Bïchuû Pîêre 3 - Mbëtï Ndjapä: TÄFO MADƗ̈

Lo kə̂ ka ndə̂ Gbölö Gbïɛ̈

¹ Arə̂mâ ndə̂ mê ndə̂ më nyîndə̂ nyê tə̂ gbölösə̂nə̈, bïchuû mbëtï ndə̂ më mbô rə̂ ndə̂kə̂ wan rə̂ sə̈ nyê kä âtə. Lə̂ ambëtï bïchuû lâme gbɛ̂, më nyïndə̂ nə̈ pä su nyê te pâ apö ndə̂ nyë wûnsə̂ nə̈, ndə̂kə̂ pa nyë wa la tchôtchô kə̂ za küma.

² Më nyïndə̂ nə̈ pä apö ndə̂ a-earə̂ ndə̂ma Ndjapä ndə̂ andjë dâka gbɛ̂ tô rə̂ sə̈ nyê dokʉ̈tchê alême, sə̂nə̈ te lə̂ nyê. Ndjë akümändëmä ndə̂ abadjângele nyîsə̂ nə̈ sə̈ nyê alême pâ pö ndə̂ Gbölö Gbïɛ̈ Earə̂ kə̂ tcha azə̂ lâme, më nyïndə̂ nə̈ pä sə̂nə̈ te lə̂ nyê.

³ Äwäpä nyë wunsə̂ nə̈ dokʉ̈tchê pä, lə̂ adɨ̂ alö, angâ azü ânəadje kə̂ səadje lakə̂ mbo rə gundə̂sə̂ ngbongbo gʉ su andjê la tə̂ andjê. Andjê moadje nyê,

⁴ andjê toadje rə̂ päkëdə̂: «Kə̂ za bâlâ ndə̂ Gbölö Gbïɛ̈ zâ rə̂ alême tə̂ pö ndə̂ kə̂ ka ndə̂ yê lâme, pö ndə̂nə̈ wä atöko? Bëte ndə̂nə̈ gû nə̂ ndə̂ arabha azə̂ tchû, gbô arə gbɛ̂ kä gbɛ̂ kpôsə̂nə̈, ndə̂kə̂ to tə̂ lo nə̈ ndə̂ Ndjapä mbô arə gbɛ̂!»

⁵ Käko sə̂ ngâ rə balë yû tə̂ andjê nə̂: Gasa alême Ndjapä mbö atchêlafô la tchêbêche lə̂ köbosə̂ pö ma yê. Ndjapä mbö rə̂ pä tchêbêche wutu lə̂ ngû ânyë a mbô tchêbêche la ngû.

⁶ Äwä ndjë käko lə̂ köbosə̂ ngû, ndə̂ âvô katchôgbɛ̂ ânyë dokʉ̈ tchêbêche ndɨ̂ lə̂ köbosə̂ nə̈.

⁷ Dëkë kütû lə̂ köbosə̂ pö ma Ndjapä balë lâme kä ndə̂ a bâta tchêlafô la tchêbêche ndə̂ tchô angêta bëte wo, ndə̂kə̂ krʉ bëte lö kə̂ wa ngbanga la lö ndə̂ angbongbo azü tchu tratralë-ê.

⁸ Praâbalë arə̂mâ ndə̂ mê ndə̂ më nyîndə̂ nyê tə̂ gbölösə̂nə̈, ngâ pö kä tâ ndə̂, âwâbo pä sə̂nə̈ yu tə̂ nyê-a: Lə̂ la Gbölö Gbïɛ̈ lö balë wä batə̂ ngû sâke balë, ânyë ngû sâke balë wâ batə̂ lö balë.

⁹ Rə ndə̂ Gbölö Gbïɛ̈ zâ bâlâ tə̂ pö ndə̂nə̈, tche chîabo ndə̂kə̂ mbo rə̂-a, batə̂ angânə̈ to tchê rə̂. Tche rʉ̈ätə̂ su yê la nyê bëte tche nyîâbo ndə̂nə̈ pä angânə̈ lə̂ gbâtə̂ nyê tchu-a, praâbalë tche nyïndə̂ nə̈ pä azü gbɛ̂ gbotə̂ bəndɨ kə̂ mbo rə ndə̂ andjê.

¹⁰ Käko lo kə̂ ka ndə̂ Gbölö Gbïɛ̈ wadje batə̂ earə̂ ngbä. Tə̂ lö nə̈ lâme tchêlafô âro me la ngâ gbölö wârə̂, wo âjuadje arə tchêlafô, sə̂nə̈ lâme tchêbêche la arə gbɛ̂ ndə̂ âwâ lə̂nə̈ âyu me yü.

¹¹ Ndə̂ arə lâme gbɛ̂ wâ ndə̂kə̂ rôrö lâme, käko äwäpä nyë wunsə̂ rə ndə̂ nyë wâ ndə̂kə̂ mbo rə̂! Äwäpä nyë watə̂ azü ndə̂ andjë dâka gbɛ̂, kə̂ zatə̂ nyê gbɛ̂ sə̈ Ndjapä.

¹² Äwäpä nyë krʉ bëte lö ndə̂ Ndjapä lakə̂ mbo rə̂ gbɛ̂ ndə̂kə̂ pa äwutu angaâtə, äwäpä nyë wunsə̂ nə̈ pä, tə̂ lo nə̈ lâme kä ndə̂ wo juadje tchêlafô ânyë arə tchêlafô gbɛ̂ juwuadje lə̂ atïmï wo.

¹³ Praâbalë azə̈ krʉ̈ bëte täfo tchêlafô la täfo tchêbêche, ndə̂ Ndjapä zâ bâlâ sə̈ azə̂ tə̂ pö ndə̂nə̈, käko kütû adjîrə̂ azü kä ndə̂ âsəadje lə̂nə̈.

¹⁴ Bëte rə̂ kä, arə̂mâ ndə̂ mê ndə̂ më nyîndə̂ nyê tə̂ gbölösə̂nə̈, ndə̂ nyê âsə̈ krʉ bëte lö nə̈ lâme, äwäpä nyë mbo rə̂ gbɛ̂ ndə̂kə̂ pa nyë daka gbɛ̂ ânyë ngâ pö balë wabô wâ lə̂ küma nyê-ê, ndjë äwäpä nyë sə la zɨtɨ su la Ndjapä.

¹⁵ Nyë wûnsə̂ nə̈ nə̂ pä Gbölö Gbïɛ̈ rʉ̈ätə̂ su yê zoo ndə̂kə̂ za köbo sə̈ nyê ndə̂kə̂ pa nyë tcha lə̂ kuzü. Käko kä ndə̂ ngâ azə̂ Pôlo ndə̂ azə̈ nyîndə̂ yê tə̂ gbölösə̂nə̈, tche mbö mbëtï sə̈ nyê lə̂ köbosə̂ küma yê ndə̂ âwâ lanə̈ ndə̂ Ndjapä zâ rə̂ sə̈ tchë.

¹⁶ Lə̂ ambëtï gbɛ̂ ndə̂ Pôlo mbô rə̂, kütû apö lâme kä ndə̂ tche to tchê rə̂. Lə̂ angâ amawû pö nə̈, angâ apö nə̈ kpôkpö tə̂ angâ azü ndə̂kə̂ dje tchə̂lə̂ nə̈, käko azü ndə̂ andjë wûn-âbô sə̂ rə wûn ânyë kə̈ mândabo rə mânda-ê, andjë dödo tchə̂lə̂ apö nə̈ batə̂ rə̂ ndə̂ andjë mbo rə̂ tə̂ angâ apö lə̂ Mbëtï Ndjapä gbɛ̂. Köbo andjê yû la rə ndə̂ andjë mbo rə̂ lâme nə̂.

¹⁷ Âdə andə̂ nye nə̈, arə̂mä ndə̂ më nyîndə̂ nyê tə̂ gbölösə̂nə̈, angaâtə a krâ tü nyê nə̂. La nyê gbö-ê, ânyë angbongbo azü lâme boloabô nyê bôlo la angbongbo apö ndə̂kə̂ yu köbo su nyê ndə̂ nyë zâ rə̂ sə̈ Jezü, ndə̂ nyë kpôkpo tə̂ nyê pânə̈ lâme-ê.

¹⁸ Praâbalë äwäpä nyë ge lə̂ tchôtchô su lakə̂ wunsə̂ Gbölö Gbïɛ̈ ndə̂ azə̂ Jezü Krîsiti Earə̂ kə̂ tcha azə̂. Voga wätə̂ andə̂ ye nə̈, angêta ndjë tə̂ logbɛ̂ logbɛ̂! Amin.