Dokʉ̈ Körɛ̂nte 1 - Mbëtï Ndjapä: TÄFO MADƗ̈

Kə̂ po ndə̂ azü

¹ Mëmê Pôlo, Ndjapä ë mê ndə̂kə̂ watə̂ badjângele ndə̂ Jezü Krîsiti, batə̂ rə̂ ndə̂ su Ndjapä nyîndə̂ nə̈, mëmê la Sösötêne ngâ azə̂,

² ârâ mbö mbëtï âtə sə̈ Egilîze ndə̂ Ndjapä ndə̂ âwâ bhâ Körɛ̂nte, andjanə̈ ndə̂ Ndjapä kʉ̂ andjê ngbî lə̂ köbosə̂ Jezü Krîsiti. Tche ë andjê kə̈ kʉ̂ andjê ngbî bëte tchë la andjanə̈ gbɛ̂ ndə̂ andjë sə̂ lə̂ atchô ngbî ngbî ânyë kə̂ e rə̈ Gbölö Gbïɛ̈ Jezü Krîsiti, tche wätə̂ Gbölö Gbïɛ̈ ndə̂ andjê ânyë kə̈ wâ ndjë tə̂ Gbölö Gbïɛ̈ ndə̂ ârâ.

³ Äfü pä Ndjapä Bha azə̂ la Gbölö Gbïɛ̈ Jezü Krîsiti mbo tchôtchô su tə̂ nyê, kə̂ za zɨtɨ su sə̈ nyê.

Ndjapä kʉ̈ atchôtchô rə sə̈ azə̂ lə̂ köbosə̂ Krîsiti

⁴ Logbɛ̂ më sə̈ lakə̂ za ayîabâ sə̈ Ndjapä tə̂ pö ndə̂ nyê, bëte tchôtchô su ndə̂ tche mbô rə̂ tə̂ nyê lə̂ köbosə̂ Jezü Krîsiti.

⁵ Bëte lə̂ köbosə̂ Krîsiti, Ndjapä kʉ̈ atchôtchô arə sə̈ nyê tə̂ gbölösə̂nə̈, atchôtchô arə tə̂ pö ndə̂ kə̂ to pö la andə̂ kə̂ wunsə̂ rə.

⁶ Dëkë apö ndə̂ nyë djê rə̂ pâ Krîsiti gbô tchô bhâtə̂ su nyê nə̂.

⁷ Käko arə ndə̂ Kpɨ̂ki Yingö kʉ̂ rə̂ sə̈ azü, nyë kä la rə̂ gbɛ̂, nyënyê ndə̂ nyë krʉ̂ bëte kə̂ ka ndə̂ Gbölö Gbïɛ̈ ndə̂ azə̂ Jezü Krîsiti lâme.

⁸ Tchetchë kä ndə̂ âmbo rə̂ pä nyë kpokpo tə̂ nyê ndjoa ësə̂nə̈ ndə̂ manə̈ krʉ tâ. Käko lo kə̂ ka ndə̂ Gbölö Gbïɛ̈ ndə̂ azə̂ Jezü Krîsiti, ngâ pö balë ndə̂ a gbo rə̂ lə̂ küma nyê wâbo-a.

⁹ Ndjapä mbö rə gundə̂sə̂ pö ma yê, tchetchë ndə̂ tche ê nyê ndə̂kə̂ pa nyë wa balë la Modô ndə̂ yê Jezü Krîsiti, Gbölö Gbïɛ̈ ndə̂ azə̂.

Tchə̂lə̂ Egilîze ndə̂ Körɛ̂nte krʉ̈ tchə̂lə̂ tə̂ yê

¹⁰ Arə̂mä, më yükû nə̈ sə̈ nyê la rə̈ Gbölö Gbïɛ̈ ndə̂ azə̂ Jezü Krîsiti, nyënyê gbɛ̂ nyë djëtə̂ nyê lə̂ gbâtə̂ nyê ânyë tchə̂lə̂ gbâtə̂ nyê krʉabô tchə̂lə̂ tə̂ yê krʉ̂-ê. Nyë ngbötə̂ nyê kə̂ wa batə̂ akrə balë. Äwäpä yingö ndə̂ nyê lakə̂ rɨ tchə̂lə̂ nyê gbɛ̂ wa balë.

¹¹ Käko arə̂mä ndə̂ mê, më tö pö lâme käko bëte azü ndə̂ Kolowë tö rə̂ sə̈ mê pä nyë kä lakə̂ po lə̂ gbâtə̂ nyê.

¹² Pö ndə̂ më nyîndə̂ kə̂ to rə̂ wä kâkë: Akrə balë balë lə̂ gbâtə̂ nyê tö pö ngbî ngbî. Ngânə̈ tö rə̂ päkëdə̂: «Më də̈ akrə ndə̂ Pôlo.» Ngânə̈ tô rə̂ päkëdə̂: «Më də̈ tchandə̂ Äpölôse.» Ngânə̈ tô andə̂ ye nə̈ päkëdə̂: «Më də̈ tchandə̂ Pîêre.» Ânyë ngânə̈ tô ndjë rə̂ päkëdə̂: «Më də̈ tchandə̂ Krîsiti.»

¹³ A krʉ̂ tchə̂lə̂ Krîsiti nə̂? Pôlo kä ndə̂ âtchû pâ yö ndə̂ gba bëte nyê? Nyë gbö batɛ̂me la rə̈ Pôlo?

¹⁴ Më zä ayîabâ sə̈ Ndjapä bëte ngâ akrə balë lə̂ gbâtə̂ nyê gbôâbo batɛ̂me tchânə̂ mê-a, kütû Krïpûse la Gäyïwûse.

¹⁵ Käko ngâ akrə balë toabô rə̂ tee pä anyë gbö batɛ̂me alême la rə̈ mê-a.

¹⁶ Yêê! Tə̂ lëge nə̈! Më zä batɛ̂me alême sə̈ azü lə̂ bûngrɨ̂ ndə̂ Sëtëfänâse. Pâ anə̈ lâme, më wûn-âbo sə̂nə̈ pä më kä zâ batɛ̂me sə̈ ngâ akrə nə̂-a.

¹⁷ Bëte Krîsiti wân-âbo mê ndə̂kə̂ pa më za batɛ̂me sə̈ azü-a, praâbalë tche wän mê ndə̂kə̂ mu Tchôtchô Pö. Âwâbo lə̂ köbosə̂ küma ndə̂ âwa lanə̈ kä ndə̂ mê mu pö nə̈ la rə̂-a, ânyë kuzü Krîsiti pâ yö ndə̂ gba wabô wâtə̂ mbämbä rə-a.

Jezü Krîsiti wätə̂ gbôgbô la küma Ndjapä ndə̂ âwâ lanə̈

¹⁸ Tə̂ lëge nə̈ pö ndə̂ yö ndə̂ gba wätə̂ pö nyî lə̂ la azü ndə̂ andjë wâ ndə̂kə̂ tchu. Praâbalë andə̂ azə̂ ndə̂ azə̈ wâ lə̂ köbo ndə̂kə̂ tchâ lə̂ kuzü, pö nə̈ wätə̂ gbôgbô ndə̂ Ndjapä.

¹⁹ Bëte a mbö rə̂ lə̂ Mbëtï Ndjapä päkëdə̂: «Mê ndɨadje küma ndə̂ âwa lanə̈ ndə̂ azü ndə̂ küma andjê wâ lanə̈, kə̂ koadje sə kə̂ wunsə̂ rə ndə̂ a-earə̂ kə̂ wunsə̂ rə.»

²⁰ Akrə ndə̂ küma yê wâ lanə̈ sə̈ bhâ tchêbâ? Earə̂ kə̂ nyisə̂ ndïɛ̈ sə̈ bhâ tchêbâ? Earə̂ kə̂ to pö la köbo nə̈ ndə̂ tchô angêta sə̈ bhâ tchêbâ? Ndjapä mbôâbo rə̂ pä küma azü ndə̂ âwâ lanə̈ pâ cho âtə watə̂ nyî?

²¹ Bëte azü pâ cho âtə, lə̂ köbosə̂ küma andjê ndə̂ âwâ lanə̈, andjë wûn-âbo sə̂ Ndjapä la küma yê ndə̂ âwâ lanə̈ lâme-a. Ädə̈ käko ânyë âdâka lə̂ la Ndjapä ndə̂kə̂ tcha andjanə̈ ndə̂ andjë zâ su andjê sə̈ tchë kütû lə̂ köbosə̂ pö ndə̂ ârâ mû rə̂, ndə̂ âwâ batə̂ pö nyî lâme.

²² Ajuîfu yükû nə̈ ndə̂kə̂ wun angâ akpɨ̈ngbɨ̈ rə, ânyë azü ndə̂ andjë wâbô wâtə̂ ajuîfu pü andə̂ andjë nə̈ ndə̂kə̂ pa küma andjê wa lanə̈.

²³ Praâbalë andə̂ ârâ, ârâ sə̈ lakə̂ mu pö päkëdə̂: A wôn Krîsiti pâ yö ndə̂ gba nə̂. Andə̂ ajuîfu, pö lâme zä gbölö mêrâ tə̂ su andjê bëte äwätə̂ pö ndə̂kə̂ dro Ndjapä, ânyë kə̈ wâtə̂ pö nyî lə̂ la azü ndə̂ andjë wâbô wâtə̂ ajuîfu-î.

²⁴ Praâbalë andə̂ andjanə̈ ndə̂ Ndjapä ê andjê, ajuîfu la azü ndə̂ andjë wâbô wâtə̂ juîfu, Krîsiti wätə̂ gbôgbô ndə̂ Ndjapä, kə̈ wâtə̂ küma Ndjapä ndə̂ âwâ lanə̈.

²⁵ Bëte rə ndə̂ Ndjapä ndə̂ âwâ lə̂ la azü batə̂ rə nyî, rə nə̈ lâme zä küma ndə̂ âwa lanə̈ kə̈ rô andə̂ azü. Ânyë rə ndə̂ Ndjapä ndə̂ azü wûn rə̂ tə̂ mömö rə, äwä la gbôgbô kə̈ rô gbôgbô ndə̂ azü.

²⁶ Arə̂mä, äwäpä nyë wuntə̂ nyê la tə̂ nyê lə̂ köbo ndə̂ nyë sə̂ la rə̂, nyënyê ndə̂ Ndjapä ê nyê: Lə̂kə̂ wun tchô ndə̂ nyê, azü ndə̂ küma andjê wâ lanə̈ ngbâbo lə̂ gbâtə̂ nyê-a, a-earə̂ gbôgbô ngbâbo-a, azü lə̂ tchôtchô bûngrɨ̂ ngbâbo-a.

²⁷ Praâbalë rə ndə̂ azü pâ cho wûn rə̂ batə̂ rə nyî, Ndjapä dɨ̈ rə̂ ndə̂kə̂ yi ganô lə̂ la azü ndə̂ küma andjê wâ lanə̈. Rə ndə̂ azü pâ cho wûn rə̂ batə̂ mömö rə, Ndjapä zä rə̂ ndə̂kə̂ yi ganô lə̂ la a-earə̂ gbôgbô.

²⁸ Rə ndə̂ azü pâ cho âtə wûn rə̂ batə̂ kpîɛ̂kpîɛ̂ rə, batə̂ rə ndə̂ akrə kosə̂ nə̈, batə̂ mbämbä rə, Ndjapä dɨ̈ rə̂ ndə̂kə̂ ndɨ tchə̂lə̂ rə ndə̂ azü wûn rə̂ batə̂ ngâ gbölö rə lə̂ la andjê.

²⁹ Käko ânyë ngâ akrə balë bhiabô gogo yê bhî tchâtchu Ndjapä-ê.

³⁰ Praâbalë tchetchë kä ndə̂ âmbô rə̂ pä nyë wa balë la Jezü Krîsiti, ânyë Jezü Krîsiti nə̈ wätə̂ küma azə̂ ndə̂ âwâ lanə̈, ndə̂ âtô bhândə̂ Ndjapä. Lə̂ köbosə̂ Krîsiti, Ndjapä mbö rə̂ pä azə̈ watə̂ adjîrə̂ azü, kə̂ watə̂ azü ndə̂ tche dɨ̂ andjê bëte tchë, ânyë kə̈ jî azə̂ tchâtchâ ngbongbo rə.

³¹ Käko batə̂ rə̂ ndə̂ Mbëtï Ndjapä tô rə̂ päkëdə̂: «Âdə ngâ akrə ânyində̂ kə̂ bhi gogo yê, äwäpä tche bhi gogo yê tə̂ pö ndə̂ rə ndə̂ Gbölö Gbïɛ̈ mbô rə̂.»