Bïchuû Timotë 3 - Mbëtï Ndjapä: TÄFO MADƗ̈

Adɨ̂ alö pâ cho âtə

¹ Äwäpä mo wunsə̂ pö âtə djîrə̂: Alö agbôgbô arə âwutuadje lə̂ adɨ̂ alö pâ cho âtə.

² Bëte azü wadje tə̂ a-earə̂ kpɨ̂tɨ̈, azü ndə̂ andjë wa la gʉ makətche, azü ndə̂ andjë nyisə̂ tə̂ andjê, azü ndə̂ andjë bhi gogo andjê, a-earə̂ kə̂ dro tchô, azü ndə̂ andjë kosə̂ araanyï la arabha andjê, azü ndə̂ andjë wûn-âbo wûnsə̂ kə̂ za ayîabâ-ê, azü ndə̂ andjë mbôâbo wa arə ndə̂ âwâ ngbî bëte Ndjapä mbô-ê.

³ Azü ndə̂ andjë nyîâbo nyîndə̂ angâ andjê-ê, azü ndə̂ andjë wun-abô nyonyo angâ andjê wûn-ê, azü ndə̂ andjë dɨ angbongbo apö tə̂ angâ andjê, azü ndə̂ andjë wûn-âbo sə̂kə̂ bata tə̂ andjê bâta-ê, azü ndə̂ andjë mbo azü la yûkü, azü ndə̂ andjë kosə̂ tchôtchô rə.

⁴ Azü ndə̂ andjë yosə̂ angâ andjê, a-earə̂ mêrâ, a-earə̂ kə̂ bhi gogo tə̂ gbölösə̂nə̈, azü ndə̂ arə tchêbêche âtə tcho tə̂ andjê âro Ndjapä.

⁵ Andjê mboadje tə̂ andjê batə̂ azü ndə̂ andjë zâtə̂ andjê gbɛ̂ sə̈ Ndjapä, praâbalë andjê vuadje sə̂ gbôgbô ndə̂nə̈. Amö sə tə̂ andjê ngrɨ̈.

⁶ Bëte angânə̈ lə̂ gbâtə̂ andjê lï lə̂ anda ânyë kə̈ bôlo aɛ̈chë ndə̂ andjë wâ gbɨgbɨ ndə̂kə̂ te lə̂ gbânda ndə̂ andjê. Aɛ̈chë nə̈ lâme mbö angbongbo rə tə̂ gbölösə̂nə̈, kə̈ wâ la gʉ arə balë balë gbɛ̂ tə̂ su andjê.

⁷ Aɛ̈chë nə̈ lâme pu köbo logbɛ̂ ndə̂kə̂ manda rə, praâbalë kə̈ gbôâbo köbo ndə̂kə̂ wunsə̂ lëge pö-a.

⁸ Ädə̈ ndjë käko tə̂ Jänêse la Jämbrêse ndə̂ andjë dâcho la Möyîze, käko azü lâme dä ndjë cho la lëge pö, andjë wätə̂ azü ndə̂kə̂ wunsə̂ rə ndə̂ andjê ndɨ̂, kə̂ za su andjê sə̈ Krîsiti kpôkpoabô tə̂ yê-a.

⁹ Praâbalë andjê eabô atə̂ tchâtchu nə̈ tee-a, bëte azü gbɛ̂ wun-adje sə̂ ngbɨ̈lə̈ ndə̂ andjê batə̂ andə̂ andjanə̈ bïchuû lâme.

Adɨ̂ wängö

¹⁰ Praâbalë andə̂ zə nə̈, mö zâ tchêngbâ mê lə̂ arə kâkë nə̂: Kə̂ nyîsə̂ rə ndə̂ mê, kə̂ sə ndə̂ mê, arə ndə̂ më nyîndə̂ kə̂ mbo rə̂ lə̂ kua ndə̂ mê, kə̂ za su mê sə̈ Krîsiti, kə̂ rʉatə̂ su mê, kə̂ nyində̂ ngâ ndə̂ mê, kə̂ rʉatə̂ su mê lə̂ arə gbôgbô.

¹¹ Arə gbôgbô la arə yükü gbö mê bhâ Äntïyôche, bhâ Ïkönïwûme, bhâ Lîsetere, më gbö arə gbôgbô gbɛ̂. Praâbalë Gbölö Gbïɛ̈ jî mê lə̂ arə lâme gbɛ̂.

¹² Tə̂ lëge nə̈, azü gbɛ̂ ndə̂ andjë nyîndə̂ kə̂ zâtə̂ andjê gbɛ̂ sə̈ Ndjapä ânyë kə̈ nyîndə̂ kə̂ wa balë la Jezü Krîsiti, a âmboadje andjê la yûkü.

¹³ Andə̂ angbongbo azü la andjanə̈ ndə̂ andjë bôlo angâ andjê, andjê eadje la ngbongbo rə ndə̂ andjê atə̂ tchâtchu nə̈. Andjê boloadje azü ânyë kə̂ bolo ndjë tə̂ andjê.

¹⁴ Praâbalë andə̂ zə nə̈, äwäpä rə ndə̂ mo manda rə̂ ânyë kə̈ gâmba rə̂ pä, äwätə̂ lëge nə̈ lâme, amö za rə̂ kperə̂: Mo wûnsə̂ akrə ndə̂ tche nyîsə̂ nə̈ sə̈ mö nə̂.

¹⁵ Mo wünsə̂ Mbëtï Ndjapä ndə̂ gbô mö ndə̂po tə̂ bechë. Mbëtï nə̈ lâme wä la gbôgbô ndə̂kə̂ za küma zə̈ lanə̈. Küma ndə̂ âwa lanə̈ lâme kä ndə̂ âza köbo sə̈ mö ndə̂kə̂ tcha lə̂ kuzü lə̂ köbosə̂ kə̂ za su zə̈ ndə̂ âwâ lə̂ Jezü Krîsiti.

¹⁶ Apö gbɛ̂ lə̂ Mbëtï Ndjapä tö lə̂ ma Ndjapä. Pö nə̈ däka ndə̂kə̂ nyisə̂ rə, ndə̂kə̂ nyisə̂ ngbongbo rə ndə̂ akrə sə̈ tchë, ndə̂kə̂ ka la akrə pâ tchôtchô köbo, ndə̂kə̂ nyisə̂ köbo ndə̂kə̂ mbo djîrə̂ rə tə̂ akrə,

¹⁷ ânyë akrə ndə̂ Ndjapä daka gbɛ̂, ndə̂kə̂ gbo arə ndə̂kə̂ mbo rə̂ la tchôtchô kua.