Dokʉ̈ Jâan 1 - Mbëtï Ndjapä: TÄFO MADƗ̈

Pö ndə̂ âza tchîsûwu sə̈ azü

¹ Rə ndə̂ âwâ tâ alême lə̂ kêsâ nə̈, ârâ djë rə̂, kə̈ wûn rə̂ la lala ârâ, kə̈ chêko rə̂, kə̈ grʉ̂ rə̂ la könô ârâ: Rə nə̈ də̈ Pö ndə̂ âza tchîsûwu sə̈ azü.

² Tchîsûwu nə̈ lâme mätə̂ yê kraâ ësûwu, ânyë ârâ wûn rə̂. Ârâ tö pö ndə̂ rə ndə̂ ârâ wûnsə̂ nə̈ pânə̈. Bëte rə̂ kä ndə̂ ârâ mû pö ndə̂ tchîsûwu ndə̂ logbɛ̂ logbɛ̂ sə̈ nyê, ndə̂ âwâ gasa alême ndrotə̂ Bha, ânyë kə̈ mâtə̂ yê sə̈ ârâ.

³ Rə ndə̂ ârâ wûn rə̂, ânyë kə̈ djê rə̂, ârâ mü rə̂ sə̈ nyê ndə̂kə̂ pa nyënyê ndjë gbɛ̂, su nyê wa balë la andə̂ ârâ. Käko azə̂ gbɛ̂ wa la su balë la Bha azə̂ Ndjapä ndjë la Modô ndə̂ yê Jezü Krîsiti.

⁴ Ârâ mbö mbëtï âtə sə̈ nyê ndə̂kə̂ pa mômô ndə̂ ârâ watə̂ gbölösə̂nə̈.

Ndjapä wätə̂ ngbänga

⁵ Pö ndə̂ ârâ djê rə̂ lə̂ ma Jezü Krîsiti ânyë kə̈ nyîndə̂ kə̂ to tchêngbâ nə̈ sə̈ nyê wä kâkë: Ndjapä wätə̂ ngbänga, ngâ bübü tchô balë wâbo lə̂ yê-a.

⁶ Âdə azə̈ âto rə̂ pä azə̈ wä balë la tchë, ânyë gbô azə̂ ndə̂po lakə̂ nə lə̂ bübü tchô, dëkë azə̈ mô yepa nə̂. Azə̈ mbôâbo rə gundə̂sə̂ lëge pö-a.

⁷ Praâbalë âdə azə̂ ânə lə̂ ngbänga, batə̂ rə̂ ndə̂ Ndjapä la tə̂ yê wâ lə̂ ngbänga, dëkë azə̈ wâ nə̂ balë la angâ azə̂, ânyë jï Jezü Modô ndə̂ yê djutu angbongbo rə ndə̂ azə̂ gbɛ̂.

⁸ Âdə azə̂ âto rə̂ pä ngbongbo rə wâbo lə̂ azə̂-a, dëkë azə̈ bölotə̂ azə̂ la tə̂ azə̂, lëge pö wâbo lə̂ azə̂-a.

⁹ Praâbalë âdə azə̂ ânyisə̂ angbongbo rə ndə̂ azə̂ ësûwu, Ndjapä wä djîrə̂, kə̈ mbô rə gundə̂sə̂ pö ma yê: Tchê koadje apö lə̂ küma azə̂, kə̂ jiadje azə̂ lə̂ angbongbo rə gbɛ̂.

¹⁰ Âdə azə̂ âto rə̂ pä azə̈ mbôâbo ngbongbo rə, dëkë azə̈ mbö rə̂ pä Ndjapä watə̂ earə̂ yepa, pö ndə̂ yê wâbo lə̂ su azə̂-a.