈ bëte angâ nyê.

³⁴ Âdə gʉ ânyu ngâ akrə, äwäpä tche zɨ rə bhândə̂ yê, käko ânyë ngbanga ndə̂ Ndjapä teabô tê pâ nyê sə̂nə̈ ndə̂ nyê palatə̂ nyê-ê. Âdə andə̂ adɨ̂ apö nə̈, më âwutu bhâye ânyë kə̂ nyikrəadje rə̂.