Dokʉ̈ Jâan 4 - Mbëtï Ndjapä: TÄFO MADƗ̈

Köbo kə̂ wunsə̂ Yingö ndə̂ Ndjapä

¹ Arə̂mâ ndə̂ mê ndə̂ më nyîndə̂ nyê tə̂ gbölösə̂nə̈, nyë gämbabô pö ndə̂ azü ndə̂ andjë to rə̂ pä anyë kä la yingö lâme gâmba-ê. Praâbalë äwäpä nyë wun kə̂ sə ndə̂ andjê, lakə̂ mbo rə ndə̂ andjê. Käko nyê wunsə̂ nə̈ pä yingö ndə̂ âwâ lə̂ andjê lâme tö bhândə̂ Ndjapä, bëte angbängbä a-earə̂ ndə̂ma Ndjapä ndə̂ yepa zâ tchêbêche nə̂ gbɛ̂.

² Köbo ndə̂ nyê wunsə̂ Yingö ndə̂ Ndjapä lâme wä kâkë: Akrə ndə̂ tche wûnsə̂ nə̈ pä Jezü Krîsiti mbötə̂ yê tə̂ lëge nə̈ tə̂ akrə, tche kä la Yingö ndə̂ Ndjapä.

³ Praâbalë yingö gbɛ̂ ndə̂ âkôsə̂ kə̂ wûnsə̂ Jezü, tôâbo bhândə̂ Ndjapä-a. Yingö lâme wätə̂ andə̂ akrə ndə̂ tche kôsə̂ Krîsiti. Tchanə̈ lâme kä ndə̂ nyë djê pö ndə̂ yê alême pä tchê wutuadje, dëkë tche wûtu angaâtə nə̂ pâ cho âtə.

⁴ Nyënyê ndə̂ abechë ndə̂ mê, nyë wätə̂ azü ndə̂ Ndjapä. Nyë rô a-earə̂ ndə̂ma Ndjapä ndə̂ yepa lâme la gbôgbô nə̂. Bëte tchanə̈ ndə̂ tche wâ lə̂ nyê lâme, tche wä gbölö kə̈ rô tchanə̈ ndə̂ tche wâ pâ cho âtə.

⁵ Andjë wätə̂ azü pâ cho âtə. Bëte rə̂ kä ndə̂ andjë to pö batə̂ azü pâ cho âtə, ânyë azü pâ cho nə̈ djê andjê.

⁶ Praâbalë andə̂ azə̈ nə̈, azə̈ wätə̂ azü ndə̂ Ndjapä. Akrə ndə̂ tche wûnsə̂ Ndjapä, tche djë azə̂. Praâbalë akrə ndə̂ tche wâbô wâtə̂ akrə ndə̂ Ndjapä, tche djêâbo azə̂-a. Käko kä ndə̂ azə̈ wunsə̂ kə̂ krʉ tchə̂lə̂ Yingö ndə̂ lëge pö la yingö ndə̂ ânyisə̂ ngbongbo köbo.

Ndjapä wätə̂ kə̂ nyində̂ ngâ

⁷ Arə̂mâ ndə̂ mê ndə̂ më nyîndə̂ nyê tə̂ gbölösə̂nə̈, äwäpä azə̈ nyində̂ angâ azə̂ lə̂ gbâtə̂ azə̂, bëte kə̂ nyində̂ ngâ tö bhândə̂ Ndjapä. Akrə ndə̂ tche nyîndə̂ ngâ yê, tche də̈ bechë ndə̂ Ndjapä, bëte tche wûnsə̂ Ndjapä nə̂.

⁸ Akrə ndə̂ tche nyîâbô nyîndə̂ ngâ yê, dëkë tche wûn-âbo sə̂ Ndjapä-a, bëte Ndjapä wätə̂ kə̂ nyində̂ ngâ.

⁹ Ndjapä nyïsə̂ köbo ndə̂kə̂ nyində̂ ngâ sə̈ azə̂ kâkë: Tche wän gbokôngô Modô ndə̂ yê atə̂ bêche ndə̂kə̂ pa lə̂ köbosə̂ yê azə̈ sə la tʉ̈rʉ̂ la.

¹⁰ Kə̂ nyində̂ ngâ wä kâkë: Âdə̂âbô azə̂ kä ndə̂ ânyîndə̂ Ndjapä-a, praâbalë Ndjapä kä ndə̂ ânyîndə̂ azə̂ ânyë kə̈ wân Modô ndə̂ yê, tche zätə̂ yê la ngela ndə̂kə̂ pa Ndjapä ko pö lə̂ küma azə̂.

¹¹ Arə̂mâ ndə̂ mê ndə̂ më nyîndə̂ nyê tə̂ gbölösə̂nə̈, âdə Ndjapä ânyində̂ azə̂ käko-ë, äwäpä azə̈ nyi ndjë ndə̂ angâ azə̂ lə̂ gbâtə̂ azə̂.

¹² Ngâ akrə balë wûn-âbo Ndjapä-a. Käko âdə azə̂ ânyində̂ angâ azə̂ lə̂ gbâtə̂ azə̂, Ndjapä kä lə̂ azə̂, ânyë kə̂ nyində̂ ngâ ndə̂ yê nə̈ lə̂ azə̂ daka gbɛ̂.

¹³ Rə ndə̂ azə̈ wunsə̂ nə̈ pä azə̈ kädje balë la Ndjapä, ânyë tche kä ndjë lə̂ azə̂ wä kâkë: Tche zä Yingö ndə̂ yê sə̈ azə̂.

¹⁴ Ârâ wün rə̂, kə̈ tô pö ndə̂nə̈ pä Bha wän Modô ndə̂ yê ndə̂kə̂ pa tche watə̂ Earə̂ kə̂ tcha azü tchêbêche âtə.

¹⁵ Âdə ngâ akrə âto rə̂ kraâ pä Jezü də̈ Modô ndə̂ Ndjapä, dëkë Ndjapä kä balë la tchë, tche kä ndjë balë la Ndjapä.

¹⁶ Andə̂ azə̈ nə̈, azə̈ wûnsə̂ nə̈ nə̂ pä Ndjapä nyïndə̂ azə̂. Ndjapä wätə̂ kə̂ nyində̂ ngâ, akrə ndə̂ tche sə̂ lə̂kə̂ nyində̂ ngâ, tche kä balë la Ndjapä, ânyë Ndjapä kä balë la tchë.

¹⁷ Âdə kə̂ nyində̂ ngâ âdaka gbɛ̂ lə̂ azə̂, käko lo kə̂ wa ngbanga, su azə̂ wadje gii-ï. Azə̂ səadje käko, bëte kə̂ sə ndə̂ azə̂ bêche âtə kʉ̈tə̂ yê la andə̂ Jezü Krîsiti.

¹⁸ Wawa wâbo lə̂kə̂ nyində̂ ngâ-a. Kə̂ nyində̂ ngâ ndə̂ âdâka gbɛ̂ grö wawa. Wawa wûnsə̂ nə̈ nə̂ pä ngbanga kä lakə̂ krʉ bëte anyê. Käko akrə ndə̂ tche kpê wa nə̈, dëkë tche wûn-âbo sə̂kə̂ nyində̂ ngâ ndə̂ âdâka gbɛ̂ nə̂-a.

¹⁹ Andə̂ azə̈ nə̈, azə̈ nyïndə̂ azü bëte Ndjapä nyïndə̂ azə̂ tə̂ dokʉ̈ nə̈.

²⁰ Âdə ngâ akrə âto rə̂ päkëdə̂: «Më nyïndə̂ Ndjapä», ânyë kə̈ kôsə̂ ngâ yê, dëkë tche də̈ earə̂ yepa. Bëte âdə ngâ yê ndə̂ tche wun tchë, ânyë kə̂ nyîâbô nyîndə̂ yê, tche wâbo ndə̂kə̂ nyində̂ Ndjapä ndə̂ tche wûn-âbô tchë wûn lâme-a.

²¹ Ndïɛ̈ ndə̂ Krîsiti zâ rə̂ sə̈ azə̂ wä kâkë: Akrə ndə̂ tche nyîndə̂ Ndjapä, äwäpä tche nyi ndjë ndə̂ ngâ yê.