Dokʉ̈ Jâan 2 - Mbëtï Ndjapä: TÄFO MADƗ̈

Krîsiti nə̈ ndə̂kə̂ za kokô azə̂

¹ Abechë ndə̂ mê, më mbö mbëtï âtə sə̈ nyê ndə̂kə̂ pa nyë mboabô ngbongbo rə mbô-ê. Âdə ngâ akrə âmbo ngbongbo rə, azə̈ kä la ngâ earə̂ kə̂ za kokô azə̂ ndrotə̂ Bha azə̂, tche də̈ Jezü Krîsiti, ndə̂ tche wâ djîrə̂.

² Tche zätə̂ yê la tə̂ yê la ngela, ndə̂kə̂ pa Ndjapä ko pö lə̂ küma azə̂. Âdə̂âbo kütû angbongbo rə ndə̂ azə̂ la kütû azə̂-a, praâbalë andə̂ azü ndə̂ tchêbêche ndjë gbɛ̂.

³ Âdə azə̂ âmbo rə gundə̂sə̂ andïɛ̈ ndə̂ Ndjapä, tchâme, azə̈ wunsə̂ nə̈ pä azə̈ wûnsə̂ Ndjapä nə̂.

⁴ Âdə ngâ akrə âto rə̂ päkëdə̂: «Më wûnsə̂ Ndjapä nə̂», ânyë kə̈ mbôâbô rə mbô gundə̂sə̂ andïɛ̈ ndə̂ yê-ê, dëkë tche wätə̂ earə̂ yepa. Lëge pö wâbo lə̂ yê-a.

⁵ Praâbalë akrə ndə̂ tche bâta pö ndə̂ yê, dëkë tche nyïndə̂ Ndjapä tə̂ lëge nə̈ gbɛ̂. Tchâme, azə̈ wunsə̂ nə̈ pä azə̈ wâ nə̂ balë la Ndjapä.

⁶ Akrə ndə̂ tche tô rə̂ pä anyë kä balë la Ndjapä, äwäpä kə̂ sə ndə̂ yê wa batə̂ andə̂ Jezü Krîsiti.

Täfo ndïɛ̈

⁷ Arə̂mâ ndə̂ mê ndə̂ më nyîndə̂ nyê tə̂ gbölösə̂nə̈, ndïɛ̈ ndə̂ më mbô rə̂ lə̂ mbëtï sə̈ nyê âtə wâbo tə̂ täfo ndïɛ̈-a, ädə̈ ngâ bəndɨ ndïɛ̈ ndə̂ nyë gbô rə̂ lə̂ kêsâ nə̈. Bəndɨ ndïɛ̈ nə̈ lâme wätə̂ pö ndə̂ nyë djê rə̂ dokʉ̈tchê.

⁸ Dëkë täfo ndïɛ̈ kä ndə̂ më mbô rə̂ lə̂ mbëtï sə̈ nyê âtə, täfo ndïɛ̈ nə̈ lâme wätə̂ lëge pö ndə̂ âwâ lə̂ Krîsiti, ndjë lə̂ nyê. Bëte tchə̂lə̂ bütchî kä lakə̂ ro, anyë lëge ngbänga tchô nə̂.

⁹ Akrə ndə̂ tche tô rə̂ pä anyë kä lə̂ ngbänga, ânyë kə̈ kôsə̂ ngâ yê, dëkë gbô tchë kä po lə̂ bübü tchô.

¹⁰ Akrə ndə̂ tche nyîndə̂ ngâ yê, tche kä lə̂ ngbänga, ânyë ngâ rə balë ndə̂ âmbo rə̂ pä tche te lə̂ ngbongbo rə wâbo-a.

¹¹ Praâbalë akrə ndə̂ tche kôsə̂ ngâ yê, tche kä lə̂ bübü tchô, kə̈ wûn-âbo sə̂ tchô ndə̂ tche e tâ-a, bëte bübü tchô nə̈ mbô tchë nə̂ tə̂ earə̂ föla.

¹² Nyënyê ndə̂ abechë ndə̂ mê, më mbö mbëtï âtə sə̈ nyê bëte Ndjapä kô pö lə̂ küma nyê nə̂ lə̂ köbosə̂ rə̈ Jezü.

¹³ Nyënyê ndə̂ arabha, më mbö mbëtï âtə sə̈ nyê bëte nyë wûnsə̂ tchanə̈ ndə̂ tche wâ tâ lə̂ kêsâ nə̈ lâme nə̂. Nyënyê ndə̂ abechë-ɛ̈köchë la abechë-ɛ̈chë, më mbö mbëtï âtə sə̈ nyê bëte nyë rôpâ Ngbongbo akrə nə̂.

¹⁴ Nyënyê ndə̂ abechë ndə̂ mê, më mbö mbëtï âtə sə̈ nyê bëte nyë wûnsə̂ Bha nə̂. Nyënyê ndə̂ arabha, më mbö mbëtï âtə sə̈ nyê bëte nyë wûnsə̂ tchanə̈ ndə̂ tche wâ tâ lə̂ kêsâ nə̈ lâme nə̂. Nyënyê ndə̂ abechë-ɛ̈köchë la abechë-ɛ̈chë, më mbö mbëtï âtə sə̈ nyê bëte nyë kpôkpo tə̂ nyê nə̂, pö Ndjapä kä lə̂ su nyê, ânyë nyë rôpâ Ngbongbo akrə nə̂.

¹⁵ Nyë nyïäbô nyîndə̂ tchêbêche âtə-ê, âdəndjë ngâ rə balë ndə̂ âwâtə̂ rə tchêbêche-ê. Âdə ngâ akrə ânyîndə̂ tchêbêche âtə, dëkë tche nyîâbo ndə̂ Bha-a.

¹⁶ Arə tchêbêche nə̈ wä kâkë: Gʉ ndə̂kə̂ mbo rə ndə̂ su akrə la tə̂ yê nyîndə̂ nə̈, âdəndjë gʉ ndə̂kə̂ gbo rə ndə̂ la azü wun rə̂, lakə̂ bhi gogo pâ arə tchêbêche. Arə lâme gbɛ̂ tôâbo bhândə̂ Bha-a, praâbalë ätö bêche âtə.

¹⁷ Tchêbêche âtə âro më rö la arə gbɛ̂ ndə̂ su azü nyîndə̂ nə̈. Praâbalë akrə ndə̂ tche mbô rə ndə̂ su Ndjapä nyîndə̂ nə̈, tchîsûwu ndə̂ yê âwa pïï etə̂.

Pö pâ azü ndə̂ andjë kôsə̂ Krîsiti

¹⁸ Abechë ndə̂ mê, tchêbêche ndô tə̂kə̂ krʉ nə̂. Nyë djê rə̂ alême nə̂ pä Earə̂ kə̂ kosə̂ Krîsiti âwutuadje. Dëkë angaâtə angbängbä azü ndə̂ andjë kôsə̂ Krîsiti wûtu nə̂. Käko azə̈ wûnsə̂ nə̈ nə̂ pä tchêbêche ndô tə̂kə̂ krʉ nə̂.

¹⁹ Azü nə̈ lâme gbô lə̂ gûtə̂ azə̂ nə̂, praâbalë andjë wâbo alême tə̂ andjandə̂ azə̈ nə̈-a. Âdə andjê âwa alême tə̂ andjandə̂ azə̂, dëkë andjê ândəpo alême lə̂ gûtə̂ azə̂. Praâbalë ndə̂ andjë gbô lə̂ gûtə̂ azə̂ lâme, änyïsə̂ nə̈ pä tə̂ lëge nə̈ ngâ akrə balë lə̂ gûtə̂ andjê wâbo alêe tə̂ tchandə̂ azə̈ nə̈-a.

²⁰ Âdə andə̂ nye nə̈, nyë gbô Kpɨ̂ki Yingö ndə̂ Krîsiti zâ tchë sə̈ nyê nə̂, ânyë nyënyê gbɛ̂, nyë wûnsə̂ lëge pö nə̂.

²¹ Mbëtï ndə̂ më mbô rə̂ sə̈ nyê âtə, nyîâbo sə̂nə̈ pä nyë wûn-âbo sə̂ lëge pö nə̂-a, praâbalë më mbö rə̂ bëte nyë wûnsə̂ lëge pö nə̂. Nyë wûn ndjë sə̂nə̈ nə̂ pä ngâ pö yepa balë wûtuabô lə̂ lëge pö-a.

²² Tchabâ kä ndə̂ âwâtə̂ earə̂ yepa? Tche də̈ akrə ndə̂ tche tô rə̂ pä Jezü wâbo tə̂ Krîsiti-a, tchanə̈ lâme kä ndə̂ âwâtə̂ Earə̂ kə̂ kosə̂ Krîsiti: Tche kôsə̂ Bha la Modô nə̈ nə̂.

²³ Akrə ndə̂ tche kôsə̂ Modô nə̈, dëkë tche wâbo la Bha-a; akrə ndə̂ tche wûnsə̂ Modô nə̈, dëkë tche kä ndjë la Bha.

²⁴ Âdə andə̂ nye nə̈, äwäpä nyë bäta pö ndə̂ nyë djê rə̂ lə̂ kêsâ nə̈ lâme. Âdə nyë âbata pö ndə̂ nyë djê rə̂ lə̂ kêsâ nə̈ lâme, dëkë nyë wâ nə̂ balë la Modô nə̈, ndjë la Bha.

²⁵ Bâlâ ndə̂ Krîsiti za rə̂ tə̂ azə̂ də̈ tchîsûwu ndə̂ logbɛ̂ logbɛ̂.

²⁶ Mbëtï ndə̂ më mbô rə̂ sə̈ nyê âtə, më mbö rə̂ tə̂ pö ndə̂ azü ndə̂ andjë mbo rə̂ pä köbo yu tə̂ nyê.

²⁷ Âdə andə̂ nye nə̈, Kpɨ̂ki Yingö ndə̂ Krîsiti zâ rə̂ sə̈ nyê lâme kä lə̂ su nyê. Äkä wâbo ndə̂kə̂ pa ngâ akrə kä ndə̂ ânyisə̂ rə sə̈ nyê-a, praâbalë Kpɨ̂ki Yingö ndə̂ yê lâme kä ndə̂ ânyisə̂ arə gbɛ̂ sə̈ nyê. Tche nyîâbo sə̂ yepa-a, praâbalë tche nyïsə̂ lëge pö. Bëte rə̂ kä ndə̂, äwäpä nyë wa balë la Krîsiti batə̂ rə̂ ndə̂ Kpɨ̂ki Yingö nyîsə̂ nə̈ sə̈ nyê.

²⁸ Angaâtə abechë ndə̂ mê, äwäpä nyë wa balë la Krîsiti ndə̂kə̂ pa lo nə̈ ndə̂ tche kangbâ yê, su azə̂ wa gii-ï, ganô mboabô azə̂ mbô ndə̂kə̂ gi azə̂ tʉ̂rʉ tə̂ yê tə̂ lo kə̂ ka ndə̂ yê.

²⁹ Âdə nyë âwunsə̂ nə̈ pä Krîsiti wä djîrə̂, äwäpä nyë wunsə̂ nə̈ pä akrə ndə̂ tche mbô djîrə̂ rə, dëkë tche də̈ bechë ndə̂ Ndjapä.