Dokʉ̈ Jâan 5 - Mbëtï Ndjapä: TÄFO MADƗ̈

Azə̈ rö tchêbêche la gbôgbô

¹ Akrə ndə̂ tche nyîndə̂ nə̈ la su yê pä Jezü wätə̂ Krîsiti, akrə lâme də̈ bechë ndə̂ Ndjapä. Akrə ndə̂ tche nyîndə̂ ngâ bha, dëkë tche nyï ndjë ndə̂ abechë ndə̂ yê.

² Rə ndə̂ azə̈ wunsə̂ nə̈ pä azə̈ nyïndə̂ abechë ndə̂ Ndjapä wä kâkë: Äwäpä azə̈ nyində̂ Ndjapä lakə̂ mbo rə gundə̂sə̂ andïɛ̈ ndə̂ yê.

³ Bëte kə̂ nyində̂ Ndjapä wä ndə̂kə̂ pa azə̈ mbo rə gundə̂sə̂ andïɛ̈ ndə̂ yê. Andïɛ̈ ndə̂ yê nə̈ lâme lûâbo-a.

⁴ Bëte azü gbɛ̂ ndə̂ andjë wâtə̂ abechë ndə̂ Ndjapä, andjë rö tchêbêche âtə la gbôgbô. Köbo ndə̂kə̂ ropâ tchêbêche âtə la gbôgbô də̈ kə̂ za su sə̈ Ndjapä.

⁵ Tchabâ kä ndə̂ ârô tchêbêche âtə la gbôgbô? Kütû akrə ndə̂ tche gâmba rə̂ pä Jezü də̈ Modô ndə̂ Ndjapä.

Pö ndə̂ a tô rə̂ pâ Jezü Krîsiti

⁶ Jezü Krîsiti nə̈ pu azə̂ lə̂ köbosə̂ ngû ndə̂ batɛ̂me ndə̂ yê, ndjë la jï kuzü yê. Tche nə̂âbo kütû lə̂ köbosə̂ ngû-a, praâbalë tche nə̈ lə̂ köbosə̂ ngû la jï, ânyë Kpɨ̂ki Yingö tô pö ndə̂nə̈ pä äwätə̂ lëge nə̈, bëte Yingö wätə̂ lëge pö.

⁷ Andjë kä vötaâ ndə̂ andjë tô pö ndə̂nə̈, andjë də̈:

⁸ Kpɨ̂ki Yingö la ngû la jï. Andjê vötaâ lâme, pö ndə̂ andjê wä balë.

⁹ Âdə azü âto pö ndə̂ rə ndə̂ andjë wûn rə̂ sə̈ azə̂, azə̈ gamba rə̂; dëkë pö ndə̂ Ndjapä tô rə̂, älü kə̈ rô andə̂ azü. Pö nə̈ ndə̂ Ndjapä tô rə̂ lâme wä pâ Modô ndə̂ yê.

¹⁰ Käko akrə ndə̂ tche zâ su yê sə̈ Modô ndə̂ Ndjapä, pö ndə̂ Ndjapä tô rə̂ lâme kä tə̂ su yê la tə̂ yê. Praâbalë akrə ndə̂ tche zâbô su yê zâ sə̈ Ndjapä, tche mbö Ndjapä tə̂ earə̂ yepa, bëte tche gâmbabô pö ndə̂ Ndjapä tô rə̂ pâ Modô ndə̂ yê-a.

¹¹ Pö ndə̂ Ndjapä tô rə̂ lâme wä kâkë: Ndjapä zä tchîsûwu ndə̂ logbɛ̂ logbɛ̂ sə̈ azə̂, tchîsûwu nə̈ lâme, azə̈ gbö rə̂ lə̂ köbosə̂ Modô ndə̂ yê.

¹² Akrə ndə̂ tche wâ la Modô nə̈, tche kä la tchîsûwu nə̈ lâme, akrə ndə̂ tche wâbô wâ la Modô ndə̂ Ndjapä, tche wâbo la tchîsûwu-a.

Tchîsûwu ndə̂ logbɛ̂ logbɛ̂

¹³ Më mbö mbëtï âtə sə̈ nyê ndə̂kə̂ pa nyë wunsə̂ nə̈ pä nyë kä la tchîsûwu ndə̂ logbɛ̂ logbɛ̂, nyënyê ndə̂ nyë gâmba rə̈ Modô ndə̂ Ndjapä.

¹⁴ Azə̈ wä ndə̂kə̂ wun tchô pu Ndjapä la su azə̂ ndə̂ âwâ gii-ï, âdə azə̂ âyukû ngâ rə tchânə̂ yê gundə̂sə̂ nə̈ ndə̂ su yê nyîndə̂ nə̈, tche dje azə̂.

¹⁵ Ndə̂ azə̈ wûnsə̂ nə̈ pä tche kä lakə̂ dje pö ndə̂ azə̈ to rə̂ sə̈ tchë, käko ndjë azə̈ wünsə̂ nə̈ tə̂ lëge nə̈ pä rə ndə̂ azə̈ yûkû nə̈ tchânə̂ yê lâme, azə̈ gbô rə̂ nə̂.

¹⁶ Âdə ngâ akrə âwun ngâ yê ndə̂ tche mbô ngbongbo rə, ndə̂ âwâbô wâ ndə̂kə̂ e la tchë pu kuzü, äwäpä tche to pö sə̈ Ndjapä ânyë Ndjapä zadje tchîsûwu sə̈ ngâ yê nə̈ lâme. Pö âtə wä bëte azü ndə̂ andjë mbô ngbongbo rə, ndə̂ âwâbô wâ ndə̂kə̂ e la andjê pu kuzü-î. Praâbalë ngâ ngbongbo rə kädje ndə̂ âe la azü pu kuzü, âdə̂âbo tə̂ pö ndə̂ ngbongbo rə ndə̂ âe la azü pu kuzü nə̈ lâme kä ndə̂ më yûkû nə̈ pä nyë to pö sə̈ Ndjapä bëte rə̂-a.

¹⁷ Kə̂ mbo arə gbɛ̂ ndə̂ âwâbô wâ djîrə̂ wätə̂ ngbongbo rə, praâbalë âdə̂âbo angbongbo arə gbɛ̂ kä âkə̂ e la azü pu kuzü-a.

¹⁸ Azə̈ wûnsə̂ nə̈ nə̂ pä ngâ bechë ndə̂ Ndjapä balë sə̂âbo kpô tə̂kə̂ mbo ngbongbo rə-a, bëte Modô ndə̂ Ndjapä kä lakə̂ bata tchë, ânyë Ngbongbo akrə wâbo ndə̂kə̂ mbo ngâ rə tə̂ yê-a.

¹⁹ Azə̈ wûnsə̂ nə̈ nə̂ pä azə̈ wätə̂ azü ndə̂ Ndjapä, ânyë tchêbêche âtə gbɛ̂ wä tchâtchâ gbôgbô ndə̂ Ngbongbo akrə.

²⁰ Azə̈ wûnsə̂ nə̈ nə̂ pä Modô ndə̂ Ndjapä nə̈, kə̈ zâ kə̂ wunsə̂ rə sə̈ azə̂ ndə̂kə̂ wunsə̂ lëge Ndjapä. Azə̈ wä balë la lëge Ndjapä lə̂ köbosə̂ Modô ndə̂ yê Jezü Krîsiti. Tchetchë kä ndə̂ âwâtə̂ lëge Ndjapä, kə̈ wâtə̂ tchîsûwu ndə̂ logbɛ̂ logbɛ̂.

²¹ Abechë ndə̂ mê, äwäpä nyë vogabô angakʉ̈lä vôga-ê!