Bïchuû Timotë 4 - Mbëtï Ndjapä: TÄFO MADƗ̈

¹ Më yükû nə̈ sə̈ mö tchâtchu Ndjapä ndjë tchâtchu Jezü Krîsiti ndə̂ tchê kadje ndə̂kə̂ wa ngbanga ndə̂ azü ndə̂ andjë wâ la tʉ̈rʉ̂ la andjê la andjanə̈ ndə̂ andjë tchû. Tche âwa ngbanga nə̈ tə̂ lo kə̂ ka ndə̂ yê, la lo kə̂ mbo kümändëmä ndə̂ yê.

² Äwäpä mo mu pö Ndjapä, kə̂ chi pânə̈ lə̂ tchôtchô lö ndjë lə̂ ngbongbo lö. Amö gbɨtɨ tü azü, kə̂ hro la andjê, kə̂ za wängö sə̈ andjê, lakə̂ rʉatə̂ su zə̈ logbɛ̂, la su ndə̂kə̂ nyisə̂ rə.

³ Bëte ngâ lö wutuadje ndə̂ angâ azü kä nyi bata ndə̂kə̂ dje lëge pö ndə̂ a nyisə̂ nə̈ tee-a. Praâbalë andjê âmbo kütû rə ndə̂ gʉ su andjê la tə̂ andjê nyîndə̂ nə̈. Kpûlû a-earə̂ kə̂ nyisə̂ rə takpadje ndə̂ andjê, ânyë kə̂ nyisə̂ rə sə̈ andjê, ndə̂ andjë wâ la gʉ ndə̂kə̂ dje rə̂ lâme.

⁴ Andjê beadje tü andjê ndə̂kə̂ dje lëge pö, ânyë kə̂ dekadje tü andjê ndə̂kə̂ dje andə̂ma pö.

⁵ Praâbalë andə̂ zə nə̈, äwäpä lə̂ arə gbɛ̂ mo mbo rə âroabô masə̂nə̈ rô-ê, amö rʉatə̂ su zə̈ lə̂ arə yûkü, kə̂ mbo kua ndə̂kə̂ mu Tchôtchô Pö, kə̂ mbo kua ndə̂ zə̈ ndə̂ Ndjapä zâ rə̂ sə̈ mö.

⁶ Andə̂ me nə̈, a zâ mê la ngela nə̂, ânyë lo nə̈ tâ tâ nə̂ ndə̂kə̂ pa më ro etə̂.

⁷ Më mbô tchôtchô kʉ̈ʉ̈ nə̂, kə̈ kpê la rö nə̈ âkâ nə̂, më bâta su mê ndə̂ më zâ rə̂ sə̈ Krîsiti lâme nə̂.

⁸ Angaâtə, a bâta kurône sə̈ mê ngbâ djîrə̂ kua ndə̂ mê nə̂, ndə̂ Gbölö Gbïɛ̈ zadje rə̂ sə̈ mê tə̂ lo kə̂ ka ndə̂ yê. Tə̂ lo nə̈ lâme, tchetchë ndə̂ tche wâtə̂ djîrə̂ earə̂ kə̂ wa ngbanga, tchetchë kä ndə̂ âzadje kurône nə̈ sə̈ mê, âdə̂âbô kütû mê balë-a, praâbalë tche âkʉ ndjë rə̂ sə̈ azü gbɛ̂ ndə̂ andjë nyîndə̂ lo kə̂ ka ndə̂ yê.

Adɨ̂ apö ndə̂kə̂ gbɨtɨ tü

⁹ Äwäpä mo pu köbo la gbôgbô gbɛ̂ ndə̂kə̂ gbo mê gasa-ê.

¹⁰ Bëte Dëmâse gbôtə̂ mê nə̂ bëte gʉ arə tchêbêche ndə̂ tchô angêta. Tche rô nə̂ atə̂ Tësälönîke, Keresän rô atə̂ Gälâte, ânyë Tîte rô atə̂ Dalemasï.

¹¹ Kütû Lûke kä ndə̂ âsə̂ ndrotə̂ mê. Amö za Mâreke kə̈ nə̂ la tchë potə̂ zə̈, bëte tche däka ndə̂kə̂ za kônö sə̈ mê lə̂ kua ndə̂ Ndjapä.

¹² Më wän Tïchîke atə̂ Ëfêze.

¹³ Âdə mo âsə̈ nə, kə̂ za gbölö lə̂ba zɨ ndə̂ më gbôtâ bhâ Tröwâse bhândə̂ Kärëpôse lâme, kə̂ nə ndjë la ambëtï, tə̂ gbogbôsə̂nə̈ akpoto agia ndə̂ a mbo mbëtï pânə̈ lâme.

¹⁴ Alegezândere earə̂ ndao lâme mbö ngbongbo rə tə̂ mê alême tə̂ gbölösə̂nə̈. Gbölö Gbïɛ̈ giadje ndjë rə̂ sə̈ tchë gundə̂sə̂ akua ndə̂ yê.

¹⁵ Momö ndjë, la zə̈ gbö tə̂ yê-ê, bëte tche dächo alême tə̂ gbölösə̂nə̈ la apö ndə̂ azə̂.

¹⁶ Tə̂ dokʉ̈ nə̈ ndə̂ më kôsə̂ pö tə̂ mê tchâtchu a-earə̂ kə̂ wa ngbanga, ngâ akrə balë sə̂âbo ndrotə̂ mê-a, azü gbɛ̂ gbôtə̂ mê-ê. Äwäpä Ndjapä mboabô ngâ rə mbô tə̂ andjê tə̂ pö ndə̂nə̈-ê.

¹⁷ Gbölö Gbïɛ̈ la tə̂ yê kä ndə̂ âsə̂ ndrotə̂ mê, tche zä gbôgbô sə̈ mê ânyë mê mû pö ndə̂ yê tə̂ gbölösə̂nə̈, ânyë azü gbɛ̂ ndə̂ andjë wâbô wâtə̂ ajuîfu djê rə̂. Tchâme Gbölö Gbïɛ̈ jî mê lə̂ ma bämalä-ê.

¹⁸ Gbölö Gbïɛ̈ jiadje mê lə̂ angbongbo arə gbɛ̂, kə̂ tchadje mê bëte Gbölö gö-gbïɛ̈ ndə̂ yê ndə̂ âwâ bhâ lafô. Voga wätə̂ andə̂ ye nə̈ tə̂ logbɛ̂ logbɛ̂! Amin.

Adɨ̂ kə̂ po ndə̂ azü

¹⁹ Amö po ndə̂ Prïsîye la Äkïlâse sə̈ mê, ndjë la azü lə̂ bûngrɨ̂ ndə̂ Önësïfôre.

²⁰ Gbô Ërâsete kä po bhâ Körɛ̂nte, më gbötə̂ Tröfîme lə̂ tə̂kömbô bhâ Milë.

²¹ Amö mbo gbôgbô gbɛ̂ ndə̂kə̂ nə dokʉ̈tchê ndə̂kə̂ pa nyîpï ndə̂ zɨ wutu. Arə̂mâ bhâtə gbɛ̂ pô ndə̂ zə̈ nə̂, lə̂ gûtə̂ andjê, a gbö Ə̈bülûse la Pudän la Lîne la Kolodïä.

²² Äfü pä Gbölö Gbïɛ̈ sə la mö! Äfü pä Ndjapä mbo tchôtchô su tə̂ nyê gbɛ̂.