Bïchuû Timotë 2 - Mbëtï Ndjapä: TÄFO MADƗ̈

Djîrə̂ turûgu ndə̂ Jezü Krîsiti

¹ Andə̂ zə nə̈, bechë ndə̂ mê, amö kpokpo tə̂ zə̈ lə̂ köbosə̂ tchôtchô su ndə̂ âwâ lə̂ Jezü Krîsiti.

² Rə ndə̂ mo djê rə̂ alême lə̂ ma mê tchâtchu angbängbä azü, äwäpä mo gbotâ ëtchânə̂ adjîrə̂ azü, ndə̂ andjê la tə̂ andjê kʉ̂sə̂ kə̂ nyisə̂ nə̈ sə̈ angâ azü.

³ Amö wun ndjë andə̂ zə nə̈ yûkü nə̈ batə̂ djîrə̂ turûgu ndə̂ Jezü Krîsiti.

⁴ Âdə ngâ akrə âli lə̂ turûgu, ânyë kə̈ nyîndə̂ kə̂ mbo rə ndə̂ afû tə̂ gbölö akrə ndə̂ yê, tchê zabô su yê pâ akua ndə̂ ambämbä azü tee-a.

⁵ Käko ndjë, lə̂ angɨ̈ ndə̂ âmbo rə̂ pä tchə̂lə̂ kpoto akrə kra lâme, âdə akrə ndə̂ tche pâ adɨngâalî gundə̂sə̂ andïɛ̈ nə̈, tche âgbo rə ngbânə̈.

⁶ Earə̂ kə̂ djo kɨ̈ndɨ̈ ndə̂ tche wûn yûkü lakə̂ djo kɨ̈ndɨ̈, tchetchë kä ndə̂ âgbo andjî rəgʉ kɨ̈ndɨ̈ nə̈ dokʉ̈tchê.

⁷ Amö dje tchə̂lə̂ pö ndə̂ mê to rə̂ âtə. Gbölö Gbïɛ̈ âmbo rə̂ me pä mo dje tchə̂lə̂ adɨ̂ nə̈ gbɛ̂.

⁸ Äwäpä sə̂ pö ndə̂ Jezü Krîsiti te lə̂ zə̈, ndə̂ tche jô lə̂ gbâtə̂ akuzü, ndə̂ a zɨ̂ tchë pâ mawo ndə̂ Davîdi, gundə̂sə̂ Tchôtchô Pö ndə̂ mê mu rə̂.

⁹ Tə̂ pö ndə̂ Tchôtchô Pö nə̈ lâme kä ndə̂ më wûn yûkü zoo ânyë a yî mê atə̂lə̂ nda kânga batə̂ ngbongbo akrə. Praâbalë âdə̂âbo pö Ndjapä nə̈ kä ndə̂ a yî rə̂ lə̂ nda kânga-a.

¹⁰ Bëte rə̂ kä ndə̂ më rʉ̂âtə̂ su mê lə̂ arə gbɛ̂, bëte azü ndə̂ Ndjapä dɨ̂ andjê ndə̂kə̂ pa andjë tcha ndjë lə̂ kuzü. Kə̂ tcha lə̂ kuzü nə̈ lâme wâ lə̂ Jezü Krîsiti lakə̂ lusə̂tə̂ ndə̂ logbɛ̂ logbɛ̂.

¹¹ Pö ndə̂ mê to rə̂ âtə wä ndə̂kə̂ pa akrə za su yê pânə̈, pö nə̈ wä kâkë: «Âdə azə̂ âtchu la tchë, azə̂ wadje la tʉ̈rʉ̂ la la tchë.

¹² Âdə azə̂ âwun yûkü la tchë, azə̂ mboadje kümändëmä la tchë. Âdə azə̂ âvusə̂ yê, tchetchë ndjë gbɛ̂ tchê vuadje sə̂ azə̂.

¹³ Âdə azə̂ âmboabô rə mbô gundə̂sə̂ pö ma yê, tchetchë ndə̂ ye nə̈ tche mbö rə gundə̂sə̂ pö ma yê, bëte tche wâbo ndə̂kə̂ vusə̂ pö ma yê la tə̂ yê-a.»

Tchôtchô earə̂ kua

¹⁴ Apö lâme gbɛ̂, äwäpä mo ka tô tchêndə̂ nə̈, kə̂ to rə̂ sə̈ andjê tchâtchu Ndjapä ndə̂kə̂ pa andjë gbotə̂ kə̂ po tə̂ pö ndə̂ ada pö-ê. Ngâ rə balë wâbo lə̂kə̂ po nə̈ lâme-a, praâbalë ändɨ̈ andjanə̈ ndə̂ andjë dje rə̂.

¹⁵ Amö mbo gbôgbô gbɛ̂ ndə̂kə̂ matə̂ zə̈ tchâtchu Ndjapä batə̂ ngâ akrə ndə̂ tchêngbâ kua ndə̂ yê wâ tâ, earə̂ kua ndə̂ ganô mbôâbô tchë mbô-ê, ndə̂ tche nyisə̂ lëge pö lə̂ köbo nə̈.

¹⁶ Amö kpe tə̂ awünwün apö ndə̂ âwâ ngbî tə̂kə̂ zatə̂ andjê gbɛ̂ sə̈ Ndjapä lâme. Bëte azü ndə̂ andjë zâtə̂ andjê lakə̂ dɨ awünwün apö nə̈ lâme, andjê eadje atə̂ tchâtchu nə̈ kütû lə̂ köbosə̂ kə̂ wa ngbî tə̂ pö ndə̂kə̂ zatə̂ andjê gbɛ̂ sə̈ Ndjapä lâme.

¹⁷ Kə̂ to pö ndə̂ andjê wä batə̂ ngbongbo ku ndə̂ âzâ kʉ̂tê akrə gbɛ̂. Imenë la Fïlête kä lə̂ gbâtə̂ andjê.

¹⁸ Andjë chɛ̂ɛ tə̂ lëge pö nə̈, kə̈ tô rə̂ pä akuzü jô lə̂ kuzü alême nə̂. Käko andjë mbö rə̂ pä angbängbä azü te lə̂ su andjê ndə̂ andjë zâ rə̂ sə̈ Krîsiti lâme.

¹⁹ Praâbalë gbôgbô da nda ndə̂ Ndjapä nyîkrə rə̂, gbô rə̂ kä tâ, pö ndə̂ a pî rə̂ pâ da nda lâme wä päkëdə̂: «Gbölö Gbïɛ̈ wünsə̂ azü ndə̂ yê», ânyë: «Akrə ndə̂ tche tô rə̂ la ma yê pä anyë wätə̂ akrə ndə̂ Gbölö Gbïɛ̈, äwäpä tche e ngrɨ̈ tə̂ ngbongbo rə.»

²⁰ Lə̂ ngâ gbölö nda, a gbôâbo kütû arə ndə̂ a mbô rə̂ la lôlo-a, âdəndjë arə ndə̂ a mbo rə̂ la wɛ̂n ndə̂ a mbo rə̂ la makətche lâme-a. A gbö ndjë arə ndə̂ a mbô rə̂ la ayö, ndjë la anə̈ ndə̂ a mbô rə̂ la tô. A bäta angânə̈ bëte kpülü, ânyë angânə̈ wâ ndə̂kə̂ pa a mbo kua la rə̂ logbɛ̂.

²¹ Akrə ndə̂ tche gbôtə̂ köbo angbongbo rə ndə̂ mê nyisə̂ nə̈ âtə, tchê wadje batə̂ arə ndə̂ a bâta rə̂ bëte kpülü lâme, tchê wadje ngbî bëte Ndjapä, ndə̂ gbölö akrə ndə̂ yê mbo kua la tchë, ânyë tche wa ndə̂kə̂ mbo tchôtchô kua gbɛ̂.

²² Amö kpe tə̂ gʉ arə ndə̂ âmbo abechë-ɛ̈köchë la abechë-ɛ̈chë lâme. Pu köbo ndə̂kə̂ mbo djîrə̂ rə, kə̂ za su zə̈ sə̈ Krîsiti, kə̂ nyində̂ ngâ, kə̂ sə la zɨtɨ su la azü ndə̂ nyê e rə̈ Gbölö Gbïɛ̈ la andjê, la grôgrô su.

²³ Praâbalë awünwün apö ndə̂ âwâtə̂ angbɨ̈lə̈ nə̈ lâme, amö kosə̂ nə̈-ê. Bëte mo wûnsə̂ nə̈ nə̂ pä apö käko mbö rə̂ pä azü po la angâ andjê.

²⁴ Dëkë earə̂ kua ndə̂ Gbölö Gbïɛ̈ wâbo ndə̂kə̂ po-a. Praâbalë äwäpä azü gbɛ̂ nyində̂ yê, tche wunsə̂ kə̂ nyisə̂ rə sə̈ azü, kə̂ rʉatə̂ su yê lə̂ angbongbo apö ndə̂ azü.

²⁵ Äwäpä tche nyisə̂ rə nyima sə̈ azü ndə̂ andjë kôsə̂ apö ndə̂ yê: Ambêteko, Ndjapä âmboadje rə̂ ndə̂kə̂ pa andjë gbotə̂ bəndɨ kə̂ mbo rə ndə̂ andjê, ânyë kə̂ wunsə̂ lëge pö.

²⁶ Käko küma andjê ka lanə̈, ânyë andjë wutu lə̂ gbânda ndə̂ Jâbolo ndə̂ âkʉ̂ andjê la ngbâa lâme, ânyë andjë mbô rə ndə̂ su yê nyîndə̂ nə̈ lâme.