Bïchuû Timotë 1 - Mbëtï Ndjapä: TÄFO MADƗ̈

Kə̂ po ndə̂ azü

¹ Mëmê Pôlo, më də̈ badjângele ndə̂ Jezü Krîsiti, lə̂ köbosə̂ nə̈ ndə̂ Ndjapä nyîndə̂ nə̈, ndjë gundə̂sə̂ bâlâ ndə̂ tchîsûwu ndə̂ Ndjapä zâ rə̂ tə̂ azü, ndə̂ âwâ lə̂ Jezü Krîsiti.

² Më mbö mbëtï âtə sə̈ mö Timotë, bechë ndə̂ mê ndə̂ më nyîndə̂ zə̈ tə̂ gbölösə̂nə̈. Äfü pä Ndjapä Bha la Gbölö Gbïɛ̈ ndə̂ azə̂ Jezü Krîsiti mbo tchôtchô su tə̂ zə̈, kə̂ wun nyonyo zə̈, kə̂ za zɨtɨ su sə̈ mö.

Pôlo zä ayîabâ sə̈ Ndjapä

³ Më zä ayîabâ tə̂ gbölösə̂nə̈ sə̈ Ndjapä, ndə̂ më zâ tchêngbâ araâta mê lakə̂ mbo kua sə̈ tchë, la tchôtchô kə̂ rɨ tchə̂lə̂ su. Më kä lakə̂ za küma mê dalobiî tə̂ pö ndə̂ zə̈ logbɛ̂ ndə̂ mê to pö sə̈ Ndjapä.

⁴ Ngûla zə̈ ndə̂ âtû lâme, sə̂nə̈ të lə̂ mê ânyë më wâ la gbölö gʉ ndə̂kə̂ kä wun mö, ânyë kə̂ wa la mômô tə̂ gbölösə̂nə̈.

⁵ Më bäta pö ndə̂ lëge kə̂ za su zə̈ ndə̂ mo zâ rə̂ sə̈ Krîsiti lâme. Kə̂ za su nə̈ lâme tö dokʉ̈tchê tə̂ âta zə̈ tə̂ ɛ̈chë ndə̂ tche də̂ Löyîse, ndjë la anyï zə̈ Ə̈nîse. Më wünsə̂ nə̈ tə̂ lëge nə̈ pä, kə̂ za su sə̈ Krîsiti lâme, mo kä ndjë la rə̂.

⁶ Bëte rə̂ kä ndə̂ më kä tô rə̂ sə̈ mö päkëdə̂: Arə ndə̂ Yingö ndə̂ âwâ lə̂ zə̈, ndə̂ mo gbô rə̂ tchânə̂ Ndjapä tə̂ lo nə̈ ndə̂ më tô könô mê lə̂ küma zə̈ lâme, äwäpä mo mbo rə̂ âjo-ê.

⁷ Bëte âdə̂âbo Yingö ndə̂ wawa kä ndə̂ Ndjapä zâ rə̂ sə̈ azə̂-a, praâbalë Yingö nə̈ lâme wätə̂ Yingö ndə̂ gbôgbô, kə̈ wâtə̂ Yingö ndə̂kə̂ nyində̂ ngâ, la Yingö ndə̂kə̂ kitə̂ gʉ tə̂ akrə.

⁸ Âwâbo pä mo mbo ganô ndə̂kə̂ to pö pâ Gbölö Gbïɛ̈ ndə̂ azə̂-a. Âwâbo pä mo mbo ganô mê, earə̂ kânga ndə̂ yê-a. Praâbalë amö gamba rə̂ ndə̂kə̂ wun yûkü la mê, bëte Tchôtchô Pö, lakə̂ za su zə̈ pâ gbôgbô ndə̂ Ndjapä.

⁹ Tchetchë kä ndə̂ âtchâ azə̂, kə̈ ê azə̂ kə̈ kʉ̂ azə̂ ngbî bëte tchë lâme. Kə̂ e tchô nə̈ lâme wâbo lə̂ köbosə̂ kua ndə̂ azə̂-a, praâbalë äwä lə̂ köbosə̂ rə ndə̂ tche nyîkrə rə̂, la tchôtchô su yê. A zä tchôtchô su nə̈ lâme sə̈ azə̂, lə̂ köbosə̂ kə̂ wa balë la Jezü Krîsiti, dokʉ̈tchê ndə̂kə̂ pa a mbo arə gbɛ̂.

¹⁰ Angaâtə, tchôtchô su nə̈ nyïsə̂ tə̂ yê lə̂ köbosə̂ kə̂ nə ndə̂ Jezü Krîsiti, Earə̂ kə̂ tcha azə̂. Tchetchë kä ndə̂ ândɨ̂ kuzü, ânyë kə̈ mbô rə̂ pä azü wa la tchîsûwu, kə̂ tchuabô tchû-î. Tchë mbö arə lâme lə̂ köbosə̂ Tchôtchô Pö.

¹¹ Bëte rə̂ kä ndə̂ Ndjapä zâ mê ndə̂kə̂ pa më mu pö ndə̂ yê, kə̂ watə̂ badjângele, kə̂ nyisə̂ rə.

¹² Bëte rə̂ kä ndə̂ mê rʉ̂âtə̂ su mê lə̂ arə yûkü. Praâbalë ganô mbôâbo mê-a, bëte më wünsə̂ akrə ndə̂ më zâ su mê sə̈ tchë. Më wünsə̂ nə̈ tə̂ lëge nə̈ pä tche kä la kümändëmä ndə̂kə̂ bata rə ndə̂ tche gbôtâ ëtchânə̂ mê zoo ëtə̂ lo nə̈ lâme.

¹³ Amö mbo rə âkʉtə̂ yê la alëge apö ndə̂ Ndjapä ndə̂ mo djê rə̂ lə̂ ma mê, lə̂kə̂ za su sə̈ Krîsiti, lakə̂ nyində̂ ngâ ndə̂ âwâ lə̂ Jezü Krîsiti.

¹⁴ Tchôtchô rə nə̈ lâme, amö bata rə̂ lə̂ köbosə̂ Kpɨ̂ki Yingö ndə̂ âwâ lə̂ azə̂.

¹⁵ Mo wûnsə̂ nə̈ nə̂ pä azü lə̂ agö ndə̂ Azï gbɛ̂ gbôtə̂ mê nə̂; akrə batə̂ Fïjêle la Hërëmöjêne kä ndjë lə̂ gbâtə̂ andjê.

¹⁶ Äfü pä Gbölö Gbïɛ̈ wun nyonyo azü lə̂ bûngrɨ̂ ndə̂ Önësïfôre, bëte tche zä tchê gbôgbô tə̂ su mê, ndə̂ më sə̂ lə̂ nda kânga lâme, ganô mê mbôâbo tchë-a.

¹⁷ Praâbalë ndə̂ tche âsə̈ wûtu bhâ Rômo, kə̈ pû mê la gbôgbô gbɛ̂ zoo ânyë kə̈ gbô mê.

¹⁸ Äfü pä Gbölö Gbïɛ̈ Jezü za rə̂ sə̈ tchë ndə̂kə̂ gbo dâkâ ndə̂ Gbölö Gbïɛ̈ Ndjapä tə̂ lo nə̈ lâme. Atchôtchô arə gbɛ̂ ndə̂ tche mbô rə̂ tə̂ mê bhâ Ëfêze lâme, mo wünsə̂ nə̈ ârô adɨ̂ azü gbɛ̂.