Dokʉ̈ Jâan 3 - Mbëtï Ndjapä: TÄFO MADƗ̈

Azə̈ wätə̂ abechë ndə̂ Ndjapä

¹ Nyë wünsa kə̂ nyində̂ azə̂ ndə̂ Bha nyîndə̂ azə̂! Tche nyïndə̂ azə̂ tə̂ gbölösə̂nə̈, ndə̂kə̂ pa a e rə̂ tə̂ azə̂ pä abechë ndə̂ Ndjapä, tə̂ lëge nə̈ azə̈ wätə̂ abechë ndə̂ yê. Âdə tchêbêche âtə âwûn-âbo sə̂ azə̂ wûn-î, bëte âwûn-âbo sə̂ Ndjapä balë-a.

² Arə̂mâ ndə̂ mê ndə̂ më nyîndə̂ nyê tə̂ gbölösə̂nə̈, azə̈ wâ angaâtə nə̂ tə̂ abechë ndə̂ Ndjapä. Köbo ndə̂ azə̈ sə la rə̂ ndə̂ tchêlâmbo, gbô rə̂ kä lə̂ küwû nə̈. Praâbalë azə̈ wûnsə̂ nə̈ nə̂ pä âdə Krîsiti âkangbâ yê, azə̂ wadje batə̂ tchë, bëte azə̂ wun-adje tchë batə̂ rə̂ ndə̂ tche wâ tâ.

³ Akrə ndə̂ tche zâ su yê pâ pö lâme, äwäpä tche ji ngbongbo rə lə̂ yê, bëte Krîsiti wâbo la ngbongbo rə lə̂ yê-a.

⁴ Akrə ndə̂ tche mbô ngbongbo rə, dëkë tche kôsə̂ ndïɛ̈ ndə̂ Ndjapä nə̂, bëte kə̂ mbo ngbongbo rə wätə̂ kə̂ kosə̂ ndïɛ̈ nə̈ lâme.

⁵ Nyë wûnsə̂ nə̈ nə̂ pä Jezü Krîsiti nə̈ ndə̂kə̂ ji angbongbo rə, ânyë ngbongbo rə wâbo lə̂ yê-a.

⁶ Akrə ndə̂ tche wâ balë la Krîsiti, tche mbôâbô ngbongbo rə-a. Akrə ndə̂ tche ndə̂po lakə̂ mbo ngbongbo rə, dëkë tche wûn-âbo sə̂ Krîsiti-a, kə̈ wûn-âbo ndjë tchë balë-a.

⁷ Abechë ndə̂ mê, ngâ akrə balë yüäbô köbo nyê yû-î. Akrə ndə̂ tche mbô djîrə̂ rə, dëkë tche wätə̂ djîrə̂ akrə batə̂ Jezü ndə̂ tche wâ djîrə̂.

⁸ Akrə ndə̂ tche mbô ngbongbo rə, dëkë tche wätə̂ tchandə̂ Jâbolo. Bëte Jâbolo jëtə̂ kə̂ mbo ngbongbo rə gasa alême lə̂ kêsâ nə̈. Ndə̂ Modô ndə̂ Ndjapä nə̂ lâme, tche nə̈ ndə̂kə̂ ndɨ tchə̂lə̂ kua ndə̂ Jâbolo.

⁹ Akrə ndə̂ tche wâtə̂ bechë ndə̂ Ndjapä, tchê kä mboabô ngbongbo rə tee-a, bëte gbôgbô ndə̂ Ndjapä kä lə̂ yê. Tchê kä mbo bata ngbongbo rə tee-a, bëte tche də̈ bechë ndə̂ Ndjapä.

¹⁰ Rə ndə̂ âkrʉ̂ tchə̂lə̂ gûtə̂ abechë ndə̂ Ndjapä la abechë ndə̂ Jâbolo wä kâkë: Akrə ndə̂ tche mbôâbô djîrə̂ rə mbô-ê, ânyë kə̈ nyîâbô nyîndə̂ angâ yê, dëkë tche wâbo tə̂ bechë ndə̂ Ndjapä-a.

Nyë nyïndə̂ angâ nyê lə̂ gbâtə̂ nyê

¹¹ Pö ndə̂ nyë djê rə̂ alême lə̂ kêsâ nə̈ kä âtə: Äwäpä azə̈ nyində̂ angâ azə̂ lə̂ gbâtə̂ azə̂.

¹² Azə̈ mböäbô rə mbô batə̂ Käyîne, ndə̂ tche wâtə̂ akrə ndə̂ Ngbongbo akrə, ânyë kə̈ wôn yîngâ yê lâme. Tche wön tchë bëte giamâ? Bëte kua ndə̂ Käyîne wätə̂ ngbongbo nə̈, ânyë andə̂ yîngâ yê wâtə̂ djîrə̂ nə̈.

¹³ Arə̂mâ ndə̂ mê, âdə azü tchêbêche âtə âkosə̂ nyê, tchə̂lə̂ küma nyê djïngɨliabô djîngɨli-î.

¹⁴ Azə̈ wûnsə̂ nə̈ nə̂ pä azə̈ rô lə̂ kuzü nə̂, ânyë kə̈ wâ la tchîsûwu, bëte rə̂ ndə̂ azə̈ nyîndə̂ angâ azə̂. Akrə ndə̂ tche nyîâbô nyîndə̂ ngâ yê, dëkë gbô tchë kä lə̂ kuzü.

¹⁵ Akrə ndə̂ tche kôsə̂ ngâ yê, dëkë tche wätə̂ earə̂ kə̂ won akrə. Nyë wûnsə̂ nə̈ nə̂ pä ngâ earə̂ kə̂ won akrə balë wâbo la tchîsûwu ndə̂ logbɛ̂ logbɛ̂ lə̂ yê-a.

¹⁶ Rə ndə̂ azə̈ wunsə̂ kə̂ nyində̂ ngâ la rə̂ wä kâkë: Jezü zä tchîsûwu ndə̂ yê bëte azə̂. Azəzə̂ ndjë gbɛ̂, äwäpä azə̈ za tchîsûwu ndə̂ azə̂ bëte angâ azə̂.

¹⁷ Praâbalë âdə ngâ akrə âwa la arə tchêbêche âtə tə̂ gbölösə̂nə̈, ânyë kə̈ gʉ̂â la yê tə̂ ngâ yê, ndə̂ tche wûn tchë la gʉ ngâ rə, akrə käko lâme nyïndə̂ Ndjapä tchïtchïnə̈ atöko?

¹⁸ Abechë ndə̂ mê, nyë nyïäbô nyîndə̂ angâ nyê kütû la wünwün pö-ê, âdəndjë mbämbä pö lə̂ ma nyê-ê, praâbalë nyë nyïndə̂ angâ nyê lakə̂ mbo kua nə̈, ndjë lə̂ köbosə̂ lëge pö.

Su ndə̂ âwa gii tchâtchu Ndjapä

¹⁹ Käko kä ndə̂ azə̈ wun-adje sə̂nə̈ pä azə̈ də̈ azü ndə̂ lëge pö, ânyë su azə̂ wadje gii tchâtchu Ndjapä.

²⁰ Bëte âdə su azə̂ âwa ngbanga lə̂ küma azə̂, Ndjapä wä gbölö kə̈ rô su azə̂, tche wünsə̂ rə gbɛ̂.

²¹ Arə̂mâ ndə̂ mê ndə̂ më nyîndə̂ nyê tə̂ gbölösə̂nə̈, âdə su azə̂ âwabô ngbanga wâ lə̂ küma azə̂, su azə̂ kä gii pâ Ndjapä.

²² Rə gbɛ̂ ndə̂ azə̈ yukû nə̈, azə̈ âgbo rə̂ tchânə̂ yê, bëte azə̈ bäta ndïɛ̈ ndə̂ yê, ânyë kə̈ mbô rə ndə̂ âfû tə̂ yê.

²³ Ndïɛ̈ ndə̂ yê wä kâkë: Äwä ndə̂kə̂ pa azə̈ gamba rə̈ Modô ndə̂ yê Jezü Krîsiti, kə̂ nyində̂ angâ azə̂ lə̂ gbâtə̂ azə̂, gundə̂sə̂ ndïɛ̈ ndə̂ tche zâ rə̂ sə̈ azə̂.

²⁴ Akrə ndə̂ tche bâta ndïɛ̈ ndə̂ Ndjapä, dëkë tche kä balë la tchë, ânyë Ndjapä wâ nə̂ balë la tchë. Käko kä ndə̂ azə̈ wunsə̂ nə̈ pä Ndjapä wâ nə̂ balë la azə̂ lə̂ köbosə̂ Kpɨ̂ki Yingö ndə̂ tche zâ rə̂ sə̈ azə̂.